La Levi 18

Tva nzakw nda ghuɓa ma guya vgha

1 Ka Yawe nda Musa mantsa: 2 « Mnana mna ta la Israʼila, ka ka nda həŋ na: Iʼi Yawe, Lazglafta ghuni. 3 Yaha kuni da maga skwi si ta magaku ma Masar ma vli si ta nzakw kuni ya. Yaha kuni da maga skwi ta magaku ma Kanʼana ma vli ta hlə yu ta kaghuni dida ya. Yaha kuni da ksa saɗa nzakwa taŋ. 4 Ka maga kuni ta slna nda tva skwi manda ya mnaghuna yu, ka snata kuni ta zlahuha ɗa, ka maga kuni ta slna nda həŋ. Iʼi Yawe, Lazglafta ghuni. 5 Ka ŋanata kuni ta zlahuha ɗa, nda tva skwiha mnaghuna yu. Mndu ta ksatá slna nda tsi ná, nda tsi dzaʼa nzata tsi nda hafu. Iʼi ná, Yawe yu.

6 Yaha dər wati mataba ghuni da gavadaghata ta vata zba ni hɗeka hɗeka ŋa hanata nda tsi. Iʼi ná, Yawe yu.

7 Yaha ka da kfariŋtá da gha nda ma hanata gha nda ma gha. Yaha ka da kfariŋtá ma gha, ma gha ya.

8 Yaha ka da hanata nda baba gha, kfariŋtá da gha tsaya.

9 Yaha ka da hanata nda makuma gha, makwa da gha, ka makwa ma gha ya ya lu ma həga ga ghuni, ka ya ya lu nda sana mndu a tsi.

10 Yaha ka da hanata nda zigha gha, makwa zwaŋa gha, ka makwa makwa gha a tsi. Kfariŋtá ghəŋa gha tsaya.

11 Yaha ka da hanata nda makwa baba gha ya ya tsi nda da gha. Makuma gha ya.

12 Yaha ka da hanata nda makuma ni ma da gha. Zba da gha hɗeka hɗeka ya.

13 Yaha ka da hanata nda makuma ni ma ma gha, zba ma gha hɗeka hɗeka ya.

14 Yaha ka da kfariŋtá zwaŋama ni ma da gha nda ma gavadaghata gha ta vata markwa taŋ ŋa hanata nda tsi. Markwa dasliʼiŋa gha ya.

15 Yaha ka da hanata nda ghwaʼala gha, markwa zwaŋa gha ya. Yaha ka da hanata nda tsi.

16 Yaha ka da hanata nda markwa zwaŋama gha, kfariŋtá zwaŋama gha tsaya.

17 Yaha ka da hanata nda marakw, hana ka guli nda makwa ni. Yaha ka da klaftá makwa zwaŋa ni, ka makwa makwa ni a tsi ŋa hanata nda tsi. Zbu hɗeka hɗeka həŋ, manzakɗaway tsaya.

18 Yaha ka da klanaghata ka waɗa ta makuma ni ma markwa ghuni ka ta ndiri tsa markwa ghuni ya, dər ka hanata nda tsi.

19 Yaha ka da gavadaghata ta vata marakw nda zuʼi tida ŋa hanata nda tsi, kabga ghuɓa a wu.

20 Yaha ka da hanata nda markwa sləvda gha, dzaʼa nighis na ka mndu ta tsaɗ lu.

21 Yaha ka da klaftá dər wati ma zwana gha ŋa pla ghəŋ nda ma drafta ŋa skwa wuyay Mulek. Kfariŋtá hga Lazglafta gha tsaya. Iʼi Yawe.

22 Yaha ka da hanata nda zgun manda ya ta hanata lu nda marakw, manzakɗaway tsaya.

23 Yaha ka da hanata nda dər wati ma rini. Dzaʼa nighis na ka mndu ta tsaɗ lu. Yaha marakw da gavadaghata ta vata rini, ŋa hanata nda tsi, manzakɗaway tsaya.

24 Yaha kuni da niŋtá ghəŋa ghuni ka gwal ta tsaɗ lu nda ya dər turtuk ma inda tsa skwiha ya, kabga nda mndərga tsa skwiha ya niŋta na mndəra mnduha ta ghəzliŋta yu ta kəma ghuni na ta ghəŋa taŋ ka gwal ta tsaɗ lu. 25 Ka nutá tsa haɗika ya ka haɗik ta tsaɗ lu. Dzaʼa tsanagha tsa yu ta guma dabga krughuva ni, dzaʼa vnihiŋ vniha tsa haɗik ya ta mnduha ni.

26 Ama kaghuni, ka snata kuni ta zlahuha ɗa nda tva skwiha ŋa magay mnaghuna yu. Yaha kuni da magatá ya dər turtuk ma tsa manzakɗawayha ya, dər zwaŋa haɗik tsi, dər mndu ka mayəm ta nzata ma səla ghuni a tsi, 27 kabga inda tsa manzakɗawayha ya mag mnduha ma tsa haɗika ya ma kɗaku kaghuni. Ka nutá tsa haɗik ya ka haɗik ta tsaɗ lu. 28 Ma niŋ kuni ta tsa haɗik ya ka haɗik ta tsaɗ lu dá vnihighunistá tsi, manda ya magana tsi ta mndəra mnduha si mida ma kɗaku kaghuni ya. 29 Dər wati ma mndu dzaʼa magatá ya turtuk ma tsa manzakɗawayha ya, dzaʼa kliŋ kla lu mataba mnduha ni.

30 Mantsa tama, dzaʼa sniha sna kuni ta tva skwiha ŋa magay, yaha kuni da magatá ya dər turtuk ma tsa manzakɗawayha si ta mag tsa mnduha si ta nzata ma tsa haɗik ya, ma kɗaku kaghuni ya. Yaha kuni da niŋtá ghəŋa ghuni ka gwal ta tsaɗ lu nda tsa skwiha ya. Iʼi Yawe, Lazglafta ghuni, » kaʼa.