Yakubu ga Lavaŋ
29
1 Ka sliʼaftá Yakubu, ka ksaftá tvi ta dzaʼa nda təv haɗika gwal ma mndəra luwa. 2 Kəʼa kəʼa ná, ka nghaŋtá tsi ta sana vavrəm ma vwah, ta hani bra rina fisik hkən ta wa ni, kabga ma tsa vli ya ta sliʼadaghata bra rini da sa imi. Mamu sana mghama klam ta wa tsa vavrəm ya. 3 Manda tskadaghata inda bra rina fisik ta vgha, ta taŋwalaghu taŋwala lu ta klam ta wa tsa vavrəm ya ŋa sunustá imi ta həŋ. Manda kɗakwa taŋ ta sutá imi ta vruŋ vra lu ta tsa klam ya manda va vla ni ta wa tsa vavrəm ya. 4 Ka Yakubu nda tsa gwal ta ngha rini ya mantsa: « Zwana ma ɗa, ta nzakw ga kuni na? » kaʼa. « Ta nzakw ma Haraŋ ŋni, » ka həŋ. 5 Kaʼa nda həŋ mantsa: « Nda sna kuni ta Lavaŋ zwaŋa Nahur ra? » kaʼa. « Nda sna ŋni, » ka həŋ 6 Kaʼa nda həŋ mantsa: « Ta ɗughwana rki? » kaʼa. « Ta ɗughwana, waʼa sagha makwa ni Rasel nda rina fisik, » ka həŋ. 7 Kaʼa mantsa: « Ta tekeʼa fitik ta luwa, ta kɗa a tsəka rini wa. Sasuŋwa sasa ta imi ta rina fisik, ka vra kuni da ngha həŋ, » kaʼa. 8 Ka gwal ngha rini mantsa: « Laviŋ a ŋni ta gi magay mantsa ya wa. Ka tskava tska rini demdem karaku, ŋa taŋwalaghutá klam ta wa vavrəm, ŋa sasuŋtá imi ta rina fisik, » ka həŋ.9 Tata gwaɗa Yakubu da həŋ, ka sagha Rasel nda rina fisik da ni, kabga mnda ngha rini ya. 10 Na nghay Yakubu ta Rasel makwa Lavaŋ zwaŋama ni ma ma ni, nda rina fisika Lavaŋ zwaŋama ni ma ma ni, ka gavadaghatá tsi ta wa vavrəm, ka taŋwalaghutá ta klam ta wa vavrəm, ka sasuŋtá imi ta rina Lavaŋ zwaŋama ni ma ma ni. 11 Ka brusu Yakubu ta Rasel, ka wahu tsi ta wahu ka taw. 12 Ka snanamtá Yakubu ta Rasel kazlay zba da ni tsatsi, zwaŋa Rebeka guli kəʼa. Ka sliʼaftá Rasel nda hwaya da mnay ŋa da ni. 13 Na tsa snaŋta Lavaŋ ta gwaɗa ta ɓhadaghata Yakubu, zwaŋa makuma ni ya, ka hwayaftá tsi da gumay, ka ŋanatá tsi ma ghuva, ka brusay. Ka kladamtá tsi da həga ga taŋ. Ka rusanaftá Yakubu ta inda tsa skwiha ta luta ya ta Lavaŋ. 14 Ka Lavaŋ nda tsi mantsa: « Kahwathwata na, zimbiɗa ɗa ka, usa ɗa ka, » kaʼa. Ka zatá Yakubu ta tili ga Lavaŋ.
Miʼa Yakubu
15 Ka Lavaŋ nda Yakubu mantsa: « Zba ɗa ka, tsaya a dzaʼa kəl ka ka magihatá slna ka mbalay wa. Mniha mna kidaghi dzaʼa plaghata yu ta nisəla vəl magatá slna gha? » kaʼa. 16 Tsaw mamu kuʼaha his ga Lavaŋ. Leʼa hga zumali, Rasel hga sagəŋ. 17 Sbəta ira Leʼa, ama ɗina tsatá Rasel, ɗina ma kuma guli. 18 Ka ɗvutá Yakubu ta Rasel, kaʼa nda Lavaŋ mantsa: « Dzaʼa zagha za yu ta vaku ndəfáŋ ta dzugwa Rasel, na makwa gha ka sagəŋ na, » kaʼa. 19 Ka Lavaŋ mantsa: « Mal vlaghata ɗa ta kagha ka vlaŋta ɗa ta sani ma mndu, nza nza ga ini, » kaʼa. 20 Ka zatá Yakubu ta vaku ndəfáŋ ta dzugwa Rasel. Ama manda fitik kwitikw ya tsa vakuha ya ta snə tsi, kabga ɗvu ɗva.
21 Tahula tsa, ka Yakubu nda Lavaŋ mantsa: « Nda maga fitika ɗa tama, vliha vla ta makwamidza ɗa, dzaʼa guya vgha yu nda tsi, » kaʼa. 22 Ka tsəkanatá Lavaŋ ta inda mnduha ma tsa vli ya. Ka datá tsi ta skwa zay gagaʼ. 23 Ga hawu tama, ka klaftá Lavaŋ ta makwa ni Leʼa, ka klədanaghatá Yakubu, ŋa lama ni da tsi. 24 Ka klaftá Lavaŋ ta kurɗa ni Zilpa ŋa nzakwa ni ka kurɗa tsa makwa ni Leʼa ya. 25 Kəʼa ka Yakubu ga sərɗək ná, Leʼa ya. Kaʼa nda Lavaŋ mantsa: « Nəna magiha ka na? Rasel a dzugwaf yu kay ra? Nya kəl ka ka naniɗifta na? » kaʼa. 26 Ka Lavaŋ mantsa: « Haɗ lu ta magay mantsa ya da amu, ka vlatá sagəŋ ta nzaku mali wa. 27 Kɗiŋ kɗa ta fitik gha ndəfáŋ ta ga maghurbi nda mali karaku, ŋa vlaghata ŋni guli ta sagəŋ. Ama dzaʼa zəgla za ka ta vaku ndəfáŋ guli ta dzugway, » kaʼa. 28 Ka zlghaftá Yakubu. Ka kɗiŋtá tsi ta fitika ni ndəfáŋ ta ga maghurbi nda Leʼa, ka klaftá Lavaŋ ta makwa ni Rasel ka vlaŋta ka markwa taŋ. 29 Ka klaftá Lavaŋ ta kurɗa ni Bilha ka vlaŋtá makwa ni Rasel ŋa nzakwa ni ka kurɗa ni. 30 Ka lam Yakubu guli da Rasel, ka ɗvu tsi ka malaghutá Leʼa. Ka zəglatá tsi vaku ndəfáŋ guli ta maganatá slna ta Lavaŋ.
Zwana Yakubu
31 Ta nghə Yawe ná, ɗvu a Yakubu ta Leʼa wa. Mantsa tama ka vlaŋtá tsi ta ya zwaŋ. Ama ka zlaŋtá tsi ta Rasel ka dzəghəŋ. 32 Ka zlghaftá Leʼa ta huɗi, ka yatá tsi ta zwaŋa zgun, ka tsanaftá tsi ta hga ni ka Rubeŋª, kaʼa mantsa: « Nghadap ngha Yawe ta htanata lu ta iʼi, dzaʼa ɗvu ɗva zəʼala ini ta iʼi ndana tama, » kaʼa. 33 Ka zlghəglaftá tsi ta huɗi, ka yəglatá tsi ta zwaŋa zgun, kaʼa mantsa: « Snaŋ sna Yawe kazlay ɗvu a lu ta iʼi wu kəʼa, kəl tsi ka vləglihatá zwaŋa zgun, » kaʼa. Ka tsanaftá tsi ta hga ni ka Simghuŋª. 34 Ka zlghəglaftá tsi ta huɗi, ka yəglatá tsi ta zwaŋa zgun, kaʼa mantsa: « Ndana tama, dzaʼa ndiʼiɗiva ndiʼa zəʼala ini, kabga yana ya yu ta zwana zgwana hkən, » kaʼa. Ka tsanaftá Yakubu ta hga tsa zwaŋ ya ka Leviª. 35 Ka zlghəglaftá tsi ta huɗi, ka yata tsi ta zwaŋa zgun, kaʼa mantsa: « Ndana tama, dzaʼa zləzləvay yu ta Yawe, » kaʼa. Ka tsanaftá tsi ta hga tsa zwaŋ ya ka Yahudaª. Ka tsaghutá yay ni ta zwaŋ.