2वा पेतुरु
पेतुरु लिहि कीता रेंडवा चिटि
दंडोस वेह्वल
1
1 येसु किरिस्तुनोर दासि अनि अपोस्तुल आय्वल सीमोन-पेतुरु इंवना दंडोस दोसि लिहि कीसेर मंतोन.
माकुन बचि किय्वल मा बगवंतल येसु किरिस्तुना नियतुन पिय्सि, मा मोडिन बेय विलुवा वाले बरोसतगा निल्तुर साटि, इदेन लिहि कीसेर मंतोन.
2 बगवंतन बारेता अनि मा येसु पर्बुन बारेता अनुबव कीता गियंतुन हिंदल, मीकुन पेर्मता-दया अनि सांति बर्पुर वायना.
बरोसतगा येद्ग्वल
3 बगवंतना सक्तितुन हिंदल मरट पिसन साटि अनि बक्तितुन साटि पह्जे मत्तङ अव सम्दो माकुन सीतोर.
मरट वोन करि किय्वडुन हिंदल अवेन येता पर्तट.
बारितेके बगवंतल तंवा मय्मतगा अनि चोकोट्ना गुन-गांतगा ईसा येत्ले माकुन केय्तोर.
4 इद तीर्दे तंवा मय्मतुन अनि चोकोट्ना गुन-गांतुन पिय्सि, वोर बेय बारितङ अनि बेय वेले वाग्दन्क माकुन सीतोर.
इवेन हिंदल, मिरट इद दुनियतुन बेय करब किय्वलिक आसनल तपुसि, बगवंतना गुन-गांतगा ईसा येता परना इन्जेर वोर इहिन कीतोर.
5-7 इद कारंतुन हिंदल, मिरट वेले दिहंते मीवा बरोसतगा येद्ग्ले कोसिद कियना.
मीवा बरोसतुन सङा चोकोट्ना गुंतुन जोडि कीम्ट.
चोकोट्ना गुंतुन सङा गियंतुन जोडि कीम्ट.
गियंतुन सङा मंदुन आव्रि किय्वल गुंतुन जोडि कीम्ट.
मंदुन आव्रि किय्वल गुंतुन सङा वोर्च्वल गुंतुन जोडि कीम्ट.
वोर्च्वल गुंतुन सङा बाव-बक्तितुन जोडि कीम्ट.
बाव-बक्तितुन सङा तादल-तमुन पोरो तोह्वल पेर्मतुन जोडि कीम्ट.
अनि इद पेर्मतुन सङा बगवंतना लाडदुन जोडि कीसि ताकट.
8 इव गुन्क्नगा मिरट वेले येद्ग्सेर दाकिट्ते, मा येसु किरिस्तु पर्बुन बारेता गियंतगा अदिक पंडि येतनल अनि अदिक कामि सीनल मंदंतिट.
9 बति इव गुन्क्नगा येद्गोर वोर, वोरोर गुड्डि बहंते तंवा पेजे सेलेके, मुने जर्ग्वडुन बारेते करि कियोरो, अह्ने तंवङ मोदोडङ पाप्क मापि आसि सुदुड आतोर इंवल गोस्टि गिर वोर मर्न्गंतोर.
10 अदेन साटि दादलिर-बायिक्निट!
अव गुन्क्नगा येद्गोर वोन मोडि मन्मट.
तंवा पर्जा आय्ले, बगवंतल मीकुन करलेन केय्सि नेमि कीतोर इन्जेर तोह्ले, मी केय्दे आता अचोर कोसिद कीम्ट.
इहिन पिस्किट्ते, मीवा बरोसतल बह्के माय्वक मंदंतिट.
11 इद तीर्दे माकुन बचि किय्वल पर्बु आय्वल येसु किरिस्तुना बस्केट मंवल राज्नगा, वेले मान येच्चेर नेङा परंतिट.
12 अदेन साटिने मिरट इव गोस्टिन बारेते करि कीसि, सत्नगा गट निल्सि मत्तेके गिर, इवेन बारेते मीकुन बस्केट हेतु किय्ले, तयर मंदंतोन.
13-14 अनि इद मेंदोडगा ना परन मनल वेरि, मीकुन हेतु कीसेर मंवल बरोबर आंद.
बारितेके नावा परन सोंवल वकत करुम वाता इन्जेर, मा येसु किरिस्तु पर्बु मुनेने नाकुन वेह्तोर.
15 नावा परन सोत्ता पेजे गिर, मिरट बस्केट इवेन हेतु कीसेर मनल नना वेले काया-कस्टम कीसेर मंतोन.
कड्क्ने सूड्ता अद किरिस्तुना मय्मा
16 बहन इत्तेके, ममोट मा येसु किरिस्तु पर्बुना सक्तितुन बारेते, अनि वोना मल्सि वाय्वडुन बारेते जोडि कीसि वेह्वलिक कतन पिय्सि, मीकुन वेह्मकि.
बति ममोट कुद वोना मय्मतुन सूड्सि वेह्तोम.
17-18 वोन बरोबर ममोट अद पवित्रा गुटतगा मत्तोम.
अस्के बाबो बगवंतनल वोर किरिसतुन डगुर-पान अनि मय्मा पुड्ता.
बहन इत्तेके, “वेर नावोर लाड्नोर मरि आंदुर.
वेन हिंदल नना वेले आनंद्ने मंतोन”+ इंवल लेङ स्वर्गनल केन्ज्तोम.
19 इदे आय्वा, तोले पर्वक्तल बविसत्ने जर्गंता इन्जेर वेह्ता अद वचन करले आंद इन्जि माकुन टावा.
अदेन साटि सिकटि मनेके वेड्चि सिय्वल डिवेत दात मंवल अद वचंतुन पटि कीतेके, मीकुन चोकोट मंदंता.
अनि बहंते दिहतुन साटि सक्रे पोड्द्ना उजुड पारंतयो, अह्ने वोर किरिस्तुना वाय्वल गिर मीवङ दिल्क्नगा वोना उजुड पारुसंता.
20 दर्मा-ग्रंत्नगा पर्वक्तलिर लिहि कीतङ वचन्क बवे गिर कुद तम्वङ सोन्चकुन पिय्सि वाय्मकि इन्जेर मिरट करि कियना.
21 बारितेके बविसत्ने जर्ग्वल वचन मायनल तंवा इचतुन पिय्सि वेहा परोर.
बति बगवंतनुर पर्वक्तलिर पवित्रा आत्मता सक्तिते निन्चि वेह्तङ आंदुङ.