Zləŋay Yakubu ta guyaftá vgha nda Ghesav
32
1 Ka tsavaftá Lavaŋ wrək sərɗək, ka brusatá tsi ta kwagha ni nda zighiha ni, ka tfanaghatá wi ta həŋ. Ka sliʼaftá Lavaŋ ka laghu, ka vraghuta da vla nzakwa ni. 2 Ka kəɗ Yakubu ta mbaɗa ni, ka guyatá duhwalha Lazglafta nda tsi. 3 Nghaŋta Yakubu ta həŋ, kaʼa mantsa: « Ghuɓa Lazglafta na! » kaʼa. Ka hgə tsi ta tsa vli ya ka Mahanayimª.4 Ka ghunaftá Yakubu ta mnduha ta kəma ta kəma da zwaŋama ni Ghesav ta ma Seghir ta haɗika Idum. 5 Kaʼa mnanaftá həŋ mantsa: « Ka kuni dzaʼazlay nda mghama ɗa Ghesav na: “Wya ka kwalva gha Yakubu: Si nza ga Lavaŋ yu ka nzəɗavata ha ka sab ta gita. 6 Mamu yu nda slaha, nda kəɗihha, nda rina fisik, nda kwalvaha nda kurɗuha. Wya yu ta ghunadaptá mnduha ɗa ŋa snaghamta mghama ɗa, kabga ŋa tsuʼafta gha ta iʼi ɗina,” » kaʼa.
7 Ka vraktá tsa gwal ghunay ya da mnanatá ta Yakubu ka həŋ mantsa: « Lab la ŋni da slanaghatá zwaŋama gha Ghesav kay. Waʼa ta sagha da guya kagha kawadaga nda mnduha fwaɗ dərmək, » ka həŋ. 8 Ka ghudzaftá Yakubu da zləŋ katakata ka tsutá ŋuɗufa ni. Ka dganaptá tsi ka ghuɓu his ta tsa mnduha kawadaga nda tsi ya. Mantsa ya kəʼa daganatá rina fisikha, nda slaha, nda ŋalibwaha. 9 Kaʼa ma ghəŋa ni mantsa: « Ka sagha sa Ghesav ka ndusanavatá sana ghuɓu ka liŋtá həŋ ya ná, dzaʼa hwayap hwaya ya sana ghuɓu ya, » kaʼa.
10 Ka mag Yakubu ta duʼa, kaʼa mantsa: « Lazglafta da ɗa Abraham, Lazglafta da ɗa Izak! Kagha Yawe ta mnihata kazlay: “Vra ta haɗika gha, da taba mndəra ghuni, dzaʼa maga gha maga yu ta zɗaku” kəʼa, 11 slaghu a yu katakata ka ŋa inda na zɗaku na, nda kahwathwata magana ka ta kwalva gha wu. Tsughwaɗagap tsughwaɗa yu ta na zala Yardeŋ na nda dafa ɗa kweŋkweŋ, ndanana wana nuna yu ka ghuɓu his. 12 Kdəkkdək, mbiɗif mba da zwaŋama ɗa Ghesav, kabga ta zləŋay yu ta sagha ni da dzatá iʼi nda ma nda ma tani, nda zwani tani. 13 Ka kagha nda iʼi na: “Dzaʼa maga gha maga yu ta zɗaku, dzaʼa yanaf ya yu ta zivira gha manda wutak ma ghwa kul laviŋta lu ta mbəɗafta da ndəghata ni ka ka ya kay,” » kaʼa.
14 Ka nzatá Yakubu ma tsa vli ya ŋa hanay hada. Ka zabaʼatá tsi mataba skwiha da tsi ŋa mbəhatá zwaŋama ni Ghesav. 15 Ka hlaftá tsi ta guha his dərmək, nda dugzumha hisambsak, nda tuwakha his dərmək, nda maŋazak hisambsak, 16 hkən mbsak mamaha ŋalibwa tata sa uʼa ŋa zwana ni, nda zwana ni tani, fwaɗ mbsak mana slaha, ghwaŋ lghəŋ, hisambsak mana kəɗihha, ghwaŋ zəʼala kəɗihha. 17 Ka daganatá tsi ta tsa braha ya kavghakavgha, ka daganaftá kwalvaha ni. Kaʼa nda həŋ mantsa: « Lawa la ta kəma ta kəma, ka zlaŋta kuni ta mabaŋ mataba sana bra nda sana bra, » kaʼa. 18 Kaʼa nda taŋtaŋa kwalva mantsa: « Ma guyata gha nda zwaŋama ɗa, ka ɗawagha ɗawa tsi kazlay: “Ŋawa ka na? dzaʼa diga ka na? ŋa wa na bra rini ta mbə ka na na?” kəʼa ya, 19 wya ka ka da zlghanaftá: “Ŋa kwalva gha Yakubu ya, mbəhu ya vlagha tsi mghama ɗa Ghesav, wya va tsatsi ta sab nda hul,” ka ka dzaʼazlay, » kaʼa.
20 Manda va tsaya kaʼa mnanaftá mahis, nda mahkən, nda inda tsa gwal ta mba bra rini ya. « Tsaya skwi dzaʼa mnanata kuni ta Ghesav guyar kuni nda tsi. 21 Ka kuni dzaʼazlay guli na: “Wya kwalva gha Yakubu ta sagha nda hula ŋni,” » kaʼa. Ka Yakubu ma ghəŋa ni na: « Ka tiŋlaghu tiŋla yu ta ghunadaptá nisəla ya na, dzaʼa ksana ksa yu ta ŋuɗuf ta Ghesav. Tahula tsaya tama dzaʼa lagha yu ta kəma ni, kawayaka skwi dzaʼa tsuʼaf tsuʼa ta iʼi ɗina, » kaʼa. 22 Ka laghu tsa braha ya ta kəma ta kəma, ta hanaghutá tsatsi ma ghuɓu ta tsa rviɗik ya.
23 Ka sliʼaftá tsi ta va tsa rviɗik ya, ka hlaftá tsi ta tsa miʼa ni his ya, nda tsa kurɗuha his ya, nda tsa zwana ni ghwaŋpəɗ ndeŋ ya, ŋa tsughwaɗanaptá tsi ta sana vli ta tsughwaɗ lu ta ghwa Yabuk.
Wuday Yakubu ta wuda nda Lazglafta
24 Ka hlaftá Yakubu ta həŋ ka tsghwaɗanaptá tsa ghwa ya ta həŋ. Ka hladaptá tsi guli ta inda skwi ya ta nzakway ka ŋa ni. 25 Ka nzaghutá tsatsi turtukwa ni, ka han sana mndu ta wuda nda tsi petsuweɗ vli ha ka safa fitik. 26 Kəʼa ka tsa mndu ta wuda nda tsi ya ná, zatá a ta ghwa ta Yakubu ma tsa wuda ta wud həŋ ya wu, ka dzuŋtá tsi ta kwatafiɗakw, ka kwiɗtá tsi. 27 Ka tsa mndu ya nda Yabubu mantsa: « Zliha zla nda sliʼa yu, nda tsaɗa vli, » kaʼa. Ka Yakubu mantsa: « Haɗ yu ta slighista ŋa laghwa gha wu, tfaɗighata gha ta wi karaku, » kaʼa. 28 « Wa hga gha na? » ka tsa mndu ya ɗawaŋta. « Yakubu, » kaʼa. 29 Ka tsa mndu ya mantsa: « Haɗ lu dzaʼa hgəgəltá kagha ka Yakubu wu, ama Israʼila, kabga wudaf wuda ka ta wuda nda Lazglafta nda ya nda mnduha, ka zatá kagha ta ghwa, » kaʼa. 30 Ka Yakubu mantsa: « Kdəkkdək mniha mna, wa hga gha na? » kaʼa. « Kabgawu ta ɗawa ka ta hga ɗa na? » kaʼa. Ka tfanaghatá tsi ta wi ta Yakubu hada. 31 Ka Yakubu mantsa: « Nda ngha yu ta Lazglafta mbəŋ ya mbəŋ ya, ta wana yu nda hafu, » kaʼa. Tsaya kəl tsi ka tsanaftá hga tsa vli ya ka Pəniʼelª. 32 Manda safa fitik, ka tsughwaɗaptá Yakubu ta ghwa Pənuʼel, ka dzəgiɗ tsi ta dzəgiɗi dabga tsa kwatafiɗakwa ni ya. 33 Tsaya ta kəl zwana la Israʼila kul za mala kwatafiɗakw ha gita, kabga ta tsa mala kwatafiɗakwa ya dzuŋta tsa mndu ya ta Yakubu.