Sana marakw nda makɗakatandaŋ
12
1 Tahula tsa,
ka zlagapta sana mandərmimi ta luwa.
Sana marakw ya bukwam lu nda fitik manda skwi nda lgut.
Ka sladafta tsi ta tili nda wa ta tekwatsa ghwaŋpəɗ his ma ghəŋ.
2 Nda huɗi tsa marakw ya ta ɓasa yaku,
ta dgakudgaku.
Ka wah tsi ta wahu,
kabga kuzlaŋtani.
3 Ka zlagəglapta sana mandərmimi ta luwa.
Sana mghama makɗakatandaŋ ya ka dva manda vu.
Ndəfáŋ ghəŋa ni,
nda wawa ta zewzewa mida.
Ghwaŋ duliha ni guli.
4 Ka slpidiŋtá tsi ta faway turtuk ma dgatá tekwatsaha hkən ta luwa ta haɗik nda hturani.
Ka sladata tsa makɗakatandaŋ ya ta kəma tsa marakw ta dzaʼa dgaku ya ŋa ndutá tsa zwaŋa ni ya dgarª tsi.
5 Ka yatá tsi ta zwaŋa zgun ya dzaʼa ŋanatá inda mndəra mnduha nda saraka kufuraniª.
Na gi frekw saha tsa zwaŋ ya,
ka gi klaghatá lu da Lazglafta nda dughurukwa ga mghama ni.
6 Ta hwayaghatá tsa marakw ya da mtak,
da vli ya payaf Lazglafta,
ŋa zunustá skwa zay hada ka fitik dəmbuʼ nda his dərmək nda mkuʼ mbsak.
7 Ka lmanafta lu ta lmu ta luwa.
Ka lmanaftá i Miselª nda duhwalha ni ta lmu nda makɗakatandaŋ.
Ka lmu i makɗakatandaŋ nda duhwalha ni tani.
8 Ka ŋawafta i *Misel nda duhwalha ni ta həŋ.
Ta haɗ wa taŋ ŋa nzəglata ta luwa wa.
9 Ka sliŋwigiŋtá lu ta tsa mghama makɗakatandaŋ ya.
Tsaya ta nzakway ka dzidza nahaɗik,
ta hgə lu ka halaway,
ghwaɗaka sulkum ta nana inda ghəŋa haɗik.
Ka sliŋwigiŋtá lu ta haɗik kawadaga nda duhwalha ni taniª.
10 Ka snaŋtá yu ta sana lwi ta luwa ta gwaɗata nda mbraku,
kaʼa mantsa:
« Ndana tama,
mbamaf mba Lazglafta,
maraŋ mara ta mbrakwa ni.
Tsatsi ta ga Mgham.
Maraŋ mara Kristi ta ŋa ni ma mbraku guli,
kabga sliŋwigiŋtani ta haɗik ta mndu ya ta gɗata ta nana zwana ma mu.
Tsatsi ya ta gɗata ta wula zwana ma mu ta kəma Lazglaftaª mu nda fitik tani nda rviɗik tani.
11 Ŋrap ŋra həŋ,
kabga vəl varata Zwaŋa Tuwak ta həŋ nda usa ni,
nda ya kabga vəl mnay taŋ kazlay:
Kahwathwata gwaɗa Lazglafta kəʼa.
Zləŋaŋə a həŋ ta mtaku
ka laghu da ɗvutá hafa taŋ wa.
12 Tsaya tama,
rfa ta rfu kagha luwa,
nda gwal ta nzaku tida tani.
Ɗaŋwa ŋa gha haɗik nda drəf,
kaghuni dzaʼa ghuya ɗaŋwa,
kabga la da kaghuni halaway nda ga ta sida ni katakata.
Nda sna kazlay:
Ta sira a fitika ɗa wu » kəʼa.
13 Kəʼa ka makɗakatandaŋ ná,
sliŋwigiŋsliŋwa lu ta haɗik.
Ka liŋtá tsi ta tsa marakw ta yatá zwaŋ ya.
14 Ka vlaŋtá lu ta zlambakha his manda ŋa dzala ta tsa marakw ya,
ŋa ndraghata ni da mtak da vli ya payanaf Lazglafta,
ŋa kwala nahaɗik ɓhanavata.
Hada dzaʼa zunusta lu ta skwa zay ka vaku hkən,
fwaɗ ka maŋəzlawatsª.
15 Ka vnihidiŋtá tsa nahaɗik ya ta imi ma wa ni mista tsa marakw ya manda zala,
má ŋa klaghata.
16 Ama ka kataftá haɗik ta tsa marakw ya,
ka gunatá wi ka ndaghatá tsi ta tsa zala zligiŋ makɗakatandaŋ ma wa ni ya.
17 Ka ɓasaftá tsa makɗakatandaŋ ya ta ŋuɗuf nda tsa marakw ya.
Ka sliʼafta tsi ka laghu da lmu nda pɗakwa zivira tsa marakw ya,
gwal ta ŋanatá zlahuha Lazglafta,
nda ya nda gwal ta ŋanatá ta nzaku ka masləmtsəka *Yesu.
18 Ka laghu tsa makɗakatandaŋ ya sladafta ta wutak ta wa drəf.