Gwaɗa ta ghəŋa kuʼaha ghwaŋ
25
1 « Ma tsa fitik ya,
dzaʼa gray lu ta ga mghama Lazglafta nda sana kuʼaha ghwaŋ ta klaftá pitirla taŋ ka dzaʼa da gəma zwaŋamidzi.
2 Mataba taŋ,
hutaf gwal kul hiɗaku,
hutaf gwal nda hiɗa.
3 Ta klafta tsa kuʼaha kul hiɗaku ya ta pitirla taŋ ná,
tana a həŋ ta rɗi ŋa sgay da tsa pitirla taŋ ya wa.
4 Ama tsa kuʼaha nda hiɗa ya,
tanaʼatá hahəŋ ta rɗi ma hwarak ŋa sgay da ŋa taŋ.
5 Ka gərɗatá zwaŋamidzi ka sagha misimmisim.
Ka zuŋur hani ta həŋ,
ka pslatá hani ta həŋ demdem.
6 « Ma takala tama,
ka gugɗatá lu:
“Waʼa zwaŋamidzi kay ta sagha!
Lawa la da gmay,”
ka lu.
7 Ka sliʼavatá tsa kuʼaha ya demdem ta hani,
ka sganaghatá vu ma pitirla taŋ.
8 Ka tsa kuʼaha kul hiɗaku ya nda tsaha nda hiɗa ya mantsa:
“Taŋnafwata ta na rɗa ghuni na,
wana na ŋa ŋni ma pitirla na ta mtaku,”
ka həŋ.
9 Ka tsaha nda hiɗa ya mantsa:
“Kay!
Slaghwa a ka dgay mu wa,
lawa la da gwal ta dzawapta,
ka skwakta kuni ta ŋa ghuni,”
ka həŋ.
10 Ta laghu hahəŋ da skwa rɗi ya ná,
ta ɓhagaghatá zwaŋamidzi.
Ka lam tsaha nda hba vgha taŋ ya kawadaga nda tsi da həga kla makwa,
ka hawutá lu ta tgha.
11 Ɓats nzɗa tama,
ka vraktá tsa kuʼaha ya.
Ka həŋ mantsa:
“Mghama ɗa,
mghama ɗa!
Gunaŋnaguna ta wa tgha,”
ka həŋ.
12 Kaʼa nda həŋ mantsa:
“Kahwathwata ka yu ta mnaghunata,
sna a yu ta kaghuni wu,”
» kaʼa.
13 Ka *Yesu sganaghata mantsa:
« Nzawa nza hzleŋa,
kabga sna a kuni ta tsa fitik ya,
ka ta wati luwa tsi wu,
» kaʼa.
Gwaɗa Yesu ta ghəŋa kwalvaha hkən
14 « Manda va tsaya ná,
dzaʼa gray lu ta ga mghama Lazglafta nda sana mndu ma sliʼa ni dista luwa,
ka hagaftá tsi ta kwalvaha ni,
ka dganaftá tsi ta gadghəla ni ta həŋ ma dzvu.
15 Ka klaftá tsi ta talaŋª hutaf,
ka vlaŋtá sani.
His kəʼa klafta ka vlaŋtá sani.
Pal kəʼa klafta guli ka vlaŋtá mahkəna ni.
Taɓ ta mbrakwa taŋ kəʼa dganaftá həŋ.
Ka sliʼaftá tsi ka laghu.
16 Ka gi sliʼafta tsa ta zlghaftá talaŋ hutaf ya da tsakala nda tsi,
ka zanaghatá tsi ta ndeli ka talaŋ hutaf guli.
17 Ka sliʼaftá tsa ta zlghaftá talaŋ his ya guli ka laghu da tsakala,
ka zanaghatá tsi ta ndeli ka talaŋ his guli.
18 Tsa ta zlghaftá talaŋ turtuk ya,
ka laghu tsi da lapta ghurum ma haɗik,
ka ɗifanatá tsa tseda daŋahəga ni həga ni ya.
19 « Nzɗavanzɗa lu katakata tama,
ka vraktá daŋahəga ni həga tsa kwalvaha ya dzagha.
Ka ɗaw tsi da həŋ ta skwi maga həŋ nda tsa tseda ni ya.
20 Ka lagha tsa ta zlghafta talaŋ hutaf ya,
ka kladanaghata nda talaŋ hutaf guli.
Kaʼa mantsa:
“Mghama ɗa,
talaŋ hutaf vliha ka,
wana zanaghata yu ta ndeli ka talaŋ hutaf guli,”
kaʼa.
21 Ka daŋahəga ni həga ni nda tsi mantsa:
“Ɗina tsa,
ŋərma kwalva ka!
Manda va tsa nzakwa gha ka ŋərma mndu ma skwi kwitikw ya,
ta vlagha vla yu ta skwi dagala.
Saghu sa gha da rfu kawadaga nda iʼi,”
kaʼa.
22 Ka lagha tsa ta zlghaftá talaŋ his ya guli,
ka kladanaghata nda sana talaŋ his.
Kaʼa mantsa:
“Mghama ɗa,
talaŋ his vliha ka,
wana zanaghata yu ta ndeli ka talaŋ his guli,”
kaʼa.
23 Ka daŋahəga ni həga ni nda tsi mantsa:
“Ɗina tsa,
ŋərma kwalva ka.
Manda va tsa nzakwa gha ka ŋərma ni ma skwi kwitikw ya,
ta vlagha vla yu ta skwi dagala guli.
Saghu sa gha da rfu kawadaga nda iʼi,”
kaʼa.
24 Tahula tsa,
ka lagha tsa ta zlghafta talaŋ turtuk ya guli.
Kaʼa mantsa:
“Mghama ɗa,
nda sna yu kazlay:
Nda bla gwaɗa ta kagha kəʼa.
Ta tskay ka ta skwi ta vwah ma vli kul sləgadata ka.
Ta hlay ka guli ta skwi ma vli kul vihaŋtá ka.
25 Ka zləŋaftá yu ta zləŋ,
ka laghu yu da ɗifanatá tsa talaŋa gha ya ma haɗik.
Wana tsi,
kla ta skwa gha,”
kaʼa.
26 Ka daŋahəga ni həga ni nda tsi mantsa:
“Kagha ná,
ghwaɗaka kwalva ka,
yaɗi.
Ka si nda sna ka kazlay:
Ta tskay yu ta skwi ta vwah ma vli kul sləgadatá yu,
ta hlay yu ta skwi ma vli kul vihaŋtá yu kəʼa ya ní,
27 má fa fa ka ta tsa tseda ɗa ya ma baŋkiª,
ma na vragaghata ɗa na ná,
má sagha sa yu da kla skwa ɗa nda imi ta ghəŋa ni.
28 Kləgadanaghwakla ta tsa talaŋ ya,
ka gwanavata kuni ta tsa nda talaŋ ghwaŋ ya,”
kaʼa.
29 « Mantsa ya ná,
ŋa mndu mamu tsi da tsi,
ta sganaghata lu ta skwi ŋa nzakwa ni dagala da tsi.
Ama mndu ya kul haɗ tsi da tsi ya,
kləgadanaghutá va tsa kwitikwatani da tsi ya.
30 Klafwa kla ta tsa ghwaɗaka kwalva ya ka wuɗidiŋta kuni dzibil da grum,
ka dzaʼa tsi taw,
ka hpaɗa tsi ta sliʼiŋa niª hada,
» kaʼa.
Dzaʼa sasa Zwaŋa mndu da tsa guma
31 « Baɗu sagha dzaʼa sagha *Zwaŋa mndu ma glakwa ni kawadaga nda inda duhwalha Lazglafta ná,
dzaʼa nzaf nza ta dughurukwa glakwa ni.
32 Dzaʼa tskana tska lu ta inda mndəra mnduha ta ghəŋa haɗik ta kəma ni,
ŋa dganatani ta sanlaha nda sanlaha manda ya ta dganata mnda ngha rini ta tuwak nda gu ya.
33 Ŋa pghata ni ta tuwak nda ga zeghwa ni,
pghaha ta gu nda ga zlaɓa ni.
34 Ka mgham dzaʼazlay nda tsaha nda ga zeghwa ni ya mantsa:
“Saghawa sa,
kaghuni gwal tfanagha Da ɗa ta wi ya.
Tsuʼawa tsuʼa,
ta za mgham ya payaghunaf Lazglafta daga ma zlrafta ghəŋa haɗik ya.
35 Ma fitika dzay maya ta iʼi,
vliha vla kuni ta skwa zay.
Ma fitika dzay ndala ta iʼi,
tiɗiftá kuni ta imi ŋa say.
Nza nza yu ka mayəm,
ka tsuʼaftá kuni ta iʼi.
36 Ma nzakwa ɗa ka fərdiʼu,
suɗiɗiva suɗa kuni ta lgut.
Ma nzakwa ɗa kul ɗughwanaku,
nghap ngha kuni ka iʼi.
Ma nzakwa ɗa ma gamak,
nghaɗighangha kuni,”
kaʼa.
37 Ka tsa gwal ta snatá gwaɗa Lazglafta ya dzaʼazlay mantsa:
“Yawu nghaŋta ŋni ta kagha ta dzə maya,
ka vlaghatá ŋni ta skwa zay?
Yawu nghaŋta ŋni ta kagha ta dzə ndala,
ka taghaftá ŋni ta imi ŋa say?
38 Yawu nghaŋta ŋni ta kagha ka mayəm,
ka tsuʼaftá ŋni ta kagha?
Yawu nghaŋta ŋni ta kagha ka fərdiʼu ka suɗavaghatá ŋni ta lgut?
39 Yawu nghaŋta ŋni ta kagha kul ɗughwanaku?
Yawu nghaŋta ŋni ta kagha ma gamak ka lagha ŋni nghaghata?”
ka həŋ
40 Ka Mgham dzaʼazlay mantsa:
“Kahwathwata ka yu ta mnaghunata ná,
inda fitik ya maga kuni ta tsa skwiha ya ŋa zwana ma ɗa gwal ya nda hta katakata ya ná,
magihatá iʼi kuni nda tsa.”
41 « Tahula tsa,
kaʼa dzaʼazlay nda tsa gwal nda ga zlaɓa ni ya mantsa:
“Laghwala ta vata iʼi,
kaghuni gwal ksiʼaf Lazglafta.
Lawa la da həga vu ya ŋa kɗekedzeŋ,
payaf lu ŋa i halaway nda duhwalha ni.
42 Ma fitika dzay maya ta iʼi,
vliha a kuni ta skwa zay wa.
Ma fitika dzay ndala ta iʼi,
taɗif a kuni ta imi ŋa say wa.
43 Nza nza yu ka mayəm,
tsuʼaf a kuni ta iʼi wa.
Ma nzakwa ɗa ka fərdiʼu,
suɗiɗiva a kuni ta lgut wa.
Ma nzakwa ɗa kul ɗughwanaku nda ya ma nzakwa ɗa ma gamak guli,
nghaɗigha a kuni wu,”
kaʼa.
44 Ka həŋ dzaʼazlay guli na:
“Mghama ɗa,
yawu nghaŋta ŋni ta kagha ta dzə maya?
Yawu nghaŋta ŋni ta kagha ta dzə ndala?
Yawu nzata ka ka mayəm?
Yawu nghaŋta ŋni ta kagha ka fərdiʼu?
Yawu nghaŋta ŋni ta kagha kul ɗughwanaku?
Yawu nghaŋta ŋni ta kagha ma gamak kul kataghata ŋni na?”
ka həŋ.
45 Ka Mgham dzaʼazlay nda həŋ mantsa:
“Kahwathwata ka yu ta mnaghunata,
inda fitik ya kul maganatá kuni ta tsa skwiha ya ŋa gwal ya nda hta katakata ya,
ŋa ɗa kwalaghuta kuni ta magay nda tsaya.”
46 Ŋa sliʼa tsaha ya da vla ghuya ɗaŋwa ŋa kɗekedzeŋ,
ta sliʼi gwal ta snatá gwaɗa Lazglafta da vla hafu ŋa kɗekedzeŋª guli,
» kaʼa.