डगुर-पान सीसेर वार्वल कीर्तन
149
1 येहोवा देवन डगुर-पान सीम्ट. येहोवा देवन साटि पूना कीर्तन वारट.
बक्तलिर मीरे माय्वल जागतगा वोन डगुर-पान सीसेर वारट.
2 इज्रयेल पर्जा तम्वकुन गडि कीतोन हिंदल आनंद येतिर.
सियोंतुर पर्जा तम्वोर राजन हिंदल कुसि येतिर.
3 वूर येन्चेर, वोना पोरोडुन डगुर-पान सियिर.
चोंड्का नेकुसेर अनि कन्जेरा पासेर, वोन बारेते कीर्तन वारिर.
4 येहोवा देवल तंवा पर्जतुन हिंदल कुसि आंतोर.
कमि-पांदे मंवलिरकुन वोर बचि कीसि मेयुसंतोर.
5 बगवंतनुर बक्तलिर तमकुन वोर डगुर-पान सीततुन पिय्सि बेय आनंद येतिर.
वूर तम्वङ बीडरकुन पोरो गिर कुसिते कीर्तन वारिर.
6 बगवंतन डगुर-पान सिय्वलिक गोस्टिङ वूरा तोड्दल वांतङ.
वूरङ केय्क्नगा रंड बाज्क दार मंवल तल्वर मंता.
7 तम्वुर पगा-दारकुन पोरो बद्लि येत्ले,
वूर पर्जतुन सिक्सा सिय्ले,
8 वूर पर्जतुर राजलिरकुन सकलिने दोह्ले,
अनि वूरुर पेदोलकुन हात्कडिङ वाट्ले,
9 वूरकुन लिहि कीसि मंवल सिक्सा वाट्लेने बक्तलिरा केय्क्नगा अद तल्वर मंता.
वोनुर बक्तलिर सम्दिरकुन ईतल मान पुटंता.
येहोवा देवन डगुर-पान सीम्ट.