Saba imi ma pala
17
1 Ka sliʼaftá guyatá ghəŋa la Israʼila demdem ta mtaka Siŋ. Ka ksaftá həŋ ta tvi, sliʼafta ma tsa ghuɓu ya, ka lagha sladata ma ya vli, lagha sladata ma ya vli, manda ya mnanaf Yawe ta həŋ. Ka lagha həŋ fatá ghuɓa taŋ ma Rəfidim, ama haɗ imi hada ŋa say mnduha wa. 2 Ka zbə mnduha ta zlərɗa wi nda Musa, ka həŋ mantsa: « Vlaŋna vla ta imi ŋa say, » ka həŋ. Ka Musa nda həŋ mantsa: « Nya ta kəl kuni ka zba zlərɗa wi nda iʼi na? Nya ta kəl kuni ka dzəgha Yawe na? » kaʼa. 3 Hada, ka kuzlanaftá ndala ta mnduha, ka ruruŋwu həŋ ta ruruŋwaku nda Musa, ka həŋ mantsa: « Kabgawu kəl ka ka hlagaŋnafta ma Masar ŋa rwaŋnata nda ndala, aŋni nda zwana ŋni, nda rina ŋni tani na? » ka həŋ. 4 Ka wahu Musa ta wahu da Yawe, kaʼa mantsa: « Nahgani dzaʼa yu magay nda na mnduha na? Ta ɓats nzəɗa ná, dzaʼa zlamba zlamba həŋ ta iʼi, » kaʼa. 5 Ka Yawe nda Musa mantsa: « Lab la ta kəma mnduha, ka hlafta ka ta sanlaha ma la galata mnduha la Israʼila mista gha, klaf ka ma dzva gha ta dafa gha kəl ka si ka dzaŋtá Nil ya, ka dzaʼa ka. 6 Wya yu dzaʼa sladata ta kəma gha ta pala ma Hwarev, ŋa dzaŋta gha ta tsa pala ya, ya dzaʼa sab sa imi mida ŋa say mnduha, » kaʼa. Ka magata Musa manda va tsaya ta kəma tsa la galata mnduha la Israʼila ya. 7 Ka hgə tsi ta tsa vli ya ka Masa nda Merivaª, kabga zbaŋta la Israʼila ta zlərɗa wi, nda ya kabga vəl kumaŋta taŋ ta dzəghaŋtá Yawe, nda mnay kazlay na: « Mamu Yawe mataba mu re haɗ wa a na kəʼa? »
Vula la Ghamalek nda la Israʼila
8 Ka lagha la Ghamalek da gəmata nda vulu nda la Israʼila ma Rəfidim. 9 Ka Musa nda Yəhusuwa mantsa: « Zabamap zaba ta mnduha, ka dzaʼa ka da vulu nda la Ghamalek. Mahtsim ya, dzaʼa sladaga slada yu ta bɗəma kuɗuŋur nda ŋatá dafa Lazglafta ma dzva ɗa, » kaʼa. 10 Ka magata Yəhusuwa manda va ya mnana Musa, ŋa dzaʼa da vulu nda la Ghamalek, ka sliʼafta i Musa nda Haruna nda Hur ka lafi ta bɗəma kuɗuŋur. 11 Na kapafta Musa ta dzvu ya, zay la Israʼila ta ghwa. Na vragata dzva ni ya, zay la Ghamalek ta ghwa. 12 Hərfakwa dzvuha Musa ya ná, mbaɗa i Haruna, nda Hur ka klaftá pala ka fanatá Musa ŋa nzafta ni tida. Ka ŋanatá i Haruna nda Hur ta dzvuha ni nda ta luwa, sani nda təv ya slərpu, sani nda təv ya slərpu. Manda tsaya nzata tsi nda kapatá dzvuha dzuŋwa ha ka dɗata fitik. 13 Ka zatá Yəhusuwa ta ghwa katakata nda kafay ta ghəŋa sludziha la Ghamalek.
14 Ka Yawe nda Musa mantsa: « Vindam vinda nda vinda ta tsa skwiha ya ma ɗelewer, ŋa nzakwa ni ka skwa havu. Mnana mna ta Yəhusuwa kazlay na dzaʼa kɗana kɗa yu ta la Ghamalek demdem, haɗ mndu dzaʼa havglapta ka həŋ ɗekɗek ta ghəŋa haɗik wu kəʼa, » kaʼa. 15 Ka baftá Musa ta gwir, ka tsanaftá tsi ta hgu kazlay na Yawe Nissi, manda mnay kazlay na Yawe ŋizla ɗa ma zatá ghwa kəʼa. 16 Kaʼa mantsa: « Kapafwa kapa ta ŋizla Yawe nda ta luwa! Dzaʼa vulay Yawe ta vulu nda la Ghamalek ha ta zivir zivirha taŋ, » kaʼa.