6
1 Ka Yawe nda Musa mantsa: « Dzaʼa nda ngha ka ta skwi dzaʼa maganata yu ta Firʼawna ndana tama. Nda mbrakwa dzva ɗa dzaʼa mblafta yu ŋa zliŋta ni ta la Israʼila, ŋa ghəzliŋta ni ta həŋ ta haɗika ni, » kaʼa.Dzaʼa mbanaf mba Yawe ta la Israʼila
2 Ka Lazglafta nda Musa guli mantsa: « Iʼi ná, Yawe yu. 3 Marava mara yu da i Abraham, nda Izak, nda Yakubu ka “Lazglafta ta Mbruta,” ama snanam a yu ta həŋ kazlay Yawe hga ɗa kəʼa wa. 4 Dzraf dzra yu ta wi nda həŋ guli ŋa vlaŋtá ɗa ta həŋ ta haɗika Kanʼana, si nza həŋ ka mayəm mida ya. 5 Ka snaŋtá guli ta waha la Israʼila dabga ga vuʼa ta gə la Masar ŋa taŋ, ka havaktá yu ta dzratá wa ɗa nda həŋ. 6 Tsaya tama ná, kla ta lwa ɗa ŋa la Israʼila kazlay na, “Iʼi ná, Yawe yu. Dzaʼa hlagaghunap hla yu ma slna mbraku ma Masar. Dzaʼa zluʼagaghunap zluʼa yu ma ga vuʼa ta gə həŋ ŋa ghuni. Nda tɗatá dzva ɗa ta mbruta, nda ya nda glakwa slna guma ɗa dzaʼa varagaghunapta yu. 7 Dzaʼa hlaf hla yu ta kaghuni ŋa nzakwa ghuni ka mnduha ɗa, ŋa nzakwa ɗa ka Lazglafta ghuni. Mantsa tama, dzaʼa snaŋ sna kuni kazlay Iʼi Yawe, Lazglafta ghuni, ta hlagaghunapta ma slna mbraku ma Masar. 8 Tahula tsa, ŋa hladaghunamta ɗa da haɗik ya waɗata ŋa vlaŋtá Abraham, nda Izak, nda Yakubu. Dzaʼa vlaghuna vla yu ŋa ghuni. Iʼi ná, Yawe yu,” » kaʼa. 9 Ka rusanaftá Musa manda va tsaya ta la Israʼila, ama ka kwalaghutá həŋ ta snay, kabga nda hwaɗa ghəŋa taŋ da tsa ndəgakwa slna ta mag həŋ ya.
10 Ka gwaɗgəlganatá Yawe ta Musa, kaʼa mantsa: 11 « La! ka mnanata ka ta Firʼawna mghama Masar. Ka zliŋ zla tsi ta la Israʼila ta haɗika ni ka ka nda tsi, » kaʼa. 12 Ka Musa nda Yawe mantsa: « La Israʼila sna a həŋ ta gwaɗa ɗa wu ná, Firʼawna yeya dzaʼa snihata rki, ta iʼi kul laviŋtá gwaɗa? » kaʼa. 13 Ka Yawe nda i Musa nda Haruna mantsa: « Lawa kawadaga da slanaghatá la Israʼila, nda Firʼawna mghama Masar, ŋa hligiŋtá la Israʼila ma haɗika Masar, » kaʼa.
Dzidzíha i Musa nda Haruna
14 Wya hga maliha ma mndəra la Israʼila. Wya zwana Rubeŋ zumala Israʼila: I Hanuk, nda Palu, nda Hetsruŋ, nda Karmi. Hahəŋ mndəra la Rubeŋ. 15 Zwana Simghuŋ na: I Yemuwel, nda Yamiŋ, nda Uhat, nda Yakiŋ, nda Tsuhar, nda Saʼul zwaŋa makwa la Kanʼana. Hahəŋ mndəra la Simghuŋ. 16 Wya hga zwana Levi nda zivirha taŋ tani: I Gersuŋ, nda Kehat, nda Mərari. Gwagwatá ima Levi nda hafu ná, dərmək nda hkən mbsak ndəfáŋ mida həŋ. 17 Zwana Gersuŋ na: I Libni, nda Simghi, nda mndəra taŋ nda mndəra taŋ. 18 Zwana Kehat na: I Amram, nda Yitshar, nda Hevruŋ, nda Ghuziʼel. Gwagwata ima Kehat nda hafu ná, dərmək nda hkən mbsak hkən mida həŋ. 19 Zwana Mərari na: I Mahli nda Musi. Hahəŋ mndəra la Levi nda zivirha taŋ tani.
20 Ka klaftá Amram ta makuma ni ma da ni, Yukebed hga ni, ka yayanatá tsi ta i Haruna nda Musa. Gwagwata ima Amram ná, dərmək nda hkən mbsak ndəfáŋ mida həŋ. 21 Zwana Yitshar na: I Kurah, nda Nefeg, nda Zikri. 22 Zwana Ghuziʼel na: I Misaʼel, nda Iltsafaŋ, nda Sitri. 23 Ka klaftá Haruna Iliseba, makwa Ghaminadav, makuma ni ma Nahsuŋ. Ka yayanatá tsi ta i Nadav, nda Avihuʼ, nda Ilghazar, nda Itamar. 24 Zwana Kurah na: I Assir, nda Ilkana, nda Abiyasaf. Hahəŋ mndəra la Kurah. 25 Ka klaftá Ilghazar zwaŋa Haruna ta marakw, sani ma kwagha Putiyel, ka yanatá tsi ta Pinhas. Hahəŋ zəʼala həgaha ma la Levi, nda mndəra taŋ nda mndəra taŋ. 26 Ŋa va tsa i Haruna nda Musa ya mnanata Yawe ta həŋ kazlay na, « Hlagapwa hla ta la Israʼila ma haɗika Masar, ka ghuɓa gwal vulu, ka ghuɓa gwal vulu kəʼa. » 27 Hahəŋ gwal ta gwaɗganatá Firʼawna, mghama Masar, ŋa hligiŋtá la Israʼila ma haɗika Masar. Va tsa i Musa nda Haruna yeya.
Təglanafta Yawe ta imi ta sləməŋ ta i Musa nda Haruna