Roh Kudus turung pa tu orang-orang yang percaya
2
1 Pas waktu orang Yahudi pe hari raya, tu dorang ja bilang hari Pentakosta, samua orang yang percaya pa Yesus bakumpul di satu ruma. 2 Kage-kage dapa dengar ada bunyi dari langit sama deng angin yang da batiop kancang. De pe bunyi pe kuat skali sampe dapa dengar di samua tampa di ruma tu dorang da dudu bakumpul. 3 Kong dorang dapa lia api yang de pe model sama deng lida-lida yang tasebar kong brenti di atas pa dorang masing-masing. 4 Kong Roh Kudus kuasai pa dorang samua, trus dorang bole babicara pake bahasa-bahasa laeng yang Roh Kudus da kase.5 Waktu hari raya itu, tu orang-orang Yahudi yang dari samua bangsa di sluru dunia da pulang ka Yerusalem. Dorang ini ja iko Tuhan pe mau. 6 Dorang dapa dengar tu bunyi itu, so itu dorang datang bakumpul di tampa itu. Dorang takage lantaran dorang dengar tu orang-orang percaya itu da babicara pake dorang pe bahasa masing-masing. 7 Dorang samua tahaga deng taheran-heran, kong dorang babilang, “Tu orang-orang yang da babicara itu orang Galilea. 8 Jadi bagimana sampe torang bole dengar dorang babicara pake torang pe bahasa yang torang ja pake pa tong pe kampung masing-masing? 9 Torang ini orang-orang dari: Partia, Media, Elam, Mesopotamia, Yudea deng Kapadokia, Pontus deng Asia, 10 Frigia deng Pamfilia, Mesir deng daera-daera di Libia tu baku dekat deng Kirene, orang-orang pendatang dari Romawi, 11 tu orang-orang Yahudi deng yang bukang Yahudi mar so maso agama Yahudi, kong ada lei orang Kreta deng orang Arab. Torang samua da dengar dorang babicara pake torang pe bahasa sandiri tentang perbuatan-perbuatan basar tu Tuhan Allah da beking.”
12 Dorang samua taheran-heran deng tahaga-haga kong baku bilang, “Apa so samua ini pe arti?”
13 Mar tu laeng cuma da basindir bagini, “Dorang ini da mabo lantaran anggor manis.”
Petrus kase tau tu Tuhan pe firman tentang Yesus
14 Abis itu, Petrus deng tu seblas rasul yang laeng badiri. Kong deng suara kuat Petrus bilang pa orang banya itu, “Hei sudara-sudara orang Yahudi deng ngoni samua orang yang da tinggal di Yerusalem. Tarukira jo bae-bae, kita mo se tau deng jelas pa ngoni apa tu da jadi di sini. 15 Torang ini kasiang nyanda mabo sama deng tu ngoni da kira, lantaran skarang ini baru jam sambilan pagi. 16 Mar apa tu ngoni da dengar tadi, dulu memang Tuhan Allah so kase tau tentang itu lewat De pe nabi Yoel, bagini tu Tuhan Allah da bilang,
17 ‘Di akhir jaman,
Kita tu Tuhan Allah mo kase cura
tu Kita pe Roh pa samua orang.
Ngoni pe anak-anak laki-laki deng parampuang
mo kase tau pa orang-orang apa tu Kita da bilang pa dorang.
Tu anak-anak laki-laki muda mo dapa penglihatan,
kong tu orang-orang tua laki-laki mo dapa mimpi.
18 Kita lei mo kase cura Kita pe Roh
sampe pa tu orang-orang yang ja beking tu Kita ja suru,
bae dia laki-laki ato parampuang,
kong dorang mo kase tau pa orang-orang apa tu Tuhan Allah da bilang pa dorang.
19 Kita mo beking hal-hal luar biasa di langit,
deng tanda-tanda di bumi:
mo ada dara, api deng asap yang bagumpal-gumpal.
20 Matahari mo bruba jadi glap,
kong bulan mo jadi mera sama deng dara.
Itu samua mo jadi seblum Tuhan mo datang ulang
for adili pa samua orang.
Hari itu, hari yang basar deng luar biasa.
21 Kong sapa tu minta Tuhan se slamat pa dia dari tu hukuman dosa, dia itu mo slamat.’ ”
22 Kong Petrus babilang lei, “Hei sudara-sudara orang Israel! Dengar bae-bae tu kita mo bilang ini: Tuhan Allah so tentukan Yesus orang Nazaret itu, kong torang tau itu lantaran lewat Dia, Tuhan Allah beking mujisat-mujisat, hal-hal yang luar biasa deng tanda-tanda di tenga-tenga pa ngoni. 23 Yesus ini, Tuhan Allah da srahkan pa ngoni iko Dia pe maksut deng rencana. Kong ngoni so bunung pa Yesus deng cara srahkan Dia pa orang-orang yang nyanda iko tu Tuhan Allah pe atoran-atoran, supaya dorang bole se salib pa Dia. 24 Mar Tuhan Allah kase hidop ulang pa Dia, Tuhan Allah kase bebas pa Dia dari siksa waktu mati lantaran maut nyanda mampu mo tahang pa Dia. 25 Dulu Raja Daud perna bilang bagini tentang Yesus,
‘Kita lia Tuhan slalu di muka pa kita.
Dia sama-sama deng kita,
so itu kita nyanda mo tako apa-apa.
26 So lantaran itu kita pe hati snang,
deng kita pe mulu kita puji-puji trus pa Dia,
deng kita lei mo babaharap trus pa Dia.
27 Soalnya Tuhan nyanda mo kase biar kita tinggal trus di tampa orang mati,
deng Tuhan nyanda se biar tu Dia pe Orang Kudus pe badan mo busu di dalam kubur.
28 Tuhan kase tunjung jalang pa kita
supaya kita bole dapa hidop kekal.
Tuhan mo beking pa kita butul-butul snang
lantaran Tuhan da sama-sama deng Kita.’
29 Sudara-sudara, kita mo bicara trang-trangan pa ngoni tentang Daud, tu torang pe nene moyang. Dia bilang bagitu, bukang dia se cirita de pe diri sandiri. Soalnya dia sandiri so mati deng so se kubur, kong de pe kubur masi ada sampe skarang di negri ini. 30 Mar Daud ini Tuhan Allah pe nabi tu ja kase tau Tuhan Allah pe pesan pa orang-orang. So itu Daud tau Tuhan Allah so bajanji pa dia deng basumpa kalu satu dari de pe keturunan mo jadi raja. 31 Jadi waktu itu, Daud so lia apa tu mo jadi nanti. Dia so se tau lebe dulu kalu Tuhan Allah nyanda mo se biar pa Kristus tu Raja yang mo se slamat pa manusia ada trus di tampa orang mati, deng Dia pe badan nyanda mo busu mar Dia mo hidop ulang.
32 So Dia no tu Yesus yang Daud da bilang itu. Yesus itu yang Tuhan Allah so kase hidop ulang, kong torang ini jadi saksi kalu Dia so hidop ulang. 33 Tuhan Allah so angka pa Yesus di sabla kanan pa Tuhan Allah, tu tampa yang terhormat. Tuhan Allah lei so kase pa Dia tu Roh Kudus, sama deng tu Tuhan Allah da janji dari dulu. Tu Roh Kudus itu Dia so kase pa torang, itu no yang ngoni da dengar deng da lia di sini. 34 Daud sandiri nyanda taangka ka sorga, mar dia da bilang tentang Yesus bagini,
‘Tuhan Allah da bilang pa kita pe Tuhana bagini,
35 Dudu jo di tampa terhormat di sabla kanan pa Kita,
sampe Ngana pe musu-musu Kita taru di bawa Ngana pe kaki.’
36 So itu sudara-sudara orang Israel, ngoni musti tau butul-butul kalu Yesus tu ngoni da salib itu, so Dia no tu Tuhan Allah da beking jadi torang pe Tuhan deng jadi Kristus tu Raja yang se slamat pa manusia.”
37 Waktu tu orang-orang dengar samua itu, dorang rasa manyasal skali kong dorang batanya pa Petrus deng pa rasul-rasul yang laeng, “Sudara-sudara, apa dang tu torang musti beking?”
38 Petrus manyao pa dorang, “Bertobat jo kong kase tu ngoni pe diri for dapa baptis dalam nama Yesus Kristus. Deng bagitu Tuhan Allah mo kase ampung tu ngoni pe dosa-dosa, trus Tuhan Allah mo kase tu karunia Roh Kudus pa ngoni. 39 Soalnya Tuhan Allah so kase tu samua janji itu pa ngoni deng pa ngoni pe keturunan, deng lei pa tu orang-orang yang tinggal di tampa-tampa yang jao. Tu janji itu Tuhan Allah mo kase pa samua orang yang Dia pangge for iko pa Dia.”
40 Petrus bicara banya lei pa dorang. Dia basaksi deng kase smangat pa dorang, dia bilang, “Skarang ini banya orang jaha, mar ngoni jang iko pa dorang. Ngoni musti kase ngoni pe diri pa Tuhan supaya mo slamat.”
Orang-orang percaya pe cara hidop
41 Tu orang-orang yang da trima tu Petrus da bilang itu dapa baptis, kong tu orang-orang yang jadi percaya pa Yesus tatamba kira-kira tiga ribu orang. 42 Dorang ja bakumpul sama-sama deng orang-orang laeng yang percaya pa Yesus. Dorang lei rajin ja badengar tu ajaran dari rasul-rasul kong dorang ja beking perjamuan deng basombayang sama-sama.
43 Waktu itu, tu rasul-rasul da beking banya hal-hal yang luar biasa deng tanda-tanda ajaib yang se tunjung Allah pe kuasa, sampe samua orang jadi taheran-heran kong hormat pa Tuhan Allah. 44 Samua orang yang so percaya itu so jadi satu, dorang ja bakumpul sama-sama. Samua harta yang ada pa dorang, dong pake sama-sama. 45 Dorang jual dong pe harta, kong tu doi dorang kase berbage pa orang-orang iko tu orang-orang pe perlu masing-masing. 46 Saban hari deng satu hati dorang ja bakumpul di kintal kompleks Ruma Ibada Pusat. Dorang beking perjamuan dari satu ruma ka ruma laeng kong makang sama-sama deng snang deng tulus hati. 47 Dorang ja puji pa Tuhan Allah, deng banya orang suka lei pa dorang. Kong saban hari Tuhan se tamba pa dorang tu orang-orang yang jadi percaya pa Dia for dapa slamat dari hukuman dosa.