Yəhusuwa
Yəhusuwa
Klafta Yəhusuwa ta vla Musa
1
1 Tahula mtuta Musa, kwalva Yawe, ka Yawe nda Yəhusuwa zwaŋa Nuŋ, si slufa Musa ya mantsa: 2 « Mtu mta kwalva ɗa Musa. Ndana tama, sliʼaf sliʼa gha, kagha dzaʼa tsughwaɗa zala Yardeŋ kawadaga nda inda na mnduha na, ŋa lami da haɗik ya dzaʼa vlaŋta yu ta la Israʼila. 3 Manda va ya mnana yu ta Musa ná, dzaʼa vlaghuna vla yu ta inda vli ya dzaʼa ŋlata səla ghuni. 4 Mukuma ghuni ná, dzaʼa sliʼafta daga ma mtak nda təv sud dikw ta ghwáha Ləvanuŋ nda təv nur, ka laghwa ni nda ma Yufratis zala dagala nda ta təv safa fitik, nda inda haɗika la Het, dikw ta wa drəf dagala, nda ta təv dɗakwa fitik ya. 5 Ma inda nzakwa gha ná, haɗ mndu dzaʼa ŋaŋta da kagha wa. Manda ya nza yu nda Musa ya, manda va tsaya dzaʼa nzata yu nda kagha guli. Haɗ yu dzaʼa walaŋta zlaghata wu, haɗ yu dzaʼa walaŋtá vzighista guli wa. 6 Mbra ta vgha ka ŋavata ka, kagha dzaʼa dganaftá na mnduha na ta haɗik ya waɗana yu ta dzidzíha taŋ ya. 7 Mbray kagha ta vgha, ka ŋavata gha kahwathwata kweŋkweŋ ŋa gha, ŋa ŋanatá inda tagha skwi ya mnaghaf kwalva ɗa Musa. Yaha ka da mbəɗaghutá vgha dər nda ga zeghwi, dər nda ga zlaɓa, kada dzaʼa ka ta kəma ta kəma ma inda vli ta dzaʼa ka. 8 Yaha na ɗelewera tagha skwi na da diʼiŋaghuta nda wubisima gha. Ka vrafta ka tida nda fitik tani, nda rviɗik tani, ŋa ŋavata gha ka snatá inda skwi ya nda vinda. Mantsa ya tama, dzaʼa mutsay ka ta skwi zbaŋ ka, ŋa dzaʼa gha ta kəma ta kəma. 9 Mnaghaf a yu kazlay na ka ŋavata ka, ka mbra ka ta vgha kəʼa kay ra? Yaha ka da ghudzaku, yaha ka da zləŋ, kabga kawadaga Yawe, Lazglafta gha nda kagha, ma inda vli ta dzaʼa ka, » kaʼa.Hbay Yəhusuwa ta vgha ŋa tsughwaɗa zala Yardeŋ
10 Mantsa tama, ka Yəhusuwa mnanaftá maliha ta ghəŋa mnduha mantsa: 11 « Ranafwa ra ta inda ghuɓu. Wya ka kuni dzaʼa mnanaftá mnduha: Dadamwa dada ta skwa zay, kabga ma fitik hkən ná, dzaʼa tsughwaɗa zala Yardeŋ kuni ŋa zaktá haɗik ya vlaghuna Yawe, Lazglafta ghuni ŋa ghuni, » ka kuni dzaʼazlay nda həŋ.
12 Ka Yəhusuwa nda la Rubeŋ, nda ya nda la Gat, nda ya nda rita mndəra la Mənase mantsa: 13 « Havakwa hava ta gwaɗa ya mnaghunaf Musa, kwalva Yawe. Kaʼa na: “Dzaʼa vlaghuna vla Yawe, Lazglafta ghuni ta mbiʼa vgha, dzaʼa vlaghuna vla ta tsa haɗik ya.” 14 Ma tsa kwakwar hladam Musa ta kaghuni ya, dzaʼa nzaghuta miʼa ghuni, nda zwana ghuni, nda braha rina ghuni tani. Ama kaghuni zgwana ka mbirima vulu ya, kaghuni dzaʼa klanatá kəma ta zwana ma ghuni nda hbatá vgha nda huzla vula ghuni, ka tsughwaɗapta kuni ta zala Yardeŋ, ŋa kataŋta ghuni ta həŋ, 15 ha ka vlaŋta Yawe ta mbiʼa vgha ta zwana ma ghuni, manda ŋa kaghuni ya, ŋa zata hahəŋ guli ta haɗik ya vlaŋ Yawe, Lazglafta ghuni ta hahəŋ. Tahula tsa, ŋa vragaghuta ghuni zaktá haɗika ghuni ta ɓla zala Yardeŋ təv safa fitik ya vlaghuna Musa, kwalva Yawe ya, » kaʼa. 16 Ka həŋ zlghanaftá wi ta Yəhusuwa mantsa: « Inda skwi mnaŋnaf ka ná, dzaʼa magay ŋni. Ta dzaʼa ŋni da inda vli ya dzaʼa ghun ka ta aŋni. 17 Dzaʼa snagha sna ŋni ta ŋa gha, manda va ya si ta snanata ŋni ta Musa ma inda skwi ya. Skwi kweŋkweŋ ná, má ka nza Yawe, Lazglafta gha kawadaga nda kagha, manda va ya si nza tsi nda Musa ya. 18 Inda mndu ya dzaʼa ganavatá sidi ta zlahuha gha, ka kwalaghuta snatá ŋa gha, nda inda zlahuha dzaʼa ka da mnaŋnata ná, dzaʼa dza dza lu. Skwi kweŋkweŋ ná, ŋava ŋa kagha, ka mbra ka ta vgha, » ka həŋ.