Jang se sala pa orang yang hidop beda deng ngoni
14
1 Ada orang-orang yang so percaya pa Tuhan mar dorang pe percaya blum kuat, jadi dorang masi blum talalu tau bagimana mo hidop butul di muka pa Tuhan. Ngoni musti trima pa dorang, jang baku ambe pendapat deng dorang. 2 De pe conto bagini: ada orang yang de pe percaya so kuat, kong dorang so tau kalu nyanda ada makanan yang haram lei di muka pa Tuhan. Mar tu orang yang de pe percaya blum kuat, dorang masi ragu tentang itu, dorang masi pikir kalu Tuhan anggap haram makang daging, kong dorang no cuma makang sayor-sayor. 3 Tu orang-orang yang tau kalu dorang bole makang samua jenis makanan, dorang jang pandang enteng pa tu orang yang cuma makang sayor-sayor, lantaran Tuhan Allah so trima pa dorang. Kong tu orang-orang yang cuma makang sayor-sayor jang kase sala pa orang-orang yang ja makang samua jenis makanan, lantaran dorang lei Tuhan Allah so trima. 4 Kong kiapa ngoni samua rasa ada hak for bilang kalu Tuhan pe orang-orang itu sala? Tuhan itu torang pe Tuang, so Dia tu ada hak for bilang pa De pe orang-orang itu sala ato nyanda. Tuhan pasti mo tolong De pe orang-orang supaya dorang bole hidop butul.5 Ada lei tu conto bagini: ada orang-orang yang bapikir kalu ada hari yang lebe penting dari hari yang laeng for semba pa Tuhan. Ada komang orang-orang yang bapikir kalu samua hari itu sama for semba pa Tuhan. Mar sebenarnya hari apa jo yang torang pili for semba pa Tuhan, torang musti yakin kalu tu torang da beking itu Tuhan anggap butul. 6 Orang yang beking tu satu hari jadi lebe penting dari hari yang laeng, dia beking itu for hormat pa Tuhan. Kong orang yang makang samua jenis makanan, dia beking itu for hormat pa Tuhan lantaran dia mo bilang makase pa Tuhan. Trus tu orang yang cuma makang sayor-sayor lantaran pikir tu daging itu haram, dia beking itu for mo hormat pa Tuhan, deng dia lei mo bilang makase pa Tuhan Allah. 7 Soalnya nyanda ada dari antara pa torang biar satu yang hidop for dia pe mau sandiri. Deng lei, nyanda ada dari antara pa torang yang mati for dia pe mau sandiri. 8 Soalnya torang hidop, torang hidop for Tuhan, deng torang mati, torang mati for Tuhan. Jadi biar torang hidop ato mati, torang ini Tuhan punya. 9 So itu, Kristus so mati kong so hidop ulang supaya Dia bole jadi torang pe Tuhan waktu torang hidop ato mati.
10 Jadi ngoni yang makang samua jenis makanan, bole so ngoni pandang enteng pa ngoni pe sudara yang percaya yang cuma makang sayor? Tantu nyanda to? Kong ngoni yang cuma makang sayor, bole so ngoni kase sala pa ngoni pe sudara yang percaya yang makang samua jenis makanan? Tantu nyanda lei to? Soalnya torang samua ini nanti tu mo mangada pa Tuhan Allah for mo dapa adili. 11 Sama deng tu da tulis di Kitab Suci bagini,
“Kita tu Tuhan Allah, Kita butul-butul hidop,
kong Kita se pasti kalu samua orang nanti mo berlutut kong basemba di muka pa Kita,
deng samua mo mangaku kalu memang butul Kita ini Tuhan Allah.”
12 Jadi torang samua nanti mo mangaku di muka pa Tuhan Allah samua tu torang so beking di dunia ini.
Jang beking torang pe sudara yang percaya sampe berdosa
13 Tuhan Allah yang mo adili pa torang, so itu torang jang baku kase sala lei. Mar lebe bae torang hidop hati-hati supaya torang jang beking tu hal-hal yang beking orang laeng tagoda beking dosa, sama deng tu orang itu da tasontong batu kong jatung. 14 Kita so percaya pa Tuhan Yesus, jadi kita tau deng yakin kalu nyanda ada makanan yang haram di muka pa Tuhan. Mar kalu ada orang yang pikir ada makanan yang haram, tu makanan itu jadi haram for dia kalu dia makang itu. 15 Mar kalu ngoni makang tu makanan yang ngoni pe sudara yang percaya anggap haram di muka pa dia sampe beking dia saki hati, itu de pe arti ngoni nyanda sayang pa dia. Jadi jang ngoni makang ato minum apa-apa yang dia ja anggap haram kalu itu beking dia beking dosa sampe jadi nyanda percaya lei. Soalnya Kristus da mati lei for dia. 16 So itu, biar yang ngoni mo beking itu ngoni rasa butul, mar kalu ngoni pe sudara yang percaya rasa itu besae, lebe bae jang ngoni beking supaya jang dorang bicara yang besae tentang ngoni. 17 Soalnya kalu Tuhan Allah berkuasa sbagai raja pa torang, yang penting bukang apa tu torang mo makang ato minum mar tu hal-hal ini: hidop ja beking tu butul, hidop baku-baku bae, hidop deng hati tenang, deng lei hidop deng hati snang. Samua itu torang bole beking lantaran Roh Kudus ada pa torang pe hati. 18 Orang yang iko pa Kristus deng cara hidop rupa itu, dia beking snang pa Tuhan Allah kong orang-orang hormat pa dia.
19 Jadi mari jo torang slalu brusaha beking tu hal-hal yang beking torang bole hidop baku-baku bae deng beking lei tu hal-hal yang bole baku kase kuat tu torang samua pe percaya. 20 Tuhan Allah so bakarja pa orang pe hati sampe orang jadi percaya. So itu, kalu apa yang ngoni da makang beking tu ngoni pe sudara yang percaya beking dosa, itu de pe arti ngoni so se ancor tu Tuhan Allah pe karja pa orang itu. Memang butul so nyanda ada lei makanan yang Tuhan Allah larang ngoni mo makang, mar ngoni tare jadi sala kalu apa yang ngoni makang beking tu sudara yang percaya jadi tagoda beking dosa. 21 Lebe bae jang ngoni makang daging ato minum anggor ato jang beking apa jo kalu itu cuma beking tu ngoni pe sudara yang percaya beking dosa. 22 Kalu ngoni yakin apa yang ngoni da makang, minum ato beking sesuatu itu nyanda sala, simpang jo itu pa ngoni pe hati supaya cuma ngoni deng Tuhan Allah yang tau, nyanda perlu orang laeng tau. Kalu ngoni nyanda ada rasa bersala waktu ngoni beking sesuatu yang ngoni yakin itu butul, ngoni itu yang paling snang. 23 Mar kalu ngoni pikir makang satu jenis makanan itu berdosa kong tetap makang, ngoni itu tare jadi sala lantaran tu da beking itu nyanda iko ngoni pe percaya. Soalnya apa jo yang ngoni da beking deng hati yang nyanda percaya, itu de pe arti ngoni so beking dosa.