24
1 Ka nghə Bilgham ná, zɗəgana zɗa ta Yawe na tfanaghatá wi ta la Israʼila. Mantsa tama, ka zlaŋtá tsi ta dzaʼa da zba mandaŋ manda ya tazlay, ama ka mbəɗatá tsi ta kuma nda ma mtak. 2 Kəʼa ká Bilgham klaŋtá ghəŋ ná, ka nghaŋtá tsi ta la Israʼila ta tsakavata ka mndəra mndu ka mndəra mndu. Ka saha Sulkuma Lazglafta ta ghəŋa ni. 3 Ka tsaftá tsi ta laha ni, kaʼa mantsa:« Gwaɗa Bilgham, zwaŋa Bəghur,
gwaɗa mndu nda guna ira ni,
4 gwaɗa mndu ta sna lwa Lazglafta,
ta ngha skwi ta maranaŋta Lazglafta ta Mbruta,
mndu ta zləmbata ta haɗik, ka gunanatá lu ta iri.
5 Ká ka nda ɗinakwa tumpulha ghuni la Yakubu,
nda ghuɓuha nzakwa ghuni la Israʼila!
6 Manda lpayatá vwaha zlizlamha nzakwa taŋ,
ka guram nda kawgalha ta wa zala,
nda luluha ŋaɓa Yawe,
nda fwa sedraha ndər ta wa imi.
7 Ta tsrufaku imi ma bakwata ni,
dzaʼa mutsay hulfa taŋ ta imi dagala.
Dzaʼa malay mghama taŋ ta Agag,
dzaʼa malaghu mala ga mghama taŋ ta mbraku.
8 Ka hlagaptá Lazglafta ta həŋ ma Masar,
manda duliha sladra nzakwa ni ŋa taŋ.
Dzaʼa niʼavatá ghumaha taŋ ka mndəra sana mnduha,
dzaʼa paslafvatá ghudzifa taŋ,
dzaʼa hahatá həŋ nda havaha ni.
9 Ta frukwa frukwa, ka hanata manda rveri,
ka manda markwa rveri a tsi, wa dzaʼa da sliʼanafta?
Tfa wi ta ghəŋa mndu ta tfa wi ŋa gha,
nda ksiʼa mndu ta ksiʼa kagha! » kaʼa.
10 Ka gufaftá ŋuɗufa Balak ta ghəŋa Bilgham, ka dza dzvu, kaʼa nda tsi mantsa: « Hgagagha ŋa ksiʼa ghumaha ɗa yu ta kagha ná, wana mahkəna səla gha na ta bukwa həŋ nda tfa wi! 11 Ka si manda na tsi ya, la ta haɗika gha! Dzaʼa vlagha vla yu ta glaku dagala ka yu sizlay, ama wana kwalaghuta Yawe ta vlaghatá tsa glaku ya, » kaʼa.
12 Ka Bilgham nda Balak mantsa: « Si mnana a yu ta gwal ghunadap ka da iʼi kazlay: 13 “Dər má dzaʼa vliha vla Balak ta inda tsedi, nda inda dasu ma həga ni ná, laviŋta a yu ta ɓlanaptá zlaha Yawe, nda klaktá zɗaku, ka ksiʼi a tsi gaghəŋ gaghəŋa ɗa wa. Dzaʼa mnay yu ta skwi dzaʼa mnata Yawe,” kəʼa kay ra? 14 Mantsa! Ndanana, nda sliʼa yu da la ini, ama sawi, ka snaghamta yu ta skwi dzaʼa na mnduha na da maganatá mnduha gha ma fitikha ta sagha, » kaʼa.
Kɗavakta laha Bilgham
15 Mantsa tama, ka tsaftá Bilgham ta laha ni, kaʼa mantsa:
« Gwaɗa Bilgham, zwaŋa Bəghur,
gwaɗa mndu nda guna ira ni,
16 gwaɗa mndu ta sna lwa Lazglafta,
nda sna ta skwi ta sagha da Lazglafta Dagala,
ta ngha ta skwi ta maranaŋta Lazglafta ta Mbruta,
mndu ta zləmbata ta haɗik, ka gunanatá lu ta iri.
17 Ta nghay yu, ama ŋa ndanana a wa.
Ta vitsay yu, ama ndusa a wa:
Ka sab tekwatsa da Yakubu,
ma Israʼila ta sliʼafta dafa ga mgham,
ta pslanaptá bizlbizla kuma la Muwav,
nda bɗəma inda mndəra la Set.
18 Dzaʼa za za lu ta ghwa ta ghəŋa haɗika Idum,
dzaʼa za za lu ta ghwa ta ghəŋa haɗika Seghir, ghumaha ni,
la Israʼila dzaʼa maraŋtá mbrakwa taŋ.
19 Ma Yakubu dzaʼa saba mndu dzaʼa ga mgham,
ŋa zaɗanata ni ta pɗakwa gwal ma tsa luwa ya, » kaʼa.
20 Ka nghaŋtá Bilgham ta la Ghamalek ka tsaftá tsi ta laha ni, kaʼa mantsa:
« Ghamalek ná, si naha mndəra mnduha ya,
ama kɗavakta ni, ka kufik dzaʼa nzakwa tsi, » kaʼa.
21 Ka nghaŋtá Bilgham ta la la Keŋ, ka tsaftá tsi ta laha ni, kaʼa mantsa:
« Təŋtəŋa vla nzakwa gha,
manda həga ɗyak ma takwa pala.
22 Ama dzaʼa dru dra Kayinu,
ma fitik dzaʼa hlaghata la Asur ta kaghuni ka vuʼa, » kaʼa.
23 Ka tsaftá Bilgham ta laha ni, kaʼa mantsa:
« Wabaw! Wa dzaʼa pɗata baɗ magatá Lazglafta ta slna ni?
24 Dzaʼa sliʼap sliʼa kwambaluha ma Kitim,
dzaʼa ghuyanap ghuya ta ɗaŋwa ta la Asur, nda la Ghever,
dzaʼa zaɗana zaɗa lu guli ta tsatsi ŋa ɗekɗek, » kaʼa.
25 Ka sliʼaftá Bilgham ka vraghata ta haɗika ni, ta vraghatá Balak guli ta ŋa ni tvi.