Lap Pena Upu
1. Sabat tumi
Sabat tumi perami ngeda, deiyo ake. Menop taru, Allahdi Musa tep, mem upu pepra deipu taruda, “Ngangtan bari tumi neitamai yumada, tali pel dona telep dinin, yoneitam tumi yaryopda, atumi deiki di tali pel men donkamrume. Atumida, sun beipye peingna tumi kurure,” pepra deipu. Upepra deipupa, yoneitam tumi si tep, ‘Sabat’ tumi perami. Allahdi upepra deipu dinin, sun Farisi nengdi, sun pe kange di teneraminge cap, tapakra peramidi, mem upu weika di ton cap, 600 utopu ton, tapakra peramidi, peteremami. Angetopu, sundi uperami. “Sabat tumi deikida, nun ati di, nun kayapu ati embana telep dinin, nun mutu di metek karenai embanada, ada pel dona utopu tep, angeda mali, men kuptepe,” perami. Ange tep nengeda, Sabat tumi deiki di, sun karen mutu men embarami. Atumida, sun meneng damaipu, tenpu kilometer utopu embarami. Ada, ‘Sabat tumi neitamaida, tali pel dopmepepa, Allahdi derepserur’ tenen, Yahudi yala nengda, sun ukurami.
2. Pentakosta Tumi
Pentakosta, tonda Paskah tumi perami ngeda, Yahudi yala neng, sun ila mambul kailya kalemna tumi tep perami. Aila tumi deiyoda, ake. Ada, Israel nesala Mesir mutu kurami taru, Allahdi Mesir mutu kurami nesala pe, sundi peirami tali gam kuramu keca yuma peda, weni keca popkamu taruda, Allahdi, ‘Ukupkamarume,’ pepupa, sun Israel nesaladi, sun domba bisam popra, yapi dopra sun ati bura tara buplan deiki tara cap, dana-dana tara cap, likra deipmai. Deipmaipa, Allah epudi, akati yuma kaplepra kirikroudi, sun weni nyapu pe, sundi peirami gam keca weninge peda men popu. Ukupka tep, sun Israel yala nesaladi, ‘Ange yumada, pio tenenkamep’ tenen, atumida, ila tumi keipi. Atumi si tep, ‘Kaplemna Kailya Kalemna Tumi’ perami. Ataru kunup nesaladi, atumi tep, ‘Paskah’ penupe.
Uda, kalemna konum kalepnopda, adinen nukbaramyanen, denge weik, ue 50 tumi konum kupnopra, ila kalemna tumi yuknge ton keipi. Atumida, ‘Pentakosta’ tumi perami. Pentakosta tumi konum kupnopda, nimi weik bulupra wengami. Wengamidi, roti kwaneng jen keca nong butene cap, tonda sun mali kurami keca kunumna tep, gam kuramu keca popkaminge cap dekarami. Dekaramidi, Allah tep karena deiyo neng, sun imam neng tep kareramipa, sun imam nengdi akeca popnopra, Allah tep karerami. Ada, sundi Allah tep, “Telepe,” pena cap, tonda sun mali kurami keca tep, ‘Allahdi akeca gum kupra deipkamser’ tenen, karerami. Tonda, Allahdi Mesir mutu neitamai, Israel nesala yuma loptapra lyepunge cap, tonda sun kourami keca Allahdi meliamupa, telep kupra bongoramunge cap tep, “Telepe,” perami.
3. Mesias, tonda Kristus
Mesias perami ngeda, sun Ibrani nesala perami upu deiki di, ‘Mesias’ perami. Yunani upu perami nesaladi, ‘Kristus’ perami, dinino aupu deiyoda tenpua. Deiyoda, menop taru Allahdi, akeca-keca yuma kapul men ketekeipu taru, Allahdi, ‘Nesala ban-ban yuma lyepkamne’ tenen, Nimi Lyemna Deiyo Ngeboda, er Mi Sisa Yesus, konum keteneiamu. Ada, ‘Teka tenepkameng nesala lyepredi, anesala sun dipru talenkamre’ tenen, ‘Yesus dokotepkamne,’ tenepra keteneiamnga tep, pepmepe.
Allahdi keteneiamnga tep, Yesus kapul men yau taruda, Allahdi peiamupa, Allah er tek sisi upu cap, amenda kupkamu keca upu cap lap perami neng, sun nabi-nabi nengdi, “Nimi Lyemna Deiyo Ngebo, Mesias yankamsere,” perami. Ange utopu, ange yuma nong kapul men katuai kupu taruda, nabi Yesayadi, “Allahdi er Mesias dokotepserepa, lyepseredi talenkamsere,” pepra pediramu. Allah er upu lap perami neng yumadi, nabi Yesaya peamnga utopu, sun peda upedirami.
“Mesias erda, Allah er Melimna ngebo kunkamre. Er pio bouna di kunkamre. Tonda, Allah er upupu moupra gekeramredi, er pelpu donkamre. Er pelpu doramredi, kange mun keca weik, er nong deiki yana kunkamre. Amendada, er depkamra deiki di, Allahdi nimi lyemna tep, er teneamu pel sirya dakamre,” pepra, pedina upu perdirami.
Yahudi yala nengdi, ‘Allah er Mesias ngeboda, ila nimi deiyo ngebo, Raja utopu ngebo kupra yaseredi, yuk nimi deiyo-deiyo nengdi talesenunga yumada, erdi aneng popra bisipredi, nun Israel nesala yuma erepra, ila deiyo neng keipkamsere,’ tenerami. Uteneramya tep, Yesus konum yau pangeda, ‘Yesusda tali tuai ngebo kurure. Erda nun Nimi Lyemna Deiyo Ngebo, Mesias ngebo pio gume,’ teneramidi, Israel nesala weik tarada, Yesus tep teka men tenerami. Allahdi nimi lyemna tep, er Mesias ngebo Yesus tek sisi dokotepu dinin, Israel nesala sun weik tarada, Yesus tep teka men tenerami.
4. Emas cap, Perak cap
Emas cap, perak cap deiyoda, ake. Menop taru Yahudi yala nengda, nun ukutaru kunup nengdi co bo kunumamep keca utopu kecada, pio men kwamnga tep, sundi akeca men talerami. Sun talepra kunumami kecada, kunumna weik, pio gat keca taleramidi kunumami. Akeca urasinda, gel uang utopu dinin, pio kunumna weik keca kwamu. Akeca deiki di, sun pel don neng, pel dopnepa apel kunumna tep, kareramipa dororami. Tonda, sun putaramu bung keca yumada, akeca deiki di kunumami. Emasda, poronge kurure. Perakda, pio gat melnge kurure.
5. Salomo Kolonade
Raja Dauddi deiamu mi Salomoda, Israel nesala sun mali kurami keca kunumna tep, ‘Allah tep karerbankameng’ tenen, ila lyom gel ati domu. Akati domu taruda, akati dam dinin, keteng yakan tarada, lyom weik atolong lapra domu. Ada, ‘Israel nesala yuma, akati damai yankameng nengda, akatolong bukmengedi, Allah upu gekenkameng’ tenen, lapra domu. Menop taruda, Salomodi akeca konum dopka tep, Yesus er teka tenerami nengdi, akati atolong deiki buknedi, Allah upu cap, Yesus er upu cap, kael keami nengdi peteremaminge tep, gekeryakarami.
6. Dumsisipu Kurur Ngebo
Dumsisi Kurur Ngebo peraminge deiyoda, ake. Yesus teka tenerami nengdi, Yesus er tep, asi perami. Ada, Yesus er tuai kuramu taru neitamai, erdi kuramu keca yuma cap, er depupa, gam bukra kuramu taru kupu keca cap, uda Allah er upu peteremamunge cap, tonda, Allahdi, ‘Ukunkamre,’ teneramunge cap utopu, Yesus erdi dumsisipu kuramnga tep, Yesus er tep asi ‘Dumsisi Kurur Ngebo,’ perami. Ada, Allahdi, “Ukunkamrume,” pepra deriramu upu yumada, tenpu upu peda, Yesusdi men yanitamamu. Tonda, mali keca tenpu pe pio men kuramu. Atep, ataru teka tenepra kurami nesaladi, Yesus er tep, ‘Dumsisi Kurur Ngebo,’ perami.
7. Melimna Deiyo Ngebo
Yesusdi er pe tep, aupu ton pepdau. Tonda, Peterusdi Yesus tenena tep, aupu pepu (Rasul 3:26). Deiyoda, ake. Ada, Allahdi ‘Nesala lyepkamne’ tenen, nimi lyemna tep wepra deiamu deiyo ngebo, Yesus tep wepra dokotepupa, nimi tuai nengdi popi. Allah erda, mali kun keca pio gum ngebo, im deiki ngebo kurura cadi, er dipapu tuai mutu men yanmanto. Atep, ‘Tuai nesala lyepkamne’ tenen, er melimna tep nengeda, Yesuspu tuai dokotepu. Yesus er kange mun keca deriramemeinge cap, popipa depunge cap, gam bukunge cap, ayuma ukupka deiki di, tuai nesala pio weika di lyepseu. Tonda, ‘Allah damai kunkameng’ tenen, tuai nesala lyepseredi, im deiki dubenkamsere. Ange yuma ukuserya deiki di, Allah melimrura tep, sun ataru kurami nengdi Yesus tep, “Allah er Melimna Deiyo Ngebo kurure,” peramitopu, nun peda utopu tupa penupe.
8. Allah er si eremami ati, kalengna deiyo neng
Yahudi yala neng, sun Allah tep karerami deiyo ati, akati kalengna deiyo nengda, sun yala ila ngeda, Yahudi yala neng, tonda Israel yala neng kurami dinin, ange amutara bokra yala yuk-yuk perami ngeda, Lewi yala neng ton kurami. Sun akati kalengami ngeda, ‘Allah er si eremna ati mali kweipsenung’ tenen, Yahudi yala gum nesaladi, nun Allah tep karenup ati men wektenge,’ teneramya tep, akati moupra kalengami. Atep, ‘Yahudi yala gum nesalada, tali mangkau di wekmengepa, nun Allah tep gam keca popra karenup ati, mali kweipsenung’ tenen, Lewi yala neng wepra deiamipa, anengdi akati moupra kalengami. Tonda, ‘Akati wengmenge nesaladi, yu kuprepa mali kupmengopda, akati mali kweipserur’ tenen, kalengami.
9. Saduki neng
Israel nesala yumada, ‘Allah er tenpu’ tenen, teka tenepra talerami dinin, anesala neitamai di bokra, yambul yuk-yuk keca teka teneramya cadi, nimi gungda, si yuk-yuk perami. Yesus kuramu taruda, ton tara neng, sun gungda, Saduki neng perami. Saduki nengdi, teka tenerami kecada ake.
Allah upu sekaminge, menmena pamu bari buku sekami ngeda, abuku si tep, Torah perami. Saduki nengdi aupupu talepra kurami. Yuk buku sengami ngeda, tamami. Atep, sundi utenerami. ‘Nimi depmengopda, sun sambala cap adipapu denunge,’ teneramya tep, ‘Nesala yuma depmengopda, kange di tamupra gam men bukronkamenge, angeda men kupmanto,’ tenerami. Tonda, ‘Isok-isok pe, Allah er im deiki melimna pel don neng malaikat peda, tek sisi men kununge,’ tenerami. Tonda, ‘Nimi konum depmengopda, Allahdi ton tara neng tep, wenepra uku jen ban men dokotepkamre. Ton tara neng, telep kunge nengda, Allahdi telep keca men karepkamre. Nimi konum depmengopda, akonuma,’ tenerami.
Yesus tuai kuramu taruda, tali kankan kunge nesaladi, sun Saduki neng upu gekepra, ila di men dombarami. Isomka nengpu denge weika di, Saduki neng sun perami upu gekepra dombarami. Yahudi yala neng, sun nimi deiyo talepra, nimi upu bongdina tep deiyo neng gung sida, Sandeheren neng perami. Agung neitamai bokrap, Sakudi neng cap, Farisi neng cap, kikiman pel doramipa, aneng yuma tep, Sandeheren neng perami.
10. Farisi neng
Israel nesala yumada, Allah er tenpu tepapu, teka tenepra talerami dinin, anesala neitamai di bokra, yambul yuk-yuk keca ton teka teneramya cadi, animi gung sida yuk-yuk perami. Yesus kuramu taruda, ton tara neng, sun gungda, Farisi neng perami. Farisi nengda, teka tenerami kecada ake.
Ada, Allah upu sekami buku yumada, talepra kurami. Atep, ‘Nimi depmengopda, sun sambala cap men denunge,’ teneramya tep, ‘Nesala yuma depmengopda, kange di tamupra gam bukrotenge,’ tenerami. Tonda, ‘Nimi konum depmengopda, Allahdi ton tara neng tep, wenepra uku jen ban dokotepkamre. Ton tara neng, sun telep kunge nengda, Allahdi telep keca karepkamre. Nimi konum depmengopda, Allah er damai welerbengepa, ‘Telep kurami do, gum do?’ tenen, dipetepredi, upu lepsikra bokeipkamsere,’ tenerami.
Yesus tuai mutu kuramu taruda, tali kankan kurami nesaladi, sun Farisi neng upu gekepra, ila di dombarami. Isomka neng dangeda, Farisi neng upu gekepra men dombarami. Yahudi yala neng, sun upu bongdina tep, ila nimi deiyo neng gung sida, ‘Sandeheren neng,’ perami. Agung neitamai bokrap, Farisi neng peda, Sandeheren neng kurami. Sun Farisi neng cap, Saduki neng cap, teka teneraminge yambulanun yuk-yuk kuramnga cadi, sunda yu kupnepa, upu weik pedarami.
Yahudi yala nengdi, Farisi neng tep utenerami. ‘Allah er upu sekaminge yuma tep, “Deiyoda, ake-ake,” lap pepmanto deiyo nengda, sun pua. Tonda, mem upu dombana tep nengeda, “Ukunkamrume,” pepra, telep upu lap pesenung nengda, sun Farisi neng pua. Sunda, ila kael neng kununge,’ tenerami.
11. Wenemna ati
Sun wenemna ati dorami ngeda, ila ati domi dinin, neitamai di wilipra, yuk-yuk metek ati ton dorami. Ton atida, tu deikipu dorami. Ton akatida, tu deiki cap, tu palipra tu amnge cap dorami. Sun ila nimi deiyo nengdi, tali nesala mali kupnopda, ateng kouprapnedi, akati pumbon dongorami. Ila weik ati dinin, neitamai wilipra domi atida, buplan cap telep kupra doramya tep, ton nengda, buplan dengne keca, selok konum dekdongopnopda, anesala bura tara men benmanto tep tamami. Dinino, ‘Ton nesalada benung’ tenen, ateng koupra dongomne neng cap, tonda akati pumbon jen talen neng cap, rantai tapu di gerekdonopnedi, dongorami (Rasul 12:3-6). Ton nengda, ila co bon potokra deiamna di, er yan dana-dana deipra, mata gipra geterbarami. Ada, ‘Yo pu weik jepyopda, men benkameng’ tenen, ukurami. Ukuramitopu, Paulus tep peda ukupmemei (Rasul 16:24).
12. Sandeheren neng
Sandeheren perami nengda, Yahudi yala neng, sun mali kupnepa, ila deiyo neng, upu lepsikra bongdina tep, ila deiyo neng kurami. Tonda, Sandeheren perami ngeda, ada pel si tep perami. Apel dorami nengda, ukuprap. Farisi neng cap, Saduki neng cap, Yahudi yala neng, sun du yapu cap, sun Allah tep karena deiyo neng cap, uda aneng, sun ila deiyo ngebo cap, aneng yumadi wisipra, upu bongdina pel dorami. Apel doramipa, sun yuk nengdi aneng sun dorami pel cap tep, ‘Sandeheren’ neng perami.
‘Sandeheren’ perami nengda, Yahudi yala neng, sun mali kupnepa, ila deiyo neng upu bongdina tep, ila deiyo neng kurami. Ukuramipa, sun Yahudi yala neng, Allah tep teka teneraminge cap, Musa sekamu mem upu cap, tonda Musadi peteremamupa, gekeramidi kupyakaramyanen, peterepnepa, kurami keca yuma cap yanipnyopda, “Er mali-mali kupmare,” pepra, ‘Upu lepsisingkameng’ tenen, Sandeheren neng, sun damai dubarami.
Uda, Sandeheren perami neng, sun pel dona tep, Yahudi yala neng dinin, yala yuk-yuk bokrap, ayala-ayala neng yuma, sun du yapu, Sandeheren neng kuramidi, upu lepsikra bongdina tep, ila deiyo pel talepra dorami. Tonda, Yahudi yala neng, sun mali kupne keca kunumna tep, Allah karena ila deiyo ngebo, ada nesala makuna tep, Allah er wilimdin ngebo peda, Sandeheren neng pel doramu. Allah karena tep, ila deiyo neng menmena pel doramyanen tapi neng pe, amenda punupnedi, pel doramne ngebo peda, Sandeheren neng cap, denepropnedi, pel dorami. Tonda, Musa sekamu mem upu ila di kael keami neng, peteremna ila deiyo neng kuraminge peda, Sandeheren neng kuramidi, apel dorami.
13. Kain Jen Ngebo, tonda Seramki, tonda Meme Dumanye, tonda Kakabar penup ngebo
Kain Jen Ngeboda, isok-isok yuma sun ila deiyo ngebo kurure. Erda, ila yu ngebo kurure. Erdi, ‘Allahda, er talerur keca yuma cap, nesala ban-ban yuma cap, mutu-mutu yuma cap, pio daraptalepra kunkamne,’ tenerure. Kain Jen Ngebo cap, er nyapu isok-isok yuma cap, mutu-mutu yuma pel donunge. Dinino, Yesus er depupane, Allahdi Yesus gam bukeipu. Gam bukudi, Yesusda akeca-keca yuma deiki tara kurya deiki di, Kain Jen Ngebo, tek sisi bisbisa kapudi, amenda sirya taruda, Kain Jen Ngebo popredi, gum kupra deipkamre.
Sirya taruda, Allahdi Kain Jen Ngebo dopra, uku jen ban dongopkamre. Uku jen ban dongoprepa, apio kunkamre. Er tenpu dinin, si yuk-yuk penge ngeda, Lusipar cap, Belesebul cap, Kain Jen Ngebo cap, Meme Dumanye cap, Sipen Ngebo cap, Kakabare cap, si weik penung dinin, er nong tenpua. Alkitab neitamaida, er si tep ngeda, Kain Jen Ngebo penupe. Allahdi Kain Jen Ngebo tep, “Erda Mok Upu Pena Deiyo Ngebo kurure,” pepu.
14. Allah Karena Deiyo Neng
Yahudi yala nengdi, sun mali kuramne keca kunumna tep, karena deiyo nengda, Lewidi deipupa, dadeipdanen, barami yala nengpu, apel talepra dorami. Anengda, Allah cap, nimi cap, neitamai kuramidi, Yahudi yala neng, sun wilimdina tep, Yahudi yala nengdi mali kuramne keca kunumna tep, kareryakarami kecada, Lewi yala nengdi dopra, Allah er si eremna ati pumbon, Allah er damai karerbarami. Yahudi yala neng, sun Allah si eremna cap, Allah tep gisal dona cap, sun Allah tep karerbarami ati pumbon kurami pel yuma tep, anengdi sunpu bongdina deiyo neng kurami. Sun yumada, Lewi yala neng kurami. Aneng tep, Allah Karena Deiyo Neng si perami. Indonesia upu deiki di, ‘Imam neng’ penunge.
Allah karena neng, sun Ila Deiyo Ngebo
Allah karena deiyo neng yuma, sun Ila Deiyo Ngeboda, Lewi yala ngebo kuramu. Yahudi yala neng, sun apu bo Lewidi deipu mi Harunda, erdi deipupa dadeipdanen, barami yala nengda, Allah karena ila deiyo neng pel talepra kurami. Lewi yala neng ton, Israel nesala, sun upu bongdina deiyo neng, Sandeheren neng, sun ila deiyo neng kurami. Tenpu keteng tamunto, tenpu ngebopu Allah karena deiyo neng, ‘Sun Ila Deiyo Ngebo kunkamre’ tenen, tenpu ngebo wepra deriramipa, apel talepra doramu. Yuk neng yuma gum dinin, Allah er si eremna ati pumbon, Pio Telep Lek Ati wengamu ngeboda, angebopu. Ada keteng tamun neitamaida, tenpu taru dipu wekudi, Israel nesala sun mali kuraminge tep, ‘Allahdi daepredi gum kupra deipkamser’ tenen, angebo dipapu akti wekudi, apel doramu. Ukuramnganen, ‘Sandeheren neng pel dopkup’ tenen, ketenepne taruda, angebo dipu, sun upu bongdina deiyo ngebo keprapudi tengamu. Tonda, pumun taru apelpu men di pel doramyanen, tamami neng peda, Sandeheren neng cap, wisipra pel dorami.
15. Allah karena tep domi ati
Israel nesala ban-ban yuma yuk-yuk kurami. Dinino, sundi Allah tep teka teneraminge yuma deiyoida, Yerusalem mutupu. Yerusalem mutu dinin, sun mali kurami keca lyemna deiyo atida, akati tenpua. Sun Allah upu gekena tep nengeda, sun yambul Allah upu ati, yuk-yuk doami. Ada, sun mutu-mutu yuma neitamai dorami. Dinino, sun mali kuramne keca kunumna tep nengeda, Yerusalem mutu neitamai, akati tenpu kareryakarami.
Menmena domi atida, Daud er mi Salomo, Israel nesala sun ila nimi deiyo ngebo tekamu taru di domu. Salomo er nai Dauddi, akati dona tep, keteng tamun 4 tahun deiki di, akati dona keca yuma bulupra deriramu. Deriramupa, Salomodi keteng tamun 7 tahun deiki di akati doramu. Doramipanen, konum dopra gawal daki pangeda, akati keteng tamun weik atengamu. Dinino, yuk mutu ila nimi deiyo ngebo, er sida Nebukadnezar, Israel nesala yuma popbisipu taruda, akati yuma olokrapudi, sikke buktapu.
Ukupu dinin, keteng tamun denge weik ton cap dakuramipanen, weik konum kupupa, amenda taruda, Israel nesala kurami mutu yuma taleamu deiyo ngebo, Herodesdi akati kange di punupra doramu. Yesus tuai kuramu taruda, Yahudi yala nengdi, Allah tep karerbarami atida, ada Herodes domu ati kwamu.
Tonda, sun Yahudi yala nengdi, Allah si eremna pe, sun mali kupnepa kunumna tep, gam kure keca popnopda, Allah tep karena tep nengeda, akati tenpu domi. Akati neitamai domidi, akati bura tara gel beilyawiamipa, Yahudi yala gum nesala pe, Yahudi yala nesala peda, Allah si eremna tep, abeilya pumbon wengbarami. Tonda, aneitamaida, akati pirmanpu beilya yuknge ton wipdongomi. Abeilya pumbonda, Yahudi yala nesalapu wengbarami. Yuk yala nesalada, “Akati meneng damai dopmepu beilya pum wengna meme,” perami. Abeilya pumbon atida, Yahudi yala neng, sun mali kupne keca kunumna tep, gam kure keca popra, Allah karena deiyo neng damai bena karepnepa, aneng dipu Allah tep karenai wengbarami.
Uda, Allah er si eremna cap, er upu gekena capda, yuk-yuk yambul ati dopra wengami dinin, sun mali kupne keca kunumna tep karerbarami atida, yuk-yuk ati men karerbarami. Yerusalem mutu dorami ati, akati pumbonpu karerbarami. Sun Yahudi yala neng, Allah tep sun teka teneraminge deiyoida, ‘Yerusalem ati, akati tenpua,’ tenerami. Tonda, Allahdi, ‘Akati deikida, ne si deipsene. Sun Yahudi yala nesala cap, ne cap kikiman kuna tep nengeda, akati pumbon dinin, Pio telep Lengna Atida, ne puto cap, ne dirine cap, akati neitamai deipnedi, pio akunkamne,’ pepka tep, sundi, ‘Akatida, nun teka tenana deiyo ati akurure,’ tenerami.
Nun Ketengban nesaladi, ‘Nun youa deiyo cap, kwet deiyo cap tarada, atara tenpua,’ teneramuputopu, Yahudi yala nesala peda, sun Allah tep, ‘Er karena cap, nun mali kun keca daemna tep karenai cap, nun deiyo atida, akati tenpua,’ tenerami.
Tonda, akati pumbon keca cap, akati nong cap, lap pena upu ton dimumdi, tonda Keluaran pasal 25-27 dinkamrume.
16. Ila Nimi Deiyo Ngebo
Allahdi nesala ban-ban yuma lyemna tep, Yesus dokotemnga tep, “Yesusda, tuai nesala yuma deiki tara kuredi, Nimi Deiyo Ngebo kurure,” perami. Mali kuna keca cap, isokdi upu moupserurdi, taleserur keca cap, pu jena deiyo keca cap, dena deiyo keca cap, akeca yuma bisbisa kapra loptapra lyemserur ngebo kurura tep, “Ila Nimi Deiyo Ngebo,” perami. Tonda aupu tupa penupe. Allahdi Yesus erepra deipupa, ‘Sirya taru Yesusdi akeca-keca yuma talenkamre’ tenen, Ila Nimi Deiyo Ngebo peramidi, penupe. Indonesia nesala sun upu deiki di, “Tuhan, tonda, Tuhan Yesus” penunge. Dinino, aupu deiyoda apua.
17. Nimi Lyemna Deiyo Ngebo
Alkitab neitamaida, Nimi Lyemna Deiyo Ngebo sengnungada, ton pasal neitamaida, Allah tenena tep sengnunge. Ton pasal neitamaida, Yesus tenena tep sengnunge. Dinin deiyoda, Yesusdi nun pununa tep, depupa er yapi embeua deiki di lyemserure. Ukupka cadi, teka tenenupa deiki di, Allahdi lyemserura cadi, Yesus tep, ‘Nun Lyemna Deiyo Ngebo kurure,’ penupe. Nimi lyemna tep deiyo ngeboda, Allah kurur dinin, tuai mutu yana, nun yo pununa tep depseu ngeboda, Yesus kurure. Tonda aupu tupa penupe. Nun mali kupe keca cap, dipru neitamai mali tenepe keca capda, ‘Allah daepseredi, gum kupra deipkamser’ tenen, Yesus popipa, er yapi embeua deiki nun tep, yo punupseu. Ukupka tep, nundi teka tenepmepyopda, Allahdi lyemseredi, gam pio kuna tep deiyo keca kareserure. Tonda, nun kange ikin kusere keca cap, pu jesere keca cap, ‘Ne pel ware kupra dopkun do?’ tenen, teniptonup keca cap tep, Yesus melimseredi lyemserure. Atep, sun men di kurami neng pe, nun ukutaru kupe neng peda, “Yesusda, nun Lyemna Deiyo Ngebo kuserure,” penupe.
18. Lipertini Neng
Lipertini Neng peraminge deiyoda, ake. Men di isomka nengdi, ‘Kankan nesala kunupmepedi, nun pelpu tali donkamseng’ tenen, sun co bo deiki di aneng sun nong kunupra, sun damai dopra derirami. Deiriramipa, akankan kurami nesaladi, sun isomka neng melimna tep, sun pelpu dorami. Dinino, bokrap ton nengda, telep pel dopnepa, sun deiyo nengdi, “Tali dabeso,” pepra tapi dinin, anengdi tupa pel domami. Ton nengda, sun deiyo neng tep, co bo deiki di kunupnedi, apel tapra tali barami. Atep, Lipertini Neng perami atida, ada apel doramne neng, sun deiyo nengdi, “Telepe, sun tali dabeso,” pepra tapnopda, pel konum kupnedi, Allah er si eremna tep, akati wengami.
19. Den bam bo deiki tara sengna pel
Apel deiyoda, ake. Allahdi Abraham tep pepu. “Kan cap, kandi deipmempa, dadeipdanen baramenganen, deipkameng nyape cap, pio melimkamne. Sun melimsenya deiki di, nesala ban-ban yuma tep, telep keca karepsenedi, telep kweipkamsene. Ukunkamsena tep, kan yala nengdi derinkameng nyape tep, yuk nengdi, ‘E, ada Allah er mawa nesala, tenenkameng’ tenen, sunda sun sal nyapu, sun den bam bol deiki tarange sengkamrume. Angeda pio kunkamrume.” Allahdi Abraham tep peipupa, amenda taru Musadi buku Kejadian pasal 17 neitamai di sekeiamu. Yahudi yala nesala yumada, ange gekeramidi kuramitopu, ukutaru peda tupa kununge. Yesus tuai mutu yau taruda, sun Yahudi yala neng yumada, yambul walwal di, utenerami. ‘Den bam bol deiki tarange sengnada, ila mambule. Ukupmepya deiki di Allah lyemserure,’ tenerami dinin, Yesusdi peramu. “Gume, den bam bol deiki tarange sengrumnya deiki di, men lyemsenune. Ne teppu teka tenepmumnya deiki dipu lyemsenune,” peramu.
20. Israel neng, sun apu yapu neng
Israel neng, “Nun apu yapu ake,” perami neng sida ake. Abrahamdi Isak deipupa, Isakdi Yakub deipu. Yakubdi nyapu denge weik 11 nyapu deipu. Er nyapu sida, Dan cap, Asyer cap, Naftali cap, Simeon cap, Ruben cap, Yusup cap, Yuda cap, Gat cap, Sepelum cap, Isakar cap, Benyamin cap kurami. Israel yala neng yuma sun yala sida, aneng si perami. Yahudi nesala yumada, sun yala tep, asi siperami. Yakub er mi Yusupdi Efraim cap, Manase cap deipu. Sun Yahudi yala nengdi, aneng yuma tep, “Nun apu yapu ake,” perami.
21. Opkal bol di keana tep tenda ati dominge
Akatida, Israel yala nesala, Mesir tara tapidi, nimi men kurami mutu neitamai, tali embarami taruda, Allahdi peipupa, sun pala opkal bol dopra, keana tep, tenda ati utopu ati wiprapidi, deipi. Amenda taru yumada, tenpu mutu tapra, yuk mutu embaramidi, akati urupra dopra tupa deipembarami. Tonda, mambul keca mawa derina tep, co bekin dopra deipidi, akati pumbonpu deipi. Akati pumbon dinin, aco bekin pumbon deipembarami kecada, ake. Tenpu ngeda, Allahdi peipupa, Musadi mem upu gel pala deiki sekeipu. Agel doprapidi, akati pumbon dinin, aco bekin pumbon deipembarami. Butene ngeda, Harun er maca tu deiki tapnepa, bal daramunge, akati pumbon dinin, aco bekin pumbon deipembarami. Tonda, Yordan me deiki, maca gweptopupa, me dana-dana bokra cepropupa, neitamai abisi bena ortara bei. Harundi ukuramu macada, atenda ati pumbon dinin, aco bekin pumbon deipembarami. Tonda, sundi Allah karena tep, yuk keca weik ton cap deipembarami. Uda atep, opkal bol di wipi tenda ati cap, akeca-keca yuma cap tep, ‘Allahdi karepseua tep, akati pumbon Allahdi peryakaserure,’ teneramidi, ‘Akatida pio telep lek ati,’ tenerami. ‘Nun nai Allahdi akati damai yana kikiman kunkamsera tep, akatida pio mambule,’ tenerami.
22. Nimi Mi Utopu Ngebo
Allah cap, Yesus cap, sun kikiman utopu kurerung dinin, Allahdi Yesus tuai dokotepkamu taruda, Allahdi tuai nesala lyemna tep, nimi urasin utopu keteneipudi, Yesus tuai mutu dokotepu. Yesus tuai kuramu taruda, er kange tenena cap, er nong cap, er putaramu keca cap ayumada, nun kurameptopu kuramu. Dinino, mali keca tenpu peda men kuramu. Tonda, Yesusdi nesala weik telep-telep kupra melimamu. Yesusda, Allah er Mi Sisa kuramu dinin, er nimi urasin utopu daudi, tuai mutu yana kuramunge tep nengeda, Nimi Mi Utopu Ngebo, si perami. Yesus er pedi, er pe teppu, “Neda, Nimi Mi Utopu Ngebo kunune,” peramu (Lukas 18:31, Lukas 21:25-28).
23. Allah er puto deiki di taleserure
Aupu peraminge deiyoda, ake. Yesus popipa, depudi er yapi embeua deiki di, konum kunupra punupseudi, nun lyepseue. Allahdi Yesus er depunge cap, gam bukeipunge cap, ukupka deiki di, nun mali kuramupu keca cap, kunup keca yuma cap, konum gum kupra deipseue. Ukupseua tep, nundi ange yuma tep, teka tenepmepepa, lyepseryopda, adeiki di, Allah er Lek Sambala kareseredi, er puto deiki melimserepa, Allah er upu deiki perserya utopu talepra kunupe. Atep, Allah er puto deiki taleserur upu perami ngeda, ada ayuma dukdongopra teneramidi uperami. Ukutaru peda, ange utopu teka tenenupa cadi, aupu tupa penupe.
24. Tu deiki embana keca
Tu deiki embana kecada, er sida Kereta Kuda, ukurami. Umpena yan sepatu kwamyadi, gamopbaramretopu, gat keca di, dana-dana bumanun (bulat kepra) domi. Akeca neitamaida, ‘Butene nengpu tekra embenkamreng’ tenen, sun tengnaida ason utopu keca di, pio telep kupra domi. Kuda bisam dana-dana kum dam tapu gerekdongopra, kuda bisam sipyal pumbon gat keca di deipnepa, kuda er si arekra dongopnopda, tapu dana-dana talepnepa embaramu. Ada, ‘Dumsisi tara benkun’ tenepne dingeda, dumsisi tara tapu gipnopda, akuda bisam dumsisi tara kepra embaramu. Utopu, ‘Telbalal tara benkun’ tenepne dingeda, tebalan tara tapu gipnopda, akuda bisam tebalal tara kepra embaramu. Tonda, abutene neng tekmana damai di, lyom co dukdongopra domi. Alyom co urup tarada, kuda dana-dana teknopda, tapu di dana-dana kuda bisam gerekdongopra, co gerengdongorami. Ukuramya tep, abutene nengda, ‘Kuda bisamdi akeca gipra dubenkusere’ tenen, yambul co teru dopra kuda bisam bali tara popnopda, akudadi akeca gipra banpa, sun abutene nengtu deiki baramrei.
25. Allah er upu lap pena neng, nabi neng
Allah er upu lap pena nengda, yala buteneto kurami. Tenpu yalada, Allahdi kirikra sun damai yana er upu pediramupa, aneng gekeramidi, yuk nesala gekenai bena, amenda kupkamu keca tep lap perami. Yesus tuai mutu men yanamu taruda, Allahdi pediramupa, lap perami neng, sun nabi-nabi neng sida, Amos cap, Yoel cap, Yesaya cap, tonda yuk nabi-nabi neng weike, utopu neng ton ukurami. Yesus konum tuai mutu yaudi, ka di tamupra im deiki welepu taruda, akurami neng utopu, Akabus ton kuramu (Rasul 21:10-11).
Ton yalada, amenda kupkamu keca men lap perami dinin, Allahdi kirikra sun damai yana, er tek sisi upu pediramupa, sun aneng gekeramidi Allah upu sengaminge cap, atarupu pepnenge cap dopra, nimi yuma gekena tep lap perami. Ada, sun pedi seki buku deikipu epra kael keamingepu men perami. Tonda, sun pe kange deiki di teneramingepu pio men lap perami. Allahdi kirikra, sun damai yandi, “Upepkurume,” pepnengepu lap perami. Aneng kuramitopu, Barnabas cap, Silas cap kuramrei (Rasul 19:6). Efesus mutu kuramu ngebo Pilipusdi, er ner nyapu dumbari deiamu ner nyapu peda, Allah upu lap pen nerapu kurami (Rasul 21:9). Ila mambul ngeda, Allah er pedi peamu upupu dopra lap perami. Yuk upu pio gume. Gambar dina tep, Kisah Para Rasul pasal 8 ayat 37 dirume.
26. Allah upu gekena ati
Yahudi yala neng, sun Allah upu gekena ati tep, lap pen upuda ake. Sun mali kurami keca kunumna tep, Allah karerbarami atida, Salomodi ila gel ati domunge tenpu, Yerusalem mutu domu. Akati pumbon tenpu, ‘Allahdi nun mali kunup keca kaukepseredi, gum kupra deipkamser’ tenen, sun gam kuramu keca bokra popnedi, Allah tep karerbarami. Yuk ati ton pio gume. Akati tenpua.
Dinino, akeca-keca karena gum dinin, Allah er upu gekena tep nengeda, Yahudi yala nesala kurami mutu yuma, yuk-yuk mutu dinin, Allah upu geken ati weika dorami. Ayambul ati pumda, gam kuramu keca popra men kareramya tep, Allah pediramu upu dopra peteremna cap, Allah morona cap kurami. Tonda, Allahdi peipupa, Musa sekeiamu mem upuda, akati pumbon ton peteremami. Tonda, sun Yahudi yala nengda, akati pumbonpu bulupra weknedi, sun mali kudaramne keca tep, upu lepsikra bongdirami. Ton tali keca tep, ‘Ware kupkup do?’ tenepne keca yuma tep, upu talerami.
Allah er upu gekena tep nengeda, akati wengbarami tumida, Sabat tumipu wengbarami. Sabat tumi peramyada, hari Sabtu penup tumi tep, sundi ‘Sabat tumi’ perami. Dinino, sun tenenada, ‘Sabat tumida, Allah er upu geken tumi,’ tenerami utopu, nunda, ‘Allah er upu geken tumda, hari Minggu tenenupe. Akati pumbon neitamaida, Allah upu peteremna neng tengna tep, co lase di lakra deiamnai di, teknedi peteremamipa, nerapu dana tara, nimi dana tara buknedi gekerami. Atep, akati domya deiyoda, nyapu peteremna cap, Allah si eremna cap, upu lepsisikra bongdina cap tep, akati pumbon wengbarami.
27. Ati arum deiki weleraminge
Sun ati arum deiki welepra bungbarami ngeda, ukuprap. Sun Yahudi yala nesala kurami mutuda, mo meteka dipu cemamnga tep, sun atida tu cap, gel cap di, doramidi ati arumda, banpu kupra dorami. Akati pumbonda, er ati deiyo ngebo kuramu. Akati deiki tarada, ago neitamai di wilipra, tonda nimi bo neng wengna ati domi. Ton wilipra dana tarada, tali gopu kupra tamyaida, Allah morona cap, tali bungna cap, kunkamya tep domi. Ukuramitopu, Piter peda, er ati arum deiki Allah mororbeu (Rasul 10:9).
28. Kristen nesala peraminge
Antiokia mutu di gonga kepra, Yesus teka tenerami nesala tep, Kristen nesala perami. Ada, Yesus tuai kuramu taru er kuramutopu, Yesus teka tenerami nesala peda, utopu kupra kuramya tep, yuk nengdi anesala tep teneramidi, “Anesalada Kristen nesala kununge,” perami. Tonda, Yesus er si tep, Yesus Kristus perami. Tonda, Yesus er upu peteremamupa, er upu gekeramidi, teka tenepra dumsisipu kurami nesala tep, “Anesalada Kristus utopu kunge nesala tep, sun sida, ‘Kristen nesala’ kununge,” perami. Ada, er upupu pio moupra gekeramidi, dombaramya tep, uperami.
29. Herodes cap, Ageripa cap tep upu
Herodesda, menop taruda, nimi deiyo ngebo men kuramu dinin, amendada, Roma nesala, sun pio ila nimi deiyo ngebo Gaiusdi, tenepu. ‘Nun Roma neng makuna tep, Herodes ila nimi deiyo ngebo keprra deipmepepa, amutu talenkamre’ tenen, Herodes erepra deipudi, Palestina tara dinin, deiki tarapu bokra, Herodes tep karepu. Amendada, Gaiusdi Herodes er mam bo Antipas konum tapudi, Antipas taleamu mutu Galilea cap, Perea cap, dopropudi, Herodes tep karepu. Amenda taru, Gaius depupa, er yo pununa tep, Roma mutu pio ila nimi deiyo ngebo, er si Kelaudius erepra tekudi, Yudea tara cap, Samaria tara cap, ‘Herodes talenkamre’ tenen, karepu. Herodes, er deipu mi sida Ageripa, erdi deipu ner mi sida, Bernike. Herodesda, keteng tamun denge weik 54 tahun konum wisi deipkopda, mali kupupa, Allahdi Herodes tep derepu. Derepudi, Herodes er wenemna tep, deiplyu pumbon kwali karepupa, akwalyedi Herodes er deiplyu jepropupa, depu (Rasul 12:20).
30. Nena Gum Roti Kwaneng Kalemna
Nena Gum Roti Kwaneng Kalemna deiyoda ake. Sun Yahudi yala neng, ila mambul kalemna tumi si tep, Kaplemna Kailya Kalemna Tumi perami. Atumi ngeda, Yahudi yala nesala Mesir mutu kurami taruda, Allahdi sun weni nyape men popka tep, ‘Akupunge tep, men tapkamepe, pio tenenkamep’ tenen, ila kalemna tumi wepra deiami. Tenpu tumi di, akalemna konum kalepnopda, atumi di nuknedi, mapbaramnanen, yoneitam tumi deiki di, roti kwaneng nenange men jerami. Ayoneitam tumi neitamai yumada, nena gum roti kwanengpu jerami.
Dinino, yoneitam tumi konum kupnopda, kange di ton cap, roti kwaneng nena deiyonge cap dapra jerami. Nena gum roti kwaneng men jerami taru tep, “Nena Gum Roti Kwaneng Kalemna,” perami. Tenpu tumi cap, yoneitam tumi cap deiki di, sun mali kuraminge kunumna tep, sun gam peirami keca popra, Allah tep karerami.
Nena gum roti kwaneng men jeraminge deiyoda, ukuprap. Allahdi Mesir mutu nesala sun weni keca cap, weni nyapu cap popu tumi lukundada, Israel nesala tep upepu. “Nedi, Mesir mutu nesala, sun weni keca cap, nyape cap popnyopda, sun Israel nesala menmena benkuruma tep, ‘Benkurum taru konum damai kupsera tep, sika di piripdarum’ tenen, nena roti kwanengda, pel weik doprum cadi, ange men dapkurume. Nena gum roti kwanengpu dapra jepkurume. Ada, sun menmena benkuruma tep pepsene,” Allahdi Israel nesala tep pepu. Atupa tenena tep, Nena Gum Roti Kwaneng Kailya Kalemna, tupa kaleami. Awar-awar neitamai kurami ngeda ake.
Tumi 1: Kaplemna Kailya Kalemna Tumi
Tumi 2-7: Nena Gum Roti Kwaneng Kailya Kalemna taru
Tumi 8-49 - tali kuna taru
Tumi 50 - Pentakosta tumi
31. Wenemna ati kalengna neng podaraminge
Sun wenemna ati kalengna deiyo nengdi podaramya deiyoda, ake. Ila pemerintah deiyo nengdi mali kupne nesala tep, ateng koupra wenemna ati deriryan dingeda, sun akati kalengna deiyo neng tep, uperami. “Sundi, ‘Aneng benung’ tenen, moupra kalengkamrume. Akati dongopmap neng, bura bendopmengopda, aneng sun yo pununa tep, sun kalengna deiyo nengda, tek sisi wenepra popkamsepe,” pepra deiami. Atep nengeda, ateng koupra wenemna ati deamne nesala bura benopra, akati kalengna deiyo nengdi, ‘Pemerintah deiyo nengdi nun wenemna tep popsenung’ tenen, sun pedipapu sun pe yuk podarami. Ukuramya tep, Piter cap, wenemna ati dongami nesala cap, bura beiyopda, jen neng dipterepidi men epipa, Herodesdi awenemna ati kalengna deiyo neng tep poptapu (Rasul 12:19).
32. Giso deiki buri taleraminge
Ataruda, ukurami. ‘Sun yuk neng pel dorbenkameng’ tenen, dokotepkup taruda, dokotepkup neng tep, giso deiki buri talepnedi, dokoterami ngeda, utenerami.
1. ‘Allahdi aneng tep, er puto karenkamre’ tenen, ukurami.
2. ‘Nun puto bokra karepmepepa, aputo deiki cap, nun si deiki cap di melimrepa, kange deipra pel donkamenge,’ teneramidi ukurami.
3. “Apel talepra pio donkamrume,” pepra, pel wepra derina tep ukurami.
4. ‘Nundi telep kupra melipmepepa, sun aneng kange bongtona gum di, balila kepmengedi, kange deipra apel telep kupra donkamenge’ tenen, ukurami.
33. Ila gapung co laut mokon deiki di embarami keca
1. Ila pala opkal. Mokon deikida, talipu men embenmanto kurami. Atep, akeca kael nengdi, ‘Kumanya puto aopkal yana pung pepredi, barepyopda, akumanya puto deiki di, nun gapung co dubenkamsere’ tenen, opkal co gupanya dipra, erepra derirami.
2. ‘Gapung co demberur’ tenen, ikin keca dopra, tapu gerekdongopra, gapung co gerekdongopnopda, mokon pumbon dokoteramipa, mokon pumbon dinin, tuai saka kalukdongopnopda, gapung co pio dimpenapu, men benmanto kuramu.
3. Gapung co urasin tamuna tep, ila co lase betaprap, gapung co der tara, tapu di getepra domidi, mokon pumbon adinu dokotemami. Ukuamipa, gapung co talena deiyo ngebodi, akeca talepra, ‘Ordumsisi tara benkun’ tenen, co lase wamupra benkun tarapu derirami. ‘Tonda ortebalal tara benkun’ tenepnopda, utopu ortarapu co lase wamupra derirami.
4. Kunumteren tapu. Mokon kaurye tep, kunumteren tapuda, lyom tapu di ikin kecada, atapu kupkupai gerengdongorami. ‘Gapung co mokon pumbonda, tu dukpepredi, bariprur’ tenen, ‘Mokonda kaurye do, dal do?’ tenen, atapu mokon pumbon dokotepra kunumtererami.
34. Daud er loka beu ati
“Daud er ati loka beu,” pepu ngeda, ada ati tek sisinge gume. Ukupmanto upu, atau domon upu utopu upu deiki di pepu. “Ati,” pepkada, Daud er yala neng tep pepu. “Akati loka beue,” pepkada, Allahdi Daud er yala nesala tep, keana taru teppu tamamunge tep pepu. Ada, pumun taru Allahdi, Daud yala nengdi dadeipdanen baramenganen, sirya taruda, “Nimi Lyemna Ngebo sun tep karepkamsene,” pepra pediramu dinin, sun Daud yala nengdi mali kupnopda, Allahdi ke tarupu tamamu. Tamamu dinin, ‘Amendada, ne pediramsitopu, Daud yala neng deiki di, tuai nesala sun Nimi Lyemna Deiyo Ngebo karepkamsene,’ tenepudi, Allahdi nabi Amos tep, aupu pepupa Amosdi seku. (Amos 9:11-12).
35. Musa sekeiamu upu
Musa sekeiamu upu perami ngeda, menmena Musadi sekeiamu buku, pamu bari buku er si tep “Taurat,” tonda “Torah” perami. Apamu bari buku sida, Kejadian cap, Keluaran cap, Imamat cap, Bilangan cap, Ulangan cap, ukuprap buku tep, abuku yuma dukdongopra si pena tep, “Taurat,” perami. Uperami dinin, ton taruda, Allah upu sengami neng, sun pe kange di sengami buku yuma dukdongopra tenena tep, “Musadi sekeiamu upu,” tali perami.
Tonda, Farisi neng cap, Saduki neng capdi, ‘Nun kange tenena cap, nun upu deiki cap di, tapakra sengamep’ tenen, mem upu weik ton cap tapakra sengami. Aupu sengamya tep, yuk ngeda, Musadi tek sisi men sengamu dinin, ton taruda aupu yuma dukdongopra tenena tep, “Musa sekeiamu upu,” pepra tali perami. Ton taruda, Allahdi peipupa, Musadi sekeiamu mem upu, Keluaran neitamai kure ngeda, mem upu sepuluh (10) sekeiamu ngeda, aupu tenpu tenena tep, “Musa sekeiamu mem upu,” perami. Atep nengeda, Alkitab neitamai, aupu kwapmaraida, moupra tenepmumdi, kael kepkamrume.
36. Co bo deiki kunumami nesala
Anesalada, isomka nengdi, sun co bo deiki di tali kankan kurami nesala, sun nong kunumami. Kunumamipa, anengda kunumna keca dorona gum dinin, tali pelpu pio weik dorami. Tonda, yuk nengdi aneng tep, ‘Sunda tek sisi nesala gume. Tali bura tara gam kuramre keca utopu, nun amutara utopu nesala kununge,’ tenerami. Indonesai nengdi ‘bukdak’ penunge. Pel deiyo nengdi, anesala dororaminge deiyoda ukuprap.
1. Co bo deiki di kunumami neng, tali pel dorami nesaladi, sun nyapu deipnopda, sun peda apelpu dorami.
2. Ataru kurami nesalada, Yesus teka tenena gum nesaladi, nyapu weik deipnopda, ‘Melipra embana nun songe,’ teneprapnedi, sun nyape deipnopda, burapu tamami. Yuk nengdi anyape epnopda, ‘Nun pel tali domkamseng?’ tenen, co bo deiki di kunupra dororami.
3. Tonda, nyape weik deipnopda, bokra ton mida, ‘Ne co bo ton dopropkamne’ tenen, yuk neng karepnedi, kunumami. Ton ngeda, sun pe mawa tep kemdorami.
4. Ton nengda, bung keca weik kunupnepa, co bo suktalepnopda, suktalepman co bo punupra dorona tep, tali pelpu dorami.
5. Ton nengda, sun yuk neng nyapu dinin, ‘Upula dopropnedi, nedi yuk neng tep, co bo kunupkamne’ tenen, yuk neng nyapu upula dororamidi, isomka neng damai kunumbarami
6. Tonda, ila nimi deiyo nengdi, nesala mali-mali kuramnopda, sun wenemna tep, ‘Tali pelpu donkameng’ tenen, tapu kouprapnedi apelpu dimami.
37. Tali keca dinin, si eremami keca
Ton nesalada, Allah er kai telep upu gekepnedi, teka tenepnopda, er upupu talepra dombarami. Dinino, ton nesalada, Allah tep teka tenena gum nesala cadi, gel cap, gat tu cap, co cap, yuk kunumna weik keca emas cap, perak cap, dopropnedi, petupra gam kure keca yala-yala yuma urasin utopu kuprapnedi, petupra deriramidi, ‘Akecada, nun nai bo cadi, erdi melimkamse’ tenen, isok er sipu, si pepra si eremami. Akeca yumada, gam men kuramu keca dinin, anesaladi sun kange tenenange cap, sun dipru cap yuma, akeca deikipu deipnedi, isok si eremami. Ukuramya deiki di, pio mali kurami.
38. Nasaret neng
Menop taruda, Nasaret nengdi Allah tep, “Ukunkamepe,” pepra pediramipa, Allah er pelpu talepra dorami. Apel dorami taru neitamai di, ‘Mangkau di mali kupnopda, nun dipruai mali kupserure,’ tenerami. Atep nengeda, sun dipru lepsikra derina pel tep nengeda, Allahdi peipupa, Musadi Yahudi yala neng tep sekeiamnga utopu, pel doramnepane, yoneitam bari tumi konum kupnopda, Allah karerbarami ati buplan damai di, sun potong yuma toupra, uku dongorami.
Ukuramidi, Allah karena tep karerami kecada ake. Ner domba bisam butene cap, gem domba bisam tenpu cap, roti kwaneng jen keca cap, me cap karerami. Akarerami kecada, kunumna weik keca tep, kankan kunge nesalada, akeca yuma tali men karepmanto kuramya cadi, isomka neng dipu melimami. Angetopu, adumbari nengdi Allah tep, “Ukunkamepe,” pediramipa, amendada Paulusda, anengdi sun karepkaminge tep melipu.
Yahudi yala neng, sun apu yapu cap, sun capdi ukuramitopu, Paulus er peda ukuramu. Allah pel don taru tenpu wepra deipnedi, “Ataru yuma ukupkamne, ukupkamne,” pepra, Allah tep pediramidi, apel dorami taru yumada, weneri keca pio men kurami.
1. Tenpu ngeda, kange yawaramamre yu me, anggur me pio men jerami.
2. Butene ngeda, deramne nesala damai pio men barami.
3. Weneri ngeda, sun potong pio men tourami. Dinino, sun wepra derirami taru yuma konum kupnopda, Allah karena tep, telep keca karepnopda, sun potong tourami.
Ange utopu, Paulusdi Allah tep, “Ukupkamne,” pepra peiamnga cadi, ukupu (Rasul 18:18).
39. Yesus Bisi
Yesus Bisi peraminge ake. Yesus er peteremamu upu cap, er kuramunge cap, “Angepu dopropmepedi, talepra dumsisipu kunkamepe,” pepra peteremami upu tep, “Yesus Bisi,” perami. Tonda, ukuprap. Yesus teka teneramidi, tuai kurami nesalada, im deiki bana bisi ketenem dina tep, “Yesus bisi,” perami. Yesus teka tenerami nengdi, Yesus er peteremamunge cap, er kuramunge cap epidi, ange talepra utopu kurami neng tep, yuk neng epidi, ‘Yesus peteremamutopu kunmange,’ tenepidi, “Yesus er bisipu dombanunge,” perami. Sun uperamitopu, Yesus peteremamunge cap, Allah upu pesere upu cap, kikiman utopu kupra kunung neng tep, “Sunda Yesus bisi banunge,” penupe.
40. Kuda bisam
Kudada, sapi bisam nong yambul utopu kurur keca dinin, er yanda lyom weike. Tonda, sapi bisam giso deiki takke weik kuramre keca, er sida abolyakot tengamra utopu kecada, kuda bisam giso deiki men kurure. Israel tata neitamaida, sapi bisam bali deikida, nimi bukra men banunge. Dinino, kuda bisam puda, er bali deiki nimi bukmengepa embarure. Akeca gambar dina tep, Yakobus pasal 3, ayat 3 dirume.
41. Kaisar
Kaisar perami ngeda, Roma nesala sun taleami mutu yuma, pio ila nimi deiyo nengdi, sun talepra dorami pel tep, Kaisar perami. Uda ange utopu, Raja neng cap, Gubenur neng cap perami neng ayumada, nimi deiyo neng kurami dinin, Kaisar neng sun amutarapu kurami. Kaisar nengda, pio deiki tara, ila deiyo neng kurami. Roma mutu nesala talerami keca cap, kurami mutu yuma cap, talepra ila nimi deiyo neng kurami.
Lukasdi, er buku sengamu taruda, Kaisar Agustus kuramudi, Yahudi yala nesala kurami mutu yuma taleamu (Lukas 2:1). Ton Kaisarda, er si Tiberius. Rasul neitamai seku Kaisarda, er nimi si Kelaudius kuramu (Rasul 10:28, 17:7, 18:2). Ton Kaisarda, Yesus teka tenerami nesala tep, pio weik poramu ngebo er sida, Nero kuramu.
42. Bernike
Bernikeda, men di Herodes perami ngebo, ila nimi deiyo ngebo, er menmena weni deipu ner mida, aner kuramu. Bernike, er weit nerda, Derusila kuramu. Bernike er mam bo sisada, Herodes Kalikis menmena dopu dinin, er depupa, Bernike er du bo sisa, tek sisi men dopu dinin, tali kikiman er cap kuramreidi nyangdaramrei. Atep, aner Bernikeda, pio mali-mali kuramu ner. Er du bo sisa, er sida Herodes Ageripa kuramu. Raja Herodes Ageripa cap, er mal ner Bernike cap, Kaisarea mutu yareidi, Paulus peteremamu upu yana gekenmarei (Rasul 25:13).
43. Co takke di lukdongopmempa, pu jenmakere
Rasul 26:14 deiki, Allahdi Saulus tep, domon upu pepu. Aupu pepunge deiyoda ukuprap. Aupuda, sun menop taru di kuramyada, sapi bisam popronen bana tep, co takke luprap douamnadi, sapi bisam menepra deipnedi, co takke di lukdongopnedi, popronen baramipa, sapi pu jepnepa, sepra baramu. Dinino, pio balila sapida, ukupne pangeda, ‘Ware keca di ponmaner do?’ tenen, deiyo tara di amnyo bisi gukra dopnepa, aco dula dipu gungdongoramupa, asapi bisam pu weik jepne panenda, tamupra sepdara banapu kuramu. Ukuramupa, dirami keca tep, Yesus ukupmanto deiki di, Saulus tep aupu pepu. “Sauluso, co takke di lukdongopmaken ngeda, warya tep, dopra donokmanerem do?” pepra wenepu. Angetopu, Allahda puto pio weik ngebo cadi, ‘Tuai neng kange tenepra kunge keca di, Allah er tenere keca tep, men bisipra upu sektenge, tenenkameng’ tenen, pepu.
44. Artemis
Efesus mutu nesalada, sun isok deiyo ner sida, Artemis kuramu. Aisok Artemis, er si eremna tep ukurami. War baramre bisipu, kuru di dombaramrenge cap tep, ‘Isok deiyo ner, er cap, er kam cap, im neitamai embarunga cadi, Artemis er sipu eremkamepe,’ teneramidi, er sipu eremami. War tep nengeda, ‘Er si Artemis kurure,’ teneramya tep, ‘Artemis er cap, er kam cap, kikiman embarunge,’ tenerami. Tonda, im deiki di tali gel utopu keca sakupa, Efesus mutu nesaladi asaku keca dopra, sun mem ati neitamai derirbenamidi, ‘Akecada, Artemis er urasin utopu keca kurure,’ tenepra, er sipu si eremami. Amutu nengdi, ‘Artemis er urasin ukuprap kurure,’ teneramitopu, er urasin utopu keca, meteknge weika di petupra deriramidi, kunumami deiyo neng cap, Artemis er si eremami neng capdi, Paulus Efesus mutu peteremamu taruda, er Paulus tep weik deremami (Rasul 19:24).
45. Roma neng
Roma nesala sisa, sun nyapu deipnopda, anyapu tep, “Sun Roma nesala kununge,” perami. Dinino, Roma mutu ila nimi deiyo nengdi, sun upu peramya deiki di, yala yuk nesala dinin, sun Roma nesala utopu kupra kemdirami. Deiyo ukuprap. Yala yuk nesaladi, sun pel telep-telep kupra doramidi, kuramya deiki di, Roma mutu nimi deiyo neng epra kange deipidi, anesalada Roma nesala utopu kemdirami.
Ukuramidi, anesala tep kalekra melimami. Paulus er apu boda, tek sisi Yahudi yala ngebo kuramu dinin, Roma ila deiyo nengdi er tep, kange deiamidi, sun upu peipya deiki di, Roma mutu ngebo utopu kupra deipi. Atep, angebodi deipupa, dadeipdanen baramyanen, Paulus peda deipya tep, “Paulusda Roma mutu ngebo sisa kurure,” pepra deipi (Rasul 22:28).
46. Me dongona
(Rasul 22:16) Buku Rasul neitamaida gum dinin, yuk Allah upu neitamaida, Allahdi aupu konum lap pepseu. Ada, nun me dongosenga deiki di, Allah men lyemserure. Nun Allah upu gekepmepedi, Yesus tep teka tenepmepya deiki dipapu, Allah lyemserure. Yuk keca deiki di pio gume. Me dongona pel dona do, yuk pel yuma doramepya deiki di, Allah men lyemserure. Allahdi bicau teneamseua tep, Yesus dokotepseupa, er popipa er yapi embeua deiki dipu, nun mali kunup keca yuma, gum kupra deipseredi lyemserure. Konum lyepseua cadi, Yesus tep, teka tenepmepya deiki di, nun mali kunup keca gum kupra deipseredi, lyepseredi, er nyapu kemdiserure.
Me dongosenunga deiyoda, ake. Ada, ‘Yuk dakunge nesaladi, ange epsengedi, kael kepkameng’ tenen, peten kemdina keca utopu kunupe. Me pumbon dongosenungada, nun dena utopu kunupe. Allahdi nun cap, Yesus cap konum dipru dukdongopseua tep, me pumbon di, ka tamupra tekropyoda, amenda taru nun depmepya peda, Yesusdi gam bukeipkamsere. ‘Ukutaru neitamai yumada, Allahdi ukupu kange dipru kareserepa, dumsisipu kunkameng’ tenen, me dongosenunge. Ada ‘Sunda Yesus konum teka tenepya tep, Allah er nyapu konum kununga cadi, dumsisipu kunkameng' tenen, me dongosenunge.
47. Yesaya 49:6
Allah er upu lap peramu ngebo, nabi Habakuk peiamu upuda, deiyo weneri akupmare.
1. Ila mambul ngeda, ‘Yesusdi nesala ban-ban yuma kunga neitamai nimi weika di lyepredi, sun kange dipru talenkamre’ tenen, peipu.
2. Deiyo butene ngeda, Allahdi Yahudi yala nesala tep tenepu. Menop taru di nesala yala weik kurami dinin, ‘Sun Israel yala nesaladi, ne upu dopra nesala ban-ban yuma tep, peterem benkamenge,’ tenepudi, wepra deiamu.
3. Deiyo weneri ngeda, Paulusdi nabi Habakuk sekamu upu konum kael keamngadi, ‘Nundi Yesus kai telep upu pio men gekerami neng tep, peterem banup neng kunupe, tenepkamnenga’ tenen, nabi Habakukdi peiamu upu dopra, Paulusdi pepu.
48. Allahdi, ‘Ne pio songe,’ tenerur keca
Yohanesdi, “Allah er pio songe,” pepkada, pumun sengami buku si, Daniel 9:27, tonda 11:31 deiki di sekami. Deiyo butene akupmare.
1. Tenpu ngeda, pumun taru Yesus tuai mutu kapul men yau taruda, tenpu mali kuramu nimi deiyo ngebodi, Yerusalem mutu neitamai domi atida, Yahudi yala neng, sun Allah karena tep, ila mambul ati pumbonda, isok si eremna keca deipupa, Allahdi, ‘Akecada pio ne songe,’ tenepudi akati tapu.
2. Deiyo butene ngeda, sirya taruda, Allahdi, ‘Kain Jen Ngebo tep, ne popnedi, bisbisa kapkamne,’ tenerur ngeboda, pio Ila Mali Kuna Deiyo Ngebodi, isok si eremna keca Yerusalem mutu neitamai deipkamre. Angeda, kapul men kupmare. Aupuda, Allah upu neitamaida, (2 Tesalonika 2:4, tonda Wahyu 13:14-15) neitamai ton dinkamrume.
49. Yahweh
Allah er si, tek sisi ngeda, Yahweh kurure. Allahdi Musa tep, aupu katuai di lap pepudi, “Ne si tep, ‘Yahweh’ kael kepnememdi, tupa penkamnerume. Israel nesala yumadi, ange kael kepmengedi, asipu sipenkamnenge,” pepu (Keluaran 3:15 dirume).
Upepu dinino, amenda taruda, sun Israel nesala, sun pe kange dipapu, ‘Uo, Allah er si sisa ‘Yahweh’, katuai di men penkamepe. Nun mali kupnup tenen, nun kware,’ teneramidi, sun upu, Ibrani upu deiki di huruf ‘YHWH’ angepu sengnunge. Ibrani upu penge nesaladi, ‘Allah er si Yahweh men peptepe’ tenen, kware tupa kununge. Kware kununga cadi, ‘Tuai nengdi Allah er si sisa katuai di men pepmanto kunkameng’ tenen, sundi huruf YHWH angepu sengnunge.
Dinino, Allah er pedi Musa tep, “Gume, ne sida ‘Yahweh’ kunerure. Asi Yahweh kael keprumudi, asipu erepra, ne tep gispal donkamnerume,” pepu. Atep nengeda, Allah er si sisada, katuai penada, telepe pua. Kware kuna gume. Ada, Allahdi, “Ne si Yahweh kael keprumudi, asipu penkamnerume,” pepra deipka tep, “Yahweh” pepmepyopda, telepe pua.
Ibrani nesaladi YHWH sengnung dinin, nun aKetengban Alkitab sekmepu nengdi, ‘Gume, angepu sekmepyopda, aupu penada iriwarye kupserepa, men pepmanto kupserurur’ tenen, nun upu deiki di, huruf ‘a’ cap, huruf ‘e’ cap tapakmepudi, sengnupe. Atep, Allah er si tep, ‘Yahweh’ sengnupe. Tuai mutu weike, Yesus tep teka tenenge nesaladi, ange utopu kupra sengnunga cadi, nun peda utopu kupmepu.
Indonesia Alkitab neitamaida, Allah er si ‘Yahweh’ katuai men sengnunge. Sun Alkitab neitamai yuma, Ibrani upu deiki di, Allah er si ‘Yahweh’, sengamiaida, sundi, ‘TUHAN’ sengnunge. Dinino, Indonesia Alkitab neitamai yuma, aupu ‘TUHAN’ epmumyopda, ‘E, acada, menop taru, sun Ibrani nengdi Allah er si sisa, Yahweh sekra kwuamngai,’ tenenkamrume. Allah er si Yahweh penada telepe pua.
50. Haleluya
Ton Alkitab neitamaida, aupuda, Ibrani upu deiki di senunge. Aupu deiyoda, ake. Ada, Ibrani upu menmena ngeda, ‘halal’ deiyoda, ‘Allah kanda pio telepe,’ pena tep, penunge. Sirikaida, ‘Yah’ seki. Angeda, Allah er pe si sisa tep, ‘Yahweh’ seki. Atep nengeda, aupu butene dukdongopmengopda, “Yahweh tep, kanda pio telepe kurume,” pepra seki. Haleluya deiyoda ange pua. Sun kael kemna tep ange sekmupu.
51. Mazmur 103:4
Akayat neitamaida, pedina upu perur dinin, Ibrani upu deiki di aupu tep, ‘hesed’ pepra seki. Perjanjian Lama neitamaida, aupu pio weika di sengami. Indonesia Alkitab neitamaida, ‘kasi-Nya kekal’, tonda 'kasih setia' sengnunge. Ange telep dinin, nundi, ‘Ketengban nesaladi aupu deiyo neitamainge moupra kael kepkameng’ tenen, aupu ‘hesed’ deiyo ngeda, acadi jenek kupra sekmepu. Ada, ‘Allahdi er mawa nesala tep, ila di bicau tenerura cadi, sun tep ‘Ukupkamsene,’ pepra pediramu upu yumada, tamna gum dipapu, tek sisi pio karenkamra cadi, nong tek sisi kupkamre,’ tenena tep, aupu ‘hesed’ sengami.
52. Efod
Akeca er si Efod, angeda sun imam neng, sun deiyo ngebodi akeca dopra, er nong urasin tara dinin, er taram deiki kenengamu. Akeca Efod deikida, urasin pio telep gel warna-warna yuk-yuk akapunge palepra deiami. Ton gelda, er si Urim, ton gelda, er si Tumin ton akeca deiki palepra deiamipa akwamu. Agel-agel yuma dipeteramipa, Allah er puto deiki di, agel warna yuk kepra deiamnga deiki di, sun imam nengdi, ‘E, Allah Yahweh, erdi nun tep, ‘Ukupkurume, tek sisi ngeda ake, sun kael kepkurum ngeda ake, sun kunkamrum ngeda ake, ’pepra deipserada, akonum’ tenen, akeca diramidi, adeiki moupra kael kemamidi, Israel tara nesala yuma tep lap perami. Atep nengeda, akeca Efod deiki deiami gel, Urmin cap, Tumin cap, diramya deiki di, peten kemna tep keca kupka cadi, adeiki di sun kunkami keca, kael keamidi, Israel nesala yuma tep lap perami.
53. Undi
Akecada, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam neng cap, deiyo-deiyo neng capdi, yambul keca dopra, adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si seki ngeda, menmena di katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apetenkemna pel dorami.
54. Peti Perjanjian
Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Aco deikida, kunumna weik keca, er si emas dopra palepra deipi. Aco peti pumbon neitamaida, gel pala butene deipi. Ada, Allahdi, ‘Angeda ukunkamrume, angeda pio men kunkamrume. Ukupmumnyopda, neda sun nai bo Allah pio kunedi, melipra kalengkamsene,’ pepra, gel pala deiki sekra deiamu mem upu cap, pedina upu capda, aco pumbon er si ‘Peti Perjanjian’ dongopra deipi. Tonda, Harundi taleamu maca cap, Allahdi Israel nesala tep kareamu im deiki kwaning, er si ‘mana’ metekanun cap, dopra, apeti pumbon dongopi. Apeti co deiki tara buplan singina tep ngeda, kunumna weik emas, pio telepnge di, palepra deipi. Ange deikida, apeti buplan er sida, ‘Penutup Pendamaian’ pepi ngeda, malaikat urasin utopu keca ton, er sida ‘Kerub’, butene di ketenepra deipi. Sun Israel nesalada, ‘APeti Perjanjian damaida, Allah Yahweh, er Sambala cap, er puto cap, er dirine cap, er pio telep kurenge yuma capda, aKerub deiki tara pio akunkamsere,’ tenerami. Akeca tep, tonda ‘Pedina Upu Kina Bekin’ peptepe. Akeca kael kemna tep, Keluaran 25:11 dinkurume.
55. Telep Lengna Ati
Allah er si eremna tep domi tenda ati pumbon, yambul ati butene wilipra deiami. Akati buteneda, ‘Allah erngepu kurure,’ teneramya tep, sun imam-imam neng dipapu akati wengbarami. Buplan damai dinin, menmena wilipi atida, jen deirina meja cap, weica laramre keca derinai cap, deiamya cadi, akati er sida, Telep Lengna Ati kuramu. Akati dinin, yambulanun ton cap akati pumbonda, lyom opkal er si gorden ton kapkotepi. Gorden ortarada, ati butenenge ton wilipra deiami. Akati sida, ‘Pio Telep Lengna Ati’ kuramu. Akatida, ‘Tali imam neng ton wengnung’ tenen, telep lyom opkal, er si gorden kapkoptepi. Akati pio pumbonaida, imam neng, sun ila deiyo ngebopu akati wengbaramu. Akati pumbonda, ‘Allahdi Israel nesala, sun mali kun keca daepredi, gum kupra deipkamre’ tenen, gam keca popinge, yapi doupra, akati pumbon dubenamudi, Peti Perjanjian deiki tara gege pepra deiamu.
56. Pio Telep Lengna Ati
Allah er si eremna ati pumbonda, yambul ati butene wilipra deiami. Akati buteneda, ‘Allah er ngepu kurura cadi, pio telep ati kurure,’ teneramya tep, Allahdi peipupa, sun imam-imam neng dipapu akati wengbarami. Menmena domi ati dinin, yambulanun ortara pumbonda, lyom opkal er si gorden ton kapkotepi. Gorden ortarada, ati butenenge ton wilipra deiaminge, er sida, ‘Pio Telep Lengna Ati’ kuramu. ‘Akatida, tali imam neng ton wengnung’ tenen, telep lyom opkal, er si gorden kapkoptepi. Akati pio pumbonaida, imam neng, sun ila deiyo ngebopu, er dipapu akati wengbaramu. Yuk imam neng pio gume. Akati pumbonda, ‘Allahdi Israel nesala, sun mali kun keca yuma daepredi, gum kupra deipkamre’ tenen, gam keca popinge, imam ila deiyo ngebo, ayapi doupra, akati pumbon dubenamudi, Peti Perjanjian deiki tara, abublan deiki di gege pepra likra deiamu.
57. Allahdi lyemserurnge lap pena upu
Tuai mutu neitamai kunup nesala yumadi, mali kunupe (Roma 3:10-12). Allahda, mali keca tenpunge peda pio men kurure. Tonda, mali kun nesala cap, mali keca capda, er damai pio men kupmanto. Allahda, pio Lengna Ngebo kurura tepa. Dinino, Allahda ila di bicau teneserura cadi, akeca-keca kapul men kwamu taruda, ‘Tuai nesala weika di lyepkamne,’ teneamudi, ‘Nimi lyemna tep, ne Mi Sisa Yesus karepkamne,’ tenemudi keteneipu (Efesus 1:4-7). Allah tenemu taru konum kupupa, Yesusda, im deiki ngebo, Allah utopu kuramu dinin, ‘Tuai nesala lyepkamne,’ tenepudi, nimi nong utopu daudi, tuai mutu yana kuramu. Allahdi pio kunpsek pen pel dopka deiki di, Israel mutu kaber ner, er nong deiki pel dopupa, aner Mariadi Yesus deipu. Deipupa, nepbaramnganen, Allah tenemu taru konum kupupa, Yesusdi, nun pununa tep, er pe nong karepseupa, yu nengdi, sengdin co deiki popipa, Yesus er yapi embeua deiki di, nun mali kunup keca yuma daepseudi, lyepseue. Ada, nun dena tep, yo punupseudi, depka deiki di, nimi lyemna keca keteneipseu. Atep, Allah er kai telep upu, nimi lyemna upu gekepmepyopda, Yesus tep teka tenepmepe pangeda, Allahdi nun tep adipapu lyemserure. Ada, er kange deiki dipapau, nun mali kunange yuma daepseredi, kunupra lyemserure. Mali kuna deiyo kecadi, ateng koudongoserurnge neitamai di, loptapra lyemseredi, ukupu nesala utopu kemdiserure (Eph 2:3-5, 12-13; 2 Korintus 5:17, 21). Ukupseredi, ataru dipapu er kange dipapu, ‘Anengda, konum dumsisi nesala kununge,’ teneseredi, telep kupra deriserure (Roma 5:1). Tonda er Lek Sambala kareserura deiki di, nun kange dipru telep kemdiseredi, er puto kareserura deiki di, Yesus cap dipru dukdongopra keipserepa, telep kupra kunkamepe (Efesus 1:13-14; 4:30). Ange yumada, Yesus tep teka tenepmepya deiki dipapu telep kemdiserure. Nundi telep pel donupa deiki di men lyemserure (Roma 3:20). Erdi bicau teneseredi, er pe kange dipapu lyemserure (Roma 3:23-24).