Yesaya
Nabi Yesayadi sengamu upu
Nabi Yesayadi, Yehuda yala nesala mali kuraminge tep, pepu upu
1
Abuku sekamunge deiyoda, Yehuda yala nesala cap, Yerusalem mutu kurami nesala capdi kurami keca tep, Allahdi er upu lap pena deiyo ngebo, nabi Yesaya tep pepu. Yesaya er nai boda, er si Amos. Apepu ngeda, Yesaya ken maramngange cap, Allahdi er dipru neitamai upu pediramunge cap, Yesayadi seku. Ataruda, ada Yehuda yala nesala, sun ila nimi deiyo neng, sun sida Uzia cap, Yotam cap, Ahas cap, Hiskia cap kurami taru neitamai, Allahdi Yesaya er dipru neitamai lap pen upu pediramupa, aupu yuma gekeramudi sengamu. Aupuda, Yehuda yala nesala kuraminge cap, amenda taru kupkamunge cap tep sengamu.Allahdi er nyapu Israel nesala tep, “Mali kuna gume,” pepra wenepu upu
2 Nabi Yesayadi pepu. Uo, Allah Yahwehdia mambul upu konum pepmasera tep, sun yuma gekenkamrume. Sun tuai mutu kumumdi, mali kumum nesala yumada, moupra gekenkamrume. Sunda pio bicaue. Im deiki kurumu nesala yumada, moupra gekenkamrume. Uo tuai mutu kurumu nesala yuma tep, Allah er si Yahwehdi pepu upuda ake.
Uo, sun Israel nesalada, ‘Ne mawa nesala kunkameng’ tenen, wepra deiamsidi, pio melimsenun dinin, metek nyapudi tali-tali upu pertamamengtopu, sundi ne tep tamnenunge. Sundi ne tep yaninenunge. 3 Ukupmanto ngeda, sapi bisam peda, sun peina deiyo neng kael kemnunge. Utopu keledai bisam peda, sun peina deiyo neng kael kepmengedi, sun jen karenai ketenem diruraida, konum tenenung dinin, sun Yehuda yala nesalada, ne tep moupra tenena gum di, sundi men kael kemnenunge.
4 Atep sun mali kurumu nesalada, bicaue. Sun dordi deipdanen, yakarami nesaladi, mali keca weika di kupyakaramidi, ne upu yanipyakaramnei. Ange utopu, sun nyapu peda, mali-malipu kununge. Ne Allah Yahweh, akeca-keca yuma talepra deiki tara, ila eremna kune ngebodi, ne penetopu kunune. Neda lengnapub kune ngebodi, Israel nesala tep pio kalekra melimsenun dinin, sundi tamnenunge. Sun yumada, ne damai men kungedi, ne tep amnyo karengdongonengedi, karenaipu kununge.
5 Sunda, ware keca deiyo tep, tupa-tupa mali kecapu kupbarum do? Ukupmantoda, sun giso cap, sun kange dipru neitamai capda, kange mun pu konum jeserure. Atep nengeda, ware keca deiyo tep, sundi, ‘Nun wenemna tep, ila ikin keca ton cap deipsetu’ tenen, putaserepa kurum do? 6 Ukupra pu jeseryada, yan dam di dipdongopra, nong yuma nepra welepseredi, giso dam baramserurtopu kurume. Tenpu ngebo peda, telep ton men kurure. Sun yumada malipu kurume. Sun nong deiki yuma, susi jepra nepredi yapunpu turungkamsere. Ukupseredi, susi jenkamser ngeda, obat di deipra kwetepsengepa, men kaikamsere. Tupa malipu kumumtopu, tupa kunkamrume.
7 Ange utopu, sun mutu yumada, yuk karen mutu yu nengdi, konum poptapsei. Sun ati doamrumnge yumada, konum uku dongopseipa, uku jepra gawal dakropseue. Yuk karen mutu nesaladi, sun taleamrum mutu dalupra dopropseidi, sun wa pepra kouramrumpa, bolongamu keca yuma dalupra dororami. Sun pe dinmamumyai di, mali kudisenunge. Sun keca yuma jepra gawal danunge. Ukupmengedi, sun mutu yuma popra sikke buktapsei.
8 Domon upu deiki di, Sion mutu ner mi, penun ngeda, ada sun Yerusalem mutu kurum nesala tep pepsene. Sunda, anggur tapu wa pen damai keana tep dodin ati domenganen, tamamengtopu nesala kurume. Tonda, sumi wa pen damai, keana dodin ati domenganen, tamamengtopu nesala kurume. Tonda, yuk karen mutu yu nengdi, ‘Amutu nesala popkup’ tenen, warekra ongomgenem pepmengepa, mali kange doupra kurameng utopu kurume. Ukurumada, nedi tapsisipa, kange mun kange doupra kuruma tep pepsene.
9 Allah er si Yahwehdi, im deiki jen talen neng, malaikat yuma talepra kurur ngebodic men melipmasetu teptoda, sun yu nengdi, nun yala nesala yuma konum popra gawal dakmasetenge. Nimi yambulanun peda, ton men tapsetu. Nun yala neng yuma, poptapra gawal dakmasetengpa, nunda Sodom mutu cap, Gomora mutu cap, yuma popra gawal dakamotopu kupmasetenge. Dinino, nun nai bo Allah Yahwehdi, nimi yambulanun ton lyepseupa, tupa kunupe.
10 Uo, sunda Sodom mutu cap, Gomora mutu cap, pio mali-mali weik kurami nesala utopu kurume. Sun Yerusalem mutu talepra kumumnya deiyo neng cap, sun amutara kunge nesala cap yumada, Allah er si Yahwehdi pesere upu moupra gekepkurume. Allahdi peteremsere upu gekepra dombankamrume. 11 Allah er si Yahwehdi peserure.
Sundi ne karena tep, gam keca ataru-ataru yuma popra, uku dongoryakanerumada ne dabale. Tonda, ne si eremna tep, domba bisam gemnge cap, sapi bisam mi nong galemna telepnge cap dekarum dinin, ne dabale. Tonda, jem sapi cap, domba cap, kambing cap popmumdi, yapi ne damai duyakarumu ngeda, ne men putanurure. Ada, sun mali kunge dipapu, ne si eremna tep dekanung kecada, ne kange men derinuna tep, pepsene.
12 Tonda ware ngebodi, ‘Ukuprume,’ peipseupa, sun gam kun keca yala-yala yuma doupra, ne damai deriyakanerum do? Sunda dipru neitamai, ne tep teka tenena gum neng cadi, sun akeca-keca yuma dekarumupa, yan lelim peredi, ne bounerure. Akeca yuma tep, ne dabal kunerure. Ne si eremna ati damai, akeca yuma yaniryakange ngeda, ne dabale kunerure. 13 Sundi deriyakamom keca yumada, talipu deyakarume. Ukupra dekamom keca yumada, dukna dukmengepa, tong tep ukinip dongoramengtopu, kusunune. Nedi sun tep dabale kunerepa, men disenune. Sundi war tengdongon taru cap, Sabat tumi cap, ila mambul tumi cap kuprepa, Allah upu gekena tep, bupra wengyakamumyaida, ne dabale.
14 War tengdongon taru tep, kailya kalemrumnge cap, tonda, ne Allahdi, ‘Atumi mambul tumi tep, bulumkamrume,’ peiamsisinge tep, kailya kalemrumnge peda, ne pio songe. Sun mali kumum dipapu, ila kailya kalemrumupa, ikin kange dounedi, ne dabal kunerure. Ada, sun mali kupyakamum ngeda, ne kange boun men kupnetue.
15 Tonda, sundi buru erepra, Allah mororumnge peda, nedi moupra men disenune. Sundi, ‘Ukupra melipkamser’ tenen, moronerum ngeda, ne men gekesenune. Ange deiyoda, sun buru deikida, nimi yapi weik kwapseua tep, pepsene. 16 Ange tep nengeda, sun mali kumum keca yuma kwiriptapmumdi, teleppu kunkamrume. Sun mali kumum keca yuma tapmumdi, yuk karenaipu donongkamrume. Ukupmumyopda, mali kun keca ton cap men kunkamrume.
17 Ukupmumnyopda, telepngepu kupbankamrume. Ada, dumsisi kunangepu, kael kepbankamrume. Nimi tep upu bongdinkamrumnge peda, dumsisipu penkamrume. Mawa di mok upu pepra, men penkamrume. Ukupmum dingeda, solu nerapu do, lyan nyapu do, yuk nengdi, sun nong deiki ikin keca derinkameng taruda, sun dipapu lepsising dinkamrume. Sun pedi, men melipdanmanto nesala tep melimkamrume.
18 Ne Allah Yahwehdi pepsene. Sun cap, ne cap upu sisikupe. Ada, ‘Sun betapra tenepkurum’ tenen, pepsene. Ukupmantoda, sun mali kecada, kapi co kait popre taru bi kuramretopu kusurure. Dinino, sun mali kun keca kwiriptapmumpa, nedi amali keca daepsenyopda, lek keca utopu kunkamrume. Ange utopu, sun mali kumum kecada, cunang tapu kait popre taru, bi kuramretopu kurur dinin, sun malinge kwiriptapmumpa, nedi amali keca daepsenyopda, ngari ma potong lengamretopu, pio lekpud kunkamrume. 19 Tonda, sundi ne tep, ‘Er upu gekepra, er amutara dombankamepe,’ tenepnemumnyopda, sun amutu kure keca pio telep ngeda, weika di karesenepa, akeca talepra jenkamrume. 20 Dinino, ne pepsenetopu men kupmumdi, ne upu yaniptapra balila kupmumnyopda, nedi peipnepa, mar podana deiki di, yuma popropsengepa depkamrume. Ne Allah Yahwehdi pepsene.
Yerusalem mutu kurami nesala tep, wenepu upu
21 Pumun taru Yerusalem mutu kuramrum nesala yumada, ‘Ne kabo,’ tenepra, kange tenpu doupra, ne tep dipru dukdongopra kuramnerum dinin, ukutaruda ne tapnerumdi, tali-tali nyangdarameng nerapu utopu kurume. Pumun taruda, dumsisipu kuramrumdi, pio teleppu kuramrume. Nimi tep upu bongdiramrumdi, telep upupu peramrum dinin, ukutaruda podana nesalapu kurume. 22 Utopu, pumun taru Yerusalem mutu kumum nesala kuramrum kecada, urasin telep keca perak utopu kuramu dinin, ukutaruda ange utopu men kurure. Nimidi, ‘Akecada mali keca’ tenen, tali bura donongamengtopu, konum kurume. Tonda, pumun taruda, anggur tapu du mokon pio telep peramrenge utopu kuramrum dinin, ukutaruda, tali me weik tapakra dikdongopmengepa, matang peramretopu konum kurume.
23 Uda, sun Yerusalem mutu talepra kurumu nimi deiyo neng yumada, ne upu bisirumudi, upula don neng cap kikiman kurume. Sundi nimi tep upu bongdimum taruda, mali kunge dipapu, ‘Nun putasere kecada karepsetenge pangeda, sun tenengetopu, upu bokeipkupe,’ tenemumdi, kurume. Utenemumnya deiki di, solu nerapu cap, lyan nyapu cap tep, sun ikin kupiya peda, dumsisipu upu men bongdirume. Sunda, ‘Nun putaseretopu karepsetenge’ tenen, kuruma tep pepsene.
24 Ange tep nengeda, ne Allah Yahweh, akeca-keca yuma talepra, puto weik kunedi, nedi, ‘Ukupkamne,’ tenenetopu kunune. Neda, im deiki jen talen malaikat yuma, sun ila deiyo ngebo kunune.e Nedi pepkusene. Neda lengnapu kunun ngebodi, Israel nesala tep pio puto di kalekra melimsenun Allahdi pepkusene.
Uo, Israel nesalao sundi ne tep mar peneruma tep, nedi sun wenepra popkamsene. Ne tep, ‘Nun songe,’ tenenengedi, mali penenung nesala yuma tep, tamupra kwang dakamne. 25 Ne upu yanipra balila kumumnge tep, ikin keca sun deiki deipkamsene. Tonda, gat keca er si perak urasin pio telep kwamreyanen, buta paleramrenge, uku dongopmengepa, malinge gum kupredi, telep kuramretopu, nedi, sun mali kun keca daepnedi, gum kupra deipkamsene. Sun mali kurumunge yumada, daepra tapkamsene. Ukupsenyopda, sun yuma teleppu kunkamrume.
26 Atep, menop taru telep deiyo neng kareramsesitopu, ukutaruda nedi ka tamupra, telep kupra upu bongdina neng cap, ‘Ukupra kunkamrume,’ pepra, upu lepsisikra pena neng cap, wepra deipkamsene. Ukupne pangeda, yuk mutu nesala yumadi, sun Yerusalem mutu kurum nesala tep, ‘Amutu kunge nesalada, pio telep nesala kununge,’ penkamsenge. Tonda, ‘Yerusalem mutu nesalada, Allah er tepapu, tamna gum di, pio talepra dombanung nesala kununge,’ penkamsenge.
27 Ne Allah Yahwehda, mali keca tenpunge peda, men kunedi, dumsisipu kunune. Atep nengeda, nedi, Yerusalem mutu kunge nesaladi, ‘Uo, nun tek sisi mali kuramepu,’ pepmengedi, sun mali kun keca tapmengopda, anesala tep lyepropkamne. 28 Dinino, ne upu bisipra mali kunkameng nesala cap, ne tep tapnengedi, malipu kupbankameng nesala cap yumada, wenepra popnepa depkamenge. Ne Allah Yahweh tep, tapnenge nesala yumada, poptapnepa pio depbankamenge. Gam pio men kunkamenge.
29 Amenda taruda, tek sisi sun yuma ali dangkamrume. Ada, ila co tengamnga deiyoi tep, isok si eremamrum ngeda, ali dangkamrume. Ange utopu, isok si eremna tep, peramrum wa pen dam tep, ali dangkamrume. 30 Sunda, ila co tekamredi, yaten me pumbon wengna gum tep, er bo kouluramretopu, kunkamrume. Ange utopu, wa pepra yal keca kouamengepane, mo cemna gum di, gelal sepdara kouluramretopu, kunkamrume. Ada, sundi isok si eremamrumnge tep, nedi wenepsenepa, sun yuma bol mali dounkamrume.
31 Nedi sun tep wenepkamsen taruda, pumun taru ila puto neng kurami dinin, sekne pelum-peluma utopu kunkamenge. Ange utopu, sekne panmanganen, pupmengepa, uku laramretopu, sun mambul pel doraminge yumada, ukupkamre. Ada, nedi sun mali kunge nesala yuma wenepnedi, uku jeryai dongopnepa, ukudi jepra gawal dakamre. Amali kunge nesala cap, sun pel doramenge nge cap yumada, uku jepropkamre. Aukuda nimidi men taptenge. Pio jenkamre.