Mbsak 11

Tawa ghəŋa la Israʼila ma Tavghera

1 Ma sana fitik, ka tawtá mnduha ta ghəŋ taŋ katakata ta wa sləməŋa Yawe. Manda snaŋtá Yawe, zɗəgana a wu, ka gufaftá ŋuɗufa ni. Ka zlghaftá vwa Yawe ta ghəŋa mnduha, ka dəghaɗanaghutá tsi ta wa mazawa ghuɓu. 2 Ka wahu mnduha ta wahu da Musa, ka mag tsi ta duʼa da Yawe, ka lɓatá tsa vu ya. 3 Ka tsanaftá lu ta hgu ta tsa vli ya ka Tavghera kabga vəl zlghafta vwa Yawe ta ghəŋa taŋ.

4 Ma sana fitik, ka ksaftá zinda ta la ka sləpɗu mataba la Israʼila. Ka zlrəglafta la Israʼila ta wahu, ka həŋ mantsa: « Wa dzaʼa vləglaŋnatá sluʼi ŋa zay? 5 A tsa klipi ta dəghaɗ ŋni ka mbalay ma Masar ya ní, a tsa kurtsi ya ní, a tsa ghudziva nda pwaru ya ní, a tsa təm ya ní, nda tseklek ya ní! 6 Ama ndanana ná, ta haɗ mbraku ma aŋni wu, ta haɗ sana skwi wu, ta ghəŋa manna yeya ta nghaŋta ŋni, » ka həŋ.

7 Manna ná, manda hya masuʼata nzakwa ni, ta gara vgha nda mandaɓay. 8 Ta tatá mnduha ta vgha ŋa dzaʼa da hlay. Tahula tsa, ŋa huʼata ta buna, ka ɗəgata ma dzər a tsi, ka dadata ma sigaha, ka magatá gatuha a tsi. Manda gatu da lu ma rɗi zɗakwa ni. 9 Nzafta wuninik ta ghuɓu girviɗik ya ná, nzafta manna guli.

10 Ka snaŋtá Musa ta tawa mnduha ta tsakavata ka uʼa taŋ ka uʼa taŋ. Inda taŋ ta wa tgha tumpula taŋ. Ka gufaftá ŋuɗufa Yawe katakata, ka kuzlanaftá tsi ta ŋuɗuf ta Musa. 11 Ka Musa nda Yawe mantsa: « Kabgawu kəl ka ka maganatá ghwaɗaka skwi ta kwalva gha na? Kabgawu kwal yu mutsəglaftá zɗakatahuɗi ta wa ira gha na? Kabgawu kəl ka ka fiɗaghatá inda ndəgakwa na mnduha na na? 12 Iʼi da ni ma inda na mnduha na ra? Iʼi ta yayatá həŋ kəl ka ka mnay ŋa ɗa kazlay na: “Ŋana ŋa ta həŋ ta ghuva, manda marakw ta sa uʼa ŋa zwaŋ,” kəʼa ra? Mantsa ya ha ta haɗik ya tanaf ka ta imi ta sləməŋ ta dzidzíha taŋ. 13 Ga dzaʼa mutsafta yu ta sluʼi ŋa vlaŋtá inda na mnduha ta dzaʼa nda taw mista ɗa na? Ka həŋ nda iʼi na: “Vlaŋna vla ta sluʼi ŋa zay ŋni!” ka həŋ. 14 Lavgliŋ a iʼi turtukwa ɗa ta spaftá inda na mnduha na wu, ta ndəgaku katakata ka ŋa ɗa. 15 Ka manda nana ta magihata ka katsi, kdəkkdək ta dər dzihata gha. Ka si mutsaf mutsa yu ta zɗakatahuɗi ta wa ira gha katsi, ma nghəglaŋ yu ta na zləmnda fiɗagha ka na wu! » kaʼa.

Zabapta Musa ta galata mnduha ndəfáŋ mbsak

16 Ka Yawe nda Musa mantsa: « Tskiha tska ta galata mnduha ndəfáŋ mbsak mataba la Israʼila, gwal graf ka kazlay na galata mnduha həŋ, mala mnduha həŋ kəʼa. Ka hladaghata ka ta həŋ da tumpula guyaku, ka sladata həŋ hada nda kagha. 17 Hada dzaʼa laha yu, ŋa gwaɗgaghata ɗa. Dzaʼa klaʼa kla yu kiʼa ta sulkum ma kagha ka pghamta ma həŋ. Mantsa tama, ŋa klay taŋ kawadaga nda kagha ta ndəgakwa mnduha, kagha turtukwa gha a dzaʼa kləgəlta wa. 18 Ka ka da mnanatá mnduha na: “Ka ghwaɓiŋta kuni ta nzakwa ghuni ŋa mahtsim, dzaʼa mutsay kuni ta sluʼi ŋa zay, kabga tawa tawa kuni ta taw ta wa sləməŋa Yawe kazlay na: Wa dzaʼa vlaŋnata sluʼi ŋa zay na? Si ɗina nzakwa ŋni ma Masar na kəʼa! Mantsa tama, dzaʼa vlaghuna vla Yawe ta sluʼi, dzaʼa zay kuni. 19 Baɗ turtuk, ka fitik his, ka fitik hutaf, ka fitik ghwaŋ, ka hisambsak kweŋkweŋ a dzaʼa za kuni wu, 20 ama tili rəŋrəŋ, ha ŋa saha ni nda ma htsiŋa ghuni, ha ŋa mtsiɗay ghuni. Inda tsaya ná, kabga vziŋta ghuni ta Yawe ta nzaku mataba ghuni, kabga kladanaghatá ghuni ta tsa taw ya. Kabgawu tama kəl mu ka sabi ma Masar na?” ka kuni, » kaʼa.

21 Ama ka Musa guli mantsa: « Dəmbuʼ mkuʼ dərmək (600.000) na sludziha nda səla ta wiɗifta na. Ka ka na: “Dzaʼa vlaŋ vla yu ta sluʼi ŋa zay taŋ ka tili rəŋrəŋ” ka ka! 22 Dər má hananaha lu ta həŋ ta rina fisik, nda slaha ná, dzaʼa slaf sla ŋa taŋ ra? Inda klipi ma drəf, ka má dzaʼa tumagaf tuma lu katsi ná, dzaʼa slaf sla ŋa taŋ ra? » kaʼa. 23 Ka Yawe nda Musa mantsa: « Dekwu dekwa dzva Yawe ra? Dzaʼa nghay ka tama, ka dzaʼa magaku tsi manda ya mna yu, ka magavata a wa tsi, » kaʼa.

24 Ka sab Musa ma tumpul, ka klaŋtá mnduha ta gwaɗa mna Yawe, ka tskanatá tsi ta mnduha ndəfáŋ mbsak mataba la galata mnduha, ka sladanatá həŋ ka wanaftá tumpul. 25 Ka saha Yawe ma kusay ka gwaɗganata, ka klaʼatá tsi kiʼa ta sulkum ma Musa, ŋa fafamta ma tsa galata mnduha ndəfáŋ mbsak ya. Na tsa nzanzanaghata sulkum ta həŋ ya, ka zlraftá həŋ ta kla lwa Lazglafta, ama kɗaŋ a həŋ wa. 26 Mamu sana zgwanaha his ta pɗaghuta ma ghuɓu, Ildat hga sani, Medat hga sani. Ka lagha sulkum ta ghəŋa taŋ, tsaw si tekw hahəŋ mataba taŋ, ama sab a hahəŋ ŋa dzaʼa da vla tumpul wu, mantsa tama, ka klə həŋ ta lwa Lazglafta ma ghuɓu. 27 Ka hwayafta sana duhwal da mnay ŋa Musa, kaʼa nda tsi mantsa: « Waʼa i Ildat nda Medat ta kla lwa Lazglafta ma ghuɓu! » kaʼa. 28 Ka Yəhusuwa zwaŋa Nuŋ, slufa Musa daga ma ga duhwala ni mantsa: « Rvera ɗa Musa, pyaf pya ta həŋ! » kaʼa. 29 Ama ka Musa nda tsi mantsa: « Ta draku ka ŋa ɗa ra? Má ka nuna inda mnduha Yawe ka anabi, ka gwal fanam Yawe ta sulkum katək ɓa! » kaʼa. 30 Ka vraghatá Musa da ghuɓu, tsatsi nda tsa galata mnduha la Israʼila ya.

Ghunakta Yawe ta fufuriha

31 Ka sliʼavaftá sana falak ghunak Yawe daga ma drəf. Ka hlagaftá tsi ta fufuriha ka lagha da pghata ma ghuɓu, nda ya ka wanaftá inda vli ta slərpuha ghuɓu ta klaftá vaghu turtuk ta mbaɗa, ka mitər valata ni ta haɗik. 32 Ka vaghu mnduha baɗ tsaya, nda rviɗik tani, nda vaghu ga mahtsima ni ta hla fufuriha. Mndu ya kwitikw hlatá ŋa ni ná, dugum ghwaŋ. Ka paghatá həŋ ŋa ghwalay ma inda vli ta wanaftá ghuɓu. 33 Ta ma wa taŋ tsa sluʼi ya, ta la a həŋ kɗiŋtá dəghaɗuta wu ná, ka sliʼafta gufaftá ŋuɗufa Yawe ta ghəŋa mnduha, ka dzuŋtá həŋ nda sana zləmnda ta fərtuta. 34 Ka tsanaftá lu ta hgu ta tsa vli ya ka Kivrutʼhataʼava, kabga hada lalamta lu ta inda mnduha fərtu haraʼutiri taŋ. 35 Ka sliʼaftá mnduha ma Kivrutʼhataʼava ka laghwi da Hatserut. Ka nzatá həŋ ma Hatserut.