Skwiha ta raku ŋa magay ŋa gwal nda hta
23
1 « Yaha kuni da tuza gwaɗa tsakalawi. Yaha kuni da gwafta wi nda ghwaɗaka mndu ŋa nzakway ka ghwaɗaka masləmtsək.2 Yaha kuni da dzaʼa mista ndəghata mnduha ŋa maga ghwaɗaka skwi. Ta kəma guma ná, yaha kuni da ga masləmtsəka skwi ta zɗəganatá ndəghata mnduha ŋa mbəɗiŋtá kahwathwata. 3 Ma gal kuni ta pɗu ta kəma guma.
4 Ka slaf sla kuni ta sla ghuma ghuni, dər kəɗiha ni a tsi si ta zwaɗuta, mbanakwa mba. 5 Ka nda ngha kuni ta kəɗiha mndu husaŋ kuni ta zlumbuta da ndəgaku, ma zlana kuni, kataŋwa kata ŋa sliʼanaftá.
6 Ma mbəɗanaf kuni ta skwi ta raku ŋa mndu ka pɗu ma guma ni. 7 Diʼiŋaghuwa diʼiŋa nda gwaɗa ka tsakalawi. Ma dza kuni ta mndu kul haɗ dmakwa ni, ka tɗukwa mndu a tsi, kabga kləta a yu ka tɗukwa mndu ta mndu ta ga dmaku wa. 8 Yaha kuni da tsuʼa sməɗ ŋa ha iri, kabga ta ghulpay sməɗ ta gwal nda guna ira taŋ, ta tərɗiŋ tərɗa ta gwaɗaha ma wa tɗukwa mnduha.
9 Ma ganap kuni tiri ta mayəm. Nda sna vərɗa kaghuni ta nzakwa mayəm, kabga si ka mayəm kaghuni guli ma haɗika Masar. »
Vakwa mbiʼa vgha nda fitika mbiʼa vgha
10 « Vaku mkuʼ dzaʼa zata kuni ta hva vwaha ghuni, mantsa ya tska skwi tida guli. 11 Ama ta mandəfáŋa vaku ya ná, dzaʼa vanap va kuni ma madza ŋa lagha gwal ka pɗu mataba ghuni da tska mandawasa mida. Paɗakwa ni ya guli, ŋa lagha tsuɗayha da ɗagay. Mantsa ya dzaʼa maga kuni nda vwaha inaba ghuni, nda fuha zaytuŋha ghuni guli.
12 Fitik mkuʼ dzaʼa kuni zata ta maga slnaha ghuni, ama baɗ mandəfáŋa fitik ya, mbiʼapta ghuni ta vgha, ŋa mbiʼapta slaha ghuni, nda kəɗihha ghuni ta vgha, ŋa hlapta zwana kurɗuha ghuni, nda matbayha ta hafu. 13 Ka ŋanata kuni ɗina ta inda tsa gwaɗaha managhuna yu ya. Yaha kuni hgaŋtá hga sana lazglaftaha, dər snaŋtá kulay ma wa ghuni. »
Skaluha hkən ma vaku ŋa Yawe
14 « Inda vaku, hkən səla dzaʼa skalihata kuni ta skalu. 15 Ka skala kuni ta skala buradi kul haɗ is mida. Fitik ndəfáŋ dzaʼa zata kuni ta za buradi kul haɗ is mida, ma fitik ya mnaf lu ma tila Avivª, kabga ma tsa tili ya sliʼagapta kuni ma haɗika Masar. Yaha kuni sagha ta kəma ɗa nda dzvu bətbət. 16 Tahula tsa, ŋa skalay ghuni ta skala tska taŋtaŋa ndəhatá yakwa skwiha slgaf kuni ta vwaha ghuni. Gufwak, ta hula kɗiŋta ghuni ta tskatá skwi maga kuni guli ná, ŋa skalay ghuni ta skala nekwatá nimaya ta vwah. 17 Mantsa tama, inda vaku, hkən səla dzaʼa maravata inda zgwana ghuni ta kəma Mgham Yawe. 18 Ma fitika play ghuni ta ghəŋ ŋa ɗa, yaha kuni da vlihatá usa skwa pla ghəŋ kawadaga nda buradi nda is mida. Yaha kuni da zlanatá ghwaviɗa skwa pla ghəŋ ŋa ɗa ma fitika skalu ya, ŋa labi ta sərɗək ga mahtsima ni.
19 Ka hlagaghata kuni da həga Yawe, Lazglafta ghuni ta taŋtaŋa yakwa skwi hva kuni ta vwaha ghuni.
Yaha kuni da damtá zwaŋa gu ma uʼa ma niª. »
Klanata duhwala Lazglafta ta kəma ta la Israʼila
20 « Sna ɓa, wana yu ta ghunaftá duhwala ɗa ta kəma ghuni ŋa ngha kaghuni ma tvi, ŋa kladaghunaghata da vli ya payaghunaf yu. 21 Ka fanata kuni ta sləməŋ, ka sna kuni ta gwaɗa ni. Yaha kuni da təŋanaftá ghəŋ, ya haɗ dzaʼa plaghunatá dmakwa ghuni wu, kabga mamu hga ɗa ma tsatsiª. 22 Ama ka fa fa kuni ta sləməŋ ɗina ka snanatá gwaɗa ni, ka ta magay kuni ta inda skwi dzaʼa mnaghata yu katsi, dzaʼa nzakway yu ka ghuma ghumaha ghuni, ka mnda dzaŋtá kuma nda mndu dzaʼa dzaŋtá kuma nda kaghuni. 23 Dzaʼa klaghuna kla duhwala ɗa ta kəma, ka ɓhadaghunaghata ni ta haɗika la Amuru, nda la Het, nda la Periz, nda la Kanʼana, nda la Hiv, nda la Yəbus. Dzaʼa zaɗana zaɗa yu ta tsa mnduha ya. 24 Yaha kuni da tsəlɓu ŋa lazglaftaha taŋ, dər maganatá slna ta həŋ. Yaha kuni da maga mndərga skwiha ta mag həŋ. Ama ka hwanzaɓiŋta kuni ta tsa lazglaftaha taŋ ya, dzaɓiŋha kuni ta tsa palaha dzagwa həŋ ya. 25 Dzaʼa magihatá iʼi Yawe, Lazglafta ghuni kuni ta slna. Tsaya tama, dzaʼa tfanagha tfa yu ta wi ta skwa zay ghuni, nda ima say ghuni. Dzaʼa huzliŋ huzla yu ta ɗaŋwaha ta ghəŋa ghuni. 26 Ta haɗika ghuni ná, haɗ ta a miʼaha dzaʼa paghigiŋtá zwaŋ, nda miʼaha ka dzəghəŋ wa. Dzaʼa slranagha slra yu ta hafa ghuni.
27 Makəɗ kuni ka ɓhadaghata ya ná, dzaʼa ganaf ga yu ta zləŋ katakata ta inda tsa mnduha dzaʼa lam kuni da taba taŋ ya. Dzaʼa hwazlaɓanaf hwazlaɓa yu ta həŋ. Da zləŋa iʼi ná, səla ma warga ma ghumaha ghuni. 28 Dzaʼa ghunaf ghuna yu ta gwadzaŋ ta kəma ta kəma, ŋa ghazliŋta taŋ ta la Hiv, nda la Kanʼana, nda la Het ta kəma ghuni. 29 Haɗ yu dzaʼa ghazliŋtá həŋ ta kəma ghuni ta vakwa turtuk wu, da nzatá haɗika ghuni ka zivak, da yaghunaghata nimtak. 30 Makiʼamakiʼa dzaʼa ghazlighunista yu ta ghumaha ghuni, ha ka yavafta ghuni tusak ŋa nuta tsa haɗik ya ka ŋa ghuni. 31 Dzaʼa kwaraghuna kwara yu ta mukuma haɗika ghuni, sliʼafta ta wa drəfa Zaŋwafiha ha ka lagha ta wa drəfa la Filistiª, nda ya sliʼafta ta wa mtaka Sinay ha ka lagha ta wa ghwa Yufratis, dzaʼa vlaghuna vla yu ma dzva ghuni ta mnduha ta tsa haɗikha ya, ŋa ghazliŋta ghuni ta həŋ ta kəma ghuni. 32 Yaha kuni da dzraftá wi nda həŋ, dər nda lazglaftaha taŋ. 33 Yaha həŋ da nzata ma haɗika ghuni. Ka zlana zla kuni ta həŋ, dzaʼa hlam hla həŋ ta kaghuni da gihatá dmaku. Dzaʼa tsəlɓay kuni ta tsəlɓu ŋa lazglaftaha taŋ, kahwathwata dzaʼa nzakway ka dəɓəla ghuni, » kaʼa.