Sliʼagamap sliʼa Lazglafta ma mtaku kawadaga nda Yesu Kristi
2
1 Ghalya si nda rwa kaghuni ta wa ira Lazglafta,
kabga ghwaɗaka skwiha si ta mag kuni.
2 Si ta gɗata ta ksa saɗa mnduha ma na ghəŋa haɗik na kuni.
Gwaɗa halaway ta ga mgham ta ghəŋa ghwaɗaka sulkumha,
ta nzaku ma ghuvaŋata luwa si sna kuni.
Kulam ndana tsa ghwaɗaka sulkum ya ta gɗata ta ksa slna ma ŋuɗufa mnduha ta kwalaghuta sna gwaɗa Lazglafta.
3 Amu demdem guli,
manda tsa nzakwa hahəŋ ya si amu ghalya.
Ghwaɗaka skwiha ta kum ŋuɗufa mu,
nda ghwaɗaka ndanuha ta ndanu mu,
si ta mag mu.
Ma tsa nzatá nzakwa mu manda tsaya ná,
ma dzaʼa dəɗamdəɗa amu guli da ɓasa ŋuɗufa Lazglafta,
ka guram nda va ŋa tsa mnduha ta maga ghwaɗaka skwiha ya.
4 Tsaw Lazglafta ná,
dagala tawa hiɗahiɗa ni,
ɗvu ɗva ta amu.
5 Kulam nda va tsa rwatá amu,
kabga vəl magata mu ta ghwaɗaka skwiha ya ná,
ka ɗvaftá tsi ta amu ka vramamta nda hafu kawadaga nda *Kristi.
Zɗakatahuɗa Lazglafta kəl kuni ka mbafta.
6 Ma tsa ndiʼatá amu nda Kristi ya,
ka sliʼagamaptá Lazglafta mataba gwal nda rwa kawadaga nda *Yesu Kristi ka pghatá amu ta luwa,
ka nzamata ka ga mgham kawadaga nda Yesu Kristi.
7 Mantsa ya maramaŋta tsi ta zɗakatahuɗa ni nda ma Yesu Kristi,
ŋa nghaŋta mnduha dzaʼa yay lu ta kəma ta nzakwa glakwa tsa zɗakatahuɗa ni ta malaghutá inda skwi ya.
8 Zɗakatahuɗa ni tani kəl Lazglafta ka mbaghunafta nda ma zlghafta ghuni ta Kristi.
Mbaghunaf a ta ghəŋa vəl magata ghuni ta skwiha ɗina ɗina wu,
ka mbalay mbaghunafta tsi.
9 Mbaghunaf a Lazglafta ta ghəŋa vəl magata ghuni ta sana slna wu,
da ghərɓə mndu ta ghərɓaku.
10 Magatá slna Lazglafta na amu na.
Vlama vla ta hafu ka lfiɗ ma ndiʼatá amu nda Yesu Kristi ŋa gɗata mu ta maga slnaha ɗina ɗina.
Nda ghada payafta Lazglafta manda tsaya,
ŋa magay mu.
Ka mndu turtuk lu ma Kristi
11 Ka yu ta mnaghunata wa,
mndəra la *Yahuda a kaghuni wa.
Havakwahava ɓa ta nzakwa ghuni ghalya ta kul zlghaftá kuni ta *Kristi.
Gwal kul tsaku fafaɗa taŋ ka həŋ ta hga kaghuni.
Kəl həŋ ka hga kaghuni manda tsaya na:
Mnduha Lazglafta aŋni ka hahəŋ,
kabga ɗatsatá fafaɗa taŋ.
Tsaw tsa tsatá fafaɗa taŋ ya ná,
skwi ta nghanaŋtá sluʼuvgha ya ɗatsa mnduha nda dzva taŋ.
12 Havakwahava kazlay:
Ma tsa fitik ya ná,
sna a kuni ta Kristi wu kəʼa.
Nza a kuni tekw mataba mnduha ta haɗika Israʼila wa.
Tekw a kaghuni mataba gwal dzraf Lazglafta ta wi nda həŋ ka tanaftá imi ta sləməŋ ta həŋ ya wa.
Ma nzakwa ghuni ma na ghəŋa haɗik na ná,
haɗ skwi faf kuni ta ghəŋ tida wu,
sna a kuni ta Lazglafta guli wa.
13 Ghalya,
si diʼiŋ kuni nda Lazglafta.
Ndana tama,
nda ndiʼa kuni nda *Yesu Kristi ma pghiŋta ni ta usa ni ta gwaɗa ta kaghuni ma mtuta ni.
Tsaya ta ndusaghunakta nda Lazglafta.
14 Manda batá dzugur si nzatá nzakwa ghuma mataba mu,
ka sagha tsi psliŋta,
ka namafta ka mndəra mndu turtuk.
Əŋkaʼ a ka tsatsi ta famta zɗaku mataba mu.
15 Ka hliŋtá tsi ta inda tsa zlahuha ta mnə la Yahuda ya nda ma mtuta ni,
kabga ŋa guyanaftá mndəra la Yahuda nda sanlaha ma mndəra mndu ŋa nzakwa taŋ ka sana lfiɗa mndəra mndu turtuk.
Ma tsa magata ni mantsa ya famta tsi ta zɗaku mataba taŋ.
16 Ma tsa mtuta ni ta udza zləŋay ya guyanafta tsi ta tsa mndəra mnduha his ya ka mndəra mndu turtuk,
ka slərɓaptá zughu mataba taŋ nda Lazglafta.
Ma tsa mtuta ni ya kwala sani kul husaŋtá sani nda sani mataba taŋ.
17 Sasa Kristi ta ghəŋa haɗik da mna *Lfiɗa Gwaɗa ta ghəŋa zɗaku ŋa kaghuni gwal si diʼiŋ nda Lazglafta,
nda ya ŋa aŋni gwal si ta ndusanavat᪠Lazglafta ya.
18 Əŋkaʼ a ka Kristi kəl amu demdem,
kaghuni nda aŋni tani,
ka laviŋta ndusanavatá Lazglafta ta nzakway ka Da,
nda ma tsa Sulkum nda ghuɓa turtuk ya.
19 Tsaya tama ná,
nza a kuni ka mayəm wu,
nza a kuni ka mayəm guli tama wa.
Nda nza kuni ndanana tama ka mnda luwa kawadaga nda sanlaha ma mnduha Lazglafta.
Nda nza kuni ka mnda huɗa həga.
20 Nda nza kuni manda palaha ta bə lu ta həga nda tsi.
Gwal ghunay nda la anabi na tughwa tsa həga ya.
Yesu Kristi tsa pala dihaf tsa həga ya ta vgha tida ya.
21 Əŋkaʼ a ka tsatsi kəl tsa həga ya ka sladata,
ka ŋlaku,
ka nuta ka həga nda ghuɓa ka ŋa Lazglafta ya.
22 Ma tsa ndiʼatá kaghuni nda Kristi ya,
guyaghunafguya nda sanlaha ma gwal zlghay nda ŋuɗuf guli,
kada nuta mu ka tsa həga ta nzaku Lazglafta nda ma Sulkum ya.