यूदा
यूदल लिहि कीता चिटि
दंडोस्क
1
1 मीकुन नावा दंडोस!
बाबो बगवंतल मीकुन केय्सि, तंवा पेर्मा तोह्तोर अनि येसु किरिस्तुना केय्दे काबाड्सेर मंतोर.
येसुनोर सेव्कना अनि याकोब्नोर तमुना आय्वल यूदना इद चिटि मी सम्दिर साटि, लिहि कीसेर मंतोन.
2 बगवंतल उंडे वेले मीकुन तंवा दया, सांति अनि पेर्मा सियिर.
सतेमुन काबाड्वल
3 लाड्नुर सोप्तलिर्निट!
मा सम्दिरा बचे माय्वडुन बारेते, मी सम्दिरकुन बेय आसते लिहि कियना इन्जेर मंदे वासि मत्ता.
बति इंके मरट बरोसा किय्वल येसुना सतुन काबाड्वडुन बारेते लिहि कियना इंवल जुरत अर्ता.
अद सतेमुन सिरिप उंदिय जोका येसु अनि वोनुर सिस्यलिर बगवंतनुर पवित्रा वालिर माकुन हव्लि कीतेर.
अद सतुन बोरे बद्लि किय्वक्ने लडेय कियना इन्जेर कोरंतोन.
4 बारितेके कहितुर करेबलिर लोकुर मी नड्डुम कुसये नेङ्तेर.
वूर बगवंतन मानि कियुर.
वूर मा बगवंतना पेर्मता-दयतुन पाप्नङ काम्क किय्ले अनि कियुस्ले वाडकम कीसेर मंतेर.
बति वूर, सम्दो अदिकार वाले वोरोरे मंवल माल्कल येसु किरिस्तु पर्बुन वोप्सेर सेलुर.
आतुरकुन सिक्सा अरंता इन्जेर तोलेने दर्मा-ग्रंत्नगा लिहि कीसि मंता.
5 इदेन बारेते मिरट हेतु कियना इन्जेर आसा कीसेर मंतोन.
पर्बु बगवंतल ईजिप्ट देसनल तंवा पर्जतुन सुटि कियुस्तोर.
बति तन पोरो बरोसा इर्मकि वूरकुन नासेडम कीतोर.
इहिन जर्ग्ततुन बारेते मीकुन मोदोले टावा.
6 अचोरे आय्वा, तम्वा काम बरोबर किय्वक्ने, तम्वङ अदिकार वाले जागन सुटि कीतुर दूतलिर बारेते गिर मीकुन टावा.
आक्रिता तस्वा किय्वल दिनमुन साटि, बोरे कोलि किया परुर आतङ सकलिने बगवंतल वूर दूतलिरकुन दोह्चि, सिकटितगा इर्तोर.
7 वूर दाते सोदोमा, गोमोरा नगुक्नुर+ अनि अवेन सिर्मुट्नङ नह्क्नुर पीर कीसेर अनि मेंदोडे दुस्रोक पाप्क गिर कीसेर मत्तेर.
ते वूर सम्दिर बस्केट पोत्वल तड्मितगा सिक्सा बोगे मातेर.
माकुन दम्कि सियन साटि वूरकुन नमुनता रूप्ने इर्तोर.
8 अह्ने वूर करेबलिर, “बगवंतनल माकुन दर्सन्क दिस्तङ” इन्जेर लबड वेह्चि, तम्वङ मेंदोलकुन बे-सुदुड कीसेर मंतेर.
अनि अदिकारतुन उल्टा आसि, बगवंतनुर मय्मा वाले दूतलिरा हिजत वोसेर मंतेर.
9 बति बगवंतनोर डगुर दूतल आसि गिर मिकयेल अहन किय्मकि.
मोसेना कूरदुन बारेते सय्तंतुन सङा, वोर दूतल जट-पट लाग्तोर.
अस्के वोन राङि सिय्मकि अनि वोन तीर्पार गिर किय्मकि.
बति मिकयेल सिरिप, “पर्बुये नीकुन दम्कि सीनुर” इन्जेर सय्तंतुन इत्तोर.
10 वूर करेबलिर तमकुन अर्तम आयोङ अवेना हिजत वोंतेर.
केडता जंवरतुन दात सोन्च किय्वक सिरिप तमकुन वोड्कि मंवलिक्ने, तम्वा तमा नासेडम कीसेर मंतेर.
11 अय्यो!
वूरकुन दुक्सा तपो.
बारितेके वूर कयिन ताक्ता सरिय* ताक्तेर.
लाबमुन साटि बिलाम कीता गल्तितुने कीतेर.
+ कोरहु गिर मर्ला बड्ता काड्कि, नासेडम आतोर.
+ अद तीर्दे वीर गिर नासेडम आंतेर.
12 सम्दिर चोकोटे मीरे मासि, तिंवलिक जेवुनकुन हिजत सेल्वक्ने आगम करब कीसेर, सिरिप तम्वङे पेटिङ निह्ले, सूडंतेर.
येर सेल्वक्ने कालि मन्जि, वडिदे पासेर सोंवलिक टेपन दात वीर मंतेर.
सीर्क अरिक तेर्सि वाड्तङ बर्पुर सातङ अव मरक बहंते पालङ सेल्वा सादोङो, अह्ने वीर मंदंतेर.
13 वीरङ हिजत वोय्वलिक काम्क, ऊसा वानेके, येत पोरो तेल्वल करब पेसुन मोडि मंदंतङ.
सरि बूले मातङ सुकुकुन दात्नुर आंदिर.
बगवंतल वूर साटि बस्केट मंले, कह्चर सिकटि तयर कीसि इर्तोर.
14-15 आदम्ना येडवा पिडितोर मायनल हानोक+ बविसत्ने जर्ग्वडुन बारेते, “केन्जट!
पर्बु हजर्क कोदि पवित्रा दूतलिर* सङा, दुनियतुर सम्दिरा तस्वा किय्ले वांतोर.
अस्के तनकुन रेह्चि वड्क्तुर करेबलिरकुन अनि वूर पापेस्तलिर कीतङ सम्दो गल्तिन वोपुसि, बगवंतल सिक्सा कींतोर” इन्जेर वेह्तोर.
16 वीर लोकुर, करब आसने ताक्सेर, तम्वा तग्दिरतुन बारेते, अनि दुस्रुर बारेते गोल्ग्सेरेन मंदंतेर.
वीर डगुक डगुक गोस्टिङ वड्कंतेर.
तम्वा लाबमुन साटि दुस्रुरकुन मेचंतेर.
बरोसतगा निल्सि मंले केय्वल
17-18 बति लाड्नुर सोप्तलिर्निट!
मा येसु किरिस्तु पर्बुनुर अपोस्तुल्क, “इद आक्रिता कालम्ने बाव-बक्ति सेलेङ अव आसने ताक्सेर, मी बरोसतुन बारेते चेडि किय्वलिर मंदंतेर” इन्जेर वेह्तेर.
अव गोस्टिन हेतु कीम्ट.
19 वूर आतुर दुनियतुर लोकुर तम्गा बगवंतना आत्मा सेल्वा सोन्जि, सोन्च किय्वक्ने मी नड्डुम बेद-बाव पुटुसंतेर.
20 बति लाड्नुर सोप्तलिर्निट!
पवित्रा आत्मते पार्तना कीसेर, मी बरोसतगा बडे माम्ट.
21 बस्केट मंवल जीवतुन माकुन सिय्वल येसु किरिस्तु पर्बुना दयतुन साटि, आसते सूड्सेर, बगवंतना पेर्मतगा निल्सि मंट.
22 बरोसतुन बारेते अनमिना आय्वलिर पोरो दया तोहट.
23 तड्मितगा अर्वलिरकुन बचि कीतपिनय उंडे कहितुरकुन बचि कीम्ट.
मीवा दिलतगा बगवंतन वेरिसेर, दिहंते पापिर पोरो दया तोहट.
बति मेंदोडे किय्वलिक वूरङ पाप्कनल लङ मंट.
आक्रिता आसिर्वाद