Kaber ngebo cap, kaber ner capdi, upu pepdareiya tep, upu
Kaber ngebodi pepu upu
5
Uo nedi dopkamken nero! Kanda ne wai dam utopu kuneruma tep, kan damaida yanmane.Nedi ne weit ner tep, bicau tenenetopu, nedi kan tepapu pio ila di bicau tenekenune. Tonda, kanda nedi konum dopkesi ner utopu kurume.
Atep, kanda ne wai dam utopu kuneruma cadi, awai damai weknyopda, nintong pio telep peramre keca, er sida mur cap, tonda, tau peramre keca er sida rempah-rempah cap, tonda, mong me mokon cap, anggur du me mokon cap, sapi moum teyung, er sida susu cap, ange yuma dopra jenmandi, pio telep kange deipra kunmane.a
Yerusalem mutu kaber nerapudi pepi upu
Ukupmantoda, jen keca cap, telep anggur du me cap, tali lupra dajenmarerumnyanen, kange yawarapserepa, konum boupseryopda, kange deipdana, teleppu kunkamrerume.
Deiyo neitamai ngeda, nun kayapu, sun butene acapu kunmarerumdi, sun putapseretopu kikiman mapmarerumnyanen, amenda konum boupseryopda, pio telep kange deipra kunkamrerume.
Kaber ner ken mapka deiki epunge tep, lap pepu upu
Kaber nerdi pepu upu
2 Ne mapmasi taruda, mapsi dinin, ne kange dipru neitamai di, tupa tenenapu kunmasi. Sun ton gekepso! Neda pio ila di bicau tenenedi, mun penun ngeboda, ‘Kan man ati wektene’ tenen, ne ati buplan deiki gogo pepmare ngeda, sun ton gekepso!
Kaber ngebodi er dopkamu ner tep, pepu upu
Ne dopkamner ngebodi pepneu upuda ake.
Kaber ngebodi pepu upu
“Uo ne nero! Kan buplan pakeipnemempa, kan ati wekune.b
Ne nero! Nedi ne weit ner tep, bicau tenenetopu, nedi kan tepapu, ila di bicau tenekenune. Kanda, yal ma er kangeda, pio boun kuretopu, kurume. Kan urasin cap, nong cap, kandi kurum keca yuma capda, pio teleppu kurura cadi, nedi kan tepapu, ila di bicau tenekenedi, kan teppu tep kange derikenune.
Ne giso potong yumada kandi konum dinerume. Lukunda taru neitamai yumada, ‘Ne ner, er damai bena kutene’ tenen, bisi yakanmanupa, mo purya konum bapmanerpa, ne giso potongda, palepmanerdi bul kupnere.
Teka, mo purya bepmanerpa, ne giso konum bul kupnere.” Ne akengebodi pepmau.
Kaber nerdi pepu upu
3 Neda, “Gume, ‘Ukutaruda mapkun’ tenen, ne nong deiki tara kenengnun opkal yumada, konum kwiripdeipmanu.
Atep, ‘Ware deiyo keca tep, ange yuma kange di ton cap dopra kenekaman do?’
Tonda, ne yanda arup taru konum me kupmanua cadi, ware keca deiyo tep, mali keca deiki kange di yanipnedi, ton cap, ne yan me kupkaman do?” pepmasi.
4 Upepmasipa, ne kange deipsidi, pio mun penun ngebodi, ‘Ne ner taleptene’ tenen, ne ati buplan neitamai potokeiamsi bon pumbon, er buru dongopu.
Buru dongopupa dinmasipa, ‘Uo, ne nenge domneu ngeboda, yakana konum damai kupmare. Neda tek sisi angebo pio putapnere’ tenen, ne kange dipru neitamai yumadi, ila di putapneupa, ne nong moropsepneu.
5 Ukupmaneu taruda, ‘Ne kange derinun ngebo damai kunmare’ tenen, ‘Ne ati buplan pakeipkumemene’ tenen, bukronmanu.
Tonda, ‘Ne nong yuma nintong telep pepkuner’ tenen, nintong pio telep peramre me, er sida mur, dopra ne nong bol deiki likeipmanu.
Teka, ‘Buplan pakeipkun’ tenen, abuplan pangna tep talena keca talepmanu taruda, ne buruda, mur me deiki bul kupmaneu.
Ada ne buru du yumada, mur me gwepmanua deiki di, bul weik tupa kupmaneupapu, abuplan pangna tep keca talepmanu.
6 ‘Ne kange pio derinun ngebo, ne ati wekur’ tenen, ne ati buplan pakeipmanu.
Pakeipmanu dinin, ne ken mapmasa deiki di, ne pio kange derinun ngeboda, konum bendopmaupa, men epmanu. Buplan kapul men pakeipmanu taruda, erdi upu pepmanupa, ‘Uo angebo pio putapnere’ tenen, ne kange dipruda buluksakmaneu.
Buplan pakeipmasidi, ne kange derinun ngebo men kupmaupa, ‘Dan kunmar do?’ tenen, epetepmanu dinin, pio men epmanu.
Tonda, ne upu gekepnetupa, tamupra ne damai yatu’ tenen, kong pepetepmasi dinin, erdi ne upu men gekepmaneudi, upu ton tamupra men pepmaneu.
7 ‘Ne kange derinun ngeboda, dan mutu benmau do?’ tenen, ati tapra benmasidi, akati arum doramya neitamai yumada, embanmasidi dipembanmasipa, amutu kalengna deiyo nengdi, epnei.
Epneidi, ‘Kan anerda, warya tep, lukunda neitamaida yana nun mutu kalengmardi embanmar do?’ tenen, yu kupmaua cadi, sundi ne nong deiki bongonmanei.
Teka, nun mutu dana-dana tara ongopdongopra wiami gel beilya deiki tara embanmaidi kalengna deiyo nengdi talepneidi, ne nong deiki bongopra, popmaneidi, ne giso galuna tep getepdanmasi lyom opkal kwiripra dopropi.
8 Uo, sun Yerusalem mutu neitamai kurumu kaber nerapu yumada, ne kange deipsidi, pio mun tupa penun ngebo, sundi ton angebo epmumnyopda, er tep, upepkamarume! ‘Kan tep pio mun peramre nerda, kan tep tupa tenekeredi, er dipru pu jerepa, kange biri-biri perepa, tu deiki lokra dourbenmanto kurure.
Yerusalem mutu kaber nerapudi tamupra aner tep, pepi upu
Yerusalem mutu kaber nerapudi pepi upu
9 Uo amutu neitamaida, yuk kaber nerapu ton, denge pio weik kunung dinin, anerapu yumada, sun urasin cap, nong capda, yambul telep kunung dinin, kanda kan urasin cap, kandi kurum keca capda, pio-pio teleppu kurume.
Ange utopu, kandi, ‘Aner dopkamne’ tenen, mun pepra, ila di bicau tenerum ngeboda, ware kupra er tenpuda, pio telepnge kuptu do?
Amutu neitamaida, yuk nerapu ton, sun di kange derinung nengda, weik akunung dinin, sun aneng yumada, yambul teleppu kunung do? Kanda ila di bicau tenerum ngebo, er tenpuda, pio-pio telep kurur do?’ tenen, ange yumada lap pepsetume.
Ware deiyo tep, kandi nun amutu kaber nerapu yuma tep, “Sunda, ne kange deipsi ngebo epmumnyopda, er tep, ‘Kan nerdi pio ekerure,’ pepkamrume,” pepra, moronmaserem do? Upepnei.
Akaber nerdi, sun Yerusalem mutu kurami nerapu yuma tep, pepu upu
Kaber nerdi tamupra pepu upu
10 “Gume, ne kange deipsidi, pio mun penun ngeboda, tek sisi erda pio teleppu kurure!
Amutu neitamaida, yuk nimida, denge pio weik 10.000 (sepuluh ribu) neng ton, akuramtenga peda, ne dopneu ngeboda, pio telep kurur dinin, sun yuk neng yumada, yambulanun pua!
Ne kange derinun ngeboda, urasinda pio teleppu kurure. Erda, pio puto weik ngebo kurura cadi, erda kware pio men tenerure!
11 Ne kangeda, kunumna weik keca er sida emas, pio telep kuramretopu, ne kange deipsi ngebo, er giso cap, urasin cap yumada, pio teleppu kurure.
Er giso potongda, pio mirirure. Ada, ma er sida kwing ma miriramre utopu mirirure. Tonda, er giso potongda, me kaitda welepna, kwerepna kururamretopu kurure.
12 Er asuruda, yal ma, er asuru pio boun kuramre utopu kurure. Er asuru bol mirin kurur dinin, dana-dana tara yumada, pio kurunpu kurure. Ada, sapi bisam moum teyung kurururtopu, pio kurunpu, kurure.
Ada, yal ma bura tara me bungna damai bukredi, kange deipra pio bounpu kuramretopu, ne kange deipsi ngebo peda, ange utopu kuredi, dinerure.
13 Ne nenge dopsi ngeboda, er katumda, nimidi wa pepmengedi, aneitamaida, tau peramre keca, er sida rempah-rempah (berbaris) nepra koupmengepa, akeca er boda, nintong pio telepnge peramretopu kurure.
Ukupmantonge ton, urasin pio telep kait keca, er sida bunga bakungda, pumbon di, pio telep me, er sida mur me embaredi sakyopda, nintong pio telepnge peramretopu, ne dopsi ngebo, er sipyal bambol peda, pio teleppu kurure.
14 Tonda, ne nengeda, ne dopsi ngeboda, er buru cap, nong yuma capda, urasin pio teleppu kurure.
Ukupmanto ngeda, er buruda, besi beton dinin, kunumna weik keca emasnge ongomdongona nge (bulat) kuramretopu, kurure. Tonda, aemas deiki di kunumna weik gel palepra deiptengepa, urasin pio telep kuramretopu, er buru peda utopu, pio telep kurure.
Tonda, er taram cap, mundu cap neitamaida, urasin pio telep kurure. Ukupmanto ngeda, ila bura tara bisam, er sida gaja bisam, er lyom weik ekwe lukmengedi, ange deiki di, urasin pio telep keca petupra deipmengedi, akeca deiki kunumna weik gel, er urasin im kalum utopunge palepra deipmengepa, pio telep kuramretopu, ne akengebo er nong yuma peda, ange utopu kupra urasin pio teleppu kurure.
15 Ukupmantonge ton, urasin pio telep kurun gel, er sida marmarda, nimidi akeca dopropmenga deiki di, ila ati ayumnya co ketenepmengedi, emas deiki ikra deiptengedi, urasin telep cap, gat cap kuramre utopu, ne nenge dopneu ngebo, er yan buteneda, ange utopu kupra, pio urasin telep kuna cap, puto kuna cap kurure.
Ukupmantonge ton, Libanon tara neitamai, ila mutu-mutu dup yuma akapmarepa epmepedi, ‘Uo, angeda pio telep,’ tenen, kange pio loramsertopu, nerapudi ne dopsi ngebo, er nong yuma epmengopda, kange pio lopserepa, ‘Uo, angeboda, urasin pio telep ngebo kurure,’ tenenunge.
Tonda, Libanon mutu neitamai, ila gat kuna cap, lyom kuna cap, urasin telep kuna cap kure co, er si aras co tengamretopu, ne dopsi nebo peda, ange utopu, urasin pio telep ngebo kurure.
16 Tonda, ne nenge dopsi ngebodi perur upuda, gekena pio telep upupu peprepa, gekepmepyopda, kange pio deipra kunupe.
Ange tep nengeda, nerapu yumadi ne nenge dopsi ngebo epmengopda, ‘Uo, erda pio telep ngebo kurure,’ tenengedi, kange doupra kununge.
Atep, sun Yerusalem mutu neitamai kurumu kaber nerapu yuma tep pepsene. Akonum lap pepmasen upu yuma, ne nenge dopsi ngebo tek sisi ange utopu kurura cadi, erda ne kap sisa kunerure. Atep nengeda, nedi er teppu ila bicau tenepnedi, er tep kange deipnedi, pingpinga kange doupra kunune.