Zlrafta 48

Tfanaghata Yakubu ta wi ta zwana Yusufu

1 Tahula luta tsa skwiha ya, ka mnanatá lu ta Yusufu kazlay: « Ɗughwana a da gha wu, » kəʼa. Ka sliʼaftá tsi nda zwana ni his, i Mənase nda Ifrayim. 2 Ka lu nda Yakubu mantsa: « Wana sagha zwaŋa gha Yusufu da nghaghata, » ka lu. Ka dihavatá Israʼila nda inda mbrakwa ni ka sliʼafta, ka nzata ta ghəzləŋ. 3 Ka Yakubu nda Yusufu mantsa: « Zlagap zlaga Lazglafta ta Mbruta ta wa ira ɗa ma Luz ta haɗika Kanʼana, ka tfaɗighatá tsi ta wi. 4 Kaʼa nda iʼi mantsa: “Dzaʼa naghaf na yu ka mndu ta ga mndu, dzaʼa yaghaf ya yu tusak, dzaʼa naghaf na yu ka dzidza ndəghatá mndəra mnduha, dzaʼa vlaŋ vla yu ta na haɗika na ta zivira gha ŋa taŋ ŋa kɗekedzeŋ,” kaʼa. 5 Ndanana, nana zwana gha his yaya ka ta haɗika Masar, ma kɗaku yu ka lab slaghaghata ya, ŋa ɗa həŋ. I Ifrayim nda Mənase ná, ŋa ɗa həŋ manda i Rubeŋ nda Simghuŋ ya. 6 Ama zwani ya yaya ka tahula taŋ ya, ŋa gha tsaha ya. Ta haɗika mala taŋ dzaʼa mutsa hahəŋ ta skwa za həga taŋ. 7 Iʼi, ta sab yu ta haɗika Padaŋ ndusa yu ka ɓhadaghata nda Ifrata ta haɗika Kanʼana, ka mtuguduɗtá ma gha Rasel ta tvi. Ka lamtá yu ta wa tvi hada, » kaʼa. Tsa Ifrata ya ná, Betlehem ta hga lu gitana.

8 Ka nghə Israʼila ta zwana Yusufu, kaʼa mantsa: « I wa nahana na? » kaʼa. 9 Ka Yusufu nda da ni mantsa: « Zwana ɗa vliha Lazglafta hadna ya, » kaʼa. Kaʼa mantsa: « Hlaɗik həŋ, wya dzvu, ka tfanaghata yu ta wi ta həŋ, » kaʼa. 10 Tsaw nda razla ira Israʼila da halaku, nghəgla a ta vli wa. Ka gavadanaghatá Yusufu ta tsa zwani ya ta vata Israʼila, ka ŋanatá tsi ta həŋ ka brusa həŋ. 11 Ka Israʼila nda Yusufu mantsa: « Si haɗ ndana nghəglaŋtá kagha da iʼi wu, ngha, Lazglafta ta magafta kəl yu ka nghaŋtá dər zwana gha tani, » kaʼa. 12 Lagha Yusufu ka hlaghutá zwana ni ta karama da ni, ka tsəlɓata zlumbruh ta haɗik.

13 Tahula tsa, ka hlaftá tsi ta həŋ his his ta dzvu. Ifrayim si ŋana tsi nda dzva zeghwi ya, ka nzaku tsi nda ga zlaɓa Israʼila. Mənase si ŋana tsi nda dzva zlaɓa ya guli, ka nzaku tsi nda ga zeghwa Israʼila guli. Ka gavadanaghatá tsi ta həŋ ta kəma ni. 14 Ka pghadaptá Israʼila ta dzvuha ni. Ka faftá tsi ta dzva zeghwa ni ta ghəŋa Ifrayim ka sagəŋ, zləŋadaptá tsi ta dzva zlaɓa ni ta ghəŋa Mənase ka zumali ya. 15 Wya kəʼa tfanaghatá wi ta Yusufu:

« Lazglafta ya mbaɗ dzidzíha ɗa i Abraham nda Izak, ta mbaɗa ta kəma ni,

tsa Lazglafta ta ngha iʼi manda mnda ngha rini ya, ta nghagaptá iʼi ka yawu nzakwa ɗa ha ka sab ta gita.

16 Tsatsi ta klaptá iʼi ma ghwaɗaka skwi,

ka tfanagha tfa tsi ta wi ta na zwani na,

əŋkaʼa ka hahəŋ dzaʼa kəl mnduha ka gɗata ta hga hga ɗa, nda ya,

nda hga dzidzíha ɗa, i Abraham nda Izak,

ka yafta həŋ ŋa nzakwa taŋ tusak ta ghəŋa haɗik, » kaʼa.

17 Nghay Yusufu ta fafta da ni ta dzva zeghwa ni ta ghəŋa Ifrayim, zɗəgana a wa. Ka ŋanatá tsi ta dzva da ni, ŋa klaghuta ta ghəŋa Ifrayim, ka fafta ta ghəŋa Mənase. 18 Ka Yusufu nda da ni mantsa: « Mantsa a da da ɗa wu, nana na ta nzakway ka zumali, faf fa ta dzva zeghwa gha ta ghəŋa ni, » kaʼa. 19 Ka kwalaghutá da ni, kaʼa nda tsi mantsa: « Nda sna yu, zwaŋa ɗa, nda sna yu. Dzaʼa nzakway zivira Mənase guli ka ndəghata mndəra mnduha dzaʼa ndəghuta. Nziya nza tsi tama ná, dzaʼa malaghu mala yatá zivira na sagəŋ na ka ŋa ni, ŋa yutá zivira ni ka mndəra mnduha ta tskuta katakata, » kaʼa.

20 Baɗ tsa fitik ya, ka tfanaghatá tsi ta wi ta həŋ, kaʼa mantsa:

« Nda ma kaghuni dzaʼa mnigiŋta la Israʼila ta na tfa wi na.

Ka həŋ dzaʼazlay na: “Ka vlagha vla Lazglafta ta zɗaku manda ya maranaŋ tsi ta i Ifrayim nda Mənase ya!”

ka həŋ dzaʼazlay, » kaʼa.

Mantsa ya, ka tiŋlaghutá tsi ta fatá Ifrayim ka Mənase.

21 Ka Israʼila nda Yusufu mantsa: « Taghwa a yu ka mtuta wa. Ama dzaʼa nza nza Lazglafta kawadaga nda kaghuni, ŋa vradaghunapta ni ta haɗika dzidza ghuni. 22 Iʼi, ta vlagha vla yu ka malaghutá ŋa i zwana ma gha ta haɗika Sekem ya zluʼa yu nda dzva ɗa da la Amuru nda kafaya ɗa nda ya nda lgheɗa ɗa, » kaʼa.