Wɛ nijoŋnu Mise taanɩ
18
Zuda tɩʋ pɛ Zʋzafatɩ dɛɛn tiini o jɩgɩ jɩjɩgɩrʋ mʋ, yɩ o yɩrɩ dɩ zaŋɩ je maama nɩ. O dɛɛn ma tɔgɩ kadiri baŋa nɩ o kɩ ni-mɔrɔ dɩ Yisɩrayɛlɩ tɩʋ pɛ Akabɩ.a 2 Kʋ na kɩ bɩna fɩnfɩɩn tɩn mʋ Zʋzafatɩ zaŋɩ o vu Samari sɩ o na Akabɩ. Akabɩ ma pa ba gʋ peeni dɩ naanɩ zanzan sɩ o ma o zuli Zʋzafatɩ dɩ o dɩdɛɛra. O laan ma bwɛ dɩd-o sɩ ba vu ba zaŋɩ najara ba li Ramɔtɩ-Gileadɩ. 3 Akabɩ ma bwe Zʋzafatɩ o wɩ: «Nmʋ wʋ́ sɛ sɩ n da dɩ amʋ sɩ dɩ́ vu Ramɔtɩ-Gileadɩ dɩ́ kɩ najara dɩ ba na?»Zʋzafatɩ ma ləri o wɩ: «Dɩ́ yɩ cʋrrʋ mʋ daanɩ. Tan ye nɩ dɩbam jar-kərə yɩ nmʋ tɩtɩ nyɩm mʋ. Dɩ́ zɩgɩ n kwaga nɩ.» 4 Zʋzafatɩ ta ma ta dɩ Akabɩ o wɩ: «Nan pa dɩ́ da yigə dɩ́ bwe dɩ́ nii Baŋa-Wɛ wʋbʋŋa na yɩ te tɩn sɩ dɩ́ laan daarɩ dɩ́ vu.»
5 Akabɩ ma bəŋi Wɛ nijoŋnǝ bam o kɩ daanɩ. Ba maa yɩ nɔɔna biə-yana (400). O ma bwe-ba o wɩ: «Cwǝŋǝ wʋra sɩ a vu Ramɔtɩ-Gileadɩ a kɩ najara dɩ ba, naa a yɩ ve?» Nijoŋnǝ bam ma ləri ba wɩ: «Pɛ, nan ve n gwarɩ-ba, sɩ Wɛ wʋ́ kwe-ba DƖ kɩ n jɩŋa nɩ.»
6 Dɩ kʋ dɩ, Zʋzafatɩ ta ma bwe o wɩ: «Baŋa-Wɛ nijoŋnu wʋdoŋ ta wʋra yo seeni sɩ dɩ́ bwe o dɩ dɩ́ nii na?»
7 Pɛ Akabɩ ma lǝr-o o wɩ: «Nɔɔnʋ wʋdoŋ ta daarɩ, o yɩrɩ mʋ Mise yɩ o yɩ Yimila bu. Dɩ́ wʋ́ wanɩ dɩ́ da wʋntʋ baŋa dɩ́ lwarɩ Baŋa-Wɛ wʋbʋŋa. Kʋ nan na yɩ te tɩn, o ba soe sɩ o taa pwərisi wo-laarʋ o pa-nɩ, lɛɛrʋ yɩranɩ mʋ o tɛa. Kʋntʋ ŋwaanɩ mʋ a ba laga o ni-taanɩ fasɩ.» Zʋzafatɩ ma ləri o wɩ: «Kʋ nan daɩ sɩ n ta kʋntʋ doŋ.»
8 Akabɩ ma bəŋi o dɩdɛɛra bam dɩdʋa yɩ o ta dɩd-o o wɩ: «Kɩ lɩla n vu n ja Yimila bu Mise n ba yo seeni.»
9 Yisɩrayɛlɩ tɩʋ pɛ Akabɩ dɩdaanɩ Zuda tɩʋ pɛ Zʋzafatɩ dɛɛn zʋ ba paarɩ gwaarʋ mʋ ba jǝni ba paarɩ yitunnu baŋa nɩ kʋ maŋɩ dɩ Samari tɩʋ manchoŋo ni dɩm. Jǝgǝ kam dɛɛn yɩ mɩna fɩrɩm jǝgǝ mʋ. Nijoŋnǝ bam maama maa zɩgɩ ba yigə nɩ ba pwərisə. 10 Ba dɩdʋa yɩrɩ na yɩ Sedesɩasɩ yɩ o yɩ Kenaana bu tɩn ma magɩ luu o ma o ji nyɩa. O ma ta dɩ Akabɩ o wɩ: «Baŋa-Wɛ na tagɩ kʋlʋ tɩn mʋ tɩntʋ: Nyɩa yantʋ brɩ nɩ n jɩgɩ dam mʋ sɩ n ma n cu Siiri tiinə bam n gʋ.»
11 Nijoŋnǝ bam maama dɩ dɛɛn pwərisi kʋntʋ mʋ yɩ ba wɩ: «Pɛ, zaŋɩ n vu Ramɔtɩ-Gileadɩ n kɩ najara n wanɩ-ba. Baŋa-Wɛ lagɩ DƖ kwe tɩʋ kʋm DƖ kɩ n jɩŋa nɩ mʋ.»
12 Dɩdɛɛrʋ wʋlʋ na ve sɩ o bəŋi Mise tɩn ma ba o ta dɩ Mise o wɩ: «Nii mʋ! Nijoŋnə sɩdonnǝ sɩm jɩgɩ ni dɩdwɩ mʋ ba pwərisi wo-laarʋ ba pa pɛ wʋm. Nmʋ dɩ nan maŋɩ sɩ n pwərisi zaanɩ taanɩ mʋ nɩ bantʋ na kɩ te tɩn.»
13 Mise ma lǝr-o o wɩ: «Nɩ Baŋa-Wɛ na yɩ ŋwɩa tu tɩn, kʋ yɩ cɩga mʋ nɩ amʋ Tu Wɛ na wʋ́ pa ni sɩ a ta kʋlʋ tɩn yɩranɩ mʋ aá ta a brɩ pɛ wʋm.»
14 Mise na ve o yi Akabɩ te tɩn, Akabɩ ma bwe‑o o wɩ: «Mise, cwǝŋǝ wʋra sɩ dɩ́ vu Ramɔtɩ-Gileadɩ dɩ́ kɩ najara dɩ ba, naa dɩ́ yɩ ve?» Mise ma lǝr-o o wɩ: «Pɛ, zaŋɩ n vu n kɩ jara yam n wanɩ-ba, sɩ Wɛ mʋ lagɩ DƖ kwe tɩʋ kʋm DƖ kɩ n jɩŋa nɩ.»
15 Akabɩ ma yɔɔrɩ o ta Mise o wɩ: «A maŋɩ a ta dɩ nmʋ kuni zanzan nɩ n maŋɩ sɩ n du nɩ nń ta cɩga taanɩ yɩranɩ mʋ n brɩ-nɩ maŋa kalʋ maama n na yǝni n pwərisi Baŋa-Wɛ yɩrɩ ŋwaanɩ tɩn.»
16 Mise laan ma ta o wɩ: «A nɛ Yisɩrayɛlɩ jar-kərə bam maama na jagɩ pweeru tɩm baŋa nɩ yɩ ba beeri yɔɔ yɩranɩ, nɩnɛɛnɩ peeni sɩlʋ na ba jɩgɩ nayɩrʋ tɩn. Baŋa-Wɛ ma ta DƖ wɩ: ‹Nɔɔna bantʋ ba jɩgɩ yuutu. Yagɩ-na sɩ ba joori sɔŋɔ cɩmm dɩ yazurə.› »b
17 Yisɩrayɛlɩ tɩʋ pɛ Akabɩ ma ta dɩ Zʋzafatɩ o wɩ: «A ya maŋɩ a ta dɩ nmʋ nɩ o bá sɛ o pwərisi wo-laarʋ o pa-nɩ, sɩ lɛɛrʋ yɩranɩ mʋ o tɛa.»
18 Mise daa ma ta o brɩ Akabɩ o wɩ: «Nan cəgi Baŋa-Wɛ na pɛ-nɩ kwǝrǝ kalʋ tɩn. A nɛ Baŋa-Wɛ na je DƖ paarɩ jangɔŋɔ baŋa nɩ yɩ Wɛ-sɔŋɔ kɔgɔ kʋm maama zɩgɩ ba gilimi‑DƖ, DƖ jazɩm dɩ jagwiə seeni. 19 Baŋa-Wɛ maa wɩ: ‹Wɔɔ mʋ wʋ́ sɛ o vu o ganɩ Yisɩrayɛlɩ tɩʋ pɛ Akabɩ sɩ o vu Ramɔtɩ-Gileadɩ o kɩ najara dɩ ba sɩ o ga o ŋwɩa?› Kɔgɔ kʋm maama dɩdʋa dɩdʋa ma ta o wʋbʋŋa. 20 Kʋ kweelim nɩ tɩn, cicirǝ kadoŋ ma nuŋi ka zɩgɩ Baŋa-Wɛ yigə nɩ yɩ ka ta ka wɩ: ‹Amʋ wʋ́ wanɩ a vu a ganɩ Akabɩ›. Baŋa-Wɛ ma bwe-ka DƖ wɩ: ‹N lagɩ n kɩ tɛ mʋ n wanɩ n kɩ kʋntʋ?› 21 Cicirǝ kam ma ləri ka wɩ: ‹A lagɩ a vu a pa Akabɩ nijoŋnǝ bam pwərisi vwan pwərisim mʋ.› Baŋa-Wɛ maa wɩ: ‹Nmʋ wʋ́ na cwǝŋǝ sɩ n sʋg-o. Nan ve n kɩ kʋntʋ.› 22 Nan lwarɩ nɩ Baŋa-Wɛ sɩɩnɩ DƖ pa n nijoŋnǝ bam fɔɩ vwan mʋ ba pa‑m. Cɩga ŋwaanɩ tɩn, Baŋa-Wɛ yɔɔrɩ DƖ tiŋi lɛɛrʋ mʋ sɩ tɩ ba n baŋa.»
23 Kʋntʋ na kɩ tɩn mʋ Kenaana bu Sedesɩasɩ zaŋɩ o vu o magɩ Mise o yibiyə nɩ, yɩ o bwe‑o o wɩ: «Baŋa-Wɛ Joro kɩ tɛ mʋ kʋ yagɩ amʋ yɩ kʋ ba nmʋ te kʋ ŋɔɔnɩ dɩ nmʋ?»
24 Mise ma ləri o wɩ: «Nii mʋ. Dɛ dɩm n na wʋ́ zʋ di-yuu wʋnɩ n səgi n tɩtɩ tɩn, nmʋ wʋ́ lwarɩ dɩbam wʋnɩ wʋlʋ na tagɩ cɩga tɩn mʋ.»
25 Yisɩrayɛlɩ tɩʋ pɛ Akabɩ ma pa ni sɩ ba ja Mise yɩ o wɩ: «Ja-o-na á ja á vu tɩʋ kʋm dɩdɛɛrʋ Amɔn te, dɩdaanɩ amʋ bu Zoasɩ te. 26 Ta-na dɩ ba nɩ: ‹Pɛ wʋm na tagɩ kʋlʋ tɩn mʋ tɩntʋ: Kɩ-na nɔɔnʋ wʋntʋ pɩɩna digə nɩ. Taá pa‑o dɩpɛ fɩnfɩɩn dɩ na yɩranɩ sɩ kʋ taa nii maŋa kam a na wʋ́ zɩgɩ najara yam wʋnɩ a joori dɩ yazurə tɩn.› »c
27 Mise ma ləri pɛ wʋm o wɩ: «N na sɩɩnɩ n zɩgɩ najara yam wʋnɩ n joori dɩ yazurə, kʋ nan daɩ Baŋa-Wɛ mʋ pɛ-nɩ kwǝrǝ kam.» Mise ta ma ta dɩ nɔn-kɔgɔ kʋm o wɩ: «Á maama yɩ swe-na a na taga taanɩ dɩlʋ tɩn.»
Pɛ Akabɩ tʋʋnɩ
28 Yisɩrayɛlɩ tɩʋ pɛ Akabɩ dɩ Zuda tɩʋ pɛ Zʋzafatɩ dɛɛn ma zaŋɩ ba vu Ramɔtɩ-Gileadɩ sɩ ba kɩ najara dɩ ba. 29 Akabɩ ma ta dɩ Zʋzafatɩ o wɩ: «Dɩ na zʋ najara yam wʋnɩ, a laan wʋ́ ləri a yibiyə sɩ ba yɩ lwarɩ-nɩ. Kʋ daarɩ nmʋ wʋ́ zʋ n paarɩ gwaarʋ tɩm.» Akabɩ ma sɩɩnɩ o kɩ nɩ o na taga te tɩn, yɩ ba maama vu sɩ ba kɩ najara yam.
30 Siiri tiinə pɛ wʋm dɛɛn ya maŋɩ o bəŋi o jara-kǝm təriko-dirə dɩdɛɛra bam mʋ yɩ o pa-ba ni wɩ: «Kwaarɩ-na najara yam dɩ Yisɩrayɛlɩ tɩʋ pɛ wʋm yɩranɩ, sɩ kʋ daɩ dɩ jar-kərə badaara bam, ba na maŋɩ ba yɩ dɩdɛɛra te dɩ.» 31 Siiri jara-kǝm dɩdɛɛra bam na nɛ Zʋzafatɩ yɩ o zʋ o paarɩ gwaarʋ tɩm tɩn, ba maa bʋŋɩ nɩ kʋ yɩ Yisɩrayɛlɩ tɩʋ pɛ wʋm mʋ. Ba ma fʋfɔ ba yi sɩ ba kɩ najara dɩd-o. Zʋzafatɩ na nɛ-ba tɩn, o ma kaasɩ dɩ kwǝr-dɩa pa Baŋa-Wɛ zən‑o. Wɛ ma cɩ Siiri jar-kərə bam yɩ ba wʋ wanɩ ba yi o yɩra. 32 Ba ma maanɩ nɩ kʋ daɩ Yisɩrayɛlɩ tɩʋ pɛ wʋm. Ba ma yagɩ o yɩra yɩ ba kɛ.
33 Siiri jar-kəru wʋdoŋ dɛɛn saŋɩ o taŋa mʋ o ta cɩnɩ yɔɔ yɩranɩ. Cɩnɩ dɩm ma vu dɩ zɔ Yisɩrayɛlɩ tɩʋ pɛ Akabɩ o nyɔɔnɩ seeni mɛ o jara zɩla yam na wʋ kwǝl‑o tɩn. Akabɩ ma ta dɩ o təriko-diru wʋm o wɩ: «Pa dɩ́ kɩ lɩla dɩ́ pipiri dɩ́ vu dáa dáa najara yam wʋnɩ, sɩ a nɛ zʋnnɩ mʋ.» 34 Najara yam dɛɛn kɩa dɛ dɩm maama wʋnɩ mʋ. Pɛ Akabɩ ma maŋɩ o təriko kʋm wʋnɩ o salɩ-kʋ o jeeri Siiri tiinə bam. Dɛ dɩm kʋntʋ Wɛ na maa zʋʋrɩ maŋa kalʋ tɩn mʋ o tɩga.