Kidung Agung
Gonga kemna tep, lap pena upu
Ton tara Ibrani upu ila kael nengdi, upenunge. “Gume, aupu yumada, tenpu ngebodi er dopkamu ner tep, ila di bicau teneramudi, kange deipka tep, aupu sekupa, er dopkamu ner tep karepu. Karepkopda, anerdi, aupu gekepudi ka tamupra er dopkamemeu ngebo tep, anerdi teneramunge ton sekra deipu.
Angebodi, aner tenpu tep mun peramudi, ila di kange deipu. Yuk nerapu yuma tep nengeda, pio men putaramnga tep men teneramu. Utopu, anerdi yuk neng tep, putana gum dipapu, er dopkamu ngebo tepapu kange deriramu. Atep nengeda, Kidung Agung bukuda, sun aneng butene pepdarei upu tep kupsere tenenunge. Akonuma. Ton tara ila kael neng dingeda, angepu tenenunge.
Dinino, ton tara ila kael nengdi ange men tenenunge. Sun dingeda, “Gume, Kidung Agung upuda, ukupmanto upu, tonda, domon upu utopu kuserure. Sun anengdi, ‘Abuku deiyo neitamai ngeda, ake,’ tenenunge.
‘Gume, nun tuai nesaladi, nun nai bo Allah cap, nun dubo Yesus cap tepapu, teka tenepra kange derinkamepe. Sun butene tepapu teka tenepmepedi, sundi pesererung upupu moupra taleptepedi, angepu kunkamepe’ tenena tep, adomon upu Kidung Agungda sekra karepsei,’ tenenunge.
Ton tara kael nengdi, utenenunge. ‘Gume, aupuda domon upu kurur dinin, aupu deiyo ngeda, Allah Yahwehdi, sun Israel nesala tep, ‘Ne mawa nesala kunkameng’ tenepudi, tuai nesala yala-yala yuma kankan neitamai di, sun Israel yala nesalapu wepra deipudi, sun tepapu ila di bicau tenerure. Yuk nesala yala-yala yuma ton, bicau teneseredi, lyemserur dinin, er pio meneng damai nesala, er mawa nesala men kunupe. Israel yala nesala tep, ila di bicau teneredi, kange derirure. ‘Ange kael kepkameng’ tenen, abuku Kidung Agungda karepsei,’ tenenunge.
Ton tara kael nengdi upenunge. “Gume, abukuda, domon upu kurur dinin, er deiyoda ake. Ada, tuai nengda, sundi konum domi nerapu tep, dabal tenepmengedi, adipapu anerapu tapmengedi, yuk tali nerapu dopra kununge. Tonda, yuk tali nerapu ton upula nyangdanunge. Tonda, yuk nengdi konum domi nerapu upula doronunge. Dinino Allahdi, ‘Angeda, ne pio songe,’ peserure. Atep, akitab Kidung Agung deiki di, akaber ngebo cap, erdi dopkamu kaber ner cap, yuk neng, tonda yuk nerapu tenena pio gum dipapu, sun butenedi, ila di bicau tenedaramreidi, kange deipdanapu kuramrei. Ange utopu, nun tuai nesala yuma peda, Allah er tenpu tep, teka teneptepedi, nun kange dipru yuma, er deikipu deiptepe. Yuk tali keca tep, ‘Nun nai bo ake,’ tenen, isok si men ereptepe. Tonda, ‘Nundi donup nerapu tapra, yuk nerapu men dopkamepe’ teneptepedi, kael keptepe tep, ‘Abuku Kidung Agung kareamsei,’ tenenunge.
Tonda, abuku neitamaida, wang-wang peserurnge ton ake. Ada, akitab Kidung Agung neitamaida, Allah er si pio men seki. Tonda, yuk-yuk Kitab neitamai yumada, Allahdi mambul upu peserur utopu ngeda, Kidung Agung neitamaida, sekipa pio men kurure. Atep, akitab, er upu deiyoda, ake. Ada, tenpu kaber ngebo cap, tenpu kaber ner cap bicau tenedanamreidi, kange deipdaramrei. Angeboda, aner tep, ‘Uo aner doptene’ tenen, mun peramu. Utopu anerdi, ‘Uo, angebo dopnetue’ tenen, mun peramu. Ukuramreidi, kange deridana upu cap, kange lona upu pena cap, tonda bicau tenedana upu cap pedaramreidi, sekrei ngeda, Alkitab keteneipsei nengdi kareamsei. Tek sisi ngeda, aupu sekrei taruda, angebodi aner kapul men dopu dinin, ‘Aner dopkamne’ tenen, seku. Akaber nerdi, ‘Angebodi, tek sisi dopkamner’ tenen, seku. Atepngeda, nimidi er konum dopu ner pepmantonge utopu pepu. Anerdi, nimi konum dopu nerdi, er akingebo tep pepmanto upu pepu. Tonda, pumun taruda, sun Israel nesaladi perami upu cap, gambar utopu, tonda ukupmanto upu perami ngeda pio yuk kuramu. Ataru kunup nesalada, ange utopu tupa men penupe. Dinino, sun menop taru kurami nesaladi, ange utopu peramya cadi, angepu sekra karepseipa, akurure.