Grafta nda nzakwa Abraham
4
1 Ndana tama,
nu dzaʼa mu mnay ta ghəŋa Abraham ta nzakway ka dzidza mu?
Nahgani mutsaf tsi ma nzakwa ni?
2 Ka si má ma slna ni maga tsi mutsafta Abraham ta nzakway ka mndu tɗukwata wa ira Lazglafta katsi ná,
ma raŋra ghubayni ta ghəŋa ni,
ama ta wa ira Lazglafta a tama wa.
3 Waká deftera Lazglafta ta mnay na?
Ka lu ta mnay ma deftera Lazglafta na:
« Zlghaf zlgha Abraham ta Lazglafta,
tsayaª kəl Lazglafta ka klafta ka mndu tɗukwata wa ira ni » kəʼa.
4 Ka maga maga mndu ta slna ná,
ta plana pla lu ta nisəla ni.
Tsa skwi plana lu ya ná,
mbəhay a mbəha lu wu,
skwi ta raŋta ya.
5 Ama ka lagha mndu ka zlghaftá Lazglafta nda ŋuɗufa ni klaf a ta ghəŋa ni ka mndu tɗukwata kəma Lazglafta ta ghəŋa tsa slna ni ta mag tsi ya wu katsi,
dzaʼa klaf kla Lazglafta ta tsa mndu ya ka mndu tɗukwata wa ira ni.
Mndərga tsa mndu ya guli ná,
nda sna kazlay:
Mamu tvi dzaʼa kəl Lazglafta ka nanaftá gwal dmaku ka gwal tɗukwata wa ira ni kəʼa.
6 Manda va tsaya ka mgham Dawuda guli ta fay ma laha ni ta ghəŋa gwal ya klaf Lazglafta ka gwal tɗukwata wa ira ni dər má maga a həŋ ta skwi ɗina.
Tsa mnduha ya ná,
mamu rfu da həŋ,
kaʼa.
7 « Rfu da gwal plana Lazglafta ta dmakuha taŋ,
ga həŋ.
Rfu da gwal hərɗiŋ Lazglafta ta dmakuha taŋ
8 Rfu da mndu kul haɗ Mgham Lazglafta ta mbəɗa dmakwa niª. »
9 Tsa rfu mnə mgham Dawuda ya ná,
ta ghəŋa gwal nda ɗatsa fafaɗa taŋ re,
ari nda gwal kul ɗatsaku fafaɗa taŋ guli a na?
Ka mu kay na:
« Zlghaf zlgha Abraham ta Lazglafta kəl Lazglafta ka klafta ka mndu tɗukwata wa ira ni,
ka mu. »
10 Yawu mutsafta Abraham ta nzakway ka mndu tɗukwata wa ira Lazglafta na?
Daga ta kul tsaku fafaɗa ni re,
ari tahula tsanatá fafaɗ a na?
Daga ta kul tsaku fafaɗa ni.
11 Ma fitika nzakwa ni ta kul tsaku fafaɗa ni,
ka klaftá Lazglafta ka mndu tɗukwata wa ira ni,
kabga vəl zlghafta ni.
Tahula tsa ka tsatá tsi ta fafaɗ.
Ka nzaku tsa tsatá fafaɗa ni ya,
ka ŋizla maraŋtá nzakwa ni tɗukwata wa ira Lazglafta.
Abraham ná,
da ni ma inda gwal kul tsaku fafaɗa ni ya,
ama ka zlghaftá həŋ ta Lazglafta,
ka klaftá Lazglafta ta həŋ ka gwal tɗukwata wa ira ni,
manda ŋa Abraham ya.
12 Nda nza ka da ni ma gwal nda tsa fafaɗa taŋ guli,
ka ksaf ksa həŋ ta saɗa zlghay nda ŋuɗufa da mu Abraham ta zlghaftá Lazglafta daga ta kul tsaku fafaɗa ni ya.
Tanafta Lazglafta ta imi ta sləməŋ ta gwal ta zlghafta
13 Tanafta Lazglafta ta imi ta sləməŋ ta Abraham nda zivira ni tani kazlay:
Dzaʼa vlagha vla yu ta ghəŋa haɗikª kəʼa.
Tanaf a Lazglafta ta imi ta sləməŋ kabga vəl magay ni ta skwi ta kum zlahu wu,
ama kabga vəl klafta Lazglafta ka mndu tɗukwa ma zlghafta ni.
14 Ka si gwal ta maga skwi ta kum zlahu dzaʼa mutsa tsa skwi tanaf Lazglafta ta imi ta sləməŋ ta mndu ya katsi ná,
bətbət tsa zlghafta zlghaf lu ya,
haɗ ghəzliwa tsa skwi tanaf tsi ta imi ta sləməŋ ta mndu ya nda tsa tama wa.
15 Zlahu ná,
ta klak kla ta ɓasa ŋuɗufa Lazglafta,
ama ka haɗ zlahu wu katsi,
haɗ sana skwi ŋa ɓlanapta wa.
16 Tsaya tama ná,
ma zlghafta nda ŋuɗuf kəl Lazglafta ka vlatá tsa skwi tanaf tsi ta imi ta sləməŋ ta mndu ya.
Ka mbalay vlata tsi guli.
Nda nza tsa skwi taf tsi ta imi ta sləməŋ ya ŋa inda zivira Abraham.
Nza a ka ŋa gwal ta sna skwi ta kum zlahu kweŋkweŋ wu.
Nda nza guli ka ŋa inda gwal ta zlghafta nda ŋuɗuf manda ŋa Abraham ta nzakway ka Da mu demdem ya.
17 Nda vinda ma deftera Lazglafta kazlay:
Fa fa yu ta kagha ka da ni ma inda mndəra mnduª kəʼa.
Nda nza Abraham ka Da mu da Lazglafta ya zlghaf tsi nda ŋuɗuf.
Tsa Lazglafta ya ta vranamtá hafu ma gwal nda rwa.
Tsatsi nda mbrakwa hgagaptá skwi kul haɗ ŋa nzakwa ni mamu.
18 Fəglaf a lu ta ghəŋ sizlay wu,
tsaw mataba tsaya ná,
nda fa ghəŋa Abraham,
zlghaf zlgha ta Lazglafta kəl tsi ka nzata ka da ni ma inda mndəra mnduhaª,
manda ya mnana Lazglafta kazlay:
Dzaʼa nda ndəgha zivira gha kəʼa ya.
19 Ta mnanatá Lazglafta ta tsa gwaɗa ya ta Abraham ná,
taghwaŋ a ima ni ka hɗa dərmək wa.
Nda sna guli kazlay:
Nda ghada halata iʼi kəʼa.
Guli ná,
lula fitika yay markwa taŋ ta nzakway ka Sara ta zwaŋ.
20 Dgaŋ a ta ghəŋ ɗekɗek ta ghəŋa skwi ya tanaf Lazglafta ta imi ta sləməŋ wu.
Katək ná,
zlghay nda ŋuɗufa ni ta vlaŋtá mbraku,
ka zləzlvu tsi ta Lazglafta.
21 Graf gra guli kazlay:
Tsa skwi taɗif Lazglafta ta imi ta sləməŋ ya ná,
mamu nda mbraku ŋa magata guli kəʼa.
22 Tsaya tama kəl Lazglafta ka klafta ka mndu tɗukwaª tawa ira ni.
23 Ka klaf kla Lazglafta ka mndu tɗukwata wa ira ni ka deftera Lazglafta mnata ya ná,
ta ghəŋa Abraham nda ghəŋa ni a nzakwa tsa gwaɗa ya wu,
24 nda nza guli ta ghəŋa amu,
ka zlghaf zlgha mu ta Lazglafta ta sliʼaganaptá mghama mu *Yesu ma mtaku ya.
Dzaʼa klaf kla ta amu guli ka gwal tɗukwata wa ira ni.
25 Lazglafta ta vlatá tsa Yesu ya ma dzva mnduha ŋa dzata ta ghəŋa dmakwa mu.
Ka sliʼaganaptá tsi guli ma mtaku ŋa nzakwa mu ka gwal tɗukwata wa ira ni.