Zlrafta 35

Nzata Yakubu ma tumpul ma Betel

1 Ka Lazglafta nda Yakubu mantsa: « Sliʼaf sliʼa gha ka ŋla ka da Betel, ka nzata ka hada, ka bafta ka ta gwir ma tsa vli marava yu da kagha ma hwayafta gha da zwaŋama gha Ghesav ya. » 2 Ka Yakubu nda la ga taŋ, nda ya nda inda gwal kawadaga nda tsi mantsa: « Hliŋwa hla ta inda lazglaftaha ka mayəm mataba ghuni. Ka hliŋta kuni ta skwi ta tsaɗ lu ta kaghuni, ka mbəɗapta kuni ta lgutha ghuni, 3 ka sliʼafta mu ka dzaʼa mu da Betel. Hada dzaʼa banafta yu ta gwir ta Lazglafta ya ta katihata ma gruɗta ghuya ɗaŋwa, ka nzata tsi kawadaga nda iʼi ma inda vli ya lab yu ya, » kaʼa. 4 Ka hlanaktá həŋ ta Yakubu ta inda lazglaftaha ka mayəm da həŋ, nda yeriha ma sləməŋa taŋ. Ka lamtá Yakubu mista sana halalaya fu dagala ndusa nda Sekem.

5 Ka sliʼaftá həŋ ka laghu, ka vlaŋtá Lazglafta ta zləŋ ta inda mnduha ma luwaha ta wanaftá həŋ, kəl mnduha kul liŋtá zwana Yakubu. 6 Ka ɓhadaghatá i Yakubu da Luz ta nzakway ka Betel ma haɗika Kanʼana, tsatsi nda inda gwal kawadaga nda tsi tani. 7 Ka baftá tsi ta gwir, ka hgə tsi ta tsa vli ya ka « El Betel^ª, » kabga hada maravata Lazglafta da tsi ma hwayafta ni da zwaŋama ni.

8 Ma tsa vli ya mtuta Debura, mataghəŋa Rebeka. Ka lamtá lu ndusa nda Betel mista sana fu dagala. Diga baɗu tsa, ka hgə lu ta tsa fu ya ka « Halalaya fu ta taw. »

9 Ka marglavatá Lazglafta da Yakubu, manda vragapta ni ma Padaŋ Aram, ka tfanaghatá tsi ta wi. 10 Ka Lazglafta nda tsi mantsa: « Yakubu hga gha, ama haɗ lu dzaʼa hgəgəltá kagha ka Yakubu wa, Israʼila dzaʼa hga lu ta kagha, » kaʼa. Mantsa tama, ka hgə tsi ka Israʼila. 11 Ka Lazglafta nda tsi mantsa: « Iʼi Lazglafta ta Mbruta, ga ta mndu, ka yafta ka tusak. Ma kagha dzaʼa saba ndəghata mndəra mnduha, nda guyatá ghəŋa mndəra mnduha. Ma kagha dzaʼa saba mghamha guli. 12 Tsa haɗik vlaŋ yu ta i Abraham nda Izak ya ná, dzaʼa vlagha vla yu, dzaʼa vlaŋ vla yu ta zivira gha guli, » kaʼa. 13 Ka sliʼaftá Lazglafta ma tsa vli si ta gwaɗ tsi ta gwaɗa nda Yakubu ya, ka laghwi. 14 Ka dzugwatá Yakubu ta pala ma tsa vli gwaɗgana tsi ya, ka slraftá tsi ta ima inabi tida pghafha ta rɗi tida. 15 Ka hgə Yakubu ta tsa vli gwaɗgana Lazglafta ya, ka Betel.

Yatá Biŋyamiŋ, ta mtaghutá ma ni Rasel

16 Ka sliʼaftá həŋ ma Betel. Taghwaŋ a həŋ ka ɓhadaghata da Ifrata wu, ka dgatá Rasel. Zlah zlah kəʼa dgata. 17 Ma tsa fitika dgakwa ni nda ɗaŋwa ya, ka tsa marakw ta ya mndu ya mantsa: « Ma zləŋ ka, zwaŋa zgun ya mutsəglaf ka, » kaʼa. 18 Ta klə tsi ta hafu ma mtakwa ni, ka hgə tsi ka Benʼuni^ª. Ama ka hgə da ni ka Biŋyamiŋ.^ª 19 Ka mtuta Rasel, ka lamtá lu ta wa tva dzaʼa da Ifrata ta hgə lu ndanana ka Betlehem ya. 20 Ka dzugwafta Yakubu ta pala ta tsa kulu ya. Tsaya palaka kula Rasel. Ta tekeʼa ha gitana. 21 Ka sliʼaftá Israʼila ka laghu dzagwatá tumpula ni, ka zluŋtá Migdal Ider. 22 Ma nzakwa Israʼila ma tsa haɗik ya, ka lagha Rubeŋ hanata nda Bilha markwa sanagha ga da ni. Ka snaŋtá Israʼila.

Ghwaŋpəɗ his zwana zgwana Yakubu.

23 Wya zwani yaya lu nda Leʼa: Rubeŋ zumala Yakubu, nda Simghuŋ, nda Levi, nda Yahuda, nda Yisakar, nda Zəvuluŋ.

24 Wya zwani yaya lu nda Rasel: Yusufu nda Biŋyamiŋ.

25 Wya zwani yaya lu nda Bilha ta nzakway ka kurɗa Rasel: Daŋ nda Naftali.

26 Wya zwani yaya lu nda Zilpa ta nzakway ka kurɗa Leʼa: Gat nda Aser.

Tsaha ya zwana Yakubu yayana lu ma Padaŋ Aram.

Mtakwa Izak

27 Ka sliʼaftá Yakubu ka lagha da Izak ta nzakway ka da ni, ma Mamre ndusa da Kiriyatʼarba ta hgə lu gitana ka Hevruŋ. Si nza nza i Abraham nda Izak hada. 28 Dərmək nda tghas mbsak ima Izak. 29 Ka mtutá Izak ma halata ni katakata, ka laghu tsi da la taŋ. Ka paɗamtá zwana ni i Ghesav nda Yakubu.