Esdrasɩ Tɔnɔ
Pɛ Sirusi kwǝrǝ kam
1
Sirusi dɛɛn yɩ Pa-farʋ wʋlʋ na te Pɛrsɩ maama tɩn mʋ. O paarɩ pulim bɩnɩ dɩm nɩ mʋ Baŋa-Wɛ pɛ kwǝrǝ kalʋ DƖ dɛɛn na tɔgɩ Zeremi baŋa nɩ DƖ ŋɔɔnɩ tɩn sɩɩnɩ kʋ kɩ. Kʋ na kɩ te tɩn, DƖ pɛ Pɛ Sirusi wʋbʋŋa mʋ ja sɩ o tʋŋɩ kwǝrǝ sɩ ka yi o tɩɩnɩ yam maama.a Ba ta ma pʋpʋnɩ o kwǝrǝ kam ba kɩ tɔnɔ nɩ ka wɩ:2 «Pɛrsɩ tɩʋ pɛ Sirusi ni dɩm mʋ tɩntʋ:
Wɛyuu Tu Baŋa-Wɛ mʋ kwe tɩga baŋa tɩɩnɩ maama DƖ pa-nɩ sɩ a taa te. DƖ nan kuri amʋ mʋ sɩ a lɔ Wɛ-di-kamunu Zuda provɛnsɩ dɩm tɩʋ Zeruzalɛm wʋnɩ a pa‑DƖ.b 3 Abam wʋlʋ maama na wʋ Baŋa-Wɛ nɔɔna bam wʋnɩ, kʋntʋ tu Wɛ dɩm nan wʋ́ taa wʋ o tee nɩ. Amʋ nan pɛ kʋ tu cwǝŋǝ sɩ o vu Zeruzalɛm na wʋ Zuda wʋnɩ tɩn o lɔ Wɛ-digə kam o pa Yisɩrayɛlɩ tiinə Wɛ dɩm, dɩ na yɩ Wɛ dɩlʋ na zʋʋrɩ Zeruzalɛm nɩ tɩn ŋwaanɩ.c 4 Balʋ na daarɩ yɩ ba zʋʋrɩ mɛ maama tɩn nan maŋɩ sɩ ba wǝli kʋ tu dɩ kʋlʋ maama o na lagɩ ba tee nɩ tɩn mʋ. Baá zən‑o dɩ səbu-poŋo, dɩ səbu-sɩŋa, dɩ jɩjɩgɩrʋ dwi dwi, dɩ vara, dɩdaanɩ wʋ-yoŋo pɛɛra yalʋ o na wʋ́ kwe o ma kwɛ Wɛ-digə kam Zeruzalɛm wʋnɩ tɩn.»
5 Zuda dwi dɩm yigǝ tiinǝ, dɩ Bɛnzamɛn dwi dɩm yigǝ tiinǝ, dɩ Wɛ kaanɩm tiinə, dɩ Levi dwi tiinə, dɩdaanɩ balʋ maama Wɛ na pɛ ba wʋbʋŋa ja tɩn ma zaŋɩ ba ti yigə sɩ ba vu Zeruzalɛm ba lɔ Wɛ-di-kamunu kʋm ba pa Baŋa-Wɛ. 6 Ba doonə bam maama ma wǝli-ba dɩ səbu-poŋo wǝǝnu, dɩ səbu-sɩŋa wǝǝnu, dɩ jɩjɩgɩrʋ dwi dwi, dɩ vara, dɩ zɩlɩ-ŋʋna na jɩgɩ yuu tɩn, kʋ ta wǝli dɩ Wɛ pɛɛra yam.
7 Pɛ Sirusi tɩtɩ dɩ ma zʋ Pɛ Nebukadnɛtsarɩ jwǝnǝ digə nɩ o lɩ Baŋa-Wɛ digə kam wo-laarʋ tɩlʋ Nebukadnɛtsarɩ dɛɛn na zɩŋɩ o nuŋi Zeruzalɛm nɩ o ba o yagɩ da tɩn o ja o nuŋi.d 8 O ma kwe-tɩ o kɩ sǝbu-tiŋnu Mitredatɩ jɩŋa nɩ sɩ o jeeli tɩ ni, sɩ o daarɩ o kɩ tɩ maama Sesebazarɩ jɩŋa nɩ. Wʋntʋ dɛɛn mʋ yɩ dɩdɛɛrʋ wʋlʋ na nii Zuda provɛnsɩ dɩm tɩn.e 9-10 Ba dɛɛn na jeeli zɩla yalʋ tɩn mʋ tɩntʋ:
Səbu-sɩŋa war-zwɩ fiintɔ (30).
Səbu-poŋo war-zwɩ mʋrʋ (1,000).
Səbu-poŋo zwɩf sɩdonnǝ fiinle-nʋgʋ (29).
Səbu-sɩŋa kabǝli fiintɔ (30).
Səbu-poŋo kabǝli biə-yana dɩ fugə (410).
Zɩla yadonnə maa yɩ mʋrʋ (1,000).
11 Səbu-sɩŋa dɩ səbu-poŋo zɩla yalʋ ba dɛɛn na kwe ba kɩ Sesebazarɩ jɩŋa nɩ tɩn maama dɛɛn yɩ mʋrrʋ tɩnu dɩ biə-yana (5,400) mʋ. Wʋntʋ dɩ Zwifǝ tiinə balʋ na ti yigə sɩ ba nuŋi Babilɔnɩ nɩ tɩn ma kwe-tɩ ba ja joori Zeruzalɛm.