Tuhan beking Abraham jadi butul lantaran Abraham percaya
4
1 Abraham, dia itu tu torang orang Yahudi pe nene moyang. Kira-kira apa yang dia da beking sampe Tuhan beking dia jadi orang yang butul di muka pa Tuhan? 2 Tuhan beking Abraham jadi orang yang butul bukang lantaran dia da beking tu bae. Soalnya kalu Tuhan beking Abraham jadi orang yang butul lantaran dia ja beking tu bae, itu de pe arti Abraham ada alasan for mo puji de pe diri sandiri. Mar Abraham nyanda ada alasan for mo puji de pe diri di muka pa Tuhan Allah. 3 Soalnya di Kitab Suci da tulis bagini,“Abraham percaya pa Tuhan Allah,
deng lantaran de pe percaya itu,
Tuhan Allah beking Abraham jadi orang yang butul di muka pa Tuhan Allah.”
4 De pe conto bagini: kalu orang bakarja, tantu dia dapa gaji. Tu gaji itu bukang hadia, mar memang itu dia pe hak yang dia mo dapa dari dia pe suar lala. 5 Mar torang pe hubungan deng Tuhan nyanda bagitu. Tuhan beking torang jadi butul di muka pa Dia bukang lantaran apa tu torang ja beking, mar lantaran tu torang pe percaya pa Dia. Dia itu yang beking butul tu orang yang hidop jao dari pa Dia.
6 Dulu, raja Daud da bilang kalu pe snang skali tu orang-orang yang Tuhan Allah beking jadi butul bukang lantaran dorang da beking tu bae. 7 Bagini tu Raja Daud da bilang,
“Tu orang yang so dapa ampung dari samua tu dia pe jaha deng samua tu dia pe dosa, dia itu yang paling snang.
8 Tuhan so nyanda inga-inga tu dia pe dosa, so dia itu yang paling snang.”
9 Tu rasa snang bagitu bukang cuma for orang-orang Yahudi, mar for orang-orang bukang Yahudi lei. Soalnya torang so bilang rupa tu conto Abraham tadi, kalu Tuhan Allah beking Abraham itu jadi orang yang butul di muka pa Tuhan cuma lantaran Abraham pe percaya pa Tuhan. 10 Kong tempo apa Tuhan Allah beking Abraham jadi orang yang butul di muka pa Dia? Apa waktu dia so dapa sunat ato waktu dia blum dapa sunat? Tantu katu waktu dia blum dapa sunat.
11 Jadi Abraham so percaya dulu pa Tuhan, baru dia dapa sunat. Tu sunat itu jadi tanda kalu Tuhan beking dia jadi orang yang butul lantaran dia pe percaya pa Tuhan. So itu, Abraham jadi bapak dari samua orang yang percaya, biar tu orang-orang yang percaya itu nyanda sunat. Deng bagitu, Tuhan beking dorang itu jadi orang yang butul lantaran dorang pe percaya. 12 Kong Abraham lei jadi bapak dari orang-orang Yahudi. Abraham itu jadi bapak dari orang-orang Yahudi bukang cuma lantaran dorang dapa sunat mar lantaran lei dorang percaya pa Tuhan iko tu dia pe percaya waktu dia blum dapa sunat. Dia itu torang samua yang percaya pe bapak.
Orang yang percaya mo trima tu Tuhan pe janji
13 Tuhan da janji pa Abraham deng de pe keturunan kalu Dia mo kase ni dunia pa dorang. Tuhan da janji bagitu pa Abraham bukang lantaran dia ja iko tu atoran-atoran di kitab Taurat, mar Tuhan janji bagitu lantaran Abraham percaya pa Tuhan sampe Tuhan beking Abraham jadi orang yang butul di muka pa Tuhan. 14 Soalnya kalu tu orang-orang yang da iko tu atoran-atoran di kitab Taurat tu mo dapa tu Tuhan pe janji itu, itu de pe arti nyanda ada de pe guna orang percaya pa Tuhan, kong tu janji itu jadi batal. 15 Soalnya nyanda ada yang mampu beking tu atoran-atoran di kitab Taurat, jadi cuma tare beking Tuhan mara sampe Dia mo hukum pa dorang. Mar kalu nyanda ada tu atoran-atoran di kitab Taurat, tantu nyanda ada orang tu mo langgar tu atoran-atoran di kitab Taurat itu.
16 Jadi torang mo dapa tu Tuhan pe janji itu cuma lantaran torang percaya pa Dia. Tuhan kase tu janji lantaran Dia pe sayang supaya samua Abraham pe keturunan bole dapa tu Dia pe janji itu. Kong Tuhan pe janji bukang cuma for orang-orang yang ja iko tu atoran-atoran di kitab Taurat, mar lei for samua orang yang percaya sama deng Abraham, tu torang samua pe bapak. 17 Itu so sama deng Tuhan Allah perna bilang pa Abraham dulu di Kitab Suci, “Kita so pili pa ngana jadi bapak for banya bangsa.” Kong di muka pa Tuhan Allah Abraham percaya tu Tuhan Allah da bilang itu. Tuhan Allah itu yang kase hidop orang yang so mati, deng so Dia yang da ciptakan samua deng Dia pe kata-kata. 18 Abraham percaya Tuhan pe janji. Jadi biar dia nyanda ada harapan mo dapa anak, dia trus baharap deng yakin pa Tuhan. Dia percaya kalu dia pe keturunan mo jadi banya bangsa sama deng tu Tuhan da bilang pa dia, “Ngana pe keturunan mo jadi banya skali.” 19 Abraham pe percaya tetap kuat biar lei dia tau kalu dia so talalu tua for mo dapa anak, bole bilang kalu dia so amper mo mati, de pe umur kira-kira sratus taong. Deng lei Sara tu de pe bini mandul. 20 Abraham tetap percaya pa Tuhan Allah deng nyanda ragu pa Tuhan Allah pe janji. Malatare de pe percaya lebe tatamba kuat, deng dia puji deng hormat pa Tuhan Allah. 21 Abraham yakin skali kalu Tuhan Allah mampu mo tepati tu De pe janji itu. 22 So lantaran Abraham pe percaya itu, sampe da tulis di Kitab Suci tentang dia bagini, “Tuhan beking dia jadi orang yang butul di muka pa Dia.”
23 Kong tu da tulis tentang Abraham jadi orang yang butul, itu da tulis bukang cuma for Abraham sandiri. 24 Mar itu da tulis lei for torang. Soalnya Tuhan lei beking torang jadi orang yang butul lantaran torang pe percaya pa Dia. Waktu Yesus mati, Tuhan Allah tu da kase hidop ulang pa Dia tu torang pe Tuhan. 25 Yesus itu yang so kase Dia pe diri mati for torang lantaran torang pe dosa. Kong Tuhan Allah se hidop ulang pa Dia supaya bole beking torang ini jadi orang yang butul di muka pa Dia.