Ghwaɗaka skwi ghanik
3
1 Zwana ma ɗa,
yaha kuni da pghamtá vgha ɓəskaʼ ŋa nzaku ka gwal tagha skwi,
kabga mali ta ghəŋa amu dzaʼa tsanaghata lu ta guma katakata.
2 Inda amu ná,
dagala krughuvi kavghakavgha ta gə mu.
Ka haɗ mndu ta guvtá krughuvi ma gwaɗa wu ná,
ŋərma mndu tsaya ta laviŋta nghaftá vgha ni demdem.
3 Ka fanam fa mu ta tsuhwal ma wi ta plisha ŋa snamata taŋ ta gwaɗa mu katsi ná,
laviŋ lava mu ta kla inda vgha ni demdem dər ndiga tsi.
4 Nghawa ngha guli ɓa ta kwambalu dagala.
Mghama falak yeya ta tiŋway.
Nda zwaŋa suwak kwitikw ta kla mndu ta sway da inda vli ta kum tsi.
5 Manda va tsaya guli ná,
sana skwi kiʼa katakata na ghanik,
mataba fawayha ta mndu.
Nduk nda tsa ná,
ta ghərɓaku nda skwiha dagala dagala.
Nghawa ngha guli ta vu ndez kwitikw,
laviŋ lava ta driŋtá mghama zivak nekwnekw.
6 Ghanik guli ná,
manda vu nzakwa ni.
Ma tsa ghanik ta nzakway ma amu ya,
nzamta inda ghwaɗaka skwi.
Mataba fawayha mu nzamta ghanik,
ka pgha ɓədzaku ta vgha demdem.
Ta ghanika mu nzafta duda vu,
mbaɗa ghanik tama ka pgha vu ta nzakwa mu daga yagatá amu ha ka mta ta amu.
7 Nda mndərga skwiha:
Dər nimtak tsi,
dər zarak tsi,
dər nahaɗik tsi,
dər klipi tsi,
mndu ta zlahafta.
8 Ama ghanik ná,
haɗ mndu ta laviŋtá zlahafta wa.
Sana ghwaɗaka skwi ya kul laviŋtá lu ta zlahafta.
Dagala gruma ta dza mndu mida.
9 Nda tsi ta zləzlva mu ta Mghama mu ta nzakway ka Da mu,
nda tsi guli ta ksiʼa amu ta mnduha magaf lu ta gara vghaª nda Lazglafta.
10 Ma va tsa wubisim ya ta sliʼagapta tfa wi nda ksiʼi tani.
Zwana ma ɗa,
ra a ka nzakwa ni mantsa wa.
11 Ta mbəzagap mbəza imi zɗa nda imi ɗahɗaha ma va tsa dzuɓay turtuk ya ra?
12 Zwana ma ɗa,
Haɗ fwa ghuraf dzaʼa walaŋtá yafta yakwa *Zaytuŋ wa.
Haɗ fwa inabi dzaʼa walaŋta yaftá yakwa ghuraf guli wa.
Manda va tsaya guli ná,
haɗ imi zɗa ta sabi ma imi nəm nəma guli wa.
Da Lazglafta ta mutsafta lu ta ɗifil
13 Wati ma mndu ya nda ɗifil ma ghəŋa ni nda sna ta skwi na?
Ka mara tsi ta slnaha ni nda ma nzaku ɗina,
nda hanata ghəŋa ya ta mutsu lu ma ɗifil.
14 Ama ka ndughundughwa ŋuɗufa ghuni nda draku,
nda ya nda ɗva ghəŋ katsi,
ma ghərɓə kuni ta ghərɓaku ka bətbət,
ma tsakalana kuni ta wi ta kahwathwata.
15 Mndərga tsa ɗifil ya ná,
ta saha ta luwa a wa.
Ŋa ghəŋa haɗik tsaya,
ŋa sluʼuvgha ya,
ŋa halaway ya guli.
16 Ma vli ta gə draku nda ɗvuta ghəŋ ta mgham ná,
mamu hwazlaɓaku nda inda mndərga ghwaɗaka slnaha tani.
17 Taŋtaŋ karaku,
ɗifil ya ta saha ta luwa ná,
nda ghuɓa.
Tahula tsa,
ta klak kla ta zɗaku nzaku,
leɓtekwa,
ta dzra ghəŋ,
dagala hiɗahiɗa da tsi,
slna ɗina ɗina ta sabi da tsi,
haɗ ta gala mndu wu,
haɗ maɗgwirmaɗgwir da tsi wa.
18 Gwal ta ɗva zɗaku ná,
zɗaku ŋa taŋ ta sləgay,
yakwa ni ya ta mutsu həŋ ná,
tsaya nzaku tɗukwa.