Zlahuha ŋa gwal ta dra skwi ŋa Lazglafta
21
1 Ka Yawe nda Musa mantsa: « Mnana mna ta gwal ta dra skwi ŋa Lazglafta, zwana Haruna, ka ka nda həŋ na: Yaha mnda dra skwi ŋa Lazglafta da niŋtá ghəŋa ni ka mndu ta tsaɗ lu nda ma ksaŋtá mbla mndu ta mtuta mataba mnduha ni, 2 ba ka zba ni tsi kasiʼi, manda i ma ni, nda da ni, nda zwaŋa ni, nda makwa ni, nda zwaŋama ni. 3 Ta ghəŋa makuma ni ta həga ta kul snaŋtá zgun guli, laviŋ lava ta niŋtá ghəŋa ni ka mndu ta tsaɗ lu. 4 Ama haɗ dzaʼa niŋtá ghəŋa ni ka mndu ta tsaɗ lu ta ghəŋa la da ni ma markwa taŋ wu, dá kfariŋtá tsi ta ghəŋa ni.5 Ka ta ŋəzu gwal ta dra skwi ŋa Lazglafta, yaha həŋ da htsatá ghəŋ, htsata a həŋ ta slərpuha ghumayha taŋ wu, kwahaŋta a həŋ ta vgha taŋ wa. 6 Dzaʼa nza nza həŋ nda ghuɓa ka ŋa Lazglafta taŋ, haɗ həŋ dzaʼa kfariŋtá hga Lazglafta taŋ wu, kabga hahəŋ gwal ta vla skwa pla ghəŋ ŋa dray ta vu ŋa Yawe, skwa zaya Lazglafta taŋ. Ka nzata həŋ nda ghuɓa.
7 Yaha həŋ da klay ka marakw ta marakw nda kfara nda ma hliri. Yaha həŋ da klay ka marakw ta marakw ghəzliŋ zəʼala taŋ, kabga nda fa mnda dra skwi ŋa Lazglafta ka mndu nda ghuɓa ka ŋa Lazglafta ni. 8 Ka ngha kuni ka gwal nda ghuɓa ta həŋ, kabga hahəŋ ta vla skwa zay ŋa Lazglafta ghuni. Dzaʼa nzakway həŋ nda ghuɓa ka ŋa ghuni, kabga iʼi Yawe ta naghunafta nda ghuɓa ná, nda ghuɓa yu. 9 Ka kfariŋ kfara makwa mnda dra skwi ŋa Lazglafta ta ghəŋa ni nda ma hliri katsi, da ni kfariŋ tsi. Dzaʼa driŋ dra lu nda vu.
10 Mali ta ghəŋa gwal ta dra skwi ŋa Lazglafta ná, tsatsi ghəŋ mataba zwana ma ni. Ta ghəŋa tsatsi pghanaghata lu ta rɗa fata mndu ka ŋa Yawe, ka famta ma slna ŋa suɗa lguta gwal dra skwi ŋa Lazglafta. Haɗ tsatsi dzaʼa zlanatá swida ni kwitsar wu, kwahiŋtá a ta lgutha ni wa. 11 Yaha dá gavadaghata ta vata dər wati ma mbli. Yaha dá niŋtá ghəŋa ni ka mndu ta tsaɗ lu guli, dər má da ni tsi, dər má ma ni a tsi. 12 Yaha da sabi ma vli nda ghuɓa dá kfariŋtá tsi ta vla Lazglafta ni nda ghuɓa, kabga nda nza rɗi nda ghuɓa ŋa fata ka ŋa Lazglafta ta ghəŋa ni. Iʼi ná, Yawe yu.
13 Daghala makwa ta kul snaŋtá zgun dzaʼa tsi klay ka marakw. 14 Yaha da kla wadgu ka marakw, dər marakw ghəzliŋ lu, dər ya nda kfara nda ma hliri. Katək ná, daghala makwa ta kul snaŋtá zgun mataba la taŋ dzaʼa tsi klay ka marakw, 15 dá kfariŋtá tsi ta zwana ni mataba mnduha ni, kabga iʼi Yawe ta fata nda ghuɓa, » kaʼa.
16 Ka Yawe nda Musa mantsa: 17 « Mnana mna ta Haruna: Yaha mndu mataba zigha gha ma zivira gha nda maslivinza tida da gavadaghata ŋa vla skwa zaya Lazglafta ni. 18 Yaha mndu nda maslivinza tida da gavadaghata: Dər ghulpata mndu tsi, dər mndu ta dzəgiɗi tsi, dər mndu ka tərɗa kuma ni tsi, dər mndu ka tsugum sana fawaya ni tsi, 19 dər ya nda ɓla səla ni ka dzva ni a tsi, 20 dər mndu nda kutsukuɗ ma hul tsi, ka mndu ka dekweri a tsi, dər mndu nda sla ta ira ni tsi, dər mndu vazaf hwasigwa tida tsi, dər mndu nda lalam tida tsi, ka mndu nda psla a tsi. 21 Yaha mndu mataba zivira la Haruna, mnda dra skwi ŋa Lazglafta, nda maslivinza tida da gavadaghata ŋa vla skwa pla ghəŋ ŋa dray ta vu ŋa Yawe. Yaha da gavadaghata ŋa vla skwa zaya Lazglafta ni, dabga nda maslivinza tida. 22 Laviŋ lava ta za skwa zay vlaŋ lu ta Lazglafta ni, skwiha ya ta ghuɓuta, nda skwiha ya nda ghuɓa. 23 Ama yaha da lagha ta vata zlala ma vli nda ghuɓa, nda gwir, kabga nzakwa ni nda maslivinza tida. Yaha da kfariŋtá vliha ɗa nda ghuɓa. Iʼi Yawe ta pghatá həŋ ka ŋa ɗa, » kaʼa.
24 Ka mnanatá Musa ta tsa gwaɗaha ya ta i Haruna, nda zwana ni, nda la Israʼila demdem tani.