Vlatá zumaliha ŋa Yawe
13
1 Ka Yawe nda Musa mantsa: 2 « Faghu fa ŋa ɗa ta inda zumali. Zumaliha yayaga lu mataba la Israʼila, dər mndu tsi, dər rini a tsi, ŋa ɗa həŋ demdem, » kaʼa.Skala buradi kul haɗ is mida
3 Ka Musa nda mnduha mantsa: « Havapwa hava ka na fitik ya sliʼagap kuni ma ga vuʼa ma Masar na. Nda mbrakwa dzva ni hlagaghunapta Yawe. Ta havə kuni ta na skalu na, yaha kuni da za buradi nda is mida. 4 Gita ma tila Avivª ta sliʼagapta kuni. 5 Baɗ da ɓhadaghunamta Yawe da haɗika la Kanʼana, nda la Het, nda la Amuru, nda la Hiv, nda la Yəbus, tsa haɗik ya waɗa tsi ta vlaŋtá dzidzíha ghuni, ta mbəzaku uʼa nda zuɗum mida ya, wya skwi ŋa magay ghuni ma na tili na inda vaku: 6 Ma fitik ndəfáŋ, buradi kul haɗ is mida dzaʼa kuni da zay. Baɗ mandəfáŋa ni ya, dzaʼa mamu skalu ŋa Yawe. 7 Dzaʼa zay lu ta buradi kul haɗ is mida ma fitik ndəfáŋ. Yaha lu da slanaghatá buradi nda is mida, nda vərɗa is guli ta inda kwakwara ghuni. 8 Ma fitika tsa skalu ya, ka snanamta kuni ta zwana ghuni. Ka kuni dzaʼazlay nda həŋ na: Ta skalay ŋni ta na skalu na ta ghəŋa skwi ya magaŋna Yawe ma fitika saba ŋni ma Masar. 9 Dzaʼa nzakway ka ŋizla ta dzva ghuni, ka skwa havu ta bizlbizla kuma ghuni ŋa nzakwa zlaha Yawe ma wa ghuni. Tsatsi ta hlagaghunapta ma Masar nda mbrakwa dzva ni. 10 Ka ŋanata kuni ta tsa skwiha mnaf lu ŋa magay inda vaku ta fitika ni ya, » kaʼa.
11 Ka kəɗ Musa ta mnay: « Dzaʼa hladaghunam hla Yawe da haɗika la Kanʼana ya waɗaghuna tsi, kaghuni nda dzidzíha ghuni ya. Vlaghunata ni ya, 12 ka faghuta kuni ŋa Yawe ta inda zumali yaga lu nda ya. Inda dugzum, nda maŋazak, nda lghəŋ ka zumali mataba rina ghuni guli ná, ŋa Yawe həŋ. 13 Dər má mantsa tsi, inda zumali yaga markwa kəɗih ya, ka varata kuni nda rina fisik. Ka vara a kuni wu, dzata ghuni nda dza ka ɓlanaftá ŋurzluŋ. Inda zumali ka zgun mataba zwana ghuni ya ná, ka varata kuni. 14 Ka ɗawaghuna ɗawa zwana ghuni ta kəma dazlay, kabgawu ta kəl kuni ka magay na ka həŋ ya, ka kuni dzaʼazlay nda həŋ na: “Nda mbrakwa dzva ni hlagamapta Yawe ma ga vuʼa ma Masar. 15 Manda təŋanafta Firʼawna ta ghəŋa ni, ka kwalaghutá zlimista, ka pslatá Yawe ta inda zumali ta haɗika Masar. Zlrafta ni ta ŋa mndu, nda ŋa rini tani. Tsaya ta kəl mu ka pla ghəŋ ŋa Yawe nda zumali ka zgun, ama ta vara vara mu ta zumaliha mu ka zgun mataba zwana mu.” 16 Dzaʼa nzakway ka ŋizla ta dzva ghuni, ka skwa havu ta bizlbizla kuma ghuni, ŋa havamakta kazlay na Yawe ta hlagamapta nda mbrakwa dzva ni ma Masar, » kaʼa.
Hlay Lazglafta ta mnduha ni ta tvi
17 Manda zliŋta Firʼawna ta la Israʼila ŋa sliʼi, kladap a Lazglafta ta həŋ nda ta tvi ta haɗika la Filisti, dər má ndusa tvi nda ta tsa wa. Ka Lazglafta na: « Yaha mnduha ɗa da haga madər ka vraghuta taŋ da Masar, nghaŋər həŋ ta vulu, » kaʼa. 18 Tsaya kəl tsi ka duwiɗaghatá həŋ ta tvi ma mtak təv drəfa Zaŋwafiha. Ka sliʼagaptá la Israʼila ma haɗika Masar nda hbatá vgha ŋa vulu. 19 Ka hlíŋtá Musa ta ghudzifa Yusufu, kabga ka Yusufu nda la Israʼila na: « Dzaʼa nghap ngha Lazglafta kahwathwata ka kaghuni, waɗihawa waɗa ta hlíŋta ghuni ta ghudzifa ɗa, » kaʼa. 20 Ka sliʼaftá la Israʼila ma Sukkut, ka lagha həŋ fata ghuɓa taŋ ma Itam ta wa mtak. 21 Yawe ta klanatá kəma ta həŋ. Gifitik ya, ma kusay sundul nzakwa ni ŋa kla həŋ ta tvi. Girviɗik ya guli, ka vu sundul nzakwa ni ŋa tsuwaɗakanatá vli ta həŋ ŋa laviŋta ta mbaɗa gifitik nda rviɗik tani. 22 Gifitik ya, haɗ tsa kusay sundul ya ta lavaghwi ta kəma mnduha wa. Girviɗik ya guli, haɗ tsa vu sundul ya ta lavaghwi ta kəma taŋ guli wa.