Nzaku ma tsuwaɗak
5
1 Ndana tama,
zwana Lazglafta ya ɗvu tsi katakata kuni,
ksawaksa ta saɗa niª.
2 Ma slnaha ghuni ta mag kuni inda fitik,
maraŋwa mara ta ɗvu ŋa sanlaha.
Mantsa ya ɗvuta *Kristi ta amu ma mtuta ni ŋa mbamafta.
Tsa skwi maga tsi ya ná,
zɗəgana zɗa ta Lazglaftaª manda skwa pla ghəŋ ta vlaŋta lu.
3 Ya nda nza kuni ka ŋa Lazglafta ya,
yaha kuni walaŋtá hliri,
yaha kuni maga skwa hula,
yaha kuni tsagana,
yaha mndu da razaghunafta ta ghəŋa tsa skwiha ya.
4 Ra a guli ka saba skwa hula,
nda tsaɓaku,
nda ɓla vgha ma wa ghuni wa.
Skwi ta raku ka sabi ma wa ghuni ná,
rfay ghuni ta Lazglafta ta ghəŋa inda skwiha magaghuna tsi.
5 Wya skwi ŋa snaŋta ghuni:
Haɗ gwal ta hliri,
nda gwal ta maga skwa hula,
nda gwal ta tsagana,
dzaʼa mutsaftá skwa za mgham ma luwa ga mghama i Lazglafta nda Kristi wa.
Tsa gwal malaghu mala ɗvafta taŋ ta tsagana ka Lazglafta ya ná,
ka guram nda wya skwi tsaya.
6 Yaha mnduha da nanaghatá kaghuni nda tsakalawa taŋ.
Ta ghəŋa tsa ghwaɗaka skwiha ya ta ɓasa Lazglafta ta ŋuɗuf dzaʼa kəl tsi ka tsanaghatá guma ta gwal ta maga tsa ghwaɗaka skwiha ya.
7 Ma guy kuni ta vgha nda tsa gwal ta maga mndərga tsa ghwaɗaka skwiha ya.
8 Si ma grusl nzatá nzakwa ghuni ghalya.
Ndana tama,
nda ndiʼa kuni nda Mgham *Yesu,
ma tsuwaɗakª nzatá nzakwa ghuni,
nzawa nza tama ta nzakwa ghuni manda gwal ta nzaku ma tsuwaɗak.
9 Kəl yu ka mnay mantsa ya ná,
ta sliʼagapta ma tsuwaɗakª na skwiha ɗina ɗina,
nda skwiha tɗukwa tɗukwa,
nda kahwathwata.
10 Ŋavawa ŋa ka tsəmaptá skwi ta zɗəganatá Mgham,
ka maga kuni.
11 Ma fam kuni ta ghəŋa ghuni da ghwaɗaka skwiha ta mag gwal ma gruslª,
haɗ ghəzliwa ni wa.
« Na skwi ta mag kuni na ná,
» ɗina a wu,
ka kuni mnanaŋtá həŋ baŋluwa katək.
12 Ta ksaku ka hula dər gwaɗay ma wi ta tsa skwi ta mag həŋ ma ɗifa ma ɗifa ya.
13 Ka kligiŋ kla lu ta ghəŋa tsa skwiha ya ta daɓi katsi ná,
dzaʼa nzakway tsuwaɗaka.
14 Ka nda ghada saba skwi ta daɓi katsi ná,
gi tsuwaɗak nzakwa ni.
Tsaya ta kəl lu ka mnay kazlay:
« Kagha mndu ta hani,
sliʼaf sliʼa ta hani.
Sliʼaf sliʼa mataba gwal nda rwa,
ka tsuwaɗakaghafta Kristi » kəʼa ya.
15 Mantsa tama,
ɗasuwa ka kuni nda nzaku ta nzaku kuni.
Ma nzaku kuni manda la rgha,
nzawa nza manda gwal nda mahizl ma ghəŋa taŋ.
16 Inda fitika mutsafta ghuni ta maga skwi ɗina ya ná,
gi magawa maga,
kabga ndaɗaʼa ghwaɗaka skwiha ta mag mnduha ta na fitik na wa.
17 Tsaya tama ná,
ma nza kuni manda la rgha,
ŋavawa ŋa ka sna skwi ta mnaghunata Mgham ŋa magay ghuni.
18 Ma ghuyaf kuni nda ima inabi,
ya ta ɓadzay ta nzakwa mndu,
Sulkum nda ghuɓa katsi mbutá kaghuni.
19 Waɗahanafwa vgha sani nda sani mataba ghuni,
nda inda mndəra lahaha ya ta vlaghunata Sulkum.
Zləzlvawa Lazglafta ma hya hya ŋuɗufaª ghuni nda lahaha.
20 Rfawa rfa ta Lazglafta ta nzakway ka Da inda fitik ta ghəŋa inda skwi ta magaghunata tsi nda ma Yesu Kristi.
Nzakwa i zəʼal nda marakw
21 Hanaganawa hana ta ghəŋa ghuni mista sani nda sani,
kabga ta zləŋay kaghuni ta *Kristi.
22 Kaghuni miʼaha,
ka hanagana hana dər wati ma marakw ta ghəŋ mista zəʼala taŋ.
Manda tsaya dzaʼa maraŋta kuni ta hanatá ghəŋa ghuni mista Mgham *Yesu.
23 Zəʼal ná,
ghəŋa markwa taŋ ya,
manda nzakwa Kristi ka ghəŋ ta ghəŋa *Igliz ya.
Kristi ta mba tsa gwal zlghay nda ŋuɗuf ta nzakway ka sluʼuvgha ni ya guli.
24 Mantsa ya guli,
inda miʼaha,
ka hanagana hana dər wati ta ghəŋa ni mista zəʼala taŋ ma inda skwi,
manda ya ta hanaganata Igliz ta ghəŋ mista Kristi ya.
25 Kaghuni zəʼalha,
ka ɗvuta dər wati ma zgun ta markwa taŋ manda ya ta ɗvu Kristi ta Igliz,
ka mtutá tsi kabgani ya.
26 Mtu mta ta ghəŋa ni,
ka ghuɓiŋtá tsi nda imiª nda ma gwaɗa ni kada nzakwa tsi hezleʼ.
27 Ta kumay ta fatá Igliz ka makwa ta rka ta wa ira ni.
Va a ta nzata ni nda rɗak wu,
va a ta razu tida wu,
va a ta dər wati ma bədzaku tida wa.
Ta kumay ta nzakwa ni ɗina kul haɗ sana skwi tida.
28 Manda tsaya guli,
ka ɗvuta zəʼal ta markwa taŋ,
manda va ya ta ɗvuta tsi ta sluʼuvgha ni.
Mndu ta ɗva markwa taŋ ná,
ghəŋa ni ta ɗvu tsi.
29 Haɗ mndu ta husaŋta sluʼuvgha ni wu,
ta zuŋ za ta skwa zay,
kelkelkel kəʼa ta nghay,
manda ya ta zə Kristi ta skwi ŋa Igliz,
ka nghay kelkelkel ya,
30 kabga inda amu sluʼuvgha ni mu.
31 « Tsaya ta kəl zgun ka zlaŋtá da ni nda ma ni,
ka laghu ndiʼaftá vgha nda markwa taŋ,
ka nzakwa taŋ ka sluʼuvgha turtuktukª,
» ka defteri mnata.
32 Tsa gwaɗa ya ná,
nda la skwi mida.
Ka iʼi ta mnaghunata ná,
ta ghəŋa i Kristi nda Igliz ta mna tsi ta tsa gwaɗa ya.
33 Tsaw nghaghunagha ngha tsa gwaɗa ya ta kaghuni guli.
Inda mndu ka ɗvuta tsi ta markwa taŋ manda ya ta ɗvuta tsi ta ghəŋa ni.
Inda marakw guli,
ka sna tsi ta gwaɗa da zəʼala taŋ.