Ibrani
Ibrani yala nesala weik teka teneramipa, anesala tep surat sekeipu upu
Abuku seku deiyo ngeboda, er sekeipseu buku neitamai, er si sekra men lap pepseu. Atep nengeda, abuku seku deiyo ngeboda, nun yuma men kael keptepe. Atep, er si men lap peptepe.
Abuku seku deiyo ngebodi, ‘Yahudi yala nesaladi, nimi Lyemna Deiyo Ngeboda, tek sisi Yesus pua,’ tenepmengedi, ‘Teka tenepkameng’ tenen, abuku seku. Yuk deiyo ton ake. Ada, ton Yahudi yala nengda, Yesus konum teka tenerami dinin, ‘Sun walwal di, kange di ton cap, Musa sekeiamu mem upu, tamupra talepmengedi, angepu dombankamnung’ tenen, abuku seku. Musa sengamu upu yumada, telep upu dinin, ange talepra dombanupa deiki di, Allahdi men lyemserure. Ange gum dinin, Allahdi, teneamu ngeda ake. Ada, ‘Yesus amenda taru dokotepkamne dinin, keana taru tep, ne nyapudi Musa sengamu upu talenkamenge,’ teneamudi, Musa tep lap peipupa, Musadi mem upu buku Kejadian adinin Bilangan yuma, weika di sengamu.
Yahudi yala nengdi aupupu talepra dombaramidi, ‘Ange deiki di Allahdi lyepkamsere,’ tenerami dinin, tek sis ngeda, nun mali kun keca kunumna cap, daemna cap, tonda nun dena tep pununa cap tep, Yesus sengdin co deiki depupa, Allahdi Yesus gam bukeipka deiki di, nun tuai nesala teka tenepmepyopda, Allahdi lyemserure. Atep, nimi lyemna tep, Musadi sekeiamu upu yumada, Yesusdi konum gawal dakudi, punupseue.