Mbsak 9

Tva skwi ŋa magay ta ghəŋa skala Pak

1 Ma taŋtaŋa tili^ª ta mahisa vaku, tahula saba taŋ ta haɗika Masar, ka Yawe nda Musa ta mtaka Sinay mantsa: 2 « Ka skala la Israʼila ta skala Pak ta fitik ya tsaf lu. 3 Baɗ ghwaŋpəɗ fwaɗ ma na tili na, ga hawu, dzaʼa skala kuni. Ka skala kuni ta fitika ni manda va ya mna inda zlahuha, inda tva skwi ŋa magay ta nghanaghata, » kaʼa. 4 Ka mnanatá Musa ta la Israʼila, ŋa skalay taŋ ta skala Pak. 5 Ka skalatá həŋ ta skala Pak ga hawu baɗ maghwaŋpəɗ fwaɗ ma tila mataŋtaŋ ta mtaka Sinay. Ka magatá la Israʼila manda va ya mnanaf Yawe ta Musa.

6 Tsaw mamu sanlaha ma mnduha ta tsaɗ lu ma vəl ksaŋta taŋ ta mbli, mutsaf a hahəŋ ta skalaŋtá Pak baɗ tsaya wa. Ka lagha həŋ ta kəma i Musa nda Haruna baɗ va tsaya. 7 Ka həŋ nda həŋ mantsa: « Gwal ta tsaɗ lu a aŋni wu, kabga ksaŋ ksa ŋni ta mbli. Kabgawu kəl lu ka pyaftá aŋni ka hlaktá ŋa ŋni ma mbəhu ŋa Yawe baɗ fitik tsaf lu, kawadaga nda sanlaha ma la Israʼila na? » ka həŋ. 8 Ka Musa nda həŋ mantsa: « Sladavawa slada karaku, ka snanata yu ta skwi dzaʼa mnafta Yawe ta ghəŋa kaghuni, » kaʼa.

9 Ka Yawe nda Musa mantsa: 10 « Mnana mna ta la Israʼila: Ka mamu mndu mataba ghuni dər ndanana tsi, ka ma zivira ghuni a tsi, ta tsaɗ lu dabga vəl ksaŋta ni ta mbli, ka ta dzaʼa da vli diʼiŋ a tsi, laviŋ lava tsa mndu ya ta skala Pak ŋa Yawe. 11 Ga hawu baɗ maghwaŋpəɗ fwaɗ ma mahisa tili^ª dzaʼa skala hahəŋ, ŋa zay taŋ nda buradi kul haɗ is mida, nda ya nda masuʼataha ɗahɗaha^*. 12 Haɗ həŋ dzaʼa pɗanata ŋa ga sərɗək wu, haɗ həŋ dzaʼa ɓlanaptá ghudzifa ni wu, dzaʼa skalay həŋ ta Pak manda ya mnaf tva skwiha ŋa magay ta ghəŋa ni. 13 Ama ka mamu mndu kul haɗ skwa tsaɗa tida, laghu a diʼiŋ wu, ka kwalaghutá tsi ta skala Pak, dzaʼa klap kla lu mataba guyatá ghəŋa mnduha ni, kabga kladagha a ta mbəha ni ŋa Yawe baɗ fitik tsaf lu wa. Dguv ta ghəŋa ni dmakwa ni. 14 Ka ta kumay mayəm ta nzaku ma səla ghuni ta skala paka Yawe, snata ni ta tva skwiha ya ŋa magay, nda zlahuha ta ghəŋa skala Pak. Ka skwa turtuk dzaʼa nzakwa tva skwiha ŋa magay, nda mayəm tani, nda zwaŋa haɗik tani, » kaʼa.

Kusay ta ghəŋa həga tumpul

15 Baɗ dzugwatá həga tumpul ná, ka bukwamtá kusay ta həga tumpula dzratá wi ya, daga ga hawu ta ghəŋa həga tumpul manda vu, mantsa ya ha ga sərɗək. 16 Mantsa ya kəʼa ta gɗata ta nzata. Gifitik ya, bukwamta tsa kusay ya ta tsa həga tumpul ya, girviɗik ya, nzata ni manda vu. 17 Inda sliʼa tsa kusay ya ta ghəŋa tsa həga tumpul ya ná, sliʼa la Israʼila guli. Ma vli ya dzaʼa sladata tsi ya guli, fata la Israʼila ta ghuɓuha taŋ hada. 18 Ta mnafta nda mna Yawe ta kəl la Israʼila ka sliʼi, ta mnafta nda mna Yawe guli ta kəl həŋ ka fatá ghuɓa taŋ. Inda fitika nzakwa tsa kusay ya ta tsa həga tumpul ya, nzakwa hahəŋ guli hada.

19 Nzata tsa kusay ya ka nzəɗavata ta tsa həga tumpul ya ná, magay la Israʼila ta slna Yawe, haɗ həŋ ta sliʼavata wa. 20 Baɗ ma sani, ka fitik kwitikw ta nzata tsa kusay ya ta tsa həga tumpul ya. Ta mnafta nda mna Yawe ta kəl həŋ ka fatá ghuɓa taŋ, ta mnafta nda mna Yawe guli ta kəl həŋ ka sliʼavata. 21 Baɗ ma sani, ga hawu ha ga sərɗək yeya ta nzata tsa kusay ya. Sliʼa ni ga sərɗək ya, sliʼa hahəŋ. Guli ná, ta nza nza ka vaghu turtuk, nda rviɗik turtuk, sliʼa ni ya, sliʼa hahəŋ guli. 22 Ka tata nzaku tsa kusay ya ta tsa həga tumpul ya, dər ŋa za fitik his tsi, dər ŋa za tili tsi, dər ŋa za fitik kidaghi a tsi, nzata la Israʼila ma ghuɓa taŋ, haɗ həŋ ta sliʼavata wa. Sliʼa ni ya, sliʼa hahəŋ. 23 Ta mnafta nda mna Yawe ta kəl həŋ ka fatá ghuɓa taŋ, ta mnafta nda mna Yawe guli ta kəl həŋ ka sliʼavata. Ta magay həŋ ta slna Yawe manda va ya ta mnafta Yawe nda ma wa Musa.