Sabi 16

Ghunakta Yawe ta manna nda fufuriha

1 Ka sliʼaftá guyatá ghəŋa la Israʼila demdem ma Ilim, ka ɓhadaghata ta mtaka Siŋ, ma takataka Ilim nda Sinay, baɗ maghwaŋpəɗ hutaf ma tila mahis, tahula saba taŋ ma haɗika Masar. 2 Ma tsa mtak ya, ka ruruŋwu guyatá ghəŋa la Israʼila demdem ta ruruŋwaku ta ghəŋa i Musa nda Haruna, 3 ka həŋ na: « Ta dər má si pslata Yawe ta aŋni ma haɗika Masar! Hada ná, ta vata siga sluʼi si ta nzakwa ŋni, ka zə ŋni ha ka baghawta ŋni! Ama ka hlagaptá kuni ta aŋni, ka hlagaghata da na mtak na, ŋa rwanatá na dəmga na nda maya! » ka həŋ. 4 Ka Yawe nda Musa mantsa: « Dzaʼa nzəgaghuna nza yu ta luwa ta skwa zay. Inda fitik, ŋa sliʼagapta mnduha ma ghuɓu, ŋa dzaʼa da hla skwa zay prək zay taŋ inda vaghu. Mantsa ya dzaʼa dzəghaŋta yu ta həŋ, ka ngha yu ka dzaʼa snə re sna a wa a həŋ ta zlahuha ɗa. 5 Baɗ mamkuʼ a fitik ya, ta pay həŋ ta tsa skwa zay dzaʼa həŋ tskafta ya, dzaʼa dukwaf dukwa həŋ ta sgavaghata his səla ka malaghutá ŋa sanlaha ma fitik, » kaʼa. 6 Ka i Musa nda Haruna mnanatá inda la Israʼila mantsa: « Ga hawu gita dzaʼa snaŋta kuni kazlay Yawe ta hlagaghunapta ma haɗika Masar kəʼa. 7 Ga sərɗək ya, dzaʼa nghay kuni ta glakwa Yawe, kabga nda sna ta ruruŋwakwa ghuni ta ghəŋa ni. Wa aŋni ŋa ruruŋwakwa ghuni ta ghəŋa aŋni na? » ka həŋ. 8 Ka Musa guli mantsa: « Dzaʼa vlaghuna vla Yawe ga hawu ta sluʼi ŋa zay ghuni. Ga sərɗək ya, ŋa baghaghunafta ni nda skwa zay, kabga snaŋ sna ta ruruŋwaku ta ruruŋ kuni ta ghəŋa ni. Ta ghəŋa aŋni a tsa ruruŋwakwa ghuni ya wa. Wa aŋni na? Ta ghəŋa Yawe ta ruruŋwa kuni ta ruruŋwaku, » kaʼa.

9 Ka Musa nda Haruna mantsa: « Mnana mna ta guyatá ghəŋa la Israʼila demdem ka slanaghata həŋ ta kəma Yawe, kabga snaŋ sna tsa ruruŋwakwa taŋ ya, » kaʼa. 10 Ma fitika gwaɗay Haruna ta tsa gwaɗa ya ŋa guyatá ghəŋa la Israʼila demdem ná, ta mbəɗavatá hahəŋ ka nghə nda ma mtak. Gi ka zlagapta glakwa Yawe ma kusay. 11 Ka Yawe nda Musa mantsa: 12 « Snaŋ sna yu ta ruruŋwakwa la Israʼila. Mnana mna ta həŋ kazlay na: “Kraʼukraʼuwa vli ga hawu, dzaʼa zay kuni ta sluʼi. Ga sərɗək guli, dzaʼa baghaku kuni nda skwa zay. Mantsa ya dzaʼa kəl kuni ka snaŋta kazlay Iʼi Yawe, Lazglafta ghuni kəʼa,” » kaʼa.

13 Ta tsa hawu ya tama, ka sliʼagaptá fufuriha təɓsaʼ ndəghanaftá ghuɓu. Ga sərɗək ya guli, ka wanaftá wuninik ta ghuɓu.

14 Manda salata tsa wuninik ya, ka nzatá sana skwi manda ŋulaŋ klipiɗpiɗa ta haɗik. 15 Nghanata la Israʼila, ka həŋ mataba taŋ mantsa: « Nahgani na na? » ka həŋ, kabga sana a həŋ wa. Ka Musa nda həŋ mantsa: « Skwa zay ya vlaghuna Yawe ŋa zay ghuni. 16 Wya gwaɗa mnaf Yawe: “Ka hlaʼata dər wa prək ka zay ni, ka agwada turtuk ta inda mndu, taɓta mbsaka mnduha ga taŋ. Ka hlaʼatá mndu ŋa gwal ga taŋ,” » kaʼa. 17 Ka magatá la Israʼila manda va tsaya. Ka halaʼata həŋ. Ŋulum ŋulum halaʼata sanlaha, kiʼa kiʼa ŋa sanlaha. 18 Garafta taŋ ta agwada ná, furtu a ŋa tsa gwal ta hlafta ŋulum ya wu, htu a ŋa tsa gwal ta hlafta kiʼa ya guli wa. Prək zay ni hlaʼata inda mndu. 19 Ka Musa nda həŋ kay guli mantsa: « Yaha kuni pɗanata ha ŋa ga sərɗək, » kaʼa. 20 Ama sna a sanlaha ta tsa gwaɗa Musa ya wu, ka pɗanatá həŋ ha ŋa ga sərɗək. Ka yamtá mtarak mida ka ziʼuta. Ka ɓasanavata Musa ta ŋuɗuf ta həŋ. 21 Daga baɗ tsa, ka hlə inda mndu ga sərɗək prək ka zay ni. Ama ndəhakwa fitik ya ná, nuʼuta ni.

22 Baɗ mamkuʼ a fitik ya, ka hlaftá həŋ his səla ta skwi ŋa zay, tsaya agwada his ta inda mndu. Ka sagha inda la maliha ta ghəŋa guyata ghəŋ mnanatá Musa ta skwi ta luta. 23 Ka Musa nda həŋ mantsa: « Wya ka Yawe mnata: “Mahtsim fitika mbiʼa vgha, ka Sabat nda fa ŋa Yawe. Sulawa sula gita ta skwi ya kumaŋ kuni ta sulata, ka dadata kuni ta skwi ya kumaŋ kuni ta dadata. Pɗakwa ni ma vəl zay ghuni ya, ka fata kuni ha ŋa mahtsim,” » kaʼa. 24 Ka fatá həŋ ha ŋa ga sərɗək ta pɗakwa ni manda va ya si mnanaf Musa ta həŋ, ziʼu a wu, yam a mtarak mida guli wa. 25 Ka Musa nda həŋ mantsa: « Zuwa za gita gita, kabga gita sabata Yawe. Slanaghata a kuni ma mtak gita wa. 26 Mkuʼ fitika ghuni ta hlay, ama baɗ mandəfáŋ ya, Sabat tsaya, haɗ kuni dzaʼa slanaghata baɗ tsaya wu, » kaʼa. 27 Ka sliʼaftá sanlaha ma mnduha baɗ mandəfáŋa fitik ka laghu da hlay, ama haɗ skwi slanagha həŋ wa. 28 Ka Yawe nda Musa mantsa: « Ha ŋa yawu dzaʼa kwalaghuta kuni ta snatá zlaha ɗa, nda skwiha ya ta mnaghunafta yu na? 29 Fawa fa ta sləməŋ ɗina, Iʼi Yawe ta vlaghunatá Sabat, tsaya kəl yu ka vlaghunatá baɗ mamkuʼ a fitik ta skwa zay ŋa fitik his. Baɗ mandəfáŋa fitik ya ná, nzakway dər wa ta nzaku mintgha ni, yaha dər wa da sabi mintgha ni baɗ tsaya, » kaʼa. 30 Mantsa ya tama, ka mbiʼaptá mnduha ta vgha baɗ mandəfáŋa fitik. 31 Ka tsanaftá la Israʼila ta hgu ta tsa skwa zay ya ka manna. Manda hya masuʼata nzakwa ni, miɗiɗa ka ŋusliŋ. Gun guna ni manda gatu klehets klehetsa magaf lu nda zuɗum. 32 Ka Musa mantsa: « Wya ka Yawe mnafta: “Ndəghanafwa ndəghata agwada nda tsi, ka nzulanata kuni ŋa zivirha ghuni, ŋa nghanata taŋ ta skwa zay ya zughunus yu ma mtak, ma fitika hlagaghunapta ɗa ma haɗika Masar,” » kaʼa. 33 Ka Musa nda Haruna mantsa: « Klaf kla ta siga, ka pghamta ka ta agwada manna mida, ka fata ka ta kəma Yawe, ŋa nzulanata ha zivirha ghuni, » kaʼa. 34 Manda va ya mnanaf Yawe ta Musa, ka fatá Haruna ta tsa siga ya ta kəma akwata dzratá wi ŋa nzulay. 35 Fwaɗ mbsak vakwa la Israʼila ta za manna ha ka lagha taŋ ta haɗik ya ta nzaku mnduha. Ka gɗata həŋ ta zay ha ka ɓhadaghata taŋ ta vraghwa haɗika Kanʼana. 36 Agwada manna turtuk ná, ta magay ta kiluʼ hkən.