किरिस्तुना मल्सि वाय्वडुन बारेते
3
1 लाड्नुर दादलिर-बायिक्निट!
मीकुन लिहि कीता रेंडवा चिटि इद आंद.
मीवङ सुदुड मंवलिक मन्क, इव गोस्टिन हेतु इर्सि, इवेन हिंदल हक्ले माय्ले लिहि कीसेर मंतोन.
2 तोले पवित्रा वालिर पर्वक्तलिर वेह्तङ गोस्टिन, अनि बचि किय्वल पर्बु, अपोस्तुल्क्ना केय्दे आगे सियुस्तङ अवेन मीकुन हेतु कियना इंवले नावा इचा.
3 इव आक्रितङ दिवोस्क्नगा कहितुर वासि, तम्वङ करेबलिक आसन पूरि कीसेर, मीवा हिजत वोंतेर इंवल मुके गोस्टितुन करि कियना.
4 अनि वूर, “वोना मल्सि वाय्वडुन बारेता वाग्दन बतल आता?
तोत्तुर मार्तेर अगटल, कलि सुरु आता अगटल जर्ग्ता तीरे, सम्दो जर्ग्सेर मंता कि?”
इन्जेर पूसि कींतेर.
5 बति वूर, तोले बगवंतल तंवा वचंते हाबडुन, दर्तुरितुन गडि कीतोर अनि येतुन रोपोडल तान निपुसि, अद येतल अलग कीतोर इंवल गोस्टितुन बुदि पिय्सिन मर्न्गंतेर.
6 अद येता गंडमुन हिंदले तोत्ता परिपन्चम मूरे माता.
7 बति अदे वचंते, तड्मिते नासेडम आय्वल दिनम वेरि, इंके मंवल हाबडुन अनि दर्तुरितुन राकि कीसेर मंतोर.
अद नेटिने पर्बुना बक्ति कियुर वूरा तस्वा गिर जर्गंता.
8 बति लाड्नुर दादलिर-बायिक्निट!
पर्बुना नदुडुन मुने उंदि दिवोस हजर सालकुन मोडि अनि हजर साल्क उंदि दिवोसुन मोडि मंदंता इंवल गोस्टितुन मरुङ्मट.
9 पर्बु तंवा वाग्दंतुन पूरि किय्ले, कोरुम कीसेर मंतोर इन्जेर कहितुर इंतेर.
बति करल सूड्तेके वोर अहन कोरुम कीसेर सेलोर.
कारन बतल इत्तेके, मह्गटल बोरे वोरोर गिर नासेडम आय्वा, सम्दिर गिर तम्वा मंदुन पापनल मार्युसना इन्जेरेन वोर्चि, सूड्सेर मंतोर.
10 बति करे माय्वक नेङ्वल कलेन मोडि, वोर पर्बुना वाय्वल दिवोस मंदंता.
अंटित आगस्क जोर्ते आवज कीसेर मूरे मांतङ.
अनि हाबडगा मंवलिक सम्दो गिर तड्मिते वेसि, उग्रे मांतङ.
बोमि अनि तान्गा मंवलिक सम्दो गिर वेसि मयड आंतङ.
11 इव सम्दो गिर अहन मूरे माय्वल मत्ता काड्कि, मिरट बचोर पवित्रा मन्जेर बाव-बक्तिते पिसनयो करि कीम्ट.
12 बगवंतना वाय्वल दिवोसुन साटि मिरट सूड्सेर मत्ता काड्कि, अद वेय्ने वायना इन्जेर कोर्सेर मंदना.
अद नेटि आगस्क वेसेर मूरे मांतङ अनि अवेनगा मंवलिक सम्दो दगड्ते उग्रे मांतङ.
13 बति बगवंतल वाग्दन सीता तीर मरट पूनङ आगसकुन साटि अनि पूना दर्तुरित साटि सूड्सेर मंतट.
इवेनगा नियत निन्चि मंदंता.
14 लाड्नुर दादलिर-बायिक्निट!
इवेन साटि मिरट सूड्सेर मत्ता काड्कि, बगवंतना नदुडे मी रोपो तप्ना डाग, कसुर सेल्वक पिसेर सांतिते मंले कोसिद कीम्ट.
15 अनि पर्बु वोर्चि सूड्वल मावा बचे माय्वडुन साटिने इन्जेर मरट सम्जे मायना.
बगवंतल सीता गियंते मावोर लाड्नोर दादल पव्लु गिर इवेन बारेते मीकुन लिहि कीतोर.
16 इवेन बारेते वोर तंवङ सम्दो चिटिनगा गिर लिहि कीतोर.
बति इवेनल कहितङ गोस्टिङ सम्जे माय्ले कटिन मंतङ.
इवेन गियन सेलुर वूर, उंदि गोस्टित पोरो निलुर वूर, दर्मा-ग्रंत्नङ मेय्तङ वचनकुन बुदि पिय्सिने, अवेना अर्तम बद्लि कींतेर.
इवेन हिंदल तम्वा पोरो तमा नासेडम तरंतेर.
आक्रिता दंडोस
17 लाड्नुर दादलिर-बायिक्निट!
इव गोस्टिङ मुनेने मीकुन टावा आता काड्कि, बगड-नियत वालिरङ गल्तिने मीवा मिरट सरि तप्सि सोंवक्ने काबाडट.
अनि मिरट गट निल्ता जागतल बूड अर्वक दिहंते मंट.
18 माकुन बचि किय्वल पर्बु आय्वल येसु किरिस्तुना पेर्मता-दयतगा, अनि गियंतगा बडे मासेर मंट.
सिरिप वोने इंके अनि उंडे बस्केट गिर डगुर-पान वायना.
आमेन!