La Ruma 3

Haɗ mndu ta nzakway tɗukwa wa

1 Ndaw malaghuta la *Yahuda ka lamndu? Nu ghəzliwa tsatá fafaɗ na? 2 Ndaɗaʼa nzakwa ni ta nghadaptá lu ta nghay nghay wu, kabga tiŋəl ŋa taŋ vlagata Lazglafta ta gwaɗa ni. 3 Ka si kwalaghu kwala sanlaha ma həŋ ta zlghafta ná, dzaʼa pyaf pya tsa slna palamapalama taŋ ya ta nzakwa Lazglafta ka ŋərma ra? 4 Pyaf a wu! Dər má ta tsakalawi inda mnduha ná, kahwathwata ŋa Lazglafta ta mnay, manda ya nda vinda ma deftera Lazglafta kazlay:

« kagha Lazglafta,

ka gwaɗa gwaɗa ka ta gwaɗa ná, nda sna lu kazlay:

tɗukwa tsa gwaɗa gha ya kəʼa.

Dər má tsafha lu ta rutsak ta kagha,

fləwəɗ dzaʼa saba ka ma guma ni. »

5 Ka si tsa ghwaɗaka skwi ta mag amu ya dzaʼa maraŋtá nzakwa Lazglafta tɗukwa katsi ná, nu ka mu dzaʼa mnay tama? Dzaʼa mnay mu kazlay: Tɗukwa a Lazglafta wu kəʼa tsamaghar tsi ta guma rki? Ma tsa vli ya ná, manda va ya gwaɗ lamndu gwaɗata yu ta tsa gwaɗa ya. 6 Mantsa a wu! Ka tɗukwa a Lazglafta wu katsi ná, wa kaʼa dzaʼa tsa guma ta ghəŋa mnduha na?

7 Ka si tsa tsakalawa ɗa ya ta malaghutá kligiŋta kahwathwata Lazglafta, ka nzaku tsi ŋa vlaŋtá glaku katsi, kabgawu dzaʼa kəl lu ka tsaɗighatá guma kazlay: Mnda dmaku ka kəʼa tama? 8 Ka si mantsa ya tsi ní, nu kwal lu kul mnay kazlay: Magama dmaku kada saba skwi ɗina kəʼa? Nu kul mag lu manda ya ta tsaŋnavata sanlaha ta gwaɗa kazlay: Mantsa ya ta mna həŋ kəʼa nda aŋni ya na? Nda ra ka tsanaghata Lazglafta ta guma ta tsa mnduha ya.

Gaga inda mnduha ta dmaku

9 Kinawu nzakwa ni tama! Malaghu mala amu la *Yahuda ka hamata gwal kul nzakway ka la Yahuda rki? Malaghu a amu wa. Ka yu mnata kay ná, nda la Yahuda tani, nda la *Grek tani, hahəŋ demdem nzanagha nza dmaku ta həŋ. 10 Nda nza manda ya nda vinda ma deftera Lazglafta kazlay:

Haɗ mndu tɗukwata wa ira Lazglafta wu, dər turtuk haɗ wa.

11 Haɗ mndu nda sna ta skwi wu, haɗ ya ta psa Lazglafta wa.

12 Inda taŋ mbəɗana mbəɗa həŋ ta hul ta Lazglafta,

nda zaɗa həŋ demdem. Haɗ ya dər turtuk ta maga skwi ɗina wu,

dər turtuk haɗ wa.

13 Wa taŋ ná, manda gunatá kulu nzakwa ni.

Nda ghanika taŋ ta nana həŋ ta mnduha.

Ghwana mupuhwa ma huta ta wa taŋ.

14 Dagala ksiʼi nda ŋaslu ma wa taŋ.

15 Nda tsəra səla taŋ ŋa dzaʼa dzata mndu.

16 Inda tvi lab hahəŋ ná, nda hwanzaɓa inda vli,

ta wahu inda mnduha.

17 Sna a həŋ ta tva zɗaku wa.

18 Haɗ zləŋa Lazglafta da həŋ ɗekɗek wa.

19 Aŋ mndani, nda sna amu ka kazlay: Inda skwi ta gwaɗ zlahu ná, ŋa gwal vla Lazglafta ta tsa zlahu ya ŋa taŋ ta gwaɗa tsi kəʼa. Tsaya tama ná, haɗ mndu nda pslaftawi ta kəma Lazglafta wu, kada snaŋta inda mndu kazlay: Gaga həŋ ta dmaku ta kəma ni kəʼa. 20 Tsaya tama, haɗ mndu dzaʼa nzakway ka mndu tɗukwata kəma Lazglafta ta ghəŋa vəl magata ni ta skwi ta kum zlahu wa. Zlahu ná, nda nza ŋa snanamtá mnduha kazlay: Gaga kuni ta dmaku kəʼa.

Zlghay nda ŋuɗuf ta nanaftá mndu ka mndu tɗukwa

21 Ndana tama, maranaŋ mara Lazglafta ta tvi ta mnduha dzaʼa kəl həŋ ka nzakway ka tɗukwa mnduha ta kəma ni. Tsa nzaku tɗukwa ya ná, nda ma zlahu a ta nzakwa lu wa. Mnaŋ mna zlaha Musa nda la anabi guli ta gwaɗa ta ghəŋa ni. 22 Tsaya tvi dzaʼa kəl Lazglafta ka nanaftá mnduha ka gwal tɗukwata kəma ni ya nda nza nda ma zlghafta dər wa ta *Yesu *Kristi. Haɗ ya galap Lazglafta, dər la *Yahuda dər gwal kul nzakway ka la Yahuda wa. 23 Inda taŋ gaga həŋ ta dmaku trap tra həŋ ma snaŋtá sgita Lazglafta. 24 Ka zɗanaŋta Lazglafta ta huɗi ta həŋ ka mbalay, ka nanaftá həŋ ka gwal tɗukwata kəma ni nda ma Yesu Kristi ta pligiŋtá həŋ ma dmaku. 25 Tsa Yesu Kristi ya vla Lazglafta ŋa mtuta ni ta ghəŋa inda mnduha ka planatá dmakwa taŋ nda usa ni nda ma zlghafta taŋ ta Yesu Kristi ŋa maraŋta kazlay: Tɗukwa tsatsi kəʼa. Tsa dmaku si ta mag mnduha ghalya ya ná, ka nzata Lazglafta manda skwi kul nghaŋta, 26 ksana ksata ŋuɗufa ni. Manda va tsaya ta mara Lazglafta ndana guli kazlay: Tɗukwa tsatsi kəʼa. Tsatsi, tɗukwa tsatsi. Ta kumay guli ta nanafta ka gwal tɗukwata gwal ta zlghaftá Yesu.

27 Ka si mantsa tsi tama ní, ta mamu skwa ghuba ghəŋ nda tsa tama rki? Haɗ wa. Kabgawu? Kabga zlghay nda ŋuɗuf ŋərma skwi, snanatá skwi ta kum zlahu a wa. 28 Nda sna amu kazlay: Nda ma zlghay nda ŋuɗuf mutsafta mnduha ta nzata ka gwal tɗukwata kəma Lazglafta kəʼa, nda ma snatá skwi ta kum zlahu a wa. 29 Lazglafta ná, ŋa la Yahuda nda ghəŋa taŋ ra? Lazglafta gwal kul nzakway ka la Yahuda a guli ra? Mantsa nzakwa ni, Lazglafta gwal kul nzakway ka la Yahuda ya guli, 30 kabga turtuktuk Lazglafta. Tsatsi dzaʼa nanafta ka gwal tɗukwata gwal nda tsa fafaɗa taŋ nda ma zlghay nda ŋuɗufa taŋ. Tsatsi dzaʼa nanafta ka gwal tɗukwata gwal kul nzakway ka la Yahuda nda ma zlghay nda ŋuɗufa taŋ guli. 31 Ma tsa zlghafta zlghaf mu ya tama guli ná, hərɗiŋ hərɗa mu ta zlahu ra? Hərɗiŋ amu wu, katək ná, ŋlanafta ŋlanaf mu ta zlahu.