Laha gwal varagagha lu
14
1 Ka nghaŋtá yu kay guli ta Zwaŋa Tuwak ta sladu ta ghwá *Siyuna.
Ta sladu mnduha dəmbuʼ dərmək nda fwaɗ mbsak fwaɗ mida kawadaga nda tsi.
Inda taŋ,
nda vinda hga Zwaŋa Tuwak nda hga Da ni guli ma bizlbizla kumaª taŋ.
2 Ka snaŋtá yu ta sani lwi ta ghudzagata manda ghudzaga mghama zala nda ya manda ghudzaga ŋəzla luwa.
Tsa lwi ta snə yu ya ná,
manda ghudzaga htimbil ta dzə lu ya nzakwa ni.
3 Lfiɗa laha ta fə tsa ndəghata mnduha ya ta kəma dughuruk,
nda ya ta kəma tsa skwiha fwaɗ nda hafu ma həŋ ya,
nda ya ta kəma tsa halata mnduha ya.
Haɗ sana mndu ta laviŋta taghaftá tsa laha ya,
ka tsa mnduha dəmbuʼ dərmək nda fwaɗ mbsak fwaɗ mida si ta haɗik vara lu ta həŋ ya a tsi wa.
4 Hahəŋ ná,
ŋəriŋ a həŋ ta vgha taŋ nda hliri wa.
Ksana ksa həŋ ta vgha taŋ,
ka nzata həŋ hezleʼ.
Mista Zwaŋa Tuwak ta mbaɗa həŋ ta mbaɗa dər ta dzaʼa diga tsi.
Varagap mataba mnduha lu ta həŋ.
Nda nza həŋ ka taŋtaŋa ni vlaŋ lu ta Lazglafta nda ya ŋa Zwaŋa Tuwak.
5 Ta sna a lu ta tsakalawiª ma wa taŋ wa.
Haɗ sana maslivinza ta həŋ guli wa.
Duhwalha Lazglafta hkən
6 Ka nghaŋtá yu ta sana duhwala Lazglafta ta ndru ma ghuvaŋata luwa.
Mamu *Lfiɗa Gwaɗa ŋa kɗekedzeŋ da tsi ŋa mnay ŋa mnduha ta ghəŋa haɗik,
ŋa inda haɗikha,
ŋa inda mndəra mndu,
ŋa inda mndəra gwaɗa ta gwaɗ lu,
ŋa inda zivira mnduha.
7 Kaʼa nda lwi dagala dagala mantsa:
« Zləŋawa zləŋa ta Lazglafta ka zləzlva kuni,
kabga sagha sa fitika tsay ni ta guma.
Tsəlɓawa tsəlɓa ta tsəlɓu ŋa mndu ya ta magaftá luwa,
nda haɗik,
nda drəf,
nda dzuɓayhaª,
» kaʼa.
8 Ka sab mahisa sana duhwala Lazglafta.
Kaʼa mantsa:
« Kweŋ tama!
Nda zləmba Babila ta nzakway ka luwa dagala.
Snu sna ta ima inabi ta inda mnduha,
sa tsa ima inabi ya ná,
hliri ya manda ŋa niª,
» kaʼa.
9 Ka sab mahkəna sana duhwala Lazglafta guli.
Kaʼa nda lwi dagala dagala mantsa:
« Ka ta tsəlɓay mndu ta tsəlɓu ŋa tsa nimtak ya,
nda ya ŋa tsa skwa wuyay tsaf lu ya,
ka tsuʼaftá tsi ta ŋizla ta bizlbizla kuma ni ka ta dzva ni a tsi,
10 dzaʼa say tsatsi guli ta ima inabi gatá sida Lazglafta kul haɗ sana skwi gaɓam lu mida.
Tsa ima inabi ya ná,
ma leghwa ɓasatá ŋuɗufa Lazglafta pghamta lu.
Ŋa gay lu ta iri ŋa ni ma ghandanda ta vu ta kəma mnduha Lazglafta nda ya ta kəma Zwaŋa Tuwakª.
11 Ɗiŋa tsa vu ta gə lu ta iri ŋa taŋ ya ná,
dzaʼa gɗava gɗa ta ŋlu ta luwa ha ŋa kɗekedzeŋª.
Tsa gwal ta tsəlɓu ŋa tsa nimtak ya,
nda ya ŋa tsa skwa wuyay tsaf lu ya,
nda inda gwal ta zlghaftá tsa mbsaka hga ni ya ná,
haɗ mbiʼa vgha taŋ ma ghuya ɗaŋwa nda fitik tani,
nda rviɗik tani wa,
» kaʼa.
12 Tsaya tama,
kaghuni gwal ta snatá zlaha Lazglafta,
ta zlghaftá *Yesu nda ŋuɗuf,
gɗavawagɗa mantsa ya.
13 Ka snaŋtá yu ta sana lwi ta gwaɗagata ta luwa.
Kaʼa mantsa:
« Vinda!
Daga ndana ná,
“Rfu da gwal ta rwuta ma slna Lazglafta,”
kaʼa.
“Mantsa nzakwa ni,
kada mbiʼa həŋ ta vgha ma slnaha taŋ,
kabga ta dzaʼa mista taŋ slnaha taŋ,”
» ka Sulkum.
Guma Lazglafta ta ghəŋa mnduha ta ghəŋa haɗik
14 Kəʼa ka yu guli ná,
ka nghaŋtá yu ta ghwayak ka ŋusliŋ.
Ta tsa ghwayak ya,
mamu sana mndu manda Zwaŋa mnduª ta nzaku tida,
nda wa ta zewzewa dasu ma ghəŋa ni,
nda ŋatá vɗu ya nda za ma dzva ni guli.
15 Ka sab sana duhwala Lazglafta guli ma həga Lazglafta.
Kaʼa nda lwi dagala dagala nda tsa mndu ta nzaku ta ghwayak ya mantsa:
« Kla ta tsa vuɗa gha ya,
ka tska ka ta skwi ta vwah,
kabga sagha sa fitika tska skwiª ta vwah.
Nda ndəha nimaya ta haɗik,
» kaʼa.
16 Ka wuɗidiŋta tsa mndu ta nzaku ta ghwayak ya ta tsa vuɗani ya,
ka gi tskatá lu ta nimaya ta ghəŋa haɗik.
17 Ka sab sana duhwala Lazglafta ma həga Lazglafta ya ta luwa.
Mamu vɗu ya nda za da tsaya.
18 Ka sab sana duhwala Lazglafta ma gwir,
ya ta nzakway ta ga mgham ta ghəŋa vu.
Kaʼa nda lwi dagala dagala nda tsa mndu ta ŋanatá vɗu nda za ya mantsa:
« Wuɗidiŋwuɗa ta tsa vuɗa gha nda za ya,
ka tskanata ka ta yakwa inabiha ta haɗik,
kabga nda ndəha tsa yakwa ni ya,
» kaʼa.
19 Ka gi wuɗiŋtá tsa duhwala Lazglafta ya ta tsa vuɗani ya ta haɗik.
Ka tskatá tsi ta yakwa inabi ta haɗik.
Ka pghamtá tsi ta tsa skwi tska tsi ya ma mghama glifiŋa ɓasata ŋuɗufa Lazglafta.
20 Ka huʼanaptá lu ta tsa yakwa inabi ma tsa glifiŋ ya ta hula luwa.
Ka mbəzagaptá us mida ka tata vgha ka mbaɗa manda zala ha meli hkən dərməkª.
Lata ni guli,
ka lam la plis dida ná,
ghəŋghəŋ yeya dzaʼa nghaku.