Yohana 16

1 “Ndɨvavʉʉlile aga gooni pakʉta mulaava mukʉvɨlwa, mwitse muleke ʉkwɨpinza nʉ kʉlʉleka ʉlwɨdɨko lwinyo kwane. 2 Lola, valavaswɨmaga ʉnyie mu masinagogi ga veene. Ikange gʉliitsa ʉnsɨkɨ ʉgwʉ ʉmuunu angave ikʉvabuda ʉnyie, alavonaga ʉta ivomba ɨmbombo jya Ngʉlʉve. 3 Valavavombelaga ndavʉle, ʉlwakʉva navammanyili ʉDaada, ikange navammanyili ʉne. 4 Lɨno ndikʉvavʉʉla ago pakʉta gʉlaava gʉsiike ʉnsɨkɨ gwa veene gwa kʉvomba ago, mwitse mukʉmbʉkage aga ʉgwʉ ndikʉvavʉʉla.

Ɨmbombo jya Mepo ʉMbalatse

“Nandyavavʉʉle ago gooni pa vʉtengʉlɨlo, ʉlwakʉva ndyale paninie nʉʉnyie. 5 Lɨno ndilʉta kwa Daada ʉvɨ ansuungʼile ʉne kwanyie. Napeene nakʉli ʉvaveetsaga pagati paanyie ʉvɨ ikʉmbʉʉtsa ʉne iita, ‘Wilʉta ndaku?’ 6 Apeene musʉsʉvye siitso mu numbula tsiinyo ʉlwakʉva ndɨvavʉʉlile ʉkʉta ndilʉta kwa Daada.

7 “Ndikʉvavʉʉla itsa jɨlweli ndiita, kʉ nongwa jya lʉvʉmbʉlɨlo lwinyo, hʉba ʉne ndɨvaleke ʉnyie, ndɨlʉte kwa Daada. Ndɨngaleke ʉkʉlʉta, ʉNtangɨli ʉlya nakiitse kwanyie. Apeene ndɨngalʉte, jʉndikʉnsuungʼa kwanyie. 8 Ʉjwa wʉ itsile, jiikʉvavoniaga avaanu va mu kɨlʉnga ɨkɨ ʉvʉtulanongwa wa veene, ʉkʉsita kʉva vagolosu kwa veene, nʉ vʉhɨgi wa vʉnuasi wa veene. 9 Jiikʉvavoniaga aveene ʉkʉta vatulanongwa, ʉlwakʉva navikʉnnyɨdɨka ʉne, 10 jiikʉvavoniaga ʉkʉta ʉlʉgendo lwa veene nalwa vʉgolosu jɨlweli, manya ndilʉta kwa Daada, ʉkwʉ namulambone ʉne lʉsiku, 11 na pa kulongwi jya vʉhɨgi, jiikʉvavoniaga ʉkʉta ʉvʉhɨgi wa veene wa vʉnuasi, manya ʉNgʉlʉve amalile ʉkʉmmɨga ʉSetano, ʉmbaha va vatulanongwa.

12 “Ndɨpitsiige ndɨlɨ nago mongosu aga kʉvavʉʉla, lɨno ʉnsɨkɨ ʉgʉ namukaweese ʉkʉgamanyingʼania. 13 ɄMepo va Ngʉlʉve wʉ itsile kwanyie vɨ alavalongotsaaga ʉnyie pakʉta mwitse muvʉmanyingʼanie ʉwajɨlweli wooni pa kulongwi tsyango. Ʉmwene nalatsovage kʉ vʉtavʉlɨlwa wa mwene jyʉmwene, apeene alatsovaga tsilya itsʉ ipʉlɨka ʉkʉhʉma kwane. Ikange ʉmwene alavavʉʉlaga ikulongwi tsa galya agalahʉmɨla ʉnsɨkɨ gwa kʉvʉlongolo. 14 ɄMepo ʉjwa alavavoniaga ʉnyie ʉwɨɨmɨkiwa wango, manya ɨkyʉ alʉʉpɨlɨlaga ʉkʉhʉma kwane, alavavʉʉlaga ʉnyie. 15 Isiinu syoni isyʉ ʉDaada alɨ nasyo, syango. Ɨkɨ kyʉ mene nditsova ndiita ʉMepo ʉjwa alavavʉʉlaga ʉgwʉ alʉʉpɨlɨlaga ʉkʉhʉma kwane.

Ʉlʉsʉsʉvalo lʉlahambʉka lʉhekelo

16 “Gʉsigye ʉnsɨkɨ nsupi ʉpwʉ jʉndikʉvaleka, namukambone ʉne. Lola wʉ gʉlʉtɨngʼiinie ʉnsɨkɨ nsupi ʉkʉhʉma ndɨvalekage, jʉmukʉmbona ʉne ikange.”

17 Pwʉ avakongi va mwene avange vakatengʉla ʉkʉvʉʉtsania vakata, “Ndeeti, kwʉ kʉta kɨki ʉpwʉ itsova iita, ‘Gʉsigye ʉnsɨkɨ nsupi jʉndikʉvaleka, namukambone ʉne,’ avujile atye ‘Lola wʉ gʉlʉtɨngʼiinie ʉnsɨkɨ nsupi ʉkʉhʉma ndɨvalekage, jʉmukʉmbona ʉne ikange,’ nʉpwʉ atye, ‘Ndilʉta kwa Daada?’ ” 18 Pwʉ vakagendelela ʉkʉvʉʉtsania valɨkʉta, “Wʉ vʉganulu vʉki ʉvʉlɨ mu mamenyu ga Yɨɨsʉ agiita, ‘Ʉnsɨkɨ nsupi?’ Ʉwe natukʉgamanyingʼania ʉgwʉ itsova.”

19 ɄYɨɨsʉ akalʉmanya ʉkʉta vinogwa ʉkʉmbʉʉtsa ʉgwʉ atsovile, pwʉ akavavʉʉtsa akata, “Ndeeti, muvʉʉtsania ʉgwʉ ndɨtsovile ʉkʉta, ‘Gʉsigye ʉnsɨkɨ nsupi jʉndikʉvaleka, namukambone ʉne, lola wʉ gʉlʉtɨngʼiinie ʉnsɨkɨ nsupi ʉkʉhʉma ndɨvalekage, jʉmukʉmbona ʉne ikange’? 20 Jɨlweli ndikʉvavʉʉla ndiita, ʉnyie jʉmulɨlaga nʉ kʉkuuta siitso, wʉ aveene avaanu va kɨlʉnga ɨkɨ jʉvihekelaga. Jʉmusʉsʉvala kʉ nsɨkɨ nsupi, napeene kʉ vʉmalɨlo ʉlʉsʉsʉvalo lwinyo jʉluhambʉka lwiva lʉhekelo. 21 Ʉnʼdala wʉ ihola ʉmwana, isʉsʉvala ʉlwakʉva ʉnsɨkɨ gwa lʉvavo lwa mwene gʉsiike. Lɨno wʉ aholile ʉmwana, nikʉmbʉka ikange ʉlʉvavo ʉlwa ʉlwakʉva alɨ nʉ lʉhekelo lwa kʉholwa ʉmuunu mu kɨlʉnga. 22 Vʉvʉle vʉle najyʉnyie mulɨ nʉ lʉsʉsʉvalo kʉ nsɨkɨ nsupi. Lɨno jʉndikwitsa ikange kwanyie, pwʉ jʉmwiva nʉ lʉhekelo mu numbula tsiinyo. Nakʉli nʉ mpamato ʉvɨ jiihetsa ʉlʉhekelo ʉlwa mu numbula tsiinyo. 23 Ikange ʉnsɨkɨ ʉgwa wʉ gʉsiike, namukandoove ʉne ɨkɨveetsaga. Jɨlweli ndikʉvavʉʉla ndiita, gooni ʉgwʉ mukʉnʼdoovaga ʉDaada mu litaawa lyango, ikʉvapeetsaga. 24 Ʉkʉsikila lɨno, namudoovili ɨkɨveetsaga kwa Ngʉlʉve mu litaawa lyango. Doovagi kwa Ngʉlʉve, pwʉ ʉmwene jiikʉvapa. Kʉ nzɨla ɨjyo mugendelelaga ʉkʉva nʉ lʉhekelo siitso mu numbula tsiinyo.

Ʉlʉnotsehetso kʉ vakongi va Yɨɨsʉ

25 “Ndɨvavʉʉlile gooni ago kʉ mamenyu ga sumbo. Ʉnsɨkɨ gukwitsa ʉpwʉ nandɨlatsovage nʉʉnyie kʉ nzɨla jya sumbo, apeene ndɨlavavʉʉlaga pavʉvalasu ikulongwi tsa Daada. 26 Mu nsɨkɨ ʉgwa mulanʼdoovaga ʉNgʉlʉve mu litaawa lyango. Ʉne nandiita ndɨlaava va kʉvadoovela ʉnyie kwa Daada. 27 Ʉmwene ʉDaada avaganile ʉnyie, ʉlwakʉva ʉnyie munganile ʉne, ikange mwɨdiike ʉkʉta nditsile ʉkʉhʉma kwa Daada. 28 Nditsile mu kɨlʉnga ʉmʉ ʉkʉhʉma kwa Daada, lɨno ndɨlɨ piipi ʉkʉhega mu kɨlʉnga ʉmʉ, ndɨkilivuke kwa Daada.”

29 Pwʉ avakongi va mwene vakambʉʉla vakata, “Gwe Mmanyisi, lɨno ʉtengwe ʉkʉtsova nʉʉwe pavʉvalasu, kɨtsila kʉtsovela mu sumbo! 30 Lɨno tʉlʉmanyile ʉkʉta ʉtsimanyile tsyoni, ikange navulonda ʉmuunu akʉvʉʉtse ɨkɨveetsaga. Ago gwʉ geene gikʉtʉpelela twɨdɨke ʉkʉta ʉhʉmile kwa Ngʉlʉve.” 31 ɄYɨɨsʉ akavavʉʉtsa akata, “Ndeeti, mutengwe ʉkwɨdɨka lɨno? 32 Ʉnsɨkɨ gʉhegelye, ikange gʉlɨ piipi siitso, ʉpwʉ nyɨ vooni jʉmupaatsɨngʼana. Nyɨ vooni jʉmukilivuka kʉ miinyo, nʉ kʉndeka ʉne ndɨ mwene. Napeene nandɨkaave ndɨ mwene, manya ʉDaada alɨ paninie nʉʉne.

33 “Ʉnyie nyɨ vagane vango, ndɨvavʉʉlile ago gooni pakʉta muveetsage nʉ lʉnotsehetso mu numbula tsiinyo, ʉlwakʉva mulɨ mu nʼgati mwane. Pa kɨlʉnga apa vukʉviitsilaga ʉvʉkʉvɨlwa ʉvʉlɨ pongosu, lɨno mwɨkangatsaage inumbula, manya ʉne ndɨlesiitse amaka ga kɨlʉnga.”