Ɓhadaghata Yakubu da haɗika Masar
46
1 Ka laghu na Israʼila nda inda skwa ni tani. Ka ɓhadaghatá tsi da luwa Bəʼerseva. Ka planatá tsi ta ghəŋ ta Lazglafta da ni Izak hada. 2 Ka gwaɗganatá Lazglafta ta Israʼila manda skwi ma suni girviɗik. Kaʼa mantsa: « Yakubu! Yakubu! » kaʼa. « Wana yu, » kaʼa. 3 « Iʼi ná, Lazglafta yu, Lazglafta da gha. Ma zləŋ ka ta laha da Masar, kabga hada dzaʼa naghaf na yu ka mndəra mnduha dagala. 4 Dzaʼa la la yu kawadaga nda kagha da Masar, dzaʼa vragaghaf vra yu guli. Yusufu dzaʼa hlaghatá iri, » kaʼa.5 Ka sliʼaftá Yakubu ma Bəʼerseva. Ka kladaftá zwana Israʼila ta da taŋ Yakubu, nda zwana taŋ, nda miʼa taŋ ma mwataha sla ghunaf Firʼawna ŋa dzaʼa da klay ya kay. 6 Ka hlaftá həŋ ta rina taŋ nda huzlaha taŋ ya mutsaf həŋ ta haɗika Kanʼana. Ka laha Yakubu da Masar kawadaga nda inda zivirha ni, 7 ka kliŋtá tsi kawadaga nda tsi da Masar ta zwana zgwana ni, nda zighiha ni ka zgwana, nda kwagha ni, nda zighiha ni ka kuʼaha, nda inda zivira ni.
Lagha Yakubu nda həga ni tani da Masar
8 Wya hga zwana Israʼila ta sliʼadamta da Masar: Yakubu nda zwana ni: Rubeŋ zumala Yakubu. 9 Wya zwana Rubeŋ: Hanuk, nda Palu, nda Hetsruŋ, nda Karmi. 10 Wya zwana Simghuŋ: Yemuwel, nda Yamiŋ, nda Uhat, nda Yakiŋ, nda Tsuhar, nda Saʼul, zwaŋa makwa la Kanʼana. 11 Wya zwana Levi: Gersuŋ, nda Kehat, nda Mərari. 12 Wya zwana Yahuda: Gher, nda Unaŋ, nda Sela, nda Perets, nda Zerah. Ka rwutá i Gher nda Unaŋ ta haɗika Kanʼana. Wya zwana Perets: Hetsruŋ, nda Hamul. 13 Wya zwana Yisakar: Tulagh, nda Puva, nda Yuv, nda Simruŋ. 14 Wya zwana Zəvuluŋ: Seret, nda Iluŋ, nda Yahləʼel. 15 Tsaha ya zwana Leʼa ta yayatá nda Yakubu ma Padaŋ Aram, nda makwa ni Dina. Hkən mbsak hkən mida gwagwatá zwana zgwana ni nda kwagha ni.
16 Wya zwana Gat: Tsifiyuŋ, nda Hagi, nda Suni, nda Itsbuŋ, nda Gheri, nda Arudi, nda Areli. 17 Wya zwana Aser: Yimnah, nda Yiswah, nda Yisvi, nda Bərigha, nda Serah, makuma taŋ. Wya zwana Bərigha: Hever, nda Malkiyel. 18 Tsaha ya zwani nda zighiha Zilpa, makwa ya si vlaŋ Lavaŋ ta makwa ni Leʼa. Ka yayanatá tsi ta zwani ta Yakubu: Gwagwata ni mnduha ghwaŋpəɗ mkuʼ.
19 Wya zwana Rasel markwa Yakubu: Yusufu, nda Biŋyamiŋ. 20 Ka mutsaftá Yusufu ta zwani his i Mənase nda Ifrayim, ta haɗika Masar, yayana markwa taŋ Asnat makwa Pwatifera mnda dra skwi ŋa lazglaftaha ma luwa Una. 21 Wya zwana Biŋyamiŋ: Bela, nda Beker, nda Asbel, nda Gera, nda Naghamaŋ, nda Ihi, nda Rus, nda Mupim, nda Hupim, nda Arət. 22 Tsaha ya zwani, nda zighiha ghwaŋpəɗ fwaɗ yayana Rasel ta Yakubu.
23 Wya zwaŋa Daŋ: Husim. 24 Wya zwana Naftali: Yahtsəʼel, nda Guni, nda Yetser, nda Silem. 25 Tsaha ya zwani nda zighiha Bilha ya vlaŋ Lavaŋ ta Rasel makwa ni. Ka yayanatá tsi ta tsa zwani ya ta Yakubu. Gwagwata ni mnduha ndəfáŋ.
26 Inda gwagwata ta zivira Yakubu ta sabi ma tsatsi, ka laha da Masar ná, mkuʼ mbsak mkuʼ mida həŋ. Mamu miʼa zwana ni guli. 27 Zwana Yusufu ta yayatá ma Masar guli, his həŋ. Inda gwagwata gwal ma həga ga Yakubu ta laha da Masar ná, ndəfáŋ mbsak həŋ.
Nzata Yakubu nda həga ma Guseŋ
28 Ka ghunaftá Yakubu ta Yahuda ta kəma ta kəma da slanaghatá Yusufu ŋa maranata ni ta tva dzaʼa da Guseŋ. Ka ɓhadaghatá həŋ ta haɗika Guseŋ, 29 ka payaftá Yusufu ta mwata plisa ni ka laf tsi da Guseŋ da guyaku nda da ni Israʼila. Na gi nghay ni, ka lagha Yusufu habuwaʼ ta ŋurzluŋa ni. Ta ŋurzluŋa ni ka nzəɗavata tsi ta taw. 30 Ka Israʼila nda Yusufu mantsa: « Tahula na nghaŋta ɗa ta kuma gha ná, nda ngha yu ta kagha ta nda hafu ka ná, dər mtu mta yu ndana nda za ŋa ɗa, » kaʼa.
31 Ka Yusufu nda zwana ma ni nda ya nda gwal ma həga ga da ni mantsa: « Nda sliʼa yu da mnanatá Firʼawna, ka yu dzaʼazlay nda tsi na: “Sagha sa zwana ma ɗa nda inda gwal ma həga ga da ɗa, si ta haɗika Kanʼana da sliɗaghata. 32 Gwal ngha rina fisik, nda bra rini həŋ, hlak hla həŋ ta rina fisika taŋ, nda slaha taŋ, nda inda skwiha taŋ.” 33 Ka hgaghuna hga Firʼawna ka ɗawaŋta: “Nahgani slna ghuni na?” kaʼa ya, 34 ka kuni dzaʼazlay nda tsi na: “Kwalvaha gha ná, gwal ngha rini həŋ daga ma ga zwaŋa taŋ ha ka sagha ta gita. Mantsa ya nzakwa ni guli daga ta dzidza ŋni nda aŋni tani,” ka kuni dzaʼazlay, kada nzata kuni ta haɗika Guseŋ, kabga inda gwal ngha rini ná, ka skwa manzakɗaway həŋ ta wa ira la Masar, » kaʼa.