Zakheus bertobat kong slamat dari hukuman dosa
19
1 Yesus sampe di kota Yerikho kong bajalang trus mo balewat tu kota itu. 2 Di kota itu ada satu orang kaya, tu dia pe nama Zakheus. Dia itu kapala dari tu petugas-petugas pajak. 3 Waktu Yesus balewat, Zakheus brusaha mo lia bagimana tu Yesus itu. Mar Zakheus nyanda dapa lia pa Yesus, lantaran pe banya orang di situ deng lei Zakheus pe badan pende. 4 Jadi dia balari for balebe dulu dari tu orang banya itu, kong dia nae ka atas pohong ara for lia pa Yesus yang mo lewat di situ.5 Waktu Yesus sampe di dekat pohong ara itu, Dia bahaga ka atas kong babilang, “Zakheus, capat jo turung! Soalnya ni hari Kita musti manumpang pa ngana pe ruma.”
6 Pe dengar itu, Zakheus iko turung, kong dia trima Yesus pa de pe ruma deng snang hati. 7 Waktu tu orang-orang da lia itu, dorang mulai babafeto, “Tu Zakheus itu orang berdosa, no kong kiapa dang Dia mo pi basingga pa Zakheus pe ruma?”
8 Kong Zakheus badiri trus babilang pa Tuhan Yesus, “Bapak, co lia, kita mo kase pa orang miskin tu stenga dari kita pe kepunyaan. Trus pa sapa jo yang perna kita da peras akang for dapa doi, kita mo se bale ulang pa dia sampe ampa kali lipa.”
9 Yesus bilang, “Ni hari, samua orang yang ada di ruma ini so slamat dari hukuman dosa lantaran ni Zakheus so se tunjung kalu dia itu butul-butul Abraham pe keturunan. 10 Soalnya tu Anak Manusia datang for cari tu orang-orang yang jao dari pa Tuhan Allah, kong se slamat pa dorang dari hukuman dosa.”
Prumpamaan tentang spulu doi mas
11 Samantara tu orang banya badengar tu Yesus ja bilang, Yesus se trus babicara pa dorang. Dia cirita satu prumpamaan lantaran waktu itu so dekat Yerusalem, deng tu orang banya bapikir kalu dorang so langsung lia Tuhan Allah Berkuasa sbagai Raja pa Dia pe orang-orang. 12 Yesus bilang, “Ada satu bangsawan brangkat ka satu negri yang jao for dapa lantik jadi raja. Abis dia dapa lantik, dia babale ulang pa de pe negri. 13 Seblum dia brangkat, dia pangge spulu budak dari tu de pe budak-budak. Kong dia kase pa tu spulu budak itu masing-masing satu doi masa kong dia bilang pa dorang, ‘Pake jo tu doi itu for bausaha akang sampe kita babale ulang kamari.’
14 Mar tu orang-orang pa de pe negri itu binci pa dia. Jadi waktu dia so brangkat, dorang kirim utusan pigi ka negri yang jao itu for bilang bagini, ‘Torang nimau tu orang itu mo jadi tong pe raja.’
15 Mar biar bagitu tu bangsawan itu tetap dapa lantik jadi raja. Kong waktu dia babale pa dia pe negri, dia pangge tu de pe budak-budak yang dia da kase akang doi mas itu for cari tau brapa tu untung yang dorang da dapa dari dong pe usaha.
16 Tu budak yang pertama datang kong babilang pa dia, ‘Tuang, tu satu doi mas yang tuang da kase pa kita itu, skarang so tatamba spulu doi mas.’
17 Kong dia bilang pa tu budak itu, ‘Bagus skali tu ngana da beking, hei budak yang bae. Ngana so setia urus tu hal yang kacili skali, so itu skarang kita kase percaya akang pa ngana for baprenta spulu kota.’
18 Abis itu, datang tu budak kadua kong babilang, ‘Tuang, tu satu doi mas yang tuang da kase pa kita itu, skarang so tatamba lima doi mas.’
19 Kong tu raja bilang pa tu budak, ‘Kalu bagitu, kita kase percaya akang pa ngana for baprenta di lima kota.’
20 Trus tu budak yang laeng datang kong babilang, ‘Tuang, napa tu tuang pe satu doi mas. Kita da bungkus akang tu tuang pe doi mas ini deng lengso for kita simpang. 21 Kita kwa tako pa tuang, so itu no kita beking bagitu. Soalnya tuang itu orang yang kras, tuang ja ambe apa tu bukang tuang punya deng lei ja bapanen apa tu bukang tuang da tanang.’
22 Kong tu raja bilang pa tu budak itu, ‘Hei budak yang jaha, kita mo hukum pa ngana iko tu ngana da bilang itu. Ngana so tau kalu kita pe orang kras. Kita ja ambe apa tu bukang kita punya, kita ja bapanen apa yang bukang kita da tanang. 23 Kalu bagitu, kiapa dang kita pe doi itu ngana nyanda simpang di bank? Jadi waktu kita bale kamari, kita bole ambe tu doi deng de pe bunga.’
24 Kong tu raja bilang pa orang-orang yang da badiri di situ, ‘Ambe jo tu satu doi mas dari pa dia, kong kase pa tu budak yang tatamba spulu doi mas.’
25 Mar dorang manyao, ‘Tuang, dia itu so tatamba spulu doi mas. Kiapa dang bapak mo beking bagitu?’
26 Tu raja manyao pa dorang, ‘Kita bilang pa ngoni, sapa tu bole mo se percaya akang sesuatu, pa dia itu mo dapa se percaya akang lebe banya lei. Mar sapa yang nimbole mo se percaya akang sesuatu, apa jo yang ada pa dia mo dapa ambe biar itu cuma sadiki. 27 Mar skarang, samua tu kita pe musu yang nyanda suka kita mo berkuasa pa dorang, tangka jo pa dorang samua kong bawa kamari trus bunung jo pa dorang di muka pa kita.’ ”
Orang banya puji-puji pa Yesus waktu Dia maso ka Yerusalem
28 Abis Yesus cirita tu prumpamaan itu, Dia bajalang lebe dulu dari tu orang banya for se trus Dia pe perjalanan ka Yerusalem. 29 Waktu so dekat kampung Betfage deng Betania, tu ada di bukit Zaitun, Yesus suru pa Dia pe dua murit, 30 Dia bilang, “Pigi jo ngoni ka kampung di muka sana. Waktu ngoni maso di situ, ngoni mo dapa lia satu keledai muda tu da se ika yang blum perna ada orang da nae akang. Ngoni buka jo tu de pe tali trus bawa kamari tu keledai itu. 31 Kong kalu ada orang batanya pa ngoni, ‘Kiapa ngoni kase lapas tu keledai itu dang?’ Ngoni jawab jo, ‘Tuhan perlu tu keledai.’ ”
32 Trus tu dua murit itu pigi, kong dorang dua da alami samua sama deng tu Yesus da bilang pa dorang. 33 Waktu dorang buka tu keledai itu pe tali, tu orang-orang yang punya keledai itu babilang pa dorang, “Hei, kiapa ngoni se lapas tu keledai itu dang?”
34 Dorang manyao, “Tuhan ada mo pake ni keledai.” 35 Abis itu, tu dua murit itu bawa tu keledai pa Yesus, kong dorang se alas tu dong pe baju di atas keledai, trus dorang tolong pa Yesus nae di keledai itu. 36 Samantara Yesus di atas keledai, Yesus se trus tu perjalanan. Kong orang-orang da se alas dorang pe juba di jalang for sambut pa Yesus. 37 Waktu Dia so mo sampe di Yerusalem, di jalang yang baturung-turung dari Bukit Zaitun, samua orang tu ja iko pa Yesus snang deng puji-puji pa Tuhan Allah deng suara kuat lantaran samua mujisat yang dorang so lia. 38 Dorang bilang,
“Puji jo pa Dia tu da datang sbagai Raja,
yang da datang dalam nama Tuhan!
Skarang manusia so bole baku bae deng Tuhan Allah tu ada di sorga,
kong puji deng hormat jo pa Dia di tampa mahatinggi!”
39 Mar ada bebrapa orang dari golongan Farisi di antara orang banya itu babilang pa Yesus, “Guru, togor akang tu orang-orang yang ja iko-iko pa Guru supaya badiam.”
40 Mar Yesus cuma bilang pa tu orang-orang dari golongan Farisi itu, “Kita bilang pa ngoni, kalu tu orang-orang itu badiam, tu batu-batu ini yang mo bataria puji-puji pa Kita.”
Yesus manangis da lia tu Yerusalem
41 Waktu Yesus so dekat di kota Yerusalem, Yesus lia tu kota itu kong Dia manangis. 42 Dia bilang, “Ado kasiang ngoni tu orang-orang Yerusalem. Kita harap ngoni tau apa yang bole beking ngoni hidop deng damai, mar skarang so terlambat, itu so tasambunyi dari pa ngoni. 43 Soalnya nanti ada de pe waktu, tu ngoni pe musu mo kepung pa ngoni, dorang mo pele tu kota kong mo srang pa ngoni dari samua arah. 44 Dorang mo se ancor tu ngoni pe kota kong dorang mo bunung pa ngoni samua yang da tinggal di dalam. Dorang nyanda mo se biar ada batu yang tasusung pa de pe tampa, biar lei itu cuma satu. Ngoni samua yang ada di dalam deng tu ngoni pe kota mo dapa hukuman, lantaran ngoni nyanda trima pa Tuhan Allah waktu Dia datang for se slamat pa ngoni.”
Yesus user tu orang-orang yang da bajual di kintal Ruma Ibada Pusat
45 Serta so di Yerusalem, Yesus maso di kintal Ruma Ibada Pusat. Di situ Dia mulai user samua orang yang da bajual. 46 Kong Dia bilang pa dorang, “Di Kitab Suci ada tatulis bagini, ‘Kita pe ruma orang mo bilang tampa basombayang, mar ngoni so beking jadi tampa batipu.’ ”