Sabi 14

Hwayiŋta Firʼawna ta la Israʼila

1 Ka Yawe nda Musa mantsa: 2 « Mnana mna ta la Israʼila ka vra həŋ da fatá ghuɓa taŋ ta kəma Piʼhahirut, ma takataka Migdul nda drəf. Hada dzaʼa fata kuni ta ghuɓa ghuni ta kəma Baghalʼtsefuŋ ndusa nda drəf ya. 3 Ka Firʼawna dzaʼazlay na: “Zaɗanagha zaɗa tvi ta la Israʼila, ta ra vli həŋ ma mtak, nanagha na mtak ta həŋ!” kaʼa. 4 Dzaʼa təŋanaf təŋa yu ta ghəŋa Firʼawna ŋa hwayighunista ni. Dzaʼa marana mara yu ta glakwa ɗa ta Firʼawna nda sludziha ni demdem tani. Mantsa ya dzaʼa kəl la Masar ka snaŋta kazlay iʼi ná, Yawe yu kəʼa! » kaʼa. Ka magata la Israʼila manda va tsaya. 5 Manda mnanata lu ta mghama Masar kazlay na sliʼap sliʼa la Israʼila kəʼa, ka mbəɗavaftá ndana Firʼawna nda kwalvaha ni tani ta ghəŋa tsa mnduha ya. Ka həŋ mantsa: « Nahgani na maga mu na? Nya kəl mu ka zlanatá la Israʼila ka laghwa taŋ, ka zlanata magamatá slna na? » ka həŋ. 6 Ka payanatá Firʼawna ta mwata plisa ni, ka sliʼaftá tsi kawadaga nda sludziha ni. 7 Ka hlaftá tsi ta mwata plisha ɗagap tsi mkuʼ dərmək, nda sanlaha ma mwata plisha demdem ma Masar, nda maliha ta ghəŋa taŋ ta ŋlay tani. 8 Ka təŋanaftá Yawe ta ghəŋa Firʼawna, mghama Masar. Ka hwayiŋtá tsi ta la Israʼila ta sab həŋ ma Masar nda kapa dzva flauʼwatá vgha. 9 Ka hwayiŋtá la Masar ta həŋ, nda plisha, nda mwata plisha Firʼawna, nda sludziha ni ta plis tani, nda sanlaha ma sludziha ni tani demdem. Ka ksaftá həŋ ta la Israʼila ta wa drəf ndusa nda Piʼhahirut ma tsa vli fa həŋ ta ghuɓa taŋ ta kəma Baghalʼtsefuŋ ya.

10 Ndusadaghata Firʼawna, kəʼa ka la Israʼila ná, ta ndusadagha ndusa la Masar. Ka ksaftá zləŋ ta həŋ katakata. Ka wahu həŋ ta wahu da Yawe. 11 Ka həŋ nda Musa mantsa: « Haɗ kulu ma Masar ra? Nya kəl ka hlagaŋnapta ŋa rwuta ŋni ma mtak na? Nya kəl ka ka hlagaŋnapta ma Masar? 12 Mnagha mna ŋni ma fitika nzakwa mu ta ma Masar kazlay na: “Zlaŋna zla ka maganata ŋni ta slna ta la Masar, kabga mal maganata ŋni ta slna ta la Masar, ka rwuta ŋni ma mtak ka ŋni kay ɓa!” » ka həŋ. 13 Ka Musa mantsa: « Ma zləŋ kuni ta zləŋ! Nzawa nza, dzaʼa nghay kuni ka Yawe dzaʼa mbaghunafta gita u na. Nana la Masar ta nghə kuni gita u na ná, nghəglaŋta a kuni ta həŋ ha ŋa ɗekɗek wa. 14 Yawe dzaʼa vulaghunatá vulu, nzata kaghuni tsəriɗ ŋa ghuni! » kaʼa.

Tanap ta Yawe ta drəfa Zaŋwafiha

15 Ka Yawe nda Musa mantsa: « Nya ta kəl ka ka wahu da iʼi na? Mnana mna ta la Israʼila ka sliʼafta həŋ, ka mbaɗa həŋ ta mbaɗa taŋ. 16 Kapaŋ kapa ta na dafa ma dzva gha na, ka fadapta ka ta dzva gha nda ta ghəŋa drəf, ka tanap ta ka ŋa mutsafta la Israʼila ta labi ma takataka drəf ta ghwalata vli. 17 Dzaʼa təŋanaf təŋa iʼi ta ghəŋa la Masar ŋa hwayighunista taŋ. Dzaʼa maranaŋ mara yu ta glakwa ɗa ta Firʼawna, nda inda sludziha ni, nda mwata plisha ni, nda sludziha ni ta plis tani. 18 Ma maranata ɗa ta glakwa ɗa ta Firʼawna, nda mwata plisha ni, nda sludziha ni ta plis tani ya, dzaʼa snaŋ sna la Masar kazlay iʼi ná, Yawe yu kəʼa, » kaʼa.

19 Ka sliʼaftá duhwala Lazglafta si ta kla ghuɓa la Israʼila ya, ka nzata ta hula taŋ. Ka sliʼafta tsa kusay sundul ya guli ka nzata ta hula taŋ guli. 20 Ka nzatá tsi ma takataka ghuɓa la Masar nda ghuɓa la Israʼila. Tɗik tsa kusay ya nda təv turtuk, nda təv sani ya guli ná, ta tsuwaɗaka vli girviɗik. Petsuweɗ vli haɗ ya ta ndusanavatá sani nda sani wa.

21 Ka fadapta Musa ta dzva ni ta ghəŋa drəf. Ka tanaptá Yawe ta tsa drəf ya, ka vruŋta nda falaka silwa dagala katakata petsuweɗ vli. Ka ghwaliŋtá tsi ta tatá tsa drəf ya, ka tsavaptá imi. 22 Ka labi la Israʼila ma takataka drəf ta ghwalata vli. Ka nzatá drəf ŋa taŋ ka matsak nda ga zeghwa taŋ nda ya nda ga zlaɓa taŋ. 23 Ka hwayiŋtá la Masar ta həŋ. Ka sliʼadamtá plisha Firʼawna, nda mwata plisha ni, nda sludziha ni ta plis tani demdem da takataka tsa drəf ya. 24 Watata vli, ka nghagatá Yawe ma kusay sundul ka vu ya, ka la Masar, ka zlaɓanaftá tsi ta ghuɓa taŋ. 25 Ka tətərɗiŋtá tsi ta səla mwataha plisha taŋ, zlah ka həŋ ta klay. Ka la Masar mantsa: « Hwayama hwaya da la Israʼila, kabga Yawe ta vulanatá həŋ ta na vulu na nda Masar! » ka həŋ.

26 Ka Yawe nda Musa mantsa: « Tɗadap tɗa ta dzva gha ta ghəŋa drəf ka vranaghata imi ta ghəŋa la Masar, nda mwata plisha taŋ, nda sludziha taŋ ta plis tani! » kaʼa. 27 Ga sərɗək, ka tɗadaptá Musa ta dzva ni ta ghəŋa drəf, ka vraftá drəf manda va si nzakwa ni, ka gruŋtá tsa la Masar ta hwaya ya. Ka pghamtá Yawe ta həŋ da takataka drəf. 28 Ka vraftá drəf, ka zanamtá mwata plisha, nda sludziha Firʼawna ta plis, nda inda sanlaha ma sludziha si ta hwayiŋtá la Israʼila da tsa drəf ya, haɗ ya ta pɗata dər turtuk wa. 29 Ama ta ghwalata vli labi la Israʼila ma takataka drəf. Ka nzatá imi ŋa taŋ ka matsak nda ga zeghwa taŋ, nda ya nda ga zlaɓa taŋ. 30 Baɗ tsaya hlapta Yawe ta la Israʼila ma dzva la Masar. Ka nghə la Israʼila ta mbla la Masar ta wa sgama drəf. 31 Ka nghaŋtá la Israʼila ta glakwa slna dzva Yawe ta maganatá la Masar. Ka zləŋatá həŋ ta Yawe, ka faftá həŋ ta ghəŋ tida, nda ya ta ghəŋa kwalva ni Musa guli.