Ni uníꞌ Esteban
7
Oraque na sacerdote gola que rabi laabe:
―Ñee dxandí irá ni na cabe ca la?
2 Para na be:
―Biche ne bixhoze caꞌ,
laucaa diaga naa.
Dios ni nandxóꞌ uníꞌ né bixhoze gola nu Abraham dxi nuu ru Mesopotamia ante chi ndeza Harán.
3 Na Dios rabi laabe:
“Biree de xquidxi luꞌ,
bisaana ca lisaa luꞌ.
Uyé,
naa ma ulué lii uná guidxi guiaanuꞌ.”
4 Para biree be xquidxi ca caldeu,
yendeza be Harán.
Raqué guti bixhoze be,
para bedané Dios laabe guidxi ra nabeza tu yanna riꞌ.
5 Chiqué qué nudii Dios laabe nin tindaa layú raríꞌ,
nin biaꞌ ra nuzuhuaa ñee be.
Peru bidii stiidxa laabe zudii ni laabe ne ca xiiñi be,
neca caꞌru gapa be xiiñi be chiqué.
6 Ne laca gudxi Dios laabe zazá renda ca xiiñi be xquidxi binni tapa gayuaa iza ne zapa ca binni que laaca de esclavu ne zuniná laacaꞌ.
7 Peru na Dios rabi laabe:
“Zusaba naya cani gapa laacabe de esclavu ne óraque zaree cabe para gueda usisaca cabe naa raríꞌ.”
8 Bidii stiidxa Dios laabe zaca be xpinni,
laabe ne ca xiiñi be,
ne na rabi laabe:
“Guluu seña stinne irá hombre gale lade familia stiuꞌ para ihuinni ma xpinne laatu.”
nga runi dxi gule Isaac uluu be seña sti Dios laa lu xhono gubidxa.
Zaqueca bini né Isaac Jacob xiiñiꞌ,
ne zaqueca bini né Jacob idubi doce xiiñiꞌ,
cani beda gaca bixhoze gola irá nu.
9 Gupa ca xcaadxi xiiñi Jacob que envidia José biꞌchi caꞌ,
ne bitoo ca laabe lu binni ze Egipto,
peru nuu né Dios laabe.
10 Bilá laabe de irá ni beeda luguiá be.
Ucané laabe para biaba be Faraón,
rey de Egipto,
ne para biiya Faraón pabiáꞌ riene be.
Ne biꞌni laabe gobernador de Egipto ne bisaana irá ni napa ralidxi lu ná be.
11 Ca dxi que guca ti gubiña idubi guidxi Egipto ne Canaán.
Nabé nagana guca ni para ca binni que,
ne qué nidxela ca bixhoze gola nu ni ño caꞌ.
12 Peru ora gunna Jacob nuu xuba Egipto la?
biseenda laacabe yesí cabe xubaꞌ.
13 Ne ra iropa tiru uyé cabe gudxi José laacabe tu laa,
ne gunna Faraón tu familia José.
14 Para bisenda caa José bixhoze ne idubi familia stiꞌ,
biaꞌ setenta y cinco caꞌ.
15 Zacá nga yebíꞌ Jacob Egipto ne raqué gutiꞌ.
Ne raqueca guti ca bixhoze gola nu.
16 Udiꞌdi ru stale iza para ulee cabe laaca yeucaachi cabe laaca Siquem ndaani baꞌ ni uzíꞌ Abraham lu ca xiiñi Hamor.
17 Peru dxi ma cadxiña dxi gaca ni bidii stiidxa Dios Abraham gaca que la?
bidale ca binni Israel ndaani guidxi Egipto,
18 dede ra beda tí sti rey ni qué runibiáꞌ José.
19 Udxite rey que ca binni laanu ne bininá laacabe ne bicaa laacabe usaꞌbi cabe ca xiiñi huiini cabe para gati caꞌ.
20 Ca dxi que beda gale Moisés ne uyuulaꞌdxi Dios laa.
Gupa bixhoze be ne jñaa be laabe ralidxi ca chonna beeu.
21 Peru dxi ma qué ñanda nucaachi ca laabe la?
ulee ca laabe,
ne ucuaa xiiñi Faraón laabe,
bisiniisi laabe casi xiiñiꞌ.
22 Ne biziidi be irá ni nanna ca binni Egipto.
Nabé bihuinni pabiáꞌ nuu xpiaani be pur ni uníꞌ be ne pur ni biꞌni be.
23 Dxi ma napa be cuarenta añu biluiꞌlaꞌdxi be chi ganna be ca binni xquidxi be,
ca israelita.
24 Ne ra ziganna be laaca biiya be caguiñe ti egipciu tobi de laacaꞌ.
Biuu be ucané be binni xquidxi be gudiñe be egipciu que dede ra biiti be laa.
25 Zácaxa be ñene ca binni xquidxi be ma chi iquiiñe Dios laabe para ulá laacaꞌ,
peru qué ñene di caꞌ.
26 Sti dxi que yendá be ra cadinde chupa de ca binni xquidxi be.
Ucalaꞌdxi be nuchiá be laacaꞌ,
rabi be laacaꞌ:
“Hombre caꞌ,
xiñee ndi cayuniná saa tu laatu.
Laca biꞌchi tu.”
27 Oraque bilaa ná ni caguiñe stobi que laabe ne na:
“Tu gudixhe lii gacu xaíque stidu para gaꞌbu laadu cadi jneza cayuni du.
28 O racalaꞌdxu guuti lu naa casi biiti lu dxa egipciu que neegue la?”
29 Ora bina diaga be xi na hombre que,
biree be de Egipto,
yendeza be xquidxi binni.
Uleza be Madián ne raqué gupa be chupa xiiñi be.
30 Udiꞌdi cuarenta añu de ngue,
ti dxi nuu be ndaani ti guiꞌxhi cueꞌ dani Sinaí,
mala biiya be cayaca bele lu ti yaga.
Tihua ti ángel biete raqué.
31 Bidxagayaa be ora biꞌya be ni,
ne bidxiña be para guꞌya be xii ni.
Oraque uníꞌ né Dios laabe,
32 na rabi laabe:
“Naa nga Dios sti ca bixhoze gola luꞌ,
Dios sti Abraham ne sti Isaac ne sti Jacob.”
Bidxibi be dede guca diti be ne qué niná be nindisa lú be.
33 Ne na Dios rabi laabe:
“Ulee xquela guidi luꞌ purti zuhuaa lu nezaluáꞌ.
34 Ma biiya pabiáꞌ cayacaná ca xpinne ni nuu Egipto ne bina diaga cayuuna cabe.
Nga runi ma biete para ulaꞌya laacabe.
Yanna gudáꞌ useenda lii cheuꞌ Egipto.”
35 Chiqué bidxii deche cabe Moisés rabi cabe laa:
“Tu gudixhe lii gacu xaíque stidu para gaꞌbu laadu cadi jneza cayuni du.”
Peru laape be gudixhe Dios de xaíque sticaꞌ para bilá be laacaꞌ,
ne gucané ángel que biꞌni be ni,
dxa ángel ni uníꞌ né laabe lu yaga que.
36 Biꞌni be milagru ne seña ndaani guidxi Egipto ne lu Nisadóꞌ Xiñáꞌ para ulee be laaca de ndaani guidxi que.
Ne laca laabe biꞌni be milagru ra uzá né be laaca cuarenta añu ndaani guiꞌxhiꞌ.
37 Ne laca laabe nga gudxi be ca binni Israel chiqué zandisa Dios ti profeta de lade ca casi undisa laabe,
ne gudxi be laaca ucaa diaga ca profeta que.
38 Ne dxi bidxiña irá ca binni que ndaani guiꞌxhiꞌ,
ne laabe nuu be raqué.
Ne laabe nga uníꞌ né dxa ángel que lu dani Sinaí para uníꞌ né be ca bixhoze gola nu.
Ne laabe ucuaa be ca diidxa sti enda nabani ne bisaana be cani para laanu.
39 Peru nin ne irá nga,
qué niná ca bixhoze gola nu nucaa diaga laabe,
laga bidxii deche ca laabe,
ne nisi cá ique ca ibigueta ca Egipto.
40 Ne ti tiru bisaana Moisés laacabe caadxi,
para rabi cabe Aarón:
“Bizáꞌ caadxi bidóꞌ sa niru lú nu,
purti ulee si Moisés laanu Egipto.
Yanna qué ganna nu xi guca be.”
41 Oraque biꞌni cabe ti yuze huiini ne biiti cabe mani bisigaꞌde cabe laa.
Bieche né cabe ni bizáꞌ cabe que.
42 Peru bixele Dios de laacabe.
Bisaana laacabe guni adorar cabe ca luceru ni nuu ibáꞌ,
casi bicaa ca profeta lu guiꞌchi ra na Dios:
Binni Israel caꞌ,
lácaxa biiti tu mani para nusigaꞌde tu naa idubi cuarenta añu uzá tu ndaani guiꞌxhi que.
43 Laga yené tu ca bidóꞌ ni bizáꞌ tu
para uzuxibi tu xa ñee.
Yené tu lidxi Moloc ne luceru sti Refán de dios stitu.
Nga runi zabee laatu de xquidxi tu,
chi ulaa laatu cherica Babilonia.
44 Uzá né ca bixhoze gola nu carpa ra gupa ca ca guie ra cá ca mandamientu.
Bizáꞌ cabe carpa que casi gudxi Dios Moisés cha ni.
Biluíꞌ Dios laabe ximodo.
45 Laca yené cabe ni dxi uzá niru Josué lú cabe para biuu cabe guidxi bidii Dios laacabe que.
Peru para biuu cabe raqué uladxi Dios ca binni nabeza raqué.
Ne zacá biꞌni cabe dede dxi beda tí rey David.
46 Gunaxhii Dios laabe ne ucalaꞌdxi be nucuí be xhiuꞌdu Dios sti Jacob,
47 peru qué ñanda.
Salomón ruꞌ beda ucuí ni.
48 Peru qué ribeza Dios ni nandxóꞌ ndaani yuꞌdu ni ucuí binni,
casi uníꞌ ti profeta ni na Dios:
49 Rune mandar ibáꞌ ne guidxilayú,
casi ñaca zuba ibáꞌ ne naguixhe ñee guidxilayú.
Xi clase ndi yoo na tu ucuí tu para naa pue.
O paraa nga na tu quixhe chaahui tu para iziiladxeꞌ.
50 Ñee cadi naa bine irá xixé ni la?
51 Peru laatu la?
na Esteban rabi laacabe,
―naguidxi ladxidóꞌ to,
casi binni ni qué runibiáꞌ Dios,
ne qué riná tu ucaa diaga tu stiidxa Dios.
Rindee tu ca bixhoze gola tu purti nisi rucaa lú tu Espíritu Santu casi biꞌni caꞌ.
52 Uná de ca profeta ni qué nizabi nanda ca bixhoze gola tu yaꞌ.
Biiti cabe cani gudxi laacabe zuseenda Dios tobi ni nachaꞌhuiꞌ.
Nga guca dxi caꞌru gueeda be.
Yanna ma beeda be ne laatu bitoo to laabe ne biiti tu laabe.
53 Bidii ca ángel ley sti Dios laatu peru qué runi tu ni na ni.
Ra guti Esteban
54 Ora bina diaga cabe ni na Esteban que,
gudó dí laacabe dede gudó yaa cabe guidi ruaa cabe,
tantu bidxiichi né cabe Esteban.
55 Peru dxá ladxidóꞌ Esteban de Espíritu Santu biiya dxí ibáꞌ.
Biiya enda nandxóꞌ sti Dios ne biiya zuhuaa Jesús cueꞌ Dios.
56 Para na:
―Cayuuya zuxele ibáꞌ ne zuhuaa Hombre Biseenda Dios cueꞌ Dios.
57 Oraque irá cabe biseegu cabe diaga cabe ne bicaa cabe ridxi ne uyé cabe luguiá Esteban irá cabe.
58 Ulee cabe laa de ndaani guidxi que,
ne bisigapa cabe xhaba cabe ti hombre lá Saulo,
para bichá cabe guie Esteban.
59 Laga cuchá cabe guie laabe,
na be:
―Señor Jesús ucuaa espíritu stinneꞌ.
60 Ne bizuxibi be,
bicaa be ridxi:
―Señor cadi udxiiba lu donda ri luguiá cabe.
Nga si uníꞌ be,
guti be.