Matius 10

Yesusdi, ‘Ne upu dopra, peterembenkameng’ tenen, 12 neng wepra deipu upu

(Markus 3:16-19; 6:8-11; 13:11-13; Lukas 21:12-17; Lukas 12:2-9, 51-53)

Yesusdi, ‘Anengda, ne pel donkamneng’ tenen, wepra deipupa, er upu gekepra, er domyakarami neng neitamai dinin, er nyapu sun 12 neng tep kongpepupa, er damai yai. Yaipa, Yesusdi nesala dipru neitamai taleami isok dopra, dokotepkamenge nge cap, pu yala-yala yuma kwetedinkamenge cap tep, ‘Apel donkameng’ tenen, er puto weika di, sun aneng 12 tep karepu.

2 Yesusdi 12 wepra deipu neng, sun Rasul nengda, sun si ake. Tenpu ngeboda, Simon perami dinin, amenda taru Yesusdi angebo tep, ‘Kan ukupu si Peterus,’ pepu. Tonda angebo er weit bo Anderias cap, Zebedeus er nyapu butene Yohanes cap, er weit Yakobus cap, tonda, 3 Pilipus cap, Bartolomeus cap, Tomas cap, ton amutu taleami neng, Roma mutu deiyo neng pajak co bo karena tep bulupra deriramu ngebo, Matius cap wepra deipu. Tonda, Alpeus er mi Yakobus cap, Tadeus cap, 4 Simon Patriot cap wepra deipu. Tonda, Yudas Iskariot, Yesus popkamaiya tep, napra beu ngebo cap, Yesusdi wepra deipu.

5 Yesusdi aneng 12 wepra deipudi, ‘Ne pel donkamneng’ tenen, peipu upuda, ake.

“Sunda, Yahudi yala gum nesaladi, ati arum dopra kuramengai cap, Samaria mutu neng kuramengai cap, men peterem benkamrume. 6 Yahudi yala nesala, sun damaida men benkamrum dinin, domba bisam pein nesala men kungepa, adombadi sun pein neng gum tep, ‘Napu boda ake,’ tenena gum di, tali yukai embaramengtopu, Israel tara nesala, ange utopu kunung nesala tep, ‘Nun deiyo ngebo, dano’ tenen, tali-talipu kununga cadi, Israel yala nesala sun damaipu peterep embankamrume.

7 Sun peterem benkamum taruda, aupu peteremkamrume. “Allahdi nesala weik lyepredi sun dipru talenkamser taru, Kerajaan Allahda, konum dam kupmasere,” penkamrume. 8 Amutu yuma embankumum taruda, pu jen nesala kwetedinkamrume. Depmange nesala gam bungdinkamrume. Ila kot susu jeramre nesala kaingdinkamrume. Isokdi nesala dipru wekra taleamrenge enepra dokotenkamrume. ‘Apel yuma donkamrum’ tenen, ne puto mesumpu sun nong deiki deipmasena tep, sun peda, pu jeramre nesala kwetenkamrumnge cap, apel-apel yuma donkamrumnge yuma cap tep, co bo men moronkamrume. Co bo morona gum dipapu, talipu anesala kwetedimumdi, apel yuma donkamrume. 9 Ne pel dopembankamrum taruda, ware keca do yuma, kunumna weik keca emas cap, perak cap, tembaga cap, yuma kipra embana gume. 10 Ila alen di sun putan keca, yala-yala yuma kipra men dubenkamrume. Tonda, ‘Opkal mawa’ tenenange cap, sepatu cap, maca cap, doupra men benkamrume. Sundi ne pel telep kupra pel dopmum pangeda, sun bena pel donkamum mutu kunge nesaladi, sun putapsere kecada karenkamsenge.

11 Ila ati arum dopra, nesala weike kuramengai pe, yambul ati arum pe bemumpa, ‘Nimi tenpu dumsisi kupra kuramredi, yuk neng tep makurur ngebo ton kurur do?’ tenen, sundi dirtenenkamrume. Telep ngebo ton epmum dingeda, angebo er atipu wekra dakuramumyanen, amutu kunkamrum taru konum kupre pangeda, amutu tapra yuk mutu bankamrume. Tonda, ‘Pio telep ati dan do?’ tenen, akati-akati sangdana gume. 12 Dumsisi kure ngebodi, ‘Nati wekso,’ pepra napropsere pangeda, sun akati wekra kumumdi, ‘Aneng sun kun keca yuma, Allahdi telep kupra deipkamre’ tenen, akati kuramenge neng tep, Allah moronkamrume.

13 Tonda, akati nengdi, sun urasin epsengedi, nong yang-yang pepra makupsengopda, akonuma. Dinino, akati nengdi sun tep, nong yang-yang pepra men makupsengedi, tapsengopda, ‘Allahdi telep kupra deipkamsere,’ peipmamum upuda, ka di tamupra doronkamrume. 14 Ware ati neng do, ware mutu neng do yuma, sun tep nong yang-yang pepra men napropsengedi, sun upu men gekepra tapsengopda, ‘Amutu tapra yuk mutu benkup’ tenen, ketenepra benkumum taruda, amutu kunmamumpa palepmaser tuda, kilipra deiya, yuk mutu bankamrume.

Ukunkamruma deiyoda, amutu nesaladi, ‘Allah upu yaniptapmapa kunumna tep, nun mutu yanipmangupa, palepmau tu kiliptapmasenga utopu, aupu peryanmaseng nengdi konum tapmasenge. Atep nengeda, sundi nun tep tapmasengtopu, Allahdi nun tepapu wenepra tapkamsere,’ tenepkamenge. ‘Ange tenepkameng’ tenen, nedi peipmasentopu ukupra kunkamrume.” Yesusdi pepu. 15 Upepudi, aupu ton pepu.

Ne tek sisi pepsene. Allahdi nesala ban-ban yuma, yuk-yuk bokra deipredi, wenepkamre taruda, Sodom mutu nesala cap, Gomora mutu nesala capda, pio mali-mali weik kurami dinin, anesala tep, yambul kanam di wenepkamre. Deiyoda, menop taru sunda ne upu men gekerami dipapu, mali weik kuramya tepa. Ukurami dinino, ukutaruda ne upu peterep embamumpa, sun upu men gekenkameng nesalada, amenda taru Allahdi pio puto di, wenepkamre. Wenepre pangeda, sunda pio ikin weik kunkamenge.

16 Domba bisam, tenpu dumre kam weik kuramenga kankan kuryopda, dumre kamdi, domba bisam popmanto kuretopu, nedi dokotepsenepa, ne upu dopra peterembemum pangeda, dipru yu kuprepa, tulum tenepra mali kange doupmengedi, anengdi, ne nyapu sun nong deiki, ikin keca deipra popmanto kunkamsenge. Ange tep nengeda, nimi pon baldi, kange moupra kuramretopu, sundi akeca-keca yuma tep, ila kael kepmumdi, kange pio moupra kunkamrume. Tonda, tulum kupserepa, kika deipra kuna gum dinin, yal ma dipru bounpu kuredi, nimi men poramretopu, sun peda, dipru boun kupra teleppu kunkamrume.

17 Ange tep nengeda, nimidi akeca-keca kupkamenge ngeda, moupra dimumdi, tenenkamrume. Sunda, ‘Upu talena deiyo nengdi wenepra popkameng’ tenen, ateng koupra karerbankamsenge. Tonda, Allah upu peteremna ati neitamai dubesenge pangeda, balana weika di bongopra ponkamsenge. Atep nengeda, ‘Ukupkamsenung’ tenen, kange moupra kunkamrume.

18 Ne tep teka tenepnerumdi, ne upu peterembenkamruma tep, yuk nengdi, sun tep ateng koupsengedi, ‘Nun mutu talepra deiyo kusenge nengdi, Yesus er nyapu popkameng’ tenen, ila nimi deiyo neng, Gubernur neng cap, ila nimi deiyo neng, Raja neng cap, sun damai dubenkamsenge. Dubesengepa, aneng cap, ton yuk Yahudi yala gum neng cap, ‘Sun gekenkameng’ tenen, ne si deiki di pel domumnge yumada, telep kupra katuai di lap penkamrume. 19 Ware taru do yuma, sun ateng koupsengedi, upu bongdina deiyo neng damai dubesengopda, upu kapul pepkumum taruda, ‘Uo, ware kupra pepkup do?’ tenen, mambul kange men dounkamrume. Ataruda, Allah er Lek Sambaladi, sun dipru neitamai yana lap peipserengepu, gekemumdi penkamrume. 20 Ada, sun nai Allah, er Lek Sambala puto karepserepa, aputo deiki di, sun dipru neitamai pel doserepa, aupu penkamruma tep pepsene.

21 Sun weitapsilip tenpu dinin, du ngebodi, er weit ngebo tep, napra ateng koupredi, ‘Wenepra popkameng’ tenen, nimi deiyo neng damai dubenkamre. Ange utopu, weit ngebodi, er du bo tep, napra ateng koupredi, ‘Nimi deiyo nengdi wenepra popkameng’ tenen, dubenkamre. Utopu ton, sun nai yapudi, sun pe nyapupu napra, ateng koupmengedi, ‘Wenepra popkameng’ tenen, nimi deiyo neng damai dubenkamenge. Ange utopu, sun pe nyapu yumadi, sun nin yapu cap, sun nai yapu cap tep, “Sun upuda nun men gekenkamepe,” pepra, yuk neng tep, “Nun nai yapu cap, nun nin yapu cap poipseso,” pepmengepa, ponkamenge.

22 Ne tep teka tenenemumdi, ne upu perbenkamruma tep, nimi yumadi, sun tep pio song tenepra, mar penkamsenge. Dinino, ware ngebo do yuma, ne tep tamna gum di, tupa teka teneneredi, ne upupu pio domyakanere ngeboda, yuk nengdi popmenga peda, Allahdi angebo lyepkamre. 23 Ne tep teka tenepnemumdi, ne upu doupra peterem embankamrume. Peterem embaramumpane, amutu nesaladi mali upu peprapsengedi, sun nong deiki ikin keca deipsengopda, amutu di taprap, ormutu bena peteremamumpane, amutu neng pedi tapsengopda, ka di yuk mutu ton bena peterep embankamrume. Utopu ton bena, Israel nesala sun ati arum dopra kuramengai cap, kunkamengai cap, amutu-amutu yuma kapul men bena peterepra men gawal dakmamumpapu, amenda taru, ne Nimi Mi Sisa Utopu Ngebodi yankamne. Yesusdi pepu.

24 Upepu dingeda, aupu ton pepu. “Peterepmengepa, kael kemenge nengda, yambul mambul dinin, sun peteremna deiyo nengda ila mambule. Tonda, ‘Pel dopso,’ pepmengepa, tali pel donge nengda, yambul mambule dinin, sun pel deiyo ngeboda, ila mambule. 25 Peteremna deiyo ngebo, er upu peprepa, er kuramretopu, er amutara kunge nesala gekepmengedi, er kuramretopu kupmengopda, angeda telepe pua. Ange utopu, sun pel donge nengdi, sun pel deiyo ngebo kuramretopu, sun peda utopu kupmengopda, ange peda pio telepe pua.

Atep nengeda, peteremna deiyo ngebodi pere upu, yuk nengdi men gekepmengopda, er nyapudi penge upu peda, men gekenkamenge. Yuk nengdi peteremna deiyo ngebo tep, er nong deiki ikin keca deipmengedi, mali kupmengetopu, anengdi er nyapu pe tep nengeda, utopu kupkamenge. Peteremna ngebodi perepa, yuk neng gekepmengopda, er nyapu penge upu peda gekenkamenge. Neda tenpu ati deiyo ngebo utopu kununa tep, yuk nengdi ne tep, ‘Angeboda, pio mali ngebo, erda isok yuma, sun deiyo ngebo kurure. Er isok sida Belesebul kurure,’ tenepmengedi, konum pepnengopda, ne ati kunge neng, ada ne amutara kunge nesala yuma tep, utopu ton tupa-tupa penkamenge,” Yesusdi er wepra deipu neng, sun 12 neng tep pepu.

26 Upepu dingeda, aupu ton pepu. “Ange tep nengeda, mali upu peprap, sun nong deiki ikin keca deipkamseng neng tep, kware men kunkamrume. Nesala ban-ban yuma, sun inipra kunge keca cap, inipra penge upu cap, amenda taru Allahdi ange yuma jenek kupra deipkamre. Tonda, Allahdi pumun taru iniamu keca yumada, jenek kupra deipredi lap penkamre. Ukuprepa, ange yuma katuaipu kupkamre ja. 27 Nedi sun tep bulupra deipnedi, kunukmaryai inipra sisingamengtopu, pesenun telep upuda, ‘Nesala ban-ban yuma gekepkameng’ tenen, jenek kupra lap perbenkamrume.

Tonda, nedi mur-muruprap pesunun upuda, nimi yuma gekenkamengai, katuai lap pepra peterem benkamrume. 28 Nimi nongda popkamseng dinin, sun sambalada, pio men popsetenge. Atep popkamseng neng tep nengeda, kwar dangna meme. Dinino, mali-mali weik kunge nesala wenepredi, uku jen ban dongopkamrenge puda, nimi nong cap, sambala cap, popra gawal dakamsere ngebo, Allah er tepapu, tek sisi kwar dangkamrume. Ada mesum tep men pepsene, ‘Allahdi wenepra popserur’ tenen, er tep kwar dangkamrume.

29 Pupalema mada, pio metek gel uang pamu bari deiki di kunumnung dinin, ama peda, Allahdi, ‘Dadeptue,’ men tenepre pangeda, tenpu ma peda, deptudi tuai men saktue. Metek ma peda, sun nai bo Allahdi men lumdongorure. 30-31 Ukupra erdi moupra dirur dinin, pupalema mada, weik kuptuopda, ‘Ange pio mambule,’ men tenepkamre. Mada mambul gum tepa. Dinino, sun nimi yumapuda, ila mambul cadi, Allahdi bicau tenepra melimseredi, kalengserure. Allahdi, ‘Anesala yuma tep nengeda, ne mawa’ tenen, sun giso potong yuma pe, konum nukra kael kemserure. Allahdi, ila mambul gum keca ma tep, pio kalengredi moupra tenerurtopu, sun nimida, ila mambul keca kuruma cadi, pio teneseredi, kalengkamsere. Ange tep nengeda, kwar dangna meme. Atep, sun putasere keca yuma peda, sun nai Allahdi pio men lumdongonkamser dinin, tupa melipra karenkamsere.” Yesusdi er nyapu tep pepu.

32 Upepudi, aupu ton pepu.

Ware nesala do yuma, nimi yuk neng sun damai bengedi, “Yesusda, ne nai tek sisi ngebo kunerure. Atep, neda, er upupu gekepra kunune,” penge nesalada, ne Yesusdi, ne nai Allah im deiki kure ngebo tep, “Anesalada, tek sisi ne nyapu sisa kununge,” pepkamne. 33 Dinino, ware nesala do yuma, ‘Yuk nengdi popsenung’ tenen, “Neda, Yesus er mi men kunune,” pepra, iniptapkameng nesalada, nedi ne nai damai benedi, “Sun anesalada, ne tep teka men tenenenunga cadi, ne nyapu men kununge,” pepkamne. 34 Sundi ne tep, ‘E Yesusda, nesala ban-ban yuma, tenpu kange doupmengedi, dimpepra tali kange doupra kunkamenge tenen, yaue,’ men tenenkamnerume. Ne upu dopra, yuk neng tep, peterep embamum pangeda, sun kange yuk tenenge nengdi aupu tep, yu kuprepa, pedana cap, podana cappu, kunkamenge.

35 Gume, ne pel donedi pene upu deikida, Allah upu lap peramu ngebo, nabi Mikadi peramutopu kunkamre. Mikadi peramu upuda ake.

‘Tenpu ngebodi, er nai sisa tep, dipru wilimdinkamre. Tonda, tenpu ner midi, er nin tep, dipru wilimdinkamre. Tonda, tenpu ngebo er midi dopu ner, anerdi er yamal ner tep, dipru wilimdinkamre. 36 Ange utopu, tenpu ngeboda, er pe ati nengdi, er tep podandam neng kunkamenge.’ (Mika 7:6)

Mikadi peramu upu dopra pepsene. Ada, ne pesene upu tep, nimidi yu kuprepa, podankamenga tep pepmasene. Yesusdi pepu.

37 Upepidi aupu ton pepu.

“Neda, ‘Mikadi pediramutopu kunkamre’ tenen, yasa tep, ware neng do yuma, sun nai yapu cap, sun nin yapu cap tep, ila di dipru kareserur dinin, ne tep nengeda, yambula dipu dipru kareserur nengda, ne nyapu men kutenge. Utopu ton, sun nyapu cap, sun ner nyapu cap tep, ila di kange deipra, dipru karerur dinin, ne tep nengeda, dipru yambula dipu karenerum nengda, ne nyapu sisa men kutume.

38 Tonda, ware ngebo do, ware ner do, ne tep, teka tenepnengedi, ne domyakankamneng nesalada, sun pe kun keca tepapu, ‘Nun kecada mambule,’ men tenenkamenge. Sun wenepmengedi popkameng nengdi, sengdin co tali lupra doupra baramengtopu, ne nyapu sisada, ‘Sun popsenga peda, telepe pua. Angeda mambul gume,’ tenepra, kunkamenge. Ne nyapu sun yuma tep nengeda, ‘Popkamseng do?’ tenepra men kunkamenge. Ange tenena gum di, sun pe gam kun keca cap, sun pe putan keca cap tepapu, tenepra men kunkamenge. Sun yuk nengda, sun pe kecapu tenepmengedi, ‘Yesus dombapyopda, yuk nengdi popsenung’ tenen, inipra lyepdangedi, ne upu gekepra men domyakankamneng nengda, ne nyapu men kuptenge.” Yesusdi pepu.

39 Upepudi aupu ton pepu. “Ware neng do yuma, sun yuk nengdi, ‘Yesus er nyapu kununga cadi, popkupe,’ tenepmengepane, lyepdana inimenge nengda, amenda sirya taru, Allahdi wenepredi poprepa, depmengopda, ne cap kikiman gam pio men kunkamenge. Aneng depmengopda, ne cap kikiman men kunkamepe. Dinino, ‘Nun popsunung’ tenen, kwar kuna gum di, ne upupu gekepra domyakanenge nesalada, yuk nengdi, ‘Yesus er nyapu kununga’ tenen, popmengopda, sun nong depkameng dinin, sun sambalada, ne cap kikiman pio gam kunkamepe. 40 Ware neng do yuma, sun tep, ‘Yesus er nyapu kununga’ tenen, dipru kareprepa, nong yang-yang pepsengopda, ada tek sisi ne tep dipru karerure. Ne tep dipru karepyopda, tek sisi ne nai Allah, ne dokotepneu ngebo tep dipru karerure.” Yesusdi pepu.

41 Upepudi aupu ton dukdongopra pepu. “Ware neng do yuma, ‘Allah upu jenek pen neng kununga’ tenen, dipru kareprepa, sun nong yuma yang-yang pepsengedi, melipsengopda, Allahdi er upu jenek penge neng telep keca karepkamretopu, sun melimkameng neng peda, atarupu telep kecapu karepkamre. Ange utopu ton, ‘Allah upu gekepra dumsisipu kunge neng kununga’ tenen, dipru kareprepa, nong yang-yang pepsengedi, melipsengopda, Allahdi, adumsisi kunge neng tep, telep keca karepkamretopu, sun melimameng neng peda, akeca utopu, telep keca karepkamre. 42 Tonda, ne tek sisi pepsene. Ware neng do yuma, sunda ne nyapu tep, ‘Anengda, Yesus er nyapu kununga tep, melipkupe,’ tenepmengedi, tali bul me gwepra kareramenge nge peda, Allahdi sun tep gispal dopredi, telep keca tali kareprepa, dopropkamenge.” Aupu yumada, Yesusdi er nyapu tep pepu.