Yohanes 12

Mariadi nintong telep me dopra, Yesus gispal dona tep, er yan deiki diktapu upu

Sun Yahudi yala nesaladi ila Kaplemne Kalemna tep, ‘Ngantan bari tumi ton cap konum mapmepyopda, kalepkamepe’ tenen, keteneipi tumida, Yesusdi Betania mutu beu. Betania mutuda, ada Lazarus deamupa, Yesusdi gam bukra deipu mutu pua. 2 Atumida, Betania mutu nengdi, ‘Nun nai Yesus tep gispal dopkup’ tenen, jen keca weik ketenepra deipmai. Jen keca ketenepra deipmaipa, Martada akeca jepkoi nesala tep, jen bokra karerbanmau. Lazarusda, er cap, Yesus cap, yuk neng cap, kikiman bukra jen jenmai.

3 Sun jen jenmai taruda, Mariadi nintong telep me, er sida narwastu, kunumna pio weiknge dopra, Yesus er gispal dona tep, er yan deiki diku. Dikudi, Maria er giso potong lyom ner cadi, er potong talepra, Yesus er yan deiki kilipu. Ayuma ukupupa, akati pumbon yuma nintong telep ngeda, weika di embanmaupa, sun yuma gekepi.

4 Mariadi ukupupa, Yesus wepra deiamu neng kankan, tenpu ngebo Yudas Iskariotdi, yu kupupa mali upu pepu. Yudasda, ada amenda taru, ‘Mali nengdi Yesus popkameng’ tenen, nimi upu kai perbenkamu ngebo kuramu. 5 Yudasdi upepu. “Anintong telep meda, warya tep tali dikmar do? Ame dopra, yuk neng tep kunupmatepetoda, co bo weik dopropmatepedi, nimi kankan kunge nesala tep makupra karepmatepe. Ame kunumnada, metek gume. Tenpu ngebo keteng tamun tenpu deiki di pel doramtuanen, keteng tamun tenpu konum kuptuopda, kunumna weik gel uang 300 denari doproptue.” Yudasdi pepu.

6 Yudasdi aupu pepu ada, tali kankan kunge nesala tep, bicau tenepudi men pepu. Mawa dipu pepu. Aupu pepka deiyoda, erda upula don ngebo kuramnga cadi, Yesus cap er nyapsilip capdi, sak karong pumbon dongopra menengami co bo talepra, kalengna ngebo kuramu. Ukuramu dinin, er putaramutopu, akarong pumbon di tali lupra upula dororamudi, er pe teneramu keca tep, kunupra gawal dangamu.

7 Yudasdi er upu pepka tep, Yesusdi pepu. “Aner tep aupu peprem ngeda yapo. Allahdi teneamutopu, anerdi konum kupmanere. Angeda lap pepkusene. Ada, amenda ne popnengepa, depkamne taruda, ne nong peipkamnenga tep, anerdi, ne nong ketenemna pel utopu konum kupmanere. 8 Tali kankan kunge nesalada, doryankamre taru neitamai yuma, sun cap wisipra kunkamrume. Dinino, ne cap, sun cap, kikiman pio men kunkamepe. Neda, amutu ke tarupu kunkamne,” Yesusdi pepu.

9 Aupu yuma penmai taruda, yuk nengdi, “Yesus kunmar ati ake,” pepra lap perbenmaipa, Yahudi yala nesala, denge weik diryanmai. Diryanmaiya deiyoda, ‘Yesus eptepe’ tenen, tonda, ‘Lazarusda, deamu dinin, Yesusdi angebo gam bukra deipupa, akati pumbon kunmara cadi, er Lazarus peda eptepe’ tenen, diryai. 10-11 Uda, Yesusdi Lazarus gam bukra deipka tep nengeda, Yahudi yala nesala denge weika di, Yesus tep teka tenepidi, er tara kepronmaiya tep, sun Yahudi yala deiyo neng yu weik kupu. Yu kupupa, Allah karena tep ila deiyo nengdi, ‘Gume, Yesuspuda gume. Tonda, Lazarus cap popkamepe,’ tenenmaidi, upu sisingmai.

Yesusdi Yerusalem mutu yau taru kupu keca tep, pepu upu

12 Mariadi, Yesus yan deiki nintong telep me dikpupa, sun mapmaiya berekyopda, Yesus cap, er nyapu cap, ‘Yerusalem mutu benkup’ tenen, bisi banmai. Banmaipa, yuk nengdi Yerusalem mutu lap perbeipa, ila kalemna tep Yerusalem mutu bulumai neng gekepidi, kange deipi. 13 Kange deipidi, ‘Yesus antapmepedi, er yakanmar bisai yakra deipmepedi, er tep gispal dopkup’ tenen, amutu nesala kuramitopu, co bata gakrapidi doupidi, Yesus yakanmau bisi sepdaro bei. Bisi banmai taruda, aupu ila di penmai. Sun penmai upuda ake.

‘Hosana, Angebodi lyepkamsere. Nun nai bo Allahdi wepra deipupa, Allah er si deiki di yanmar ngeboda, Allah ila di makurepa, teleppu kunkamre.

Nun Israel nesala yuma, nun Ila Nimi Deiyo Ngebo, nun Raja adano. Allahdi angebo tep ila di makurepa, teleppu kunkamre.’ (Mazmur 118:25)

Yesus yakanmau bisi kunmaidi, kikiman banmai nesaladi aupu yuma penmai. 14 Yesusda, ‘Yerusalem mutu benkun’ tenen, keledai bisam ukupunge, nimidi er bali tara bukra kapul men embarami keledai bisam epra doprapudi, akeledai bisam bali tara bukra bisi banmau. Ukupra banmauada, pumun taru Allah upu neitamai sekaminge, nong dukdongopkoua tep kupu. Nabi Zakariadi menop taru sekeiamu upuda ake.

15 ‘Yerusalem mutu kunung nesalada, kwar dangna meme. Sun diso. Sun Ila Nimi Deiyo Ngebo, nimidi kapul men bukra barami keledai bisam mi bali deiki bukra yakanmasere.’ (Zakaria 9:9)

Zakariadi menop taru peramutopu, Yesusdi atumi kupu.

16 Akeca yuma ukupu kupmau taruda, Yesus er nyapudi moupra men tenepidi, akeca nong neitamai ngeda, men kael kepi dinin, amenda tarupu Yesus depupa, Allahdi gam bukra deipudi, ‘Ila mambul ngebo kunkamre’ tenen, erepra deipudi, pio telep kweipupa, Yesus im deiki welerbeu pangeda, ataru dipapu, Yesus er nyapu akeca yuma moupra tenepidi, kael kepi. Ada amenda taruda, sundi, ‘Uo, teka de. Allah upu lap perami neng, sun nabi nengdi Yesus tep upu sengamitopu, Betania wekmepu tumi deiki di, Yesusdi akeca yuma kupu. Tonda, sun nabi nengdi sengami keca utopu, nun ataru kunmapu nesaladi Yesus tep konum kupmepu,’ tenen, kael kepi. 17 Yesus cap embanmai nesala yumadi, ‘Yuk nesala weika di gekenkameng’ tenen, Yesusdi Lazarus gel imir pumbon kongpepudi, gam bukra deipu ngeda, weika di lap perbanmai.

18 Sun lap penmaipa, nimi weik gekepidi, ‘E, Yesusda ila mambul pel, nimi men kupmanto keca, konum kupmaua cadi, dirbepedi, er cap antapdatepe’ tenen, Yesus yakanmau bisi banmai. 19 Nimi gung weika di Yesus damai baramipa, sun Farisi nengdi upepdai. “Uo, angebo tep upu sekterepmapada, nong men kupkamsere. Dipetepso, amutu-mutu nesala yumada, er tara kepronmang adano,” pepra pedanmai.

Yesusdi, ‘Aneng popkamaneng’ tenen, lap pepu upu

20 Uda, ataruda, ila Kaplemne Kalemna tep, nimi denge pio weik, Yerusalem mutu bulupra wengbei. Anesala kan-kan di, Yunani yala neng ton kunmai. 21 Sun Yunani yala nengdi, Pilipus er damai yai. Pilipusda, ada Galilea tara neitamai dinin, mutu si Betsaida mutu ngebo kuramu. Er peda Yerusalem mutu kunmauai, sun Yunani yala neng yaidi, upepi. “Kao, Yesus perameng ngeboda, ‘Nun cap antapdatepe’ tenen, putaserura tep, moropkepe,” pepi. 22 Upepipa, Pilipus er weit bo Anderias tep, lap perbeupa, sun butenedi, Yesus tep lap perberei. 23 Perbereipa, Yesusdi upepu.

“Neda Nimi Mi Sisa Utopu Ngebo tep, Allahdi pio telep kupra deipkamner taru konum yanmasere. 24 Domon upu pepkusenada, pio tek sisi kurure. Yakung du tenpu, tuai deiki saka dorberedi, men lyupyopda, tenpu dupu pio kunkamre. Dinino, lyuprepa dakuamreanen, amenda taru pakredi, bolokyopda, du pio weike moupkamre. 25 Ware ngebo do, ware ner do, sun pe gam kuna tep, ‘Ne mawa’ tenepra, kupmengopda, amenda taru depmengepa, tek sisi gam pio men kunkamenge.

Dinino, ware nesala do yuma, tuai mutu kunge taru yumadi, ‘Ne gam kunada mambul gum dinin, Yesus er kecada mambul weike,’ tenepmengedi, ne keca tepapu tupa tenenapu kupmengopda, depmenga peda, amenda taru gam pio kunkamenge. 26 Ware nesala do yuma, ne amutara bukra, ne upu gekepmengedi, ne pel tep dopnengopda, ne kunetopu adipapu kunkamenge. Ne ban bisipu adipapu domyankamnenge. Tonda, ne kune mutu yuma, ne nyapu kunkamenge. Ne amutara bukra, ne upu gekepneredi, ne pel tep donere ngebo tep nengeda, ne nai bo Allahdi, angebo erepra telep kupra deipkamre.” Yesusdi pepu.

27 Upepudi, aupu ton pepu. “Ukutaruda, ne mambul kange dounmane. Ware upu peptene do? ‘Naie, ataru ikin keca ne nong deiki deipkamanenga tep, loptapra lyepneo,’ peptene do? Gume. Angeda men peptene. Tek sisi ‘Ukupkamneng’ tenen, ataru kunune. 28 Atep ne nai Allah, ‘Nesala yuma kan pio telep kuremnyada, jenek kupra epmengedi, kael kepkameng’ tenen, kandi kan pe si ereipkamrume.” Yesusdi pepu. Yesusdi upepupa, im deiki neitamai di, nimi upu utopu upu di, Allahdi pepu. “Konuma menop taru neitamai di ne si ereipsi. Kange di ton cap ne si ereipkamne,” pepu.

29 Aupu im deiki di pepupa, awekmai neng yumadi lelimpu gekepi dinin, ‘Allahdi pepmasere’ tenen, men kael kepidi sundi, ‘Ada kulman lelimpu gekepmepe,’ tenepi. Ton nengdi, ‘Angeda kulman upu gum dinin, Allah er im deiki pel don ngebo, malaikatdi Yesus tep, aupu peipmare,’ tenepra pepi.

30 Upepipa, Yesusdi awekmai nesala tep pepu. “Aupu gekepmarumada, sun melimna tep pepu. Ne melimna tep gume. 31 Ukutaruda, tuai kunge nesala yuma tep, Allahdi upu bokeipkamsere. Allahdi tuai mutu yuma talerya deiyo ngebo, mali ngebo, Kain Jen Ngebo tep, bisbisa kapredi, bura tara utopu dokotepkamre. 32 Dinino, nepuda, tu deiki tara ereipnengopda, nedi nesala ban-ban yuma tep, kongpepnepa, nesala weika di ne tara kepronkamnenge. Anesalada lyepnedi, ne nyapu keipkamsene.” Yesusdi pepu.

33 Yesusdi, “Tu deiki tara ereipnengopda,” pepu ada, sengdin co deiki deiprap, er nong erepra popkaminge tep, ‘Ne upu gekepmenge nesala kael kepkameng’ tenen, pepu. 34 Yesusdi aupu pepupa, awekmai nengdi upepi. “Allahdi peipupa, Musadi sekeiamseu upu neitamai di peteremamseipa, gekeramupke. Ada, Allahdi, ‘Nimi lyepkamre’ tenen, wepra deipudi doproipseu ngebo Kristusda, erda pio gam kunkamre ngebo, pepra peteremsenunge. Atep nengeda, kandi ‘Nimi Mi Sisa Utopu Ngebo adipapu ereipkamnenge,’ pepserem ngeda, ware keca deiyo tep aupu pepmaserem do? Tonda, ‘Nimi Mi Sisa Utopu Ngebo’ pepserem ngeboda, ware ngebo tep pepserem do? Erda ware ngebo kurur do?” pepra asipetepi.

35 Upepipa, Yesusdi domon upu deiki di tamupra pepu. “Ukutaru nimi moupra kael kemna tep, dirin kupsere ngeda, sun cap yambulanun taru cap, sun kikiman kunkamsere. Dirin tupa kusere taruda, telep bisi adipapu bankurume. Amenda taruda, kunungnapu kunkamsera tep pepsene. Kunungnaipu embare ngeboda, er bisi banmaraida, moupra men kael keptue. 36 Dirine tupa kusere taruda, sun kange dipru adirin keca deiki di deipra, teka tenepkurume. Ada tali tep gume. ‘Nunda dirin deiyo ngebo, er dirin nyapu kunkamepe’ tenen, dirin ngebo, ne tep teka tenepneso. ‘Ukupkamrum’ tenen, pepsene,” Yesusdi pepu. Yesusdi aupu pepra sengpepu dingeda, anesala acapu tapra, inipra beupa, sundi er ton men epmai.

Yahudi yala deiyo nengdi Yesus tep, pio teka men tenepi upu

37 Uda, Yesusdi nimi men kupmanto keca, pel yala-yala yuma doramupane, sun Yahudi yala deiyo neng ton dirami dinin, sundi Yesus tep teka pio men tenepi. 38 Sun teka men tenepya deiyoda, Allah upu lap peramu ngebo, nabi Yesayadi pediramu upu, aupu nong kupkamua tep, teka men tenepi. Nabi Yesayadi peramu upuda ake.

‘Nun nai Allah, er upu nundi peteremamupu upuda, ware mutu nesala teka tenenung do? Gekertamnapu kununge. Tonda, kan puto deiki di, ila mambul pel dorum dinin, ware mutu nesala epmengedi, moupra kael kemnung do?’ (Yesaya 53:1)

39 Yesayadi peramutopu, sun Yahudi yala nesaladi, Yesus tep teka men tenepi. Tonda, Yesayadi yukai peramutopu, anengda teka men tenepmanto neng kurami. Yahudi yala nesaladi teka men tenepmanto kuramya deiyoda, Yesayadi pumun taru sekeiamu upu deiki di, konum lap peramu. Aupuda ake.

40 ‘Allahdi anesala tep, asuru pun keca konum karepu. Tonda, sun kange dipru neitamaida, gat konum keipu. Allahdi anesala tep, asuru puna cap, dipru gat kuna cap, konum karepupa ukununge. Sun asuru di telep kupra men dinunge. Sun kange dipru neitamaida, ‘Deiyo ake’ tenen, moupra men tenenunge. Sun men kael kepmanto pio kuramenganen, sun mali kun keca tapra amnyo karikra, ne tara men kepronkamenge. Sun mali kunge keca taptengopda, nedi sun tep kwetepra, telep kudiramtene dinin, sunda dipru gat nesala cadi, ange men kunkamenge. Allahdi pepu.’ (Yesaya 6:10)

41 Allah er upu lap peramu ngebo, nabi Yesayadi, pumun taru aupu peamu ngeda, Yesus pio telep kupkamunge moupra teneamudi, akeca yuma kapul men kupu taru, Yesus kupkamunge tep, lap pediramu.

42 Yahudi yala nesala pio weika di Yesus tep, teka men tenepi taru neitamaipu, ton nesalada, Yahudi yala nesala sun deiyo neng kankan kurami neng peda, gung yambula di ton teka tenepi. Yahudi yala deiyo neng, tenpu-tenpudi Yesus tep, teka tenepi dinin, sunda utenepi. ‘Uo, Farisi nengdi, “Nun yuma Allah upu peteremnup ati, sun ton men wektume. Sun yuke,” pepra wenepsenung’ tenen, Yesus teka tenepi ngeda, yuk neng gekepmanto damai katuai men pepi. 43 Yahudi yala deiyo neng, tenpu-tenpu teka tenepi neng dinin, katuai men pepya deiyoda, ‘Allahdi kange deipsetudi, sunda telep neng, tenepsetua peda, yambul mambule. Dinino, nimidi, telep neng tenepsetengedi, kange deipsetengada, ila mambule,’ tenenapu kuramya tep, dimpepnapu kunmai. ‘Yesus teka tenepmape,’ pepra men lap perami.

44 Ton taruda, Yesusdi aupu pepu. “Ware nesala do yuma, ne tep teka tenepnengopda, ada ne teppu teka men tenenunge. Teka tenepnenga deiki di, ne doproipneu ngebo Allah cap tep, teka tenenunge. 45 Sundi ne tep dinerum taru yumada, ne dokotepneu ngebo peda, Allah dirume. 46 Neda dirin utopu kupsidi, tuai mutu neitamai yasi. Dirin utopu yana kununada, ‘Ne tep teka tenenge nesala yumada, kunungnaipu tupa men kunkameng’ tenen, tuai yasidi, kunune.” Yesusdi pepu. 47 Upepudi, aupu ton pepu.

“Ne upu peterepmengepa, amul deikipu gekerur dinin, aupu talepra men dombare ngeboda, nedi angebo tep upu bokra men wenepne. Deiyoda, nedi, ‘Tuai mutu nesala yuma tep, upu bokeipnedi wenepra poptapkamne’ tenen, men yasi. Ange gum dinin, ‘Nesala yuma tep lyepkamne’ tenen, tuai mutu yasi. Adeiyo tep aupu pepsene.

48 Dinino, ne tep tapredi, ne upu talepra men dombaredi, ne upu yaninerur ngebo tep nengeda, upu bongdina deiyo ngebo kurura cadi, ne tep tamnere ngebo tep, upu bokeipkamre. Ne upu men gekenung nesalada, sun tep upu bongdina cap, wenemna cap deiyo kecada, akurure. Ada, sirya taruda, nedi peamsisi upu deiki di, anesala tep, upu bokra wenepkamre.

49 Angeda tali tep men pepsene. Nedi pesene upu yumada, ne kange tenenange dipapu men peteremsenune. Ange gum dinin, ne nai bo Allah, ne dokotepneu ngebodi, ‘Kandi penkamrum upuda ake. Upu penkamrum taruda, ukuprap, ukuprap penkamrume,’ pepra deipneutopu, apu peramsidi, tupa pesenune. 50 Ne kaele, Allahdi, ‘Ukunkamrume,’ pepra derisere upu yuma gekepra dombamumyopda, amenda taru pio gam kuna deiyo keca karepserepa, gam pio kunkamrume. Atep, ne pesene upu yumada, tali upupu men kurure. Aupu yuma, ne nai bo Allahdi, ‘Upenkamrume,’ peipneutopu, apu pesenune.” Yesusdi pepu.