Dzratá wa Yawe nda la Israʼila
24
1 Ka Yawe nda Musa mantsa: « Safwa sa da iʼi, kaghuni nda Haruna, nda Nadav, nda Avihuʼ, nda sanlaha ma la galata mndu ndəfáŋ mbsak mataba la Israʼila. Ka tsəlɓakta kuni diʼiŋ. 2 Tahula tsa, ŋa gavagaghata kagha Musa turtukwa gha ta vata iʼi Yawe, ma gavagagha sanlaha. Yaha hamata mnduha guli da safi mista gha ta ghwá, » kaʼa.3 Ka sliʼaftá Musa ka laghu da mnanatá la Israʼila ta inda gwaɗaha nda gumaha mnana Yawe. Ka zlghaftá inda taŋ ta wa ni ka skwa turtuk, ka həŋ mantsa: « Inda gwaɗaha mna Yawe ná, dzaʼa magay ŋni manda va tsaya, » ka həŋ. 4 Ka vindaftá Musa ta inda gwaɗaha Yawe. Ka sliʼaftá tsi wrək tgha, ka baftá tsi ta gwir mista tsa ghwá ya. Ka dzagwatá tsi ta palaha ghwaŋpəɗ his, ta mndəra la Israʼila, ta mndəra la Israʼila ghwaŋpəɗ his. 5 Ka ghunaftá tsi ta sanlaha ma duhwalha la Israʼila ŋa draftá skwi ŋa pla ghəŋ ŋa dray tsuh tsuh. Ka vlaŋtá həŋ ta lghəŋha ta Yawe ŋa pla ghəŋa zɗaku. 6 Ka taʼatá Musa ta rita usa tsa riniha ya, ka paghamta ma glifiŋha, pɗakwa rita ni ka wutsikaftá tsi ta gwir. 7 Ka klaftá tsi ta deftera dzratá wi, ka dzaŋafta ta snay sləməŋa mnduha. Ka həŋ mantsa: « Inda gwaɗaha mna Yawe ná, dzaʼa magay ŋni manda va tsaya, dzaʼa sna sna ŋni, » ka həŋ. 8 Ka klaftá Musa ta tsa us ya ka wutsikafta ta mnduha, kaʼa mantsa: « Nana us na, ta maraŋta dzratá wa Yawe nda kaghuni, manda ya mna tsi ma inda gwaɗa ni, » kaʼa.
9 Tahula tsa, ka laf Musa ta ghwá nda i Haruna, nda Nadav, nda Avihuʼ, nda tsa la galata mnduha ndəfáŋ mbsak mataba la Israʼila ya. 10 Ka nghaŋtá həŋ ta Lazglafta la Israʼila. Mista səla ni mamu sana skwi manda brika pala ka saffirª manda ghudzifa luwa hezleʼ. 11 Ama tsa maliha la Israʼila ya ná, haɗ ghwaɗaka skwi magana Lazglafta ta həŋ wa. Ka vitsanavata həŋ, ka zə həŋ, ka sə həŋ ta skwi.
Ləglafa Musa ta ghwá Sinay
12 Ka Yawe nda Musa mantsa: « Saf sa da iʼi ta ghwá, ka nzata ka, dzaʼa vlagha vla yu ta klamha vindaf yu tida ta skwiha ŋa taghay nda zlahuha ŋa taghanaftá la Israʼila, » kaʼa. 13 Ka sliʼafta Musa nda Yəhusuwa slufa ni, ka lafi Musa ta ghwá Lazglafta, 14 tahula mnanata ni ta la galata mnduha: « Kəzlaŋnawa kəzla hadna ha ta vragatá ŋni slaghunaghata. Wya i Haruna nda Hur kawadaga nda kaghuni. Ka mamu skwi ŋa dzray mataba sana mndu nda sana mndu katsi slanaghata ni ta həŋ, » kaʼa.
15 Manda lafa Musa ta ghwá, ka bukwamtá kusay ta tsa ghwá ya. 16 Ka gɗavatá glakwa Yawe ta ghwá Sinay, ka bukwamtá kusay ka fitik mkuʼ. Baɗ mandəfáŋa fitik, ka hgaŋtá tsi ta Musa ma kusay. 17 Ka nghaŋtá la Israʼila ta glakwa Yawe manda vu ta zləghaku katakata ta bɗəma ghwá. 18 Ka lam Musa da tsa kusay ya, ka laf ta tsa ghwá ya. Ka zatá Musa ta fitik fwaɗ mbsak, nda rviɗik fwaɗ mbsak ta tsa ghwá ya.