पार्तना कीम्ट इन्जेर पव्लु कोर्वल
3
1 दादलिर-बायिक्निट!
आक्रित मीकुन कोर्वल बतल इत्तेके, पर्बुना बोदा मिह्गा पग्रे मातपे, दुस्रुर सम्दिर्गा गिर वेय्ने पग्रे मासि, तान डगुर-पान वानल पार्तना कीम्ट.
2 सम्दिर रोपो बरोसा सेले.
अदेन साटि करेबलिर अनि आगम माय्नलिरा केय्दल माकुन काबाडनल मा साटि पार्तना कीम्ट.
3 बति पर्बु बरोसा वाले आंदुर.
अनि वोर मीकुन सय्तंदा केय्दल बचि कीसि, सक्ति सींतोर.
4 ममोट आगे सीता तीर मिरट ताक्सेर मंतिट इन्जेर, अनि उंडे गिर मुने ताककिट इन्जेर, पर्बुनगा मी बारेते माकुन बरोसा मंता.
5 ते इंके बगवंतना पेर्मते अनि किरिस्तुना वोर्च्वल गुंते, मीवङ दिलकुन निह्चि पर्बु ताकुसिर.
गह्लल गुंतुन बारेते दम्कि सिय्वल
6 मावुर दादलिर-बायिक्निट!
मह्गटल केन्ज्तिट अद बोदा तीर आय्वा, जरब सेल्वक अनि दुस्रो तीर्दे ताक्वल हर वोरोर बक्तनल मिरट लङ मंदना इन्जेर, मा येसु किरिस्तु पर्बुना पोरोडे मीकुन आगे सीसेर मंतोम.
7-9 ममोट मी सङा मनेके गह्ललिर दात पिस्मकि.
बोनये रोन पोकोट तिन्मकि.
मिह्गटल बोन पोरोन वजन आय्वा इन्जेर ममोट रात-दिहा काया-कस्टम कीतोम.
मिह्गटल मा साटि मदत येत्वल हक सेले इन्जेर आयो बति, मिरट मावा नमुना येच्चि ताकना इन्जेरेन इहिन ताक्तोम.
इदेन पिय्सि, मा दात बहन ताकना इंवल मीकुन टावये.
10 अनि ममोट मी सङा मनेकेने, “बोरे आयि काम किय्वेके वोर जेवुन किय्वा” इन्जेर आगे सीसि मत्तोम.
11 तेर बति मिह्गा कहितुर गह्ललिर आसि, वूर काम किय्वक्ने मंवले आयो बति, दुस्रुरा जोलित गिर सोन्जेर मंतेर इंवल केन्ज्तोम.
12 ते इंके वूर आतुर दुस्रुरा जोलित सोंवक्ने, काम कीसेर तम्वा चंदि तमय कमय कियना इन्जेर, मा येसु किरिस्तु पर्बुना पोरोडे कोर्सि आगे सीसेर मंतोम.
13 बति दादलिर-बायिक्निट!
मिरट चोकोट किय्वडगा असले हटे माय्मट.
14 बोरे आयि ममोट इद चिटितगा लिहि कीतङ आगेङ पिय्सि ताक्वेके दानुर्ते, दिहंते सूड्सि करि कीम्ट.
अनि वोना वोन लजन वाटेङ आयना इन्जेर वोन सङा मीरे मासि मन्मट.
15 अचोरे बति, वोन मीवोर पगा-दारन दात सूड्वक्ने, मीवोर तादल-तमुरे इन्जि वोन दम्कि सीम्ट.
आक्रिता दंडोस
16 इंके वोर पर्बु, मी सम्दिर सङा हर वकत सात मन्जेर, मीकुन सांति सियिर.
17 पव्लु इंवना नना ‘दंडोस्’ इन्जेर कुद लिहि कीसेर मंतोन.
नना लिहि किय्वल हर चिटितगा इद आंवल मंदंता.
इद नावा लिहि किय्वल तरिका आंद.
18 मा येसु किरिस्तु पर्बुना पेर्मता-दया मीकुन सात मनि!