Zuda tɩʋ Pɛ Zʋzafatɩ taanɩ
17
Asa bu Zʋzafatɩ ma ləri o ko wʋm yuu nɩ o ji pɛ. O dɛɛn fɔgɩ Zuda tɩʋ kʋm dɩ dam sɩ ba wanɩ Yisɩrayɛlɩ tiinə bam ba jeeri dɩ najara. 2 O ma kwe jar-kərə o zɩgɩ tɩɩnɩ dɩlʋ na lɔgɩ dɩ pɩ tɩn maama wʋnɩ o cɩ-dɩ. O ta ma pa jar-kərə badonnǝ zɩgɩ ba cɩ Zuda tɩɩnɩ dɩdonnǝ, dɩdaanɩ Efrayim tɩɩnɩ dɩlʋ o ko Asa ya na wanɩ o di najara baŋa nɩ tɩn.3 Baŋa-Wɛ dɛɛn nan wʋ Zʋzafatɩ tee nɩ mʋ, Bɛŋwaanɩ, o nɔn-dʋnnɩ maŋa nɩ o yɔɔrɩ o kɩ nɩ o nabaarʋ Davidi dɛɛn na kɩ te tɩn mʋ. O dɛɛn vɩn sɩ o kaanɩ Baalɩ jwǝnǝ yam mʋ. 4 O nan sɛ sɩ o taa zuli Baŋa-Wɛ dɩm o ko dɩ dɛɛn na zuli tɩn, yɩ o kɩ o tɔgɩ Wɛ niə yam. O wʋ lwǝni Yisɩrayɛlɩ tiinə kikiə yam. 5 Baŋa-Wɛ dɩ ma wǝli Zʋzafatɩ sɩ o taa te o tɩʋ kʋm dɩ dam. Zuda tiinə bam maama maa jaanɩ pɛɛra ba tui ba pa Zʋzafatɩ, pa o jɩjɩgɩrʋ tiini tɩ puli, yɩ o yɩrɩ dɩ zaŋɩ. 6 O dɛɛn yɔɔrɩ o tɔgɩ Baŋa-Wɛ cwe sɩm dɩ o wʋʋ maama mʋ. O ma ja wara-je kaanɩm bimbinə yam o cɔgɩ o yagɩ, yɩ o daarɩ o cɩcʋgɩ Asera nyɩnyʋgʋ dɛ sɩm sɩ Zuda tiinə daa yɩ taa zuli-tɩ.
7 Zʋzafatɩ na di paarɩ o kɩ bɩna yatɔ tɩn, mʋ o tʋŋɩ o dɩdɛɛra banu sɩ ba taa tʋlɩ Zuda tɩɩnɩ dɩm wʋnɩ ba brɩ nɔɔna Wɛ niə yam. Nɔɔna bam dɛɛn yɩ Ben-Ayili, dɩ Abdɩasɩ, dɩ Zakari, dɩ Netaneli, dɩ Mise mʋ. 8 Levi tiinə badonnǝ dɩ maa tɔgɩ ba wʋ ba wʋnɩ. Ba maa yɩ Semaya, dɩ Netanɩa, dɩ Zebadia, dɩ Azayɛlɩ, dɩ Semiramɔtɩ, dɩ Zonatan, dɩ Adoniya, dɩ Tobiya, dɩdaanɩ Tobi-Adoniya. Wɛ kaanɩm tiinə bale dɩ maa wʋ ba wʋnɩ, ba yɩra na yɩ Elisama dɩ Yoram tɩn. 9 Ba dɛɛn jɩgɩ Baŋa-Wɛ niə tɔnɔ kʋm mʋ ba beeri Zuda tɩɩnɩ dɩm maama wʋnɩ. Je sɩlʋ maama ba maa na veǝ, ba yǝni ba kwe Wɛ niə yam mʋ ba brɩ nɔɔna bam.a
10 Baŋa-Wɛ fʋʋnɩ dɛɛn ma ja tɩɩnɩ dɩlʋ maama na gilimi dɩ kaagɩ Zuda tɩn. Ba daa wʋ sɛ sɩ ba zaŋɩ najara dɩ Pɛ Zʋzafatɩ. 11 Filisi tiinə badaara ma ja səbu-poŋo dɩ pɛɛra yadonnə ba ba ba pa Zʋzafatɩ sɩ ba sɛ ba pa‑o. Arabi tiinə dɩ ma ja peeni dɩ bʋnɩ ba ba pa‑o. Tɩ maa yɩ pi-balɩ mʋrrʋ tɩrpɛ dɩ biə-yarpɛ (7,700), dɩdaanɩ bʋnɩ mʋrrʋ tɩrpɛ dɩ biə-yarpɛ (7,700).
12 Zʋzafatɩ dɛɛn yɔɔrɩ o na dam mʋ maŋa maama wʋnɩ. O ma lɔ dalɩm je, dɩ tɩɩnɩ dɩdonnǝ Zuda tɩʋ dɩm nɩ, sɩ o taa tiŋi o wǝǝnu dɩ wʋnɩ. 13 O maa jɩgɩ zɩla zanzan o na tiŋi-ya Zuda tɩɩnɩ dɩm wʋnɩ tɩn. O dɛɛn ta yagɩ jar-kərə balʋ na tiini ba ye najara laŋa tɩn mʋ Zeruzalɛm tɩʋ kʋm wʋnɩ. 14 Ba kɔgɔ dɛɛn na yɩ te kʋ tɔgɩ dɩ ba sɔ-yuni tɩm tɩn mʋ tɩntʋ:
Zuda dwi tiinə bam wʋnɩ, Adina dɛɛn mʋ yɩ jar-kərə bam yigə tu. O kwaga nɔɔna dɛɛn yɩ jar-kərə mʋrrʋ biə-yatɔ (300,000) mʋ.
15 Yohanan mʋ saŋɩ wʋntʋ kwaga. O dɩ kwaga nɔɔna maa yɩ jar-kərə mʋrrʋ biə-yale dɩ funɔnɔ (280,000).
16 Dɩdɛɛrʋ wʋlʋ na kɩ batɔ tu tɩn dɛɛn yɩ Zikiri bu Amasɩya mʋ. Wʋntʋ dɛɛn kwe o tɩtɩ o vwe o pa Baŋa-Wɛ tɩtʋŋa yam ŋwaanɩ. O kwaga nɔɔna maa yɩ jar-kərə mʋrrʋ biə-yale (200,000).
17 Bɛnzamɛn dwi tiinə bam wʋnɩ, Ɛlyada dɛɛn mʋ yɩ nɔn-babɩa kalʋ na nii ba jar-kərə mʋrrʋ biə-yale (200,000) tɩn. Bantʋ dɛɛn ze tɛ dɩdaanɩ jara-kǝm cɩ-kwɛn mʋ.
18 Wʋlʋ dɩ daa na saŋɩ wʋntʋ kwaga tɩn maa yɩ Yehozabadɩ. O dɛɛn jɩgɩ jar-kərə mʋrrʋ bi dɩ funɔnɔ (180,000) balʋ na ze ba jara zɩla tɩn mʋ.
19 Jar-kərə balʋ dɛɛn na maŋɩ Zeruzalɛm nɩ ba tʋŋɩ ba pa pɛ wʋm tɩn mʋ kʋntʋ. Jar-kərə badaara maa yɩrɩ tɩɩnɩ dɩlʋ na lɔgɩ dɩ pɩ yɩ dɩ jagɩ dɩ wʋ Zuda ni maama nɩ tɩn.