डगुर-पान सीसेर वार्वल कीर्तन
135
1 येहोवा देवन डगुर-पान सीम्ट. येहोवा देवना पोरोडुन डगुर-पान सीम्ट.
येहोवा देवनुर बक्तलिर्निट, वोन डगुर-पान सीम्ट.
2 येहोवा देवल मंवल जागतगा,
मा बगवंतना रोता आव्रतगा सेवा किय्वलिर्निट!
येहोवा देवन डगुर-पान सीम्ट.
3 येहोवा देवल चोकोट्नोर आता काड्कि, वोन डगुर-पान सीम्ट.
वोना पोरोल बेय सोबता आता काड्कि, तान कीर्ति सीम्ट.
4 येहोवा देवल तंवा साटि याकोब्ना संतांदुन आच्तोर.
वोर तंवा जाय्जतुन मोडि मंले इज्रयेल पर्जतुन नेमि कीतोर.
5 येहोवा देवल डगुर-पान वाले इन्जेर
अनि मा पर्बु सम्दो पेन्कनल तेर बेय डगुर इंवल नाकुन टावा.
6 हाबडगा, बोमितगा, सम्दुर्क्नगा अनि बेय कोल मंवलिक पेर्सङ सम्दुर्क्नगा गिर
येहोवा देवल तनकुन इस्टम वाता तीर जर्गुसंतोर.
7 दर्तुरितङ नालुङ कोन्कनल हूकुडुन तेह्चि, टेपङ तयर किय्वल वोरे आंदुर.
पिर अरनल हाबडगा मिड्च्वलिक पुटुस्वल वोरे आंदुर.
तंवा गोदमनल वडितुन सारि किय्वल वोरे आंदुर.
8 ईजिप्ट लोकुरुर मडनुर मरकुन,
अनि जिव्रसनल पेह्लुरि वालेकुन जक्तोर.
9 ईजिप्ट्नुर लोकुर्निट! मी नड्डुम, परो राजन मुने अनि वोन बूड्नुर अदिकारिर मुने,
चमत्कार्दङ अनि मय्मतङ कार्यङ कीसि तोह्तोर.
10 वेले जातिनुर पर्जतुन अनि ताकद वालिर राजलिरकुन मेय्सि नासेडम कीतोर.
11 अमोरिया पर्जतोर राजल सिहोंतुन,
बासंतोर राजल वोगुन
अनि कनान देस्नगा मंवलिक सम्दो जातिन मेय्सि नासेडम कीतोर.
12 वोर वूरा देसुन जाय्जतुन मोडि,
तंवुर इज्रयेल पर्जतुन ईसा इन्जेर तूसि सीतोर.
13 येहोवा देवा, नीवा पोरोल बस्केट निल्सि मंदंता.
येहोवा कीर्ति वाले नीवा पोरोडुन पिडिनङ-पिडिङ हेतु कींतेर.
14 येहोवा देवल तंवा पर्जतुन नाय्दा तस्वा कींतोर.
तंवुर सेव्कलिर पोरो किवुल वांतोर.
15 दुस्रोक जातिनुरङ पेन्क्नङ पुत्लङ, सोने-चांदितङ आंदुङ.
अव माय्नलिरा केय्दे निव्डे मातङ आंदुङ.+
16 अवेन तोड्डिङ मंतङ बति, अव वड्का परोङ.
अवेन कड्क मंतङ बति, अव सूडा परोङ.
17 अवेन केव्क मंतङ बति, अव केन्जा परोङ.
अवेक्ना तोड्दगा जरा गिर हूकुर सेले.
18 अवेन निव्डि किय्वलिर अनि अवेनगा बरोसा इर्वलिर
सम्दिर गिर आक्रित अवेन दाते बततुने कामि सिय्वक आंतेर.
19 इज्रयेल्ता कांदांतुर्निट! येहोवा देवन डगुर-पान सीम्ट.
अहरोंता कांदांतुर्निट! येहोवा देवन डगुर-पान सीम्ट.
20 लेविना कांदांतुर्निट! येहोवा देवन डगुर-पान सीम्ट.
येहोवना बाव-बक्तिता वेरेते पिस्वलिर्निट! वोन डगुर-पान सीम्ट.
21 येरुसलेम्नगा मंवल येहोवा देवा, सियोंतल डगुर-पान वायि!
येहोवा देवन मान सीम्ट.