Sliʼa Biŋyamiŋ kawadaga nda zwana ma ni da Masar
43
1 Ka va kəbaku maya ka rwa mndu ta haɗika Kanʼana. 2 Manda kɗiŋta la ga Yakubu ta zutá tsa alkama kladap həŋ ma Masar ya, ka da taŋ nda həŋ mantsa: « Vrawa vra da skwagista kiʼa, ta skwi ŋa zay, » kaʼa. 3 Ka Yahuda nda tsi mantsa: « Ka tsa mnda ya mnaŋnata kahwathwata na: “Haɗ kuni dzaʼa sagha ta kəma, ka sagha a kuni nda tsa zwaŋama ghuni ya wu,” kaʼa. 4 Ka ghunaf ghuna ka ta zwaŋama ŋni ka dzaʼa ni mista ŋni, ta dzaʼa ŋni skwagaghatá zimi ŋa zay. 5 Ama ka ghunaf a ka wu, haɗ aŋni ta dzaʼa wu, kabga ka tsa mndu ya nda aŋni na: “Ka sagha a kuni nda tsa zwaŋama ghuni ya wu ná, haɗ yu ta tsuʼaftá kaghuni wu!” » kaʼa. 6 Ka Israʼila mantsa: « Nya kəl kuni ka mnanaŋtá tsa mndu ya kazlay mamu sana zwaŋama ŋni kəʼa na? Magiha maga kuni ta skwi kul ɗinaku, » kaʼa. 7 Ka həŋ mantsa: « Tsa mndu ya ta va ɗawtá vli ta ghəŋa aŋni nda la ga mu. “Ta ndiri da ghuni ra? Mamu sana zwaŋama ghuni ra?” ka a nda aŋni. Zlgha wa ɗaway ni ŋa aŋni ta zlghanaftá kweŋkweŋ. Si nda sna a aŋni kazlay dzaʼa ɗaway ta klədanapta ŋni ta zwaŋama ŋni kəʼa ra, » ka həŋ.8 Ka Yahuda nda Israʼila ta nzakway ka da ni mantsa: « Zlaŋ zla ta zwaŋa zgun na ka dzaʼa tsi mista ɗa, ka dzaʼa ŋni ka ta kumay mu ta kwala mu ka rwuta ŋa nzakwa mu nda hafu, kagha, nda aŋni, nda zwana mu tani. 9 Klaf kla yu ta ghəŋa ɗa ka ŋa ni, da iʼi dzaʼa ɗawa ka, ka vraghak a yu. Ka fagha a yu ta kəma gha, ka mndu ta gaghatá dmaku dzaʼa ngha ka ta iʼi ha ŋa kɗekedzeŋ. 10 Ka má gərɗa a ŋni nda yaya wu ná, má vradap vra ŋni ka səla his, » kaʼa. 11 Ka da taŋ Israʼila nda həŋ mantsa: « Ka si mantsa tsi, wya skwi ŋa magay ghuni: Hla a wa hla ma zliba ghuni ta skwiha ta na haɗik na, ya ɗina ɗina, ka dzaʼa kuni mbəhatá tsa mnda ya. Kla a kuni ta skwiha ya ta haɗika mu, nda zuɗum, nda urdi, nda mandaɓay urdi, nda ɓurtsum, nda amandaª. 12 Klafwa kla ta tsa tsedi slaslanagha kuni ta wa buhwa ghuni ya, kawayaka skwi zlaɓiŋ nda zlaɓa həŋ, klaf kuni ta sana tsedi. 13 Lawa la, ka kliŋta kuni nda zwaŋama ghuni, ka dzaʼa kuni slanaghatá tsa mndu ya. 14 Má ka zɗaghunaŋ zɗa Lazglafta ta Mbruta ta huɗi, ka tawata tsa mndu ya ta hiɗahiɗa ta kaghuni, Ka zlighunista tsi ta i Biŋyamiŋ, nda Simghuŋ mista ghuni. Iʼi taɗa, nda dga vgha ɗa nda zwani, manda skwi kul yatá yu ta zwaŋ, » kaʼa.
Gumglafta zwana ma ni ta vgha nda Yusufu
15 Ka tsəkaftá tsa mnduha ya ta skwiha ŋa mbəha tsa mndu ya, hlafha həŋ ta vgha taŋ, ta tsa tsediha ya his his, nda Biŋyamiŋ. Ka sliʼaftá həŋ ka laghu da Masar. Ka lagha həŋ maraŋtá ghəŋa taŋ ta kəma Yusufu. 16 Kəʼa ka Yusufu ná, kawadaga Biŋyamiŋ nda həŋ, kaʼa nda tsa mndu ta nghapta ka həga ni ya mantsa: « Hla ta na mnduha na da ini, ka hnata ka ta skwi nda səla, ka data ka ta skwa zay, ŋa zay taŋ kawadaga nda iʼi gifitik, » kaʼa. 17 Ka magatá tsa mndu ya ta skwi mnanaf Yusufu, ka hlaghatá tsi ta tsa mnduha ya da həga ga Yusufu. 18 Ka ksaftá zləŋ ta tsa mnduha ya, na tsa kla həŋ da həga ga Yusufu ya. Ka həŋ mantsa: « Ta ghəŋa tsa tsedi slanagha mu ma buhwa mu taŋtaŋ ya kay ta hla lu ta amu. Hlagam hla lu ta amu da hadna ŋa valafta ta amu, ka ghuya ɗaŋwa ŋa mu, dzaʼa hlaghu hla lu ta kəɗihha mu, ka nimista ka vuʼa, » ka həŋ. 19 Ka gavanavatá həŋ ta tsa mndu ta nghapta ka həga Yusufu ya, ka gwaɗganata ta dzaʼa həŋ lam da həga. 20 Ka həŋ nda tsi mantsa: « Ari mghama ɗa, kdəkkdək, sliʼaf sliʼa ŋni taŋtaŋ ta haɗika ŋni da skwa skwa zay. 21 Ta vru ŋni dzagha ka sladavata ŋni ma vli dzaʼa ŋni hanay girviɗik, ka gwananaftá ŋni ta buhwa ŋni ka slanaghatá ŋni ta tsedi ta wa buhwa inda aŋni, ka gragra manda va tsa tseda ŋni vla ŋni ya. Wana varanakta ŋni. 22 Hlaf hla ŋni guli ta sana tsedi ta vgha ŋni ŋa skwa skwa zay. Sna a aŋni ka wa ta vraŋnavatá tsa tseda ŋni ya ma buhwa ŋni wa, » ka həŋ.
23 Ka tsa mndu ya mantsa: « Ka nza zɗaku kawadaga nda kaghuni, ma zləŋ kuni, Lazglafta ghuni ta nzakway ka Lazglafta da ghuni ta faghunamtá ghazlu ma buhwa ghuni. Zlghaf zlgha yu ta tseda ghuni, » kaʼa. Ka zliniŋtá tsi ta həŋ ta Simghuŋ. 24 Ka hladamtá tsa mndu ya ta həŋ da həga ga Yusufu, ka vlaŋtá tsi ta imi ta həŋ ŋa mbaza səla taŋ, vlaŋha ta mbamba ta kəɗihha taŋ. 25 Ka payaftá həŋ ta tsa mbəhu ya kay ta sagha Yusufu gifitik, kabga nda sna həŋ kazlay dzaʼa zə hada həŋ ta skwa zay kawadaga nda tsi kəʼa. 26 Lagha Yusufu dzagha, ka hlaftá həŋ ta tsa skwa mbəha taŋ ya, ka vlaŋta, ka zlambata həŋ zluzlumbruha ta kəma ni. 27 « Ta mantsa kuni ra? » kaʼa nda həŋ. Kaʼa guli mantsa: « Ta mantsa tsa halata mndu, da ghuni si ta mnə kuni ŋa ɗa ya kay ra? Ta ndiri ra? » kaʼa nda həŋ. 28 « Ta mantsa kwalva gha da ŋni, ta nda hafu gitana, » ka həŋ. Ka zlambata həŋ guli, zluzlumbruh ta kəma ni.
29 Kəʼa ka Yusufu na, hada Biŋyamiŋ vərɗa zwaŋama ni ma huɗa turtuk həŋ, kaʼa mantsa: « Nana na sagəŋa ghuni mnə kuni ŋa ɗa ya kay ra? » kaʼa. Kaʼa nda tsi mantsa: « Ka tfaghagha tfa tfa Lazglafta ta wi sagəŋ, » kaʼa. 30 Na nghay Yusufu ta zwaŋama ni, ka ksutá mamaya ni, laŋlaŋlaŋ ima tawa ni, gi ka laghu tsi da hərɓa taw ma dzuguva ni. 31 Tahula mbaziŋta ni ta kuma ni, ka sab tsi. Ka ksanatá tsi ta ŋuɗuf. « Dgawa skwa zay, » kaʼa 32 Ka tsanaftá lu ta skwa zay ta Yusufu nda ghəŋa ni ta vla za skwa ni, ta ŋa taŋ vli nda ghəŋa taŋ zwana ma ni. Mamu la Masar hagadagha lu ya guli, ta za ŋa hahəŋ kawadaga nda tsi nda ghəŋa taŋ, kabga dzahay zay taŋ ta skwa zay kawadaga nda la Hebru. Manzakɗaway tsaya da həŋ. 33 Ka nza nzanatá lu ta kəma Yusufu ta zwana ma ni, zlrafta ta mali ha ta sagəŋ ka həŋ nza nzata. Ka nagh həŋ ta vgha ta iri ta iri, ka ndərmim həŋ ta ndərmimaku. 34 Ka tsaʼatá Yusufu ta skwa zay ta kəma ni, ka vlaŋtá lu həŋ. Ka tsanaftá tsi ta ŋa Biŋyamiŋ hutaf səla ka malaghutá ŋa sanlaha. Ka sə həŋ ta skwa say, ka ghwayaftá həŋ kawadaga nda tsi.