I Musa nda Haruna ta kəma Firʼawna
5
1 Tahula tsa, ka lagha i Musa nda Haruna da Firʼawna, ka həŋ mantsa: « Ka Yawe, Lazglafta la Israʼila na: “Zliŋ zla ta mnduha ɗa ka dzaʼa həŋ skalihatá skalu ma mtak,” » kaʼa. 2 Ka Firʼawna mantsa: « Wa Yawe ŋa snay ɗa ta gwaɗa ni, ŋa zliŋta ɗa ta la Israʼila na? Sna a yu ta Yawe wa, haɗ yu ta zliŋtá la Israʼila guli wu, » kaʼa. 3 Ka i Musa nda Haruna mantsa: « Marava mara Lazglafta la Hebru da aŋni. Kdəkkdək, zliŋnis zla ka dzaʼa ŋni da mbaɗa ka fitik hkən ma mtak, ka planata ŋni ta ghəŋ ta Yawe, Lazglafta ŋni, kada kwala tsi ta vzaŋnaghatá zləmnda, ka kafay a tsi, » ka həŋ. 4 Ka mghama la Masar nda həŋ mantsa: « Ariwa i Musa nda Haruna, nu ta kəl kuni ka ga yaɗi ŋa la Israʼila ta maga slna na? Vrawa da vla maga slna ghuni. 5 Nghawa ɓa ta ndəgha mnduha ma na haɗik na. Ta kumay kaghuni ta pyaftá həŋ ka maga slna ra? » kaʼa.Sganaghata Firʼawna ta slna ta la Israʼila
6 Baɗ va tsa fitik ya, ka vlaŋtá Firʼawna ta zlahu ta maliha mataba la Masar ta nzanaghatá la Israʼila ya, nda la Israʼila ta nghapta ka zwana ma taŋ, kaʼa nda həŋ mantsa: 7 « Tazlay ná, kaghuni ta hlanaktá husu ta la Israʼila ŋa tsa brik. Ndana tama, ma hləglanak kuni ta həŋ, ka la hahəŋ ka ghəŋa taŋ da hlay. 8 Nduk nda tsa, va tsa mbsaka brik ta tsafta həŋ ya dzaʼa mblafta kuni ta həŋ ŋa tsafta taŋ guli. Haɗ brik dər turtuk dzaʼa sab mida wa. La yaɗi həŋ. Tsaya kəl həŋ wahu kazlay: “Mbaɗma da pla ghəŋ ŋa Lazglafta mu kəʼa.” 9 Vlaŋwa vla ta slna mbraku ta həŋ, ta kumay yu ta mbranaghata ni ta həŋ, ŋa zanapta taŋ ta tsa tsakalawa taŋ ya, » kaʼa.
10 Ka sliʼaftá tsa maliha ta nzanaghatá la Israʼila ya, nda tsa gwal ta nghapta ka zwana ma taŋ ya, da mnanatá la Israʼila. Ka həŋ mantsa: « Wya ka Firʼawna nda kaghuni: “Vləglaghunata a yu ta husu wa. 11 Lawa kaghuni ka ghəŋa ghuni da zbay ma vli dzaʼa slanaghata kuni. Haɗ skwi dzaʼa htanaghuta lu ɗekɗek ma slna ghuni guli wu,” » ka həŋ. 12 Mantsa tama, ka tatá la Israʼila ta vgha ta inda haɗika Masar ka zba kuzuŋ ŋa tsa brik. 13 Mbaɗa tsa maliha ta nzanaghatá həŋ ya ka fa mbraku ta ghəŋa taŋ, ka həŋ mantsa: « Kɗiŋwa kɗa ta slna ghuni! Tsaf kuni ta mbsaka brik manda va ya ta tsafta kuni ma fitik si ta hlaghunakta aŋni ta husu guli, » ka həŋ. 14 Kuraʼata ghəŋa taŋ, dzay maliha mataba la Masar ta tsa gwal zabap həŋ mataba la Israʼila ŋa nghamta ka zwana ma taŋ ya. Ka həŋ nda həŋ mantsa: « Kabgawu kwal kuni hɗamtá mbsaka brik ma na fitikha na, manda ya ta tsafta kuni tazlay na? » ka həŋ.
15 Ka sliʼaftá tsa la Israʼila ta nghapta ka zwana ma taŋ ya da taw da Firʼawna, ka həŋ mantsa: « Kabgawu ta kəl ka ka sa duni ŋa ŋni manda na na? 16 Haɗ husu ta hləglaŋnakta lu wu, ama tsawa tsa ta brik, ka lu nda aŋni. Ta dza aŋni guli mataba tsa. Mnduha gha ta gatá dmaku, » ka həŋ. 17 Kaʼa nda həŋ mantsa: « La yaɗi kuni! Manda va tsaya nzakwa ni, la yaɗi kuni! Tsaya kəl kuni ka mnay kazlay: “Mbaɗma da planatá ghəŋ ta Yawe kəʼa ya.” 18 Ndanana, lawa da maga slna, haɗ lu dzaʼa hləglaghunaktá husu wu, haɗ brik dər turtuk dzaʼa sab ma tsa mbsak ta tsafta kuni tazlay ya guli wu, » kaʼa. 19 Ka nghadaptá tsa la Israʼila ta nghapta ka zwana ma taŋ ya ná, ma ghuya ɗaŋwa həŋ katakata, kabga ka lu nda həŋ na: « Haɗ mbsaka brik dzaʼa kuni htanaghuta inda fitik guli wu, » ka lu nda həŋ. 20 Ka sab həŋ ma həga ga Firʼawna slanaghatá i Musa nda Haruna ta sladu hada ta kzla həŋ. 21 Ka həŋ nda həŋ mantsa: « Ka ngha Yawe ta skwi maga kuni, ka tsaghunagha tsatsi ta guma. Ziʼiŋnis ziʼa kuni ta wa ira Firʼawna, nda ya ta wa ira gwal ta ksanatá slna. Pghanam pgha kuni ma dzvu ta kafay ta həŋ ŋa pslatá aŋni, » ka həŋ.
Tawa Musa
22 Ka mbəɗəglavatá Musa təv Yawe, kaʼa nda tsi mantsa: « Rvera ɗa, nya kəl ka ka maganatá ghwaɗaka skwi ta na mnduha na? Nya kəl ka ka ghunɗikta da hadna na? 23 Ka yawu lama ɗa da gwaɗganatá Firʼawna manda ya mniha ka ná, ka mbəɗavatá tsi da ghuya ɗaŋwa ŋa la Israʼila. Kataŋ a ka ɗekɗek ta mnduha gha ŋa zluʼaptá həŋ wu, » kaʼa.